¿Kasaichi nünülia Maleiwa?

Watüjaweere saaʼu nünülia wanee wayuu, wasakirüin kasaichin nünülia. ¿Jama niale wasakirüin Maleiwa sünain kasaichin nünülia? ¿Jameetche nünüiki wamüin?

«Taya chi kanüliakai Jehová» (Isaías 42:8).

¿Paapüirü süchiki tia anülieekat? Eesüjaʼa nnojotyürüle paapüin süchiki, süka jamüin, nnojoluitpain süshajünüin natuma na wayuu ashajakana tü Wiwüliakat suluʼu wainma anüikii. Nnojotsü nashajüin nünülia Maleiwa, shia neʼe nashajaka SENYOTKAI. Alatüsü suulia 7.000 süshajünaka aluʼu nünülia Maleiwa suluʼu tü pütchi Ashajuushikat süka hebreo otta süka griego. Ashajünüsü tia anülieekat süka pienchisü leetüra suluʼu hebreo, YHWH otta JHVH. Ashajünüsü tia anülieekat wayuunaikiruʼu «Jehová».

Ashajünüsü nünülia Maleiwa suluʼu hebreo otta suluʼu waneirua anüikii.

KOJUTUSÜ MAʼIN NÜNÜLIA MALEIWA

Kojutusü nümüin Maleiwa tü nünüliakat. Nnojotsü jaralüin keʼinaajalain shia nünain, nia neʼe niakai nümüiwaʼa. Anuu nünüiki Jehová: «Tüü, shia tü tanüliakat, süpülajatü kaʼika süpüshuaʼa otta süpüla sotuinjachin jaaʼin taya waneepia namaa na juuʼuliwoʼukana» (Éxodo 3:15). Kojuyatua maʼin süshajünüin nünülia Maleiwa suluʼu tü Wiwüliakat suulialeʼeya Pülashikai maʼin, Washikai, Senyotkai otta Maleiwa. Kojuyatualeʼeya süshajünüin suulia waneirua anüliee maʼaka saaʼin Abraham, Moisés, David otta Jesuu. Nücheka achikit Jehová weʼraajüin nünülia. Müsü tü Wiwüliakat süchiki tia: «Süpüla sütüjaainjatüin aaʼu wayuu, piain neʼe pümüiwaʼa chi Miyoʼushikai saaʼu tü mmakat süpüshuaʼa, piakai chi kanüliakai Jehová» (Salmo 83:18).

Kojutusü nümüin Jesuu nünülia Maleiwa. Jamüshijaʼa Jesuu wanaa sümaa nikirajüin sünain oʼuraajaa na nikirajüinkana, «kojuta putuma tü pünüliakat», müinjana naya nümüin Maleiwa naashin (Mateo 6:9, TNM). Otta müshi Jesuu soʼu nuʼuraajüin nümüin Maleiwa: «Taata, kojuta putuma tü pünüliakat» (Juan 12:28, TNM). Kojutusü maʼin nümüin Jesuu nünülia Maleiwa, müshijeseʼe nümüin nümüin: «Teʼraajirüitpa tü pünüliakat otta ayateeria teʼraajirüin shia» (Juan 17:26, TNM).

Kojutusü nünülia Maleiwa namüin na eʼraajakana nia. Sümaiwa paala, na aʼyataashiikana nümüin Maleiwa natüjaa aaʼu naaʼinmajünüin nutuma jee nuʼtteʼerüin naya saaʼujee tü nünüliakat. Anuu tü nümakat wanee aʼyataai nümüin: «Tü nünüliakat Jehová müsü aka saaʼin wanee piichi ounjulaaya. Aaʼinmajünüshi chi wayuu achuntakai nünülia» (Proverbios 18:10). Jee müshi waneʼeya: «Chi wayuu achuntakai nünülia Jehová, oʼttaweechi» (Joel 2:32). Saashin tü Wiwüliakat, eʼraajüneena na aʼyataashiikana nümüin Jehová sükajee tü nünüliakat: «Pansaajeerü nakuwaʼipa napüshuaʼa na wayuukana sümaa nünülia chi namaleiwasekai. Aluʼusaʼa wayakana, pansaajeerü wakuwaʼipa süpüla kaʼikat süpüshuaʼa sümaa nünülia chi Wamaleiwasekai Jehová» (Miqueas 4:5; Aluwataaushikana 15:14, TNM).

¿JAMALUʼULU TIA ANÜLIEEKAT?

Nnojoishi eein wanee makai aka naaʼin Maleiwa. Naashin na atüjakana süpüleerua sukuwaʼipa tü Wiwüliakat, tü nünüliakat Jehová maluʼulu «Naainjeerü tü Keeʼireekat Naaʼin süpüla Nikeraajüinjatüin tü Nümakat». Sünainjee tü nümakat Jehová nümüin Moisés wayaawata aaʼu jamaluʼuluin tü nünüliakat, müshi nia: «Tountuin taaʼinrüin süpüshuaʼa tü taaʼinreekat» (Éxodo 3:14). Müsüjeseʼe wayaawatüin saaʼu niain chi Kakumalakai kasa süpüshuaʼa, chi eekai atuma shia. Naainjeerü Jehová tü keeʼireekat naaʼin süpüla nikeraajüinjatüin tü nümakat otta nikeraajeerü shiaʼaya sükajee tü kasa nukumajakat. Watüjaa aaʼu niain aluwataain, laülaain jee pülashin, wayaawateetpejeʼe sükajee tü nünüliakat jamüin maʼin tü nukuwaʼipakat otta kaseerüin naaʼinrüin süpüla nikeraajüin tü nümakat.

Kapülasü naaʼin Maleiwa wakuwaʼipa. Sünainjee tü nünüliakat Maleiwa, wayaawata aaʼu alin maʼin nüpüla tü kasa nukumajalakat, aishii waya nüpülaya. Sünainjee nüküjain wamüin Jehová tü nünüliakat, wayaawata aaʼu nücheküin süchiki weʼraajüin nia. Nüküjatüjülia wamüin Jehová kasaichin nünülia süpülapünaa weʼraajüin nia. Niyouta achikit Jehová jülüjainjatüin waaʼin wattain nia woulia otta nnojolin süpüla weʼraajüin nia. Shia nüchekaka warütkaain nünainmüin otta wanoujain sünain eein nia (Salmo 73:28).

Kapülashi waaʼin Maleiwa wachuntule nünülia. Jamüshijaʼa aleeweere pia nümaa wanee wayuu, püküjain nümüin kasaichin pünülia. ¿Jameetche paaʼin nnojorüle nuchuntuin pünülia? Eesüjaʼa jülüjeerüle paaʼin nnojolin aleeweein nia pümaa. Müsia neʼe tü jülüjeetkat naaʼin Jehová, nnojorüle wachuntuin nünülia. Müsüjeseʼe nüküjain wamüin tü nünüliakat süpüla wachuntajatüin shia. Müle shia watuma, jaʼyasü waaʼu aleeweein waya nümaa Jehová. Saashin tü Wiwüliakat nütüjaa aaʼu Jehová jaralin na kojutukana amüin nia (Malaquías 3:16).

Watüjaainjatü aaʼu kasaichin nünülia Maleiwa süpüla weʼraajüinjachin nia. Nnojotpejeʼe anainjatüin neʼe waaʼin sutuma watüjaain saaʼu tü nünüliakat, watüjaainjatü aaʼu jamüin maʼin nukuwaʼipa chi Maleiwakai.