Shapaale maʼin paaʼin

Anuu tü sümakat Adriana, wanee wayuu chejeʼewat Brasil: «Shapaasü maʼin taaʼin waneepia müsüjeseʼe toʼuniraweein aaʼin».

¿EEICHI oʼuniraweein aaʼin pia sünainjee shapaain paaʼin? Müle shia, piyaawatüinjaʼa saaʼu jamüin makaʼa saaʼin Adriana. Shapaasü maʼin saaʼin otta mojusü maʼin saaʼin waneepia sümaa shiʼyalajüin. Nüküjakaʼa chi tottootkai sümüin ayuuliin tü mojuu aaʼin sünainkat.

Jülüjataa paaʼin tü alatakat nümüin Kaoru, wanee wayuu chejeʼewai Japón. Naaʼinmajüin chi nüshikai sümaa tü niikat süka laülaayuuin sümaa ayuulin naya. Anuu nünüiki süchiki tia: «Soʼunnaa tia, shapaasü maʼin taaʼin süka tapüleeruaanüin aaʼin taʼyataaleruʼu. Meküinyeesai otta matunkuinyeesai taya. ‹Kasataalejeseʼe outuin taya suulia müliakuʼu maa› majiraashi taya».

Anuu nünüiki Ojebode wanee wayuu chejeʼewai Nigeria: «Mojusü taaʼin waneepia otta aʼyalajüshi taya sutuma kasa eekai eein neʼe. Oʼuniraweeshi taya taaʼin». Nnojoishi oʼuniraain naaʼin Ojebode, Kaoru otta Adriana. Eepejeʼe maʼaka saaʼin 800 miit na wayuu oʼuniraakana aaʼin juyawai.

TÜ PAAʼINRAJATKAT SÜPÜLA ANALÜIN PAAʼIN

Nayapejeʼe oʼuniraʼaleʼeinya naaʼin na tooloyuukana otta nnojotsü naküjain süchiki tü alatakat namüin suulia neʼrüin japülii. Nüküjapejeʼe Jesuu choʼujaain tottoot nümüin wanee wayuu eekai ayuulin (Lucas 5:31). Nnojo yüütiraain pia sümaa tü alatakat pümüin, watta maʼin naalii na wayuu anatkana aaʼin süka nanaʼliraain nümaʼana wanee tottoot. Anatsü naaʼin Ojebode, Kaoru otta Adriana süka noʼunuin nümaʼanamüin wanee tottoot.

Süpüla analüinjatüin naaʼin wanee wayuu eekai mojuin maʼin naaʼin, aluwataanüsü nümüin nutuma chi tottootkai wunuʼu nüsüinjatka otta eeshi nuluwataanüle nümaʼanamüin wanee psicólogo. Akaalinjünüinjachi nia natuma nüpüshi jee natuma naʼaleewainyuu, nnojoishii jashichijaainjanain nümüin otta nnojotsü akulajaainjatüin naaʼin nümaa. Niapejeʼe anain Jeʼwaa süpüla waʼaleewain otta nükaalinjain waya sükajee tü Wiwüliakat, anashaatasü maʼin tia.

¿KEPISÜCHE TIA?

Na wayuu mojukana aaʼin kakaliashii naya sünain anaʼliraa sümaʼana tottoot otta wainma tü kasa neeʼiratüinjatkalü akuwaʼipa süpüla anain naaʼin mayaainjeʼe ayuulin naya. Mojule maʼin paaʼin maaʼulu, jülüja paaʼin piʼreerüin kasa anasü mapa. Anuu tü nümakat Ojebode süchiki tia: «Kasataalejeseʼe shikeraajüin tü sümakat Isaías 33:24 eere süküjünüin nnojoleechin eein wanee wayuu eekai ‹ayuuishi taya› nümeechin». Amülialaajeerü paaʼin sutuma pütüjaain saaʼu nunouteʼereerüin Maleiwa tü kasa mojusü eekat mmapaʼa. Nnojoleerü mojuu aaʼin jee saalii ayuulii (Alateetkat Mapeena [Apocalipsis] 21:1, 4). Müiria nnojoluin mojuin paaʼin, eetaayaai soteerüin paaʼin tia (Isaías 65:17).

Pütchi suluʼujeejatka tü Wiwüliakat akaalinjeechika pia

Nütüjaa aaʼu Maleiwa jamüin paaʼin

«Tayakai Jeʼwaa, taya chi Pümaleiwasekai, taya ajattaka pia, anuu tanüiki pümüin: ‹Nnojo mmoluin pia. Shiimain maʼin takaalinjeechin pia›» (Isaías 41:13).

Isasü süchiki wayuu sütüjaain saaʼu jamüin waaʼin, nütüjaapejeʼe Jeʼwaa saaʼu tia jee nükaalinjeein waya.

Püsakira suluʼu paaʼin süchiki tü sümakat tü Wiwüliakat

Achuntushi outaʼiree Elías sünain nümüin: «Kettaataashi taya Jeʼwaa. ¡Anataashi puʼutule taaʼin!» (1 Reyes 19:4).

Anuu tü nümakat Ojebode: «Asakitshi taya suluʼu taaʼin sünain sünüiki tü Wiwüliakat, anasü taaʼin sutuma. Tayaawata aaʼu shiain alatüin tamüin tü alatakat nümüin Elías».

Pütüja nanainjee na wayuu süküjakana achiki tü Wiwüliakat

Müshi Jesuu nümüin Pedro: «Achuntüshi taya nümüin Maleiwa süpüla püchecherüinjatüin paaʼin sünain tü pünoulakat» (Lucas 22:32).

Mojusü maʼin naaʼin Pedro otta aʼyalajüshi nia sükajee naattajaain apünüintua naaʼu Jesuu. Anuu nünüiki Kaoru: «Atütülaasü taaʼin sutuma kojutuin Pedro nümüin Jeʼwaa otta nümüin Jesuu».

Müiria nnojoluin mojuin paaʼin, eetaayaai soteerüin paaʼin tia (Isaías 65:17).