Nülaʼajaain saainjala wayuu sümaiwa paala

Awalaajünüsü waainjala saaʼujee amülaitpain nüsha Jesús (Éf. 1:7). Na wayuu eejanakana süpülapünaa outuin Jesús nülaʼajaain Jehová tü naainjalakat. Müsü tü Bibliakat: «Nülaʼajaain Maleiwa saainjala wayuu sümaiwa paala. Nnojoliikalaka süsalain naainjala na wayuu nülaʼajaakana aainjala» (Roma 3:25). ¿Jamüsü süpüla nülaʼajaain Jehová saainjala wayuu süpülapünaa naakajirüin waya nükajee Jesús?

Nümüin Jehová müshii naakajirakai naaʼin na wayuu aʼwaajakana nia soʼujeʼereeya nüküjain eeinjachin wanee suuʼuliwoʼu tü jietkat süpüla nuʼtteʼerüin naya (Gén. 3:15; 22:18). Nütüjaatüjülia aaʼu Jehová anain nümüin Jesús naapajiraain nikii süpüla naakajirüin waya (Gal. 4:4; Heb. 10:7-10). Wanaa sümaa yaajachin Jesús mmapaʼa, süpülapünaa outuin nia waaʼu, naapüin Jehová nümüin laülawaa süpüla nülatirüin saainjala wayuu. Nülatirüin Jesús naainjala na wayuu anoujakana nünain süka nütüjaain saaʼu naakajirüinjanain naya suulia naainjala (Mat. 9:2-6).