Meimmoluin paaʼin maʼaka naaʼin Sadoc

1, 2. ¿Jarai chi wayuu kanüliakai Sadoc? (1 Crónicas 12:22, 26-28).

OUTKAJAASHII maʼaka 340.000 wayuu süpüla naneeküin David süpüla nuluwataain naaʼu na israelitakana. Jutkatüshii naya soʼu apünüin kaʼi saaʼu tü wutai pejekat sünain Hebrón. Jaʼyasü nayorolo, eeʼirajüshii naya nümüin Maleiwa sümaa talatüin maʼin naaʼin (1 Crón. 12:39). Naʼaka naya wayuukana eejachi wanee jimaʼai kanüliashi Sadoc. Nnojoishi eʼnnajünüin maʼin nia, kachipünaapejeʼe nia naaʼin Jehová. Müsüjeseʼe nüshajirüin nünülia süpüla watüjaain aaʼu nüchiki (paashajeʼera 1 Crónicas 12:22, 26-28). Anashii wekirajaale nüchiki.

² Sacerdote Sadoc, aʼyataapuʼushi nia nümaa Abiatar chi laülaashikai napüleerua na sacerdotekana. Kekiishi nia nutuma Maleiwa süpüla niyaawatüin saaʼu tü nüchekakat (2 Sam. 15:27). Antapuʼushii na wayuukana nümaʼanamüin süpüla nasakirüinjachin nia süchiki wanee kasa. Wayuu yalayala aaʼinchi nia. Anasü wekirajaale süchiki jamüin meimmoluinka nia.

3. (1) ¿Jamüsü meimmoluinjatkaʼa waaʼin? (2) ¿Kasa wekirajaainjatka anain sünain ekirajaayakat tüü?

³ Jashichishi maʼin Satanás namüin na aʼyataashiikana nümüin Maleiwa maaʼulu yaa sülüʼütpa sükalia süpüla sajaʼttüin kasa mojusü (1 Ped. 5:8). Sümaʼainruʼu waʼatapajüin nükalia Jehová süpüla najaʼttirüin Satanás namaʼaleeya na nümaajanakana yalayalainjatü maʼin waaʼin (Sal. 31:24). Wekirajaa sünain apünüinsü kasa waaʼinrajatka süpüla meimmoluin waaʼin maʼaka naaʼin Sadoc.

WAAʼINMAA TÜ WAʼYATAAINKAT NÜMÜIN MALEIWA

4. ¿Jamüsü yalayalainjatkaʼa waaʼin süpüla waʼyataain nümüin Maleiwa? (Piirakaa sümüin tü ayaakuaakat).

⁴ Aʼyataashii waya nümüin Maleiwa süka süpüshuaʼa waaʼin, eepejeʼe kaʼi yalayalainjatka oʼu waaʼin (Mat. 6:33). Jamüshiijaʼa waya yalayalainjatü waaʼin süpüla woonooin sümaa tü nuluwataakalü anain waya Jehová otta müsia süpüla waküjainjanain pütchi süchiki nuluwataainjachin, jama mojulaain maʼin wayuu maaʼutpünaa (1 Tes. 2:2). Nnojoishii paaʼinwain na wayuukana sutuma tü naaʼinrakat na políticokana otta nacheküin wanaawain waaʼin namaa, yalayalainjatü waaʼin süpüla wayoutuin tü nachekakat (Juan 18:36). Wainma na aʼyataashiikana nümüin Jehová eʼrakana choʼujawaa, eeshii eekai müliain atumawaa, eeshii eekai püreesain saaʼujee nnojoliin sünainpünaain política jee saaʼujee nayoutuin surulaalüin naya.

5. ¿Jamüshi meimmoluinjachikaʼa Sadoc süpüla nükaalinjain David?

⁵ Nnojoishi neʼe oʼunuin Sadoc chamüin Hebrón süka nüneekünüin David süpüla aluwatawaa, yapashiaʼaya nia eejaʼalaa sümüle wanee atkawaa, müshijeseʼe kaʼapülain nia (1 Crón. 12:38). Naaʼinmaasü maʼin nükaalinjainjachin David sünain atkawaa jee müshiʼiya na israelitakana noulia na naʼünüükana. Eeshijaʼa nnojoire nütüjain maʼin atkawaa, meimmoluinpejeʼe nia.

6. ¿Jamüshi meimmoluinkaʼa Sadoc sünainjee nukuwaʼipa David? (Salmo 138:3).

⁶ ¿Jamüshi meimmoluinkaʼa Sadoc? Eesüjaʼa nütüjale shia sünainjee nakuwaʼipa na wayuu niʼraajakana, na wayuu yalayalakana aaʼin sümaa meimmoluin naaʼin. Noʼutku nayakana nia David, sutuma yalayalain maʼin naaʼin David sünain oʼuniraa nakuwaʼipa na surulaatkana nacheküin na israelitakana nuluwataainjachin naaʼu (1 Crón. 11:1, 2). Achuntawaishi David kaalinwaa nümüin Jehová soʼu süpüleeruaanüin naaʼin natuma na nüʼünüükana (Sal. 28:7; paashajeʼera Salmo 138:3). Yalayalasü naaʼinña Sadoc sünainjee nukuwaʼipa wanee wayuu yalayalakai aaʼin kanüliakai Jehoiadá otta Benaya chi nüchonkai Jehoiadá, chi yalayalakai aaʼin sünain atkawaa jee müsia sünainjee nakuwaʼipa 22 nekiipüʼüjana na surulaat nümaajanakana David (1 Crón. 11:22-25; 12:26-28). Akaalinjünüshi David natuma napüshuaʼa süpüla nuluwataainjachin.

7. (1) ¿Jaralii na anakana akuwaʼipa wapüleerua süpüla yalayalainjatüin waaʼin? (2) ¿Kasa pütüjaka sünainjee nukuwaʼipa chi wawalakai Nsilu?

⁷ Meimmoluinjeerü waaʼin wekirajaale sünain nakuwaʼipa na aʼyataashiikana nümüin Maleiwa. Jesucristo, chi Aluwataakai waaʼu, nnojotsü kasajatüin nümüin tü kasa nuluwataakalü aaʼu Satanás (Mat. 4:8-11; Juan 6:14, 15). Achuntawaishi nia kaalinwaa nümüin Jehová süpüla yalayalainjatüin naaʼin. Müsia maaʼulu, watta naalii jimaʼalii otta majayünnüü ayoutaka surulaalüin naya otta nnojoishii naya sünainpünaain política. Anasü pikirajaale nachiki suluʼu jw.org.a

PÜKAALINJA NA WAWALAYUUKANA

8. ¿Jamüsü yalayalainjatkaʼa naaʼin na laülaashiikana?

⁸ Talatüshii maʼin na aʼyataashiikana nümüin Jehová sutumajee nakaalinjiraain (2 Cor. 8:4). Eejeetpejeʼe kaʼi meimmoluinjatka oʼu naaʼin süpüla nakaalinjiraain. Natüjaa aaʼulu na laülaashiikana choʼujaain nakatsüinrüin naaʼin na wawalayuukana eejaʼalaa sümüle wanee atkawaa otta müsia nakatsüinrüinjatü nanoula jee neʼikajaainjatü tü kasa choʼujaakat namüin. Naaʼinrüin tia süka alin napüla na wawalayuukana jaʼitainna jamajüin naya atumawaa (Juan 15:12, 13). Sutuma meimmoluin naya müsü nakuwaʼipa maʼaka naaʼin Sadoc.

9. ¿Kasa ajütünaka apüla Sadoc nutuma David? (2 Samuel 15:27-29; piirakaa sümüin tü ayaakuaakat).

⁹ Oʼutunee aaʼinchi David. Aluwataweeshi wanee nüchon nuulia, Absalón nünülia (2 Sam. 15:12, 13). Müshijeseʼe nuʼluwataainjachin David Jerusalénjee. Nümakalaka David namüin na aʼyataashiikana nümüin: «Jooʼuya, outeenasa waya nutuma Absalón nnojoliire waʼluwataain nuulia» (2 Sam. 15:14). Wattapa David niyaawata aaʼulu choʼujaain wanee wayuu makatüinjachikai Jerusalén süpüla nütüjaain saaʼu tü naaʼinrajatkat Absalón. Nüjütaka Sadoc namaa waneinnua sacerdote süpüla naleʼejüinjanain Jerusalénmüin nachikuaʼa. Neʼrajüinjatü saaʼu tü naaʼinrajatkat Absalón (paashajeʼera 2 Samuel 15:27-29). Kapüleesü maʼin tü aluwataanakalü anain naya süka eein süpüla jamajüin naya atumawaa. Kapülasü naaʼin Absalón nukuwaʼipa neʼe nümüiwaʼa, kaashichijaarai nia sümaa kemeejaralin nia wayuu. Nütüjaale saaʼu Absalón tü naaʼinreekat naya wayuukana süpüla nakaalinjain David outushiijeʼe naya nutuma.

10. ¿Kasa akaalinjünaka anain David nutuma Sadoc otta na waneinnua?

¹⁰ Nuchuntaka David nümüin Sadoc otta nümüin wane naʼaleewain kanüliakai Husai nemeejüinjachin Absalón (2 Sam. 15:32-37). Naaʼinraka Husai tü nuluwataakalü anain David, nimeejakalaka Absalón. Nüküjain nümüin tü naaʼinrajatkat süpüla nükanajüin tü atkawaakat. Noonooka Absalón sümaa nünüiki. Nüküjaka Husai nümüin Sadoc otta müsia nümüin Abiatar tü naaʼinrajatkat Absalón (2 Sam. 17:8-16). Naluwataaka pütchi nümüin David süpüla eejüin naaʼin (2 Sam. 17:17). Oʼttaashi David nutuma Jehová nükajee Sadoc otta nakajee na wane sacerdotekana (2 Sam. 17:21, 22).

11. ¿Kasa waaʼinrajatka süpüla meimmoluinjanain waya maʼaka naaʼin Sadoc wakaalinjapa na wawalayuukana?

¹¹ ¿Kasa waaʼinrajatka süpüla meimmoluin waya maʼaka naaʼin Sadoc süpüla wakaalinjain na wawalayuukana soʼutpünaa kaʼi keemasü? (1) Oonooinjana waya sümaa tü aluwataanakalü anain. Anasü waaʼinrüle tia süpüla paaʼinwainjanain waya soʼutpünaa wanee kaʼi keemasü. Jüüjüüinjana waya sümüin tü suluwataakalü anain Weteet (Heb. 13:17). Na laülaashiikana ekirajaʼawaishii naya sünain tü aluwataanakalü anain süpüla natüjaain saaʼu tü naaʼinrajatkat eejaʼalaa sümüle wanee kasa (1 Cor. 14:33, 40). (2) Meimmoluinjana waya otta laülaainjatü waaʼin (Prov. 22:3). Jülüja waaʼin tü waaʼinrajatkat suulia jamajüin waya. (3) Kanoulainjana maʼin waya nünain Jehová. Kachipünaashii naaʼin Jehová napüshuaʼa na wawalayuukana. Nükaalinjeena waya süpüla naaʼinmajüin na wawalayuukana.

12, 13. ¿Kasa pütüjaka sünainjee nukuwaʼipa Víktor otta Vitali? (Piirakaa sümüin tü ayaakuaakat).

¹² Jülüjataa waaʼin nukuwaʼipa Víktor otta müshia Vitali, laülaashii naya otta nakaalinjain na wawalayuukana. Eʼikajüshii naya eküülü otta wüin namüin na wawalayuu chakana Ucrania. Anuu nünüiki Víktor: «Waraittapuʼushi maʼin taya nümaa Vitali sünain achajawaa eküülü. Waapapuʼuin shipijana katkoʼusü peje wanain. Eejachi wanee wawala katientainkai, nüsülajüin süpüshi tü nuikaainkat nayaaluʼu na wawalayuukana. Sutumajee tia, eküshii na wawalayuukana waneirua kaʼi. Sümaʼainruʼu woʼotuin waneirua kasa suluʼu weʼejena asotoosü wanee wonpa maʼaka 20 meetüro wanainjee. Soʼu kaʼikat tia oʼuraajüshi maʼin taya nümüin Jehová süpüla meimmoluinjatüin taaʼin sünain akaalinjaa na wawalayuukana».

¹³ Anuu nünüiki Vitali: «12 oora taya wopuluʼuin soʼu tü palajatkat kaʼi teʼikajaain kasa namüin na wawalayuukana, oʼuraajüshi maʼin taya nümüin Jehová». Yalayalasü maʼin naaʼin Vitali sümaa kekiin nia. Anuu nünüiki süchiki tü naaʼinrakat: «Nnojoishi taya ooʼulaain suulia achuntaa kekiwaa nümüin Jehová jee müsia süpüla tayaawatüinjatüin saaʼu takuwaʼipa. Shia toʼunaka aluʼupünaa tü wopu naküjakat na sülaülashiikana mma. Akatsüinraasü maʼin tanoula sutuma teʼrüin naʼyataajiraain na wawalayuukana. Nepitajüin tü wopukot wapüleerua jee akotchojüshii naya eküülü sümaa noʼotuin shia suluʼu weʼejena. Aʼlakajaashii wayaaluʼu naya wawalayuukana sümaa watunkapünaain nepialuʼu».

POONOO WANEEPIA NÜMAA JEHOVÁ

14. ¿Jamüsü waaʼin nuuʼulaale suulia aʼyatawaa nümüin Jehová wanee wayuu aikai wapüla?

¹⁴ Mojusü maʼin waaʼin nuuʼulaale suulia aʼyatawaa nümüin Jehová wanee waʼaleewain jee niale wanee wapüshi (Sal. 78:40; Prov. 24:10). Shialeekajaʼa aleewale maʼin waya nümaa. Katsüinjeerü waaʼin jülüjale waaʼin waneepiain Sadoc nümaa Jehová.

15. ¿Jamüsü meimmoluinjatkaʼa naaʼin Sadoc süpüla waneepiain nia nümaa Jehová? (1 Reyes 1:5-8).

¹⁵ Oonooshi waneepia Sadoc nümüin Jehová mayaainjeʼe nnojoluin naaʼinrüin tia Abiatar chi naʼaleewainkai. Wanaa sümaa laülaain David otta sülüʼülüin nükalia süpüla outaa, Adonías chi nüchonkai aluwataweeshi nia nüchikumüin. Nüchekapejeʼe Jehová niainjachin aluwataain Salomón nüchikumüin David (1 Crón. 22:9, 10). Waneepiashi Sadoc nümaa Jehová, waneepiapejeʼe Abiatar nümaa Adonías, nükaalinjain nia süpüla nuluwataainjachin (paashajeʼera 1 Reyes 1:5-8). Nnojoishi waneepiain Abiatar nümaa Jehová otta müshia nümaa David. Mojukajasaʼa maʼin naaʼin Sadoc sutuma tia. 40 juya naʼyanaajiraain sünain sacerdotein naya (2 Sam. 8:17). Naaʼinmajapuʼuin tü kojon shiyaawasekat süpansaajünüin pütchi (2 Sam. 15:29). Akaalinjünapuʼushi maʼin David natuma otta wainma tü kasa naaʼinrakat sünain aʼyatawaa nümüin Jehová (2 Sam. 19:11-14).

16. ¿Kasa waneepiaka aaʼujee Sadoc nümaa Jehová?

