Nükaalinjeechi pia Jehová mojule maʼin paaʼin

1, 2. (1) ¿Jamapuʼusü naaʼin Pablo? (2) ¿Jamüsü anakaʼa maʼin nukuwaʼipa Pablo wapüleerua? (Roma 7:21-24).

WAASHAJAAPA nüchiki Pablo jülüjasü waaʼin niapuʼuin wanee wayuu yalayalakai aaʼin, atüjakai maʼin ekirajaa otta jülüjasü waaʼin nüshajüin kojuyasü karaloʼuta suluʼuka tü Bibliakat. Eepejeʼe kaʼi mojuwaikalü oʼu naaʼin Pablo jee yüülakalü oʼu naaʼin. Eesüjaʼa müle paaʼin maʼaka naaʼin Pablo.

² (Paashajeʼera Roma 7:21-24). Sünainjee tü nüshajakat Pablo namüin na anoujashii chejeʼewaliikana Roma, eesüjaʼa piyaawatüle saaʼu wanaawain tü mojukalü atuma naaʼin Pablo sümaa tü mojukalü atuma paaʼin. Waneepiashi Pablo nümaa Jehová, eepejeʼe kaʼi eejiraakalü oʼu nia sümaa tü kasa mojusü suchuntaakat naaʼin, eesüjaʼa mojuwaire naaʼin jülüjapa naaʼin tü kasa mojusü naaʼinrapuʼuka jee yüülasü naaʼin sutuma wanee kasa müliaka atuma naaʼin.

3. ¿Kasa wekirajaainjatka anain sünain ekirajaayakat tüü? (Paashajeʼera tü nootakat).

³ Mayaainjeʼe eein kaʼi mojuwaikalü oʼu naaʼin Pablo nnojotsü yüülain naaʼin waneepia. Sünain ekirajaayakat tüü wekirajaajeerü anain kasain wayuu mojuka atuma naaʼin Pablo jee tü naaʼinrakat suulia mojuin naaʼin waneepia. Otta wekirajaajeerü anain tü paaʼinrajatkat süpüla püshatüin nukuwaʼipa Pablo.a

TÜ MOJUKALÜ ATUMA NAAʼIN PABLO

4. Püküja waneirua kasa mojuka atuma naaʼin Pablo.

⁴ Tü kasa mojusü naaʼinrapuʼukat. Mojusü naaʼin Pablo sutuma tü kasa mojusü naaʼinrakat süpülapünaa nunoujain. Jamüshijaʼa nia, anashiisü nümüin nuʼutunuin aaʼin Esteban (Aluw. 7:58; 8:1). Otta müliashii nutuma na anoujashiikana (Aluw. 8:3; 26:9-11).

5. ¿Jamüsü naaʼin Pablo sutuma tü kasa mojusü naaʼinrapuʼukat?

⁵ Eesü kaʼi mojuwaikalü oʼu naaʼin Pablo sutuma tü kasa mojusü naaʼinrapuʼukat. Mojuleesia maʼin naaʼin sülata sülata sümapa tü kaʼikat. Müshijeseʼe nüshajüin pütchikat tüü namüin na anoujashii chejeʼewaliikana Corinto: «Nnojoishi keraain taya süpüla ‹aluwataaushi› tamünajachin, jama müliapuʼuin tatuma na anoujashiikana nünain Maleiwa» (1 Cor. 15:9). Maʼaka jaʼrai juya süchikijee tia, nüshajüin Pablo namüin na anoujashii chajanakana Éfeso pütchikat tüü: «Taya maawainka maʼin naʼakajee napüshuaʼa na aneekuushikana» (Éf. 3:8). «Mojutupuʼusai Maleiwa tamüin, müliapuʼushii tatuma na anoujashiikana jee eʼrüitpuʼu taya wayumüin», müshi Pablo nümüin Timoteo (1 Tim. 1:13). Nuwaraijaapa Pablo naaʼu na anoujashiikana eesüjaʼa mojule maʼin naaʼin niʼrapa na anoujashii müliapuʼukana nutuma.

6. ¿Jetsü tü wane kasa müliakalü atuma naaʼin Pablo? (Paashajeʼera tü nootakat).

⁶ Tü müliakalü atuma naaʼin. Müliashi maʼin Pablo «sutuma wanee kasa makat aka saaʼin keipüse sünainka niʼiruku» (2 Cor. 12:7). Nnojotsü watüjaain maʼin saaʼu kasain wayuu tü müliakalü atuma naaʼin Pablo, shialejeʼe wanee ayuulii jee shiale wanee kasa alatakat nümüin. Wayaawatapejeʼe saaʼu sükajee nünüiki müliain maʼin naaʼin.b

7. ¿Jamüsü kapüleekaʼa nümüin Pablo aaʼinraa waneepia tü anakat noʼuluʼu Maleiwa? (Roma 7:18, 19).

⁷ Tü jookalü apüla nia. Eejiraashi Pablo sümaa tü kasa jookalü apüla nia (paashajeʼera Roma 7:18, 19). Mayaainjeʼe naaʼinjeein wanee kasa eekai anain, isasü neʼe nüchiki. Niyaawata aaʼu Pablo nüchajaainjatüin sukuwaʼipa süpüla anain nukuwaʼipa noʼuluʼu Maleiwa (1 Cor. 9:27). Mojukajasaʼa maʼin naaʼin naaʼinrapa wanee kasa nnojotka anain.

¿KASA NAAʼINRAKA PABLO SUULIA MOJUIN NAAʼIN WANEEPIA?

8. ¿Kasa naaʼinraka Pablo süpüla eejiraain nia sümaa tü kasa mojusü suchuntaakat naaʼin?

⁸ Nütüjaa aaʼulu Pablo naapeerüin Jehová tü nüpülainkat namüin na anoujashiikana süpüla eejiraainjanain naya sümaa tü kasa mojusü suchuntaakat naaʼin. Watüjaa aaʼulu tia sünainjee tü nüshajakat Pablo namüin na anoujashiikana (Roma 8:13; Gal. 5:16, 17). Nüküjain Pablo süchiki tü kasa niyoutuinjatkat wanee anoujashi süpüla anainjatüin nukuwaʼipa noʼuluʼu Jehová (Gal. 5:19-21, 26). Sutuma tia wayaawata aaʼu nüchajaain maʼin sukuwaʼipa Pablo süpüla nunouteʼerüin nukuwaʼipa, nikirajaain sünain tü Nünüikikat Maleiwa jee jülüjasü naaʼin tü naaʼinrajatkat. Watüjaa aaʼulu naaʼinrüin Pablo tü nikirajakalü anain na anoujashiikana.

9, 10. ¿Kasa naaʼinraka Pablo suulia mojuin naaʼin waneepia? (Éfeso 1:7; piirakaa sümüin tü ayaakuaakat).

⁹ Nnojotsü mojuin naaʼin waneepia Pablo, eesü tü kasa talatakalü atuma naaʼin. Jamüsüjaʼa süküjünapa nümüin anain nakuwaʼipa na anoujashiikana, talatüsü naaʼin sutuma tia (2 Cor. 7:6, 7). Wane kasa talataka atuma naaʼin shia alin nia napüla na naʼaleewainkana (2 Tim. 1:4). Talatüsiaʼaya naaʼin Pablo sutuma aleewain nia nümaa Jehová jee talatüin nia nümaa (2 Tim. 1:3). Anuu nünüiki namüin na anoujashiikana soʼu püreesain nia chaa Roma: «Talataʼaya jaaʼin waneepia sünain aʼyatawaa nümüin chi Señotkai» (Filip. 4:4). Nnojotsüjeʼe müin nünüiki Pablo mojule naaʼin waneepia. Suchuntaapa naaʼin kasa mojusü, jülüjasü naaʼin kasa anasü.

¹⁰ Wane kasa naaʼinraka Pablo suulia mojuin naaʼin waneepia shia jülüjain naaʼin naapüin Jehová nikii chi Nüchonkai süpüla outuin naaʼu (Gal. 2:20; paashajeʼera Éfeso 1:7). Sutuma naaʼinrüin tia Pablo nunoujain maʼin sünain nülatirüin Jehová sooʼopünaa naaʼin naainjala sutuma naapajiraain nikii Jesús naaʼu (Roma 7:24, 25). Sutuma jülüjain maʼin naaʼin Pablo tia, talatüsü naaʼin sünain aʼyatawaa nümüin Jehová (Heb. 9: 12-14).

11. ¿Jamüsü sütütüleʼerakaʼa waaʼin tü nukuwaʼipakat Pablo?

¹¹ Eesüjaʼa wachecherüinjatüle maʼin waaʼin suulia waaʼinrüin jee waküjain wanee kasa mojusü. Eesüjaʼa yüülale waaʼin sutuma jülüjain waaʼin nnojoluin anain wakuwaʼipa nümaa Jehová. Anuu sünüiki wanee wawala, Eliza sünüliac: «Anasü taaʼin süka tatüjaain saaʼu nnojoluin tayain tamüiwaʼa eejiraaka sümaa tü suchuntaakat taaʼin, naaʼinrüinña shia Pablo otta nütüjaa aaʼu Jehová tü alatawaikat wamüin». Wekirajaa sünain tü waaʼinrajatkat süpüla talatüin naaʼin Jehová wamaa otta tü waaʼinrajatkat süpüla talatüinjatüin waaʼin maʼaka naaʼin Pablo.

PAAʼINRAJATKA SÜPÜLA SÜKATCHINRAAIN PAAʼIN

12. ¿Kasa waaʼinrawalinjatka süpüla talatüin waaʼin?

¹² Anashi aleewale maʼin pia nümaa Jehová. Nnojoleerü mojuin maʼin waaʼin aleewale waya nümaa Jehová, aneerü waaʼin anale weküin waainjale ejercicio otta watunkule maʼin. Aneeriaʼaya waaʼin waashajeʼerawaire tü Bibliakat, waküjawaire pütchi, yapale watuma tü wekirajaainjatkalü anain sünain tü outkajawaakat, woʼunule sünain otta wayalerüle wajapü süpüla wasoutuin shiʼipajee tü asakinnakalü anain. Waaʼinrüle tia nnojoleerü mojuin maʼin waaʼin süka jülüjeerüin waaʼin kasa anasü (Roma 12:11, 12).

13, 14. ¿Kasa anasü neʼraka na wawalayuukana sutuma ayatüin aleewain naya nümaa Jehová?

¹³ Anuu tü alatakat nümüin wanee wawala Juan nünülia, soʼu 39 nuuyase ayuuishi nia sutuma kanset. Mojusü maʼin naaʼin otta shapaasü maʼin naaʼin sutuma tü alatakat nümüin, jama nnojoluin laülaain maʼin nia jee apünüin neʼe nuuyase chi nüchonchonkai soʼu tia. ¿Kasa naaʼinraka Juan suulia mojuin maʼin naaʼin? Anuu nünüiki: «Mayaainjeʼe ayuulin maʼin taya jee mapüsawalin taya, oʼunawaishi taya sümaa taʼwayuuse jee chi tachonkai sünain tü outkajawaakat, aküjashii waya pütchi otta ekirajaashi taya namaa semaanawai sünain tü Bibliakat. Mojusü maʼin taaʼin tatüjaapa saaʼu kanserüin taya, nükatsüinrapejeʼe waaʼin Jehová süka alin waya nüpüla otta anasü waaʼin nutuma. Naaʼinreeria Jehová tia püpüleerua».

¹⁴ Anuu sünüiki Eliza tü waküjayütkalü anülia suluʼu tü pütchikat 11: «Tekirajaawaipa tamüiwaʼa sünain tü Bibliakat otta toʼunawaipa sünain tü outkajawaakat, jülüjasü taaʼin naapajüin tanüiki Jehová jee alin maʼin taya nüpüla. Sutuma tatüjaain saaʼu tia, talatüsü taaʼin». Nolan wanee wawala alapalaʼawaikai naaʼu na wawalayuu chakana África nüküjain wamüin tü naaʼinrakat sümaa tü nuʼwayuusekat süpüla talatüin naaʼin, müsü nünüiki: «Nnojoishii waya ooʼulaain suulia oʼuraajaa, ekirajaawa sünain tü Bibliakat, oʼunaa sünain tü outkajawaakat otta aküjashii waya pütchi. Waaʼinrüinña tia jaʼitasü mojuin maʼin waaʼin, nütütüleʼerüin waaʼin Jehová sükajee tia. Yüülale waaʼin anasü jülüjale waaʼin nükaalinjeenain waya Jehová jee weʼreenain kasa anasü nutuma. Eesüjaʼa nnojorüle watüjaain saaʼu tü naaʼinrajatkat Jehová süpüla nütütüleʼerüin waaʼin, naaʼinreetpejeʼe shia».

15. ¿Kasa amaa eeka süpüla waaʼinrüin mojule maʼin waaʼin? Püküja wanee sukuwaʼipa.

¹⁵ Ayatüle mojuin waaʼin jee yüülale waaʼin, eesü tü kasa waaʼinrajatkat. Jamüsüjaʼa aire maʼin wasapü eesüjaʼa nnojorüle sülatamaatüin woulia saalin süʼlanünüle neʼe wamüin, eesüjaʼa choʼujaale wamüin weʼrajeʼerüinjanale nümaʼanamüin wanee tottoolu. Müsia neʼe wakuwaʼipa ayatülejeʼeya mojuin maʼin waaʼin, anashii wekirajaale sooʼomüin süchiki tü sümakat tü Bibliakat otta wekirajaale sünain tü karaloʼuta eekat wamaʼana süchiki tü alatakat wamüin jee shiale wachuntuin kaalinwaa nümüin wanee wawala laülaakai aaʼin sünain anoujaa. Anashii wekirajaale sooʼomüin süchiki tü waaʼinrajatkat.

16. ¿Kasa waaʼinrajatka süpüla wayaawatüin saaʼu kasain mojuka atuma waaʼin? (Salmo 139:1-4, 23, 24).

¹⁶ Wachunta kaalinwaa nümüin Jehová süpüla wayaawatüin saaʼu jamüin mojuka maʼin waaʼin. Niʼraajüin maʼin Jehová tü nukuwaʼipakat David, nütüjaa aaʼu David tia müshijeseʼe nuchuntuin kaalinwaa nümüin süpüla niyaawatüin saaʼu jamüin «shapaaka maʼin naaʼin» (paashajeʼera Salmo 139:1-4, 23, 24). Akaʼaya neʼe waya, choʼujaasü wachuntuin kaalinwaa nümüin Jehová süpüla wayaawatüin saaʼu jamüin mojuka waaʼin otta tü waaʼinrajatkat süpüla anain waaʼin. Anasü wasakireʼerüle waaʼin sünain tüü: ¿Kasache maʼin tü shapaakalü atuma taaʼin? ¿Eesüche wanee kasa jülüjakat taaʼin jee mojuwaikalü atuma taaʼin? ¿Tekiiruʼusüche waneepia tü kasa mojuwaikalü atuma taaʼin?

17. ¿Kasa anaka süpüla wekirajaʼawalin anain wamüiwaʼa? (Piirakaa sümüin tü ayaakuaakat).

¹⁷ Anashii wekirajaale sünain tü anainjatkalü atuma waaʼin. Anashii wekirajaʼawaire sünain tü nukuwaʼipakat Jehová wamüin. Jamüshijaʼa chi aluwataaushikai Pablo anasü maʼin nümüin nüsakireʼerüin naaʼin sünain motuin naaʼin Jehová naainjala saaʼujee naapüin nikii chi Nüchonkai naaʼu. Anashii wekirajaale sünain tü pütchi ojuʼitawaikat suluʼu jw.org süchiki tü nukuwaʼipakat Jehová wamüin maʼaka saaʼin nümülialüin waaʼin, motuin naaʼin waainjala otta alin waya nüpüla. Wekirajaapa anasü sotule waaʼin tü pütchi waashajeʼerakat süpüla wekirajaain sünain mojupa waaʼin. Waashajeʼerapa tü pütchi suluʼujeejatkat tü Bibliakat ojuʼitakat sünain tia pütchikat, jülüjainjatü waaʼin aneerüin waaʼin sutuma otta tü waaʼinrajatkat süpüla washatüin nukuwaʼipa Jehová (Filip. 4:8).

18. ¿Kasa nekirajaaka anain waneinnua wawalayuu süpüla anainjatüin naaʼin?

¹⁸ Jamüsüjaʼa Eliza tü waküjayütkalü achiki paala, ekirajaasü shia nüchiki Job. Anuu sünüiki: «Tayaawatüitpa aaʼu müin takuwaʼipa maʼaka naaʼin Job. Pachiiruaʼalaasü tü müliaa niʼrakat Job, mayaainjeʼe nnojoluin nütüjaain aaʼu Job jamüin müliaka maʼin nia ayatüshia nia waneepiain nümaa Jehová» (Job 42:1-6). Anuu sünüiki Diane tü nuʼwayuusekat Nolan: «Ekirajaʼawaisü taya nümaa taʼwayuuse süchiki tü nukuwaʼipakat Jehová wamüin. Talatüsü waaʼin nümaa Jehová süka eein süpüla müin wakuwaʼipa maʼaka naaʼin niakai. Mojule waaʼin sutuma tü kasa mojuwaikalü watuma, sotusü waaʼin nükaalinjain waya süpüla wanouteʼerüin wakuwaʼipa. Sutuma müin nukuwaʼipa Jehová wamüin, aleewashii maʼin waya nümaa» (Is. 64:8).

NÜKAALINJEENA WAYA JEHOVÁ

19. ¿Jameerü waaʼin waaʼinrüle tü wekirajaaitpakalü anain?

¹⁹ Jaʼitakajeʼe waaʼinrüin tü wekirajaaitpakalü anain, eejeerü tü kaʼi mojeetkalü oʼu waaʼin maʼaka naaʼin Pablo. Nükaalinjeenapejeʼe waya Jehová süpüla nnojoluin jülüjain waaʼin tia otta talatüin waaʼin wachikuaʼa. Mayaainjeʼe eein tü kaʼi mojeetkalü oʼu waaʼin, wainmaleejeeria tü kaʼi talateetkalü oʼu waaʼin süka aleewain maʼin waya nümaa Jehová otta talatüin nia wamaa.

20. ¿Kasa ayatüinjatka waaʼinrüin?

²⁰ Anasü wachajaale sukuwaʼipa süpüla nnojoluin yüülain waaʼin sutuma tü kasa waaʼinrapuʼukat, sutuma tü alatakat wamüin jee sutuma tü kasa nnojotkalü anain watuma. Nükaalinjeena waya Jehová süpüla anain waaʼin (Sal. 143:10). Waʼatapajashaatain tü kaʼi nnojoleetkalü oʼu mojuin maʼin waaʼin, chapa waya suluʼu tü paʼaraiisükat nnojoleerü shapaain maʼin waaʼin. ¡Talateerü waaʼin waneepia sünain aʼyatawaa nümüin Jehová!