Wuleinjatü watuma tü Piichi Outkajaaleekat

Mayaainjeʼe wainmain aʼyatawaa sünain akumajaa tü aʼwaajüleekat Maleiwa chaa Israel otta wainmain nneerü oʼunaka sünain, nnojotsü nakulajaain amaa na israeliitakana (1Cr 29:2-9; 2Cr 6:7, 8). Kettaapa shia, wulesü natuma. Shiiʼiyatüin tia anain tü nanoulakat (2Re 22:3-6; 2Cr 28:24; 29:3). Maaʼutpünaa, wainma aʼyatawaa sünain akumajaa jee anoukteʼeraa wanee piichi outkajaalee jee shiale wanee piichi süpülajatka outkajawaa miyoʼu. Süpüshuaʼa tia, sünainpünaasü wanoula nünain Maleiwa. Kojuta wamüin tia aʼyatawaa naapakat wamüin Jeʼwaa (Sl 127:1; Alat 7:15).

ANUU TÜ WAAʼINRAJATKAT

• 

  Kettaapa tü outkajawaakat, wapütüinjatü wulein eejanale joyotuin waya.

• 

  Antüinjana waya sünain epitajaa tü Piichi Outkajaaleekat. Wainmale waya soʼu kaʼikat tia, motsoʼojeerü wamaʼa ooʼulaka talateerü waaʼin sünain aʼyatawaa (lv süp. 92, 93 püt. 18).

• 

  Eeshii süpüla wasülajüin wanneetse. Kojutüsü nümüin Jeʼwaa tü nneerü wasülajakat süka süpüshuaʼa waaʼin jaʼitainna wasülajüin «piamasü neerü kachueerachen neʼe» (Mr 12:41-44).

• 

  Müleka eere süpüla, eeshii süpüla woʼunüin sünain akumajaa wanee piichi outkajaalee. Nnojotsü choʼujaain watüjain maʼin süpüleerua akumajaa piichi.