¹⁶ Waneepiashi Sadoc nümaa Jehová mayaainjeʼe mojuin tü nüneekakat Abiatar. Nnojotsü wainmajüin naaʼin David nünain Sadoc. Wanaa sümaa süküjünüin nümüin David tü naaʼinrajatkat Adonías neenajirüin Sadoc, Natán otta Benaya süpüla naneeküinjachin Salomón süpüla nuluwataainjachin nüchikumüin (1 Rey. 1:32-34). Shiakajasaʼa anain atuma nukuwaʼipa Sadoc nakuwaʼipa na aʼyataashiikana nümüin Jehová. Noʼutku naya wayuukana nia Natán, waneepiashi nia nümaa Jehová jee nükaalinjain David (1 Rey. 1:38, 39). Nüikalaaiwaʼaya Salomón sünain aluwatawaa, nüneeküin Sadoc süpüla niiʼirakainjachin nia Abiatar (1 Rey. 2:35).

17. ¿Kasa paaʼinrajatka süpüla püshatüin nukuwaʼipa Sadoc nuuʼulaale suulia aʼyatawaa nümüin Jehová wanee wayuu aikai püpüla?

¹⁷ ¿Kasa paaʼinrajatka süpüla püshatüin nukuwaʼipa Sadoc nuuʼulaale suulia aʼyatawaa nümüin Jehová wanee wayuu aikai püpüla? Jaʼyainjatü saaʼu pukuwaʼipa waneepiain pia nümaa Jehová (Jos. 24:15). Nükaalinjeechi pia Jehová süpüla yalayalain paaʼin. Puʼuraaja nümüin otta aleewa pia namaa na waneepiakana nümaa. Kojutusü maʼin nümüin Jehová poonoole sümaa nünüiki otta eʼreechi pia kasa anasü nutuma (2 Sam. 22:26).

18. ¿Kasa pütüjaka sünainjee nukuwaʼipa Marco otta Sidse?

¹⁸ Jülüjataa waaʼin nukuwaʼipa Marco otta müsia Sidse, tü nuʼwayuusekat. Piamashii jieyuu nachonnii, ooʼulaashii naya suulia anoujaa müleʼuyuupa naya. Anuu nünüiki Marco: «Aitüjüliʼiya tapüla tachonnii joʼuuiwaʼaya naya. Tachajaain maʼin sukuwaʼipa süpüla taaʼinmajüin naya. Mojusü maʼin taaʼin nachiirua nooʼulaapa suulia aʼyatawaa nümüin Jehová. Nükaalinjapejeʼe maʼin waya Jehová. Mojupa taaʼin, katchinsü saaʼin Sidse süpüla sükaalinjain taya otta mojupa saaʼin shiaka, anasü taaʼin süpüla takaalinjain shia». Anuu sünüiki Sidse: «Nnojoliirejeʼe nükaalinjain waya Jehová nnojotsüje katsüin waaʼin. Mojusü maʼin taaʼin süka tayain kasirüin taaʼinruʼu nooʼulaain tachonnii suulia anoujaa. Shiasaʼa mapa sürütkaaka tanainmüin wanee wawala kakaliaitka nnojoluin teʼrüin. Sümaka tamüin: ‹Nnojotsü püsirüin tü alatakat›. Sutuma nükaalinjain taya Jehová talatüsü taaʼin sünain aʼyatawaa nümüin».

19. ¿Kasa nüchekaka Jehová wapüleerua?

¹⁹ Nücheküin Jehová meimmoluinjatüin naaʼin napüshuaʼa na aʼyataashiikana nümüin maʼaka naaʼin Sadoc (2 Tim. 1:7). Nnojotsü nücheküin jülüjainjatüin waaʼin wainkeerüin wanee kasa süka waaʼin wamüiwaʼa. Sülatüle pümüin wanee kasa eere choʼujaain yalayalainjatüin paaʼin, puchunta kaalinwaa nümüin Jehová. Nükaalinjeechi pia süpüla meimmoluinjatüin paaʼin maʼaka naaʼin Sadoc (1 Ped. 5:10).