¿Kasa paaʼinrajatka süpüla naapajüin Maleiwa pünüiki?
Nia Jehová «chi Aapajakai sünüiki wayuu suʼuraajapa» (Salmo 65:2). Eeshii süpüla woʼuraajüin nümüin Jehová eepünaale waya, jaʼitairü jiattain wanüiki jee emeturule shia. Nücheküin Jehová «Washi», wamüinjanain nümüin, nia anaʼleekai maʼin süpüla washinjachin (Mateo 6:9). Nüküjain Jehová tü waaʼinrüinjatkat süpüla naapajüin wanüiki woʼuraajapa nümüin.
ACHUNTUINJANA WAYA NÜMÜIN JEHOVÁ NÜNÜLIALUʼU JESÚS
«Jaʼitasü kasain juchuntuin nümüin chi Tashikai tanülialuʼu, naapeerü shia jümüin» (Juan 16:23).
Wayaawata aaʼu sükajee tü nümakat Jesús nücheküin Jehová woʼuraajüin saaʼu nünülia Jesús. Nnojoishii oʼuraajüinjanain waya saaʼujee wanee ayaakuaa, wanee aapiee jee naaʼujee wanee wapüshi outakai. Woʼuraajüle nümüin Jehová nünülialuʼu Jesús watüjaa aaʼu naapajeerüin wanüiki sükajee tü naainjakat Jesús wapüleerua. Anuu tü nümakat Jesús: «Nnojoishi süpüla nürütkaain wanee wayuu nünainmüin chi Tashikai, aluʼusaʼa tayale arütkeʼerüin nia» (Juan 14:6).
PÜKÜJA NÜMÜIN TÜ SHAPAAKALÜ ATUMA PAAʼIN
«Jüküja nümüin tü shapaakalü atuma jaaʼin» (Salmo 62:8).
Puʼuraajüle nümüin Jehová müshi yootokaijaʼa paaʼin nümaa chi püshikai, aikai maʼin apüla pia. Puʼuraajapa nümüin Maleiwa nnojoishi müinjachin paashajeʼerakai saaʼin wanee karaloʼuta jee piiteʼerakuʼu müin pünüiki. Püküjainjatü nümüin tü suluʼukat paaʼin jee kojutuinjachi nia pümüin.
PUCHUNTA NÜMÜIN MALEIWA TÜ KASA ANAKAT NÜMÜIN
«Jaʼitasü kasain wachuntuin nümüin wanaapünaa sümaa tü nüchekakalü achiki, naapeeriaʼaya wanüiki» (1 Juan 5:14).
Süküjain tü Bibliakat tü naaʼinrüinjatkat Maleiwa wapüleerua jee tü waaʼinrüinjatkat süpüla talatüin naaʼin wamaa. Süpüla naapajüin wanüiki woʼuraajapa nümüin choʼujaasü wachuntuin nümüin wanaapünaa sümaa tü nüchekakat. Wounteerü tia wekirajaale sünain tü Bibliakat otta wayaawateerü saaʼu tü kasa nüchekakat. Waaʼinrüle tia naapajeerü wanüiki woʼuraajapa nümüin.
¿KASA PUCHUNTUINJATKA NÜMÜIN MALEIWA PUʼURAAJAPA?
Puchunta tü kasa choʼujaakat pümüin. Puchunta nümüin Maleiwa tü kasa choʼujaakat pümüin maʼaka saaʼin piküin, püsheʼin jee eeinjachire kepiain pia. Eesü süpüla puchuntuin nümüin anainjatüin sukuwaʼipa tü kasa püneekakat, püchecherüin paaʼin soʼunnaa sülatüin wanee kasa kapüleesü pümüin, motuin naaʼin paainjala, icheinjatüin punoula jee naaʼinmajüin pia (Lucas 11:3, 4, 13; Santiago 1:5, 17).
Puʼuraaja napüleerua na waneinnua. Anasü maʼin naaʼin wanee wayuu aijiraale maʼin na nüchonniikana, müsia neʼe tü keeʼireekat naaʼin Jehová wapüleerua, keeʼireesü naaʼin waaʼinmajiraain. Anasü maʼin woʼuraajüle süpüleerua waʼwayuuse, wachonnii, wapüshi jee waʼaleewainyuu. Müshi Santiago: «Juʼuraajiraale jüpüleeruajiraa» (Santiago 5:16).
Paapa analuʼut. Süküjain tü Bibliakat nukumajüin Maleiwa wainma kasa anasü wapüleerua. «Aluwataashi nia juya jümüin, watta saalii jüʼttia nutuma, aapüshi nia eküülü jümüin jee talatüsü maʼin jaaʼin nutuma» (Aluwataaushikana 14:17). Jülüjale waaʼin tü kasa nukumajakat Maleiwa wapüleerua, waapeerü analuʼut nümüin. Otta wanee kasa waaʼinrüinjatka süpüla waapüin analuʼut nümüin shia woonooin sümaa tü nuluwataakalü anain waya (Colosas 3:15).
AYATAʼAYA WOʼURAAJÜIN JEE NNOJO WASHAPAJAAIN AAʼIN
Eesüjaʼa mojule waaʼin nnojorüle nusoutamaatüin Maleiwa shiʼipajee tü wachuntakat nümüin. ¿Shiache sutuma nnojoluin jülüjain waya naaʼin Maleiwa? Nnojorüleejaʼa. Wekirajaa nachiki waneinnua wayuu ayatakana oʼuraajüin nümüin Maleiwa.
Anuu tü nümakat Steve, chi wachuntayüikai anülia suluʼu tü palajatkat ekirajaaya: «Müleka nnojoire toʼuraajüin ayüülaajatüitpejeʼe taya». ¿Jamüshi ayataka nia oʼuraajüin nümüin Maleiwa? Ekirajaashi nia sünain tü Bibliakat jee nütüjaaka saaʼu nuʼuraajawalinjachin waneepia. Anuu tü nümakat Steve: «Taapüin analuʼutkat nümüin Maleiwa saaʼujee nükaalinjain taya nakajee na taʼaleewainyuukana, talatüsü maʼin taaʼin maaʼulu».
¿Jamaka sukuwaʼipa Jenny mapa? Süchikijee nnojoluin naapajüin Maleiwa sünüiki saashin, anuu tü sümakat: «Wanaa sümaa mojuin maʼin taaʼin tachuntuin nümüin Maleiwa süpüla tatüjaainjatüin saaʼu jamüin maka taya». ¿Kasa shiʼraka sünainjee suʼuraajüin nümüin Maleiwa? «Sutuma toʼuraajüin nümüin Maleiwa tayaawata aaʼu jülüjain taya naaʼin. Shiasaʼa jülüjapa taaʼin tü kasa mojusü taaʼinrapuʼukat nükaalinjain taya Maleiwa süpüla nnojoluinjatüin yüülain taaʼin. Aleewasü maʼin taya nümaa Jehová süka toʼuraajüin nümüin, müshi nia maʼaka naaʼin wanee Taʼaleewain, wanee Tashi jee Tamaleiwase. Eejeechi nia waneepia tamaa otta tatüjaa aaʼu nükaalinjeerüin taya toonoole sümaa tü nuluwataakalü anain taya».
«Tayaawata aaʼulu naapajüin Jehová tanüiki. Mayaainjeʼe ayuulin chi tachonkai teʼrüin talatüin maʼin nia», müsü Isabel.
Jülüjataa waaʼin tü alatakat sümüin Isabel. Wanaa sümaa ipuoluin shia naküjain na tottootkana sümüin ayuulinjachin chi süchonkai. Mojushaatasü saaʼin otta eeshii na makana sümüin anain sujutirüle chi joʼu süleʼeruʼukai. Anuu tü sümakat: «Ojutuusü taaʼin sutuma tü aküjünakat tamüin. Achuntusü maʼin taya kaalinwaa nümüin Maleiwa». Shiasaʼa mapa, jemeika shia nümaa chi süchonkai, Gerard. Eweeniraashi nia sümaa ayuulin nia. Shiyaawatüin Isabel naapajüin Jehová tü sünüikikat. Anuu tü sümakat: «14 juya chi tachonkai jee talatüsü maʼin taya nümaa. Tayaawata aaʼulu naapajüin Jehová tanüiki. Mayaainjeʼe ayuulin chi tachonkai teʼrüin talatüin maʼin nia».
Sutuma tü sümakat Isabel sotusü waaʼin tü nümakat chi salmistakai: «Jehovákalee, piaʼala neʼe aapajaka nanüiki na wayuu anamiakana. Jimateerü naaʼin putuma otta jülüjeena naya paaʼin» (Salmo 10:17). ¿Aashin anain maʼin ayatüle woʼuraajüin nümüin Jehová?
Ashajünüsü suluