¿Süpaʼashiche mmaka süpüshuaʼa chi Maleiwakai?
Tü sümakat tü Bibliakat
Niʼrüin Maleiwa kasa süpüshuaʼa jee nuluwataain tü nüpülainkat eepünaweere shia (Proverbios 15:3; Hebreokana 4:13). Nnojotpejeʼe süküjain tü Bibliakat süpaʼain Maleiwa mmakat süpüshuaʼa. Nnojoishi suluʼuin nia tü kasa nukumajalakat, süküjain chain nia chayaa sirumatuʼu.
Nukuwaʼipa Maleiwa: Meʼrujusai chi Maleiwakai (Juan 4:24). Müshijeseʼe nnojoluin süpüla shiʼrüin nia wayuu (Juan 1:18). Saashajaapa tü Bibliakat nüchiki, süküjain chain nia chaa iipünaa, nnojotsü süküjain süpaʼain nia tü mmakat süpüshuaʼa(Isaías 6:1, 2; Alateetkat Mapeena [Apocalipsis] 4:2, 3, 8).
Nüpülee: Chashi Maleiwa sirumatuʼu, naatajatshaana suulia tü Mmakat chaa eere nia (1 Reyes 8:30). Süküjain tü Bibliakat nantüin na nüchonniikana Jeʼwaaa chaa eere nia (Job 1:6).
¿Eeshiche süpüla nükaalinjain taya Maleiwa mayaainjeʼe nnojoluin eein nia süpaʼa mmakat süpüshuaʼa?
Aa. Mayaainjeʼe chain nia sirumatuʼu jülüjashii maʼin naaʼin Maleiwa na wayuukana, nükaaliijain na jüüjüüjakana nümüin (1 Reyes 8:39; 2 Crónicas 16:9). ¿Kasa niiʼiyataka akajee jülüjain waya naaʼin jee naaʼinmajüin waya?
Wanaa sümaa waashajaain nümaa: Naapamaatüin Jehová tü wanüikikat woʼuraajapa (2 Crónicas 18:31).
Wanaa sümaa mojuin waaʼin: «Nnojoishi wattaluʼuin Jehová noulia na mojukana aaʼin otta nükaaliijain na wayuu yüülakana aaʼin» (Salmo 34:18).
Wanaa sümaa choʼujaain süküjünüin wamüin tü waaʼinrajatkat: Kekiishii maʼin waya nutuma Jehová sükajee tü nünüikikat otta nuʼunirüin tü wakuwaʼipakat süpüla anainjatüin maʼin shia (Salmo 32:8).
Tü nnojotkat pansaain nüchiki Maleiwa
Nanoujaka anain na waneinnua: Eeshi chi Maleiwakai suluʼu tü kasa nukumalakat.
Tü shiimainkat: Chashi Maleiwa chaa sirumatuʼu, nnojoishi kepiain nia yaa mmapaʼa (1 Reyes 8:27). Saashin tü Bibliakat, atüjaana aaʼuchi pülashin maʼin chi Maleiwakai sünainjee tü kasa nukumalakat, maʼaka saaʼin tü jolotsükalüirua (Salmo 19:1). Nnojoishi kepiain Maleiwa suluʼu tü kasa nukumalakat maʼaka nnojoluin kepiain wane wayuu suluʼu wanee dibujo nipintajaka. Wayaawata aaʼu nukuwaʼipa chia wayuukai sükajee tü dibujo nipintajakat. Müsia neʼe tü nukuwaʼipakat Maleiwa, jaʼyasü sükajee tü kasa nukumajakat, maʼaka saaʼin pülashin maʼin nia, kekiin maʼin nia jee aipüralin nia wayuu (Roma 1:20).
Nanoujaka anain na waneinnua: Nnojoishijamata pülain chi Maleiwakai süka nnojoluin süpaʼain nia mmakat süpüshuaʼa.
Tü shiimainkat: Tü nüpülainkat Maleiwa shia tü nukumajakalü akajee kasa süpüshuaʼa. Sükajee tü nüpülainkat eesü süpüla nütüjaain saaʼu kasa süpüshuaʼa jaʼitairü jalain shia. Nnojotsü choʼujaain nuʼunajachin chaa eere shia (Salmo 139:7).
Nanoujaka anain na waneinnua: Eeshijamata chi Maleiwakai süpaʼa mmakat süpüshuaʼa, ¿jamakaʼa sümaka Salmo 139:8 «toʼunule sirumatuʼumüin, cheechi pia tapüla jee tojoitunule tanaajaapa, yaleechi pia tapülaya»?
Tü shiimainkat: Nnojotsü maluʼuluin pütchikat tüü süpaʼain Maleiwa tü mmakat süpüshuaʼa. Tü süküjeekalü achiki shia eein süpüla nükaalinjain waya jaʼitainna jalain waya.
a Jehová nünülia Maleiwa saashin tü Bibliakat.