Ayataʼaya wakatchinrüin wanoula

1. ¿Kasa tü choʼujaakat wamüin? (Mateo 5:3).

NÜTÜJAA AAʼULU Jehová eein tü kasa choʼujaakat wamüin maʼaka saaʼin weküin, washeʼin jee wepia. Eʼrüshiijeʼe waya wamüliala nnojorüle eein tia kasakalüirua wamaʼana. Niapejeʼe choʼujaain maʼin wamüin chi Maleiwakai suulialeʼeya tia kasakalüirua (paashajeʼera Mateo 5:3). Talateerü waaʼin wayaawatüle saaʼu choʼujaain chi Maleiwakai wamüin jee ayatüle wakatchinrüin wanoula nünain.

2. ¿Kasa wanaawaka aluʼu wakuwaʼipa nümaa wanee wayuu eekai maʼletsein maʼin?

² Suluʼu tü anüikiikat griego wanee wayuu ayaawatakai saaʼu «choʼujaain chi Maleiwakai nümüin» müshi aka naaʼin wanee wayuu maʼletsekai ojulijakai sümüin wayuu niküin jee nüsheʼin. Jamüshijaʼa wanee wayuu maʼletsere maʼin nia müliashi sutuma nülatirüin jamü, sutuma sajaʼttüin jee yarüttüin nüsheʼin. Eeshijaʼa müliale maʼin nia sutuma jaaʼin maʼin chi Kaʼikai nümüin jee müliain nia sutuma jemiai saʼwai, eeshijaʼa mapüsawaire nia jee mojuin maʼin naaʼin, jama sülerajüin nia wayuu. Nütüjaa aaʼulu choʼujaain nümüin nükaalinjünüin süpüla anain nia jee katchin naaʼin. Maʼaka nütüjaain saaʼu tia chia wayuukai müsia nakuwaʼipa na wayuu ayaawatakana saaʼu choʼujaain niain Maleiwa oʼunirüin nakuwaʼipa jee nükaalinjain naya.

3. ¿Kasa wekirajaainjatka anain sünain ekirajaayaka tüü?

³ Sünain ekirajaayaka tüü, wekirajaajeerü anain süchiki wanee wayuu chejeʼewat shia Fenicia achuntaka maʼin kaalinwaa nümüin Jesús. Sünainjee sukuwaʼipa tia wayuukat atüjeena waya süchiki tü waaʼinrajatkat süpüla nuʼunirüin Jehová wakuwaʼipa. Ekirajaainjanaʼaya waya süchiki nukuwaʼipa Pedro, Pablo otta David, wayuu kanoulashii maʼin naya.

WATÜJAKA SÜNAINJEE SUKUWAʼIPA WANEE WAYUU ACHUNTAKA MAʼIN KAALINWAA

4. ¿Kasa suchuntaka tü wayuu chejeʼewatka Fenicia nümüin Jesús?

⁴ «Pümüliajaʼaya taya Señotkalee [...]. Müliasü maʼin tachon sutuma Yolujaa», müsü sünüiki wanee wayuu chejeʼewatka Fenicia nümüin Jesús (Mat. 15:21-28). Süsapainkaka tü wayuukat nümülatuʼu Jesús süpüla sümüliajünüin nutuma. Anashii wekirajaale süchiki apünüinsü kasa watüjaka sünainjee sukuwaʼipa tia wayuukat.

5. (1) ¿Kasa naaʼinraka Jesús süpüleerua tü wayuu chejeʼewatkat Fenicia? (2) ¿Jamüsü naaʼinrakaʼa tia? (Piirakaa sümüin tü ayaakuaakat).

⁵ Jaʼyasü saaʼu sukuwaʼipa tü wayuu chejeʼewatkat Fenicia nnojoluin yaletüin saaʼin. Jamüsüjaʼa shia nnojotsü jashichin wanaa sümaa nüküjain Jesús sümüin müin sukuwaʼipa maʼaka naaʼin wanee etchon. ¿Jamüsüjeʼe waaʼin wayale aküjünüin amüin tia? ¿Jashichijaaweenache waya sümaa wayüülajaain? Sutuma nnojoluin yaletüin saaʼin tia wayuukat, nnojotsü ayüülajaain shia jee ayatüsia suchuntuin kaalinwaa nümüin Jesús, jama kanoulain maʼin shia nünain. Mayaainjeʼe nüküjain Jesús nüjütünüin neʼe nanainmüin na wayuu kepiakana Israel anasü nutuma süchon tia wayuukat sutuma kanoulain maʼin shia.

6. ¿Kasa watüjaka sünainjee sukuwaʼipa tü wayuu chejeʼewatkat Fenicia?

⁶ Washatüinjatü sukuwaʼipa tü wayuu chejeʼewatkat Fenicia süpüla katchinjatüin wanoula. Jamüshiijaʼa waya nnojoluinjatü yaletüin waaʼin, achuntajana waya kaalinwaa waneepia nümüin Jehová otta kanoulainjana waya nünain. Nnojoleerü akulajaain waaʼin sünain achuntaa kaalinwaa nümüin Jehová nnojorüle yaletüin waaʼin. Kanoulainjana waya nünain Jesús jee jüüjüüinjana waya namüin na wayuu nüneekakana süpüla noʼunirüin wakuwaʼipa (Mat. 24:45-47). Nükaalinjeena waya Jehová otta Jesús kanoulale waya, nnojorüle yaletüin waaʼin jee wachuntule kaalinwaa waneepia nümüin Jehová (anasü paashajeʼerüle Santiago 1:5-7). Anashii wekirajaale sünain tü naaʼinrakat Jehová süpüla nükatchinrüin wanoula jee talatüin waaʼin otta tü watüjeetkat sünainjee nukuwaʼipa Pedro, Pablo otta David.

WASHATA NUKUWAʼIPA PEDRO: WEKIRAJAA WANEEPIA SÜNAIN TÜ NÜNÜIKIKAT MALEIWA

7. (1) ¿Kasa nüküjaka Jesús nümüin Pedro? (2) ¿Jamüsü ayatüinjatkaʼa naaʼinrüin tia? (Hebreokana 5:14–6:1).

⁷ Chi aluwataaushikai Pedro noʼutku nia na palajannuukana judío anoujakana sünain niain Jesús chi Mesíaskai. Nütüjaa aaʼulu nüneeküin nia Jehová süpüla nikirajüin wayuu sünain tü pütchi katüinjatkalü atuma noʼu waneepia (Juan 6:66-68). «Pikajeʼera tü taʼanneetsecheinkat», müshi Jesús nümüin Pedro süpülapünaa nuʼunuin sirumatuʼumüin (Juan 21:17). Naaʼinrüin Pedro tü nümakat Jesús jee nikirajüin na nuwalayuukana süpüla kooʼomüin nanoula. Nüshajüin Pedro piamasü karaloʼuta sükajee tü nüpülainkat Maleiwa jee suluʼusü shia tü Bibliakat maaʼulu. Choʼujaapejeʼe nümüin Pedro nikirajaainjachin süpüla katchinjatüin tü nunoulakat, müsüjeseʼe nikirajaain sünain tü karaloʼuta nüshajakat Pablo namüin na anoujashiikana. Naaʼinrüin tia mayaainjeʼe eein waneirua kasa kapüleeka süpüla shiyaawatünüin aaʼu (2 Ped. 3:15, 16). Ayatapejeʼe ekirajaain nia süka nütüjaain saaʼu nükaalinjüneechin nutuma Jehová süpüla niyaawatüin saaʼu tü ashajünakat suluʼu jee noonooin sümaa (paashajeʼera Hebreokana 5:14–6:1).

8. ¿Kasa naaʼinraka Pedro sutuma tü nümakat chi aapieekai nümüin?

⁸ Jüüjüüshi waneepia Pedro nümüin Jehová sutuma kanoulain maʼin nia nünain. Jamüshijaʼa nia niʼrüin wanee kasa nutuma Maleiwa. Nüküjain wanee aapiee nümüin niküinjatüin mürüt yarüttaka noʼuluʼu Maleiwa naashin na judíokana. Nnojotsü anain nümüin Pedro tü nuchuntakat chi aapieekai nümüin, jama judíoin nia. Müshijeseʼe nümüin: «Nnojoireejaʼa süpüla teküinjachin türa. Matüjainsai taya ekaa wanee kasa yarüttaka noʼuluʼu Maleiwa». Nümaka joo chi aapieekai nümüin: «Yarüttüsü pümajayaai sümüin tü kasa wulekat nutuma Maleiwa» (Aluw. 10:9-15). Nunouteʼerüin mapa Pedro tü jülüjakat naaʼin sutuma tü nümakat chi aapieekai nümüin. Jamüshijaʼa wanaa sümaa nuunejaanüin nutuma Cornelio nipialuʼumüin oʼunushi nia. Naaʼinrüin tia Pedro eerejeʼe nnojoluin wayuuin judíoin Cornelio. Jamüshijaʼa na Judíokana nnojotsü anain namüin naʼaleewajaale wanee wayuu judío namaa na wayuu naatakana oumain, jama yarüttüin nakuwaʼipa naashin (Aluw. 10:28, 29). Nunoutuin Pedro tü jülüjakat naaʼin nüküjapa Jehová nümüin süküjünüinjatüin tü pütchi anakat maʼin sümüin wayuu maʼleekalia (Prov. 4:18). Nüküjaka pütchi Pedro nümüin Cornelio jee namüin napüshuaʼa na wayuu suluʼujünakana nipia. Talatakajasaʼa maʼin naaʼin Pedro niʼrapa nanoujain nünain Jesús, eein naaʼu tü nüpülainkat Maleiwa jee woutiisain naya (Aluw. 10:44-48).

9. ¿Jamüsü anakaʼa wekirajaale sünain tü kasa kapüleekat süpüla ayaawatüna aaʼu ashajünaka achiki suluʼu tü Bibliakat?

⁹ Maʼaka naaʼin Pedro ekirajaainjanaʼaya waya sünain tü kasa nütüjaainjatkalü aaʼu wanee wayuu palajana süchiki tü sümakat tü Bibliakat otta ekirajaainjanaʼaya waya sünain tü sümakat tü Bibliakat kapüleekat süpüla wayaawatüin saaʼu. Anasü wakatarüle kaʼi süpüla tia jee nnojoluinjatü akulajaain waaʼin sünain. Waaʼinrüle tia, weʼraajeerü maʼin nukuwaʼipa Jehová, aijeechi maʼin nia wapüla, kojuteechi nia wamüin jee waküjeerü maʼin sümüin wayuu süchiki nukuwaʼipa Jehová (Roma 11:33; Apoc. 4:11). Wane kasa watüjaka sünainjee nukuwaʼipa Pedro shia jüüjüümaatüinjana waya sümüin tü apansaajünakalü akuwaʼipa sünain tü wanoujakalü anain natuma na wawalayuu oʼunirakana sukuwaʼipa waʼyataain. Waaʼinrüle tia nieechi Jehová oʼuniraka wakuwaʼipa jee waneepieena waya nümaa.

WASHATA NUKUWAʼIPA PABLO: ANA WAKUWAʼIPA NOʼULUʼU JEHOVÁ

10. ¿Kasa waaʼinrajatka süpüla talatüin naaʼin Jehová wamaa? (Colosas 3:8-10).

¹⁰ Nikirajüin waya Jehová sükajee tü sümakat tü Bibliakat süpüla anainjatüin wakuwaʼipa nümüin jee talatüin nia wamaa (paashajeʼera Colosas 3:8-10). Nnojotsü nunouteʼeramaatüin nukuwaʼipa wanee wayuu uwatuwoʼushi, alatüinjatü wainma kaʼi süpüla nuuntuin tia. Jülüjataa waaʼin nukuwaʼipa Pablo, jimaʼaliiwaʼaya nia aʼyataashi maʼin nia süchiirua talatüinjatüin naaʼin Maleiwa nümaa (Gal. 1:14; Filip. 3:4, 5). Nnojotpejeʼe nütüjaain saaʼu Pablo tü naaʼinrajatkat süpüla anainjatüin sukuwaʼipa nutuma nuʼwaajia Jehová jee nnojotsü nütüjaain saaʼu tü nikirajaakalü anain Cristo. «Eʼrüitpuʼu taya wayumüin» müshi Pablo. Sutuma wayuuin yaleta aaʼinchi nia nnojotsü anain nukuwaʼipa nümüin Jehová (1 Tim. 1:13).

11. ¿Kasa nunouteʼeraka Pablo sünain nukuwaʼipa?

¹¹ Wayuu kaashichijaarai Pablo süpülapünaa nunoujain. Sutuma jashichin maʼin Pablo nooʼomüin na anoujashiikana müliashii maʼin naya nutuma «jee nuʼutee aaʼinchii naya» (Aluw. 9:1). Nunouteʼeraka mapa Pablo tü nukuwaʼipakat, nüchecherüin naaʼin suulia jashiee jee kamaneeshi nia sümüin wayuu (Éf. 4:22, 31). Eepejeʼe kaʼi kapüleekalü oʼu nümüin nüchecherüin naaʼin. Jamüshijaʼa nia aʼülüjiraashi nümaa Bernabé sutuma nnojoluin paaʼinwain naya sünain wanee kasa (Aluw. 15:37-39). Mayaainjeʼe nnojoluin anain tü naaʼinrakat Pablo nnojoishi nia ayüülajaain, ayatüshia nia aʼyataain süchiirua anain nukuwaʼipa noʼuluʼu Maleiwa (1 Cor. 9:27).

12. ¿Kasa nuuntaka atuma Pablo nuuʼulaain tü nukuwaʼipapuʼukat?

¹² Sutuma nnojoluin yaletüin naaʼin Pablo nuuʼulaain suulia tü nukuwaʼipapuʼukat (Filip. 4:13). Nütüjaa aaʼulu Pablo nükaalinjüneechin nutuma Jehová sükajee tü nüpülainkat maʼaka nükaalinjünüin Pedro nutuma Jehová (1 Ped. 4:11). Eepuʼusü kaʼi mojuwaika oʼu naaʼin Pablo sutuma naaʼinrüin wanee kasa nnojotka anain maʼin. Akatchinraapejeʼe naaʼin jülüjapa naaʼin süpüshuaʼa tü kasa naaʼinraka Jehová nüpüleerua (Roma 7:21-25).

13. ¿Kasa waaʼinrajatka süpüla washatüin nukuwaʼipa Pablo?

¹³ Jaʼitainna kakaliain waya aʼyataain nümüin Jehová ayatüinjatü wanouteʼerüin wakuwaʼipa. Washatüinjatü nukuwaʼipa Jehová jee waaʼinrüinjatü tü nikirajakalü anain waya. Eejeerü kaʼi waainjeetkalü oʼu wanee kasa nnojotka anain. Eeshii waashichijaale jee airuʼule wanüiki sümüin wayuu. Sülatüle wamüin tia nnojotsü anain jülüjale waaʼin amülain neʼe waʼyataain süchiirua talatüin naaʼin Jehová wamaa. Shia anaka aluʼu ayatüle weeʼiratüin tü wakuwaʼipakat (Roma 12:1, 2; Éf. 4:24). Anasü jülüjale waaʼin tüü: weeʼirateere tü wakuwaʼipakat waaʼinrüinjatü tü nikirajakalü anain waya Jehová jee weʼraajüinjatü maʼin nukuwaʼipa.

WASHATA NUKUWAʼIPA DAVID: WACHUNTA KAALINWAA WANEEPIA NÜMÜIN JEHOVÁ

14, 15. ¿Kasa naaʼinraka Jehová maaʼulu yaa süpüla naaʼinmajüin na aʼyataashiikana nümüin? (Salmo 27:5; piirakaa sümüin tü ayaakuaakat).

¹⁴ Süpüla talatüinjatüin waaʼin choʼujaasü wamüin naaʼinmajüinjanain waya Jehová. ¿Kasa naaʼinraka Jehová süpüla nükaalinjain waya? ¿Kasa waaʼinrajatka süpüla nükaalinjain waya Jehová?

¹⁵ Nütüjaa aaʼulu David naaʼinmajünüin nutuma Jehová soʼunnaa müliaa (paashajeʼera Salmo 27:5). ¿Kasa naaʼinraka Jehová maaʼulu yaa süpüla naaʼinmajüin na aʼyataashiikana nümüin? Aaʼinmajünüshii naya nutuma Jehová suulia wanee kasa jee noulia na wayuu amalajeʼereekana nanoula. Jaʼitairü kasain maʼin aainjüneein wamüin wayamüleerü shia nutuma Jehová (Sal. 34:7; Is. 54:17). Pülashi Satanás, na yolujaakana jee na wayuu nümaajanakana. Pülaleepejeʼe Jehová noulia. Jaʼitashii outuin waya natuma nüsoʼireʼereerü waaʼin Jehová (1 Cor. 15:55-57; Apoc. 21:3, 4). Nükaalinjainña waya Jehová shapaale maʼin waaʼin saaʼu wanee kasa süpüla ayatüin waʼyataain nümüin (Prov. 12:25; Mat. 6:27-29). Sutuma alin waya nüpüla Jehová naapüin wamüin na wawalayuukana süpüla natütüleʼerüin waaʼin jee nakaalinjain waya otta naapüin wamüin na laülaashiikana süpüla nakatchinrüin wanoula (Is. 32:1, 2). Sünain tü outkajawaakat nikirajüin waya Jehová süchiki waneirua kasa naaʼinraka süpüla nükaalinjain waya (Heb. 10:24, 25).

16. ¿Kasa naaʼinraka Jehová süpüla naaʼinmajüin David?

¹⁶ Anasü nukuwaʼipa David nutuma Jehová naaʼinrapa tü nuluwataakat anain nia Jehová jee talatüsü naaʼin sutuma naaʼinmajünüin nutuma Jehová (anasü paashajeʼerüle Proverbios 5:1, 2). Niʼrapejeʼe müliaa David moonooinpa nia sümaa tü nümakat Jehová (2 Sam. 12:9, 10). Niʼrüinña David nümüliala sutuma tü kasa mojusü aainjünakat nümüin. Oʼuraajapejeʼe David nümüin Jehová jee nüküjain nümüin süpüshuaʼa tü shapaakalü atuma naaʼin. Nükaalinjaka nia Jehová jee niyaawata aaʼu alin nia nüpüla (Sal. 23:1-6).

17. ¿Kasa waaʼinrajatka süpüla washatüin nukuwaʼipa David?

¹⁷ Washateerü nukuwaʼipa David woʼuraajüle nümüin Jehová jee wachuntule kaalinwaa nümüin süpüla waaʼinrüin tü anakat nümüin. Waaʼinrüle wanee kasa nnojotka anain nümüin Jehová eʼreena waya wamüliala jee nnojoleerü nüsütüin Jehová woulia tia müliaka (Gal. 6:7, 8). Saainjünüle kasa mojusü wamüin wachuntuinjatü kaalinwaa nümüin Jehová. Naaʼimajeetkalaka tü suluʼukat waaʼin jee tü suluʼukat wekii (Filip. 4:6, 7).

AYATAʼAYA WAKATCHINRÜIN WANOULA

18. (1) ¿Kasa eejüinjatka oulia waaʼin? (2) ¿Kasa waaʼinrajatka süpüla ayatüin wakatchinrüin wanoula? (Piirakaa sümüin tü ayaakuaakat).

¹⁸ Anasü jülüjale maʼin waaʼin tü pütchi süpülajatkat tü juyakat 2026 makat mayaa: «Anakuwaʼipalii na wayuu ayaawatakana saaʼu choʼujaain chi Maleiwakai namüin». Maaʼulu yaa kepiashii waya saʼaka wayuu nnojoliikana ayaawatüin saaʼu choʼujaain chi Maleiwakai namüin otta müsia eeshii wayuu aʼwaajakana Maleiwa sümaa nnojoluin pansaain shia sümaa tü nüchekakat Jehová otta eeshii na oʼunakana süchiirua tü sümakat neʼe wayuu. Eejüinjatü waaʼin suulia washatüin nakuwaʼipa naya wayuukana. Müsüjeseʼe wakatchinrüinjatüin wanoula, ekirajaainjana maʼin waya sünain tü Nünüikikat Maleiwa, weeʼiratüinjatü wakuwaʼipa jee wachuntuinjatü kaalinwaa waneepia nümüin Jehová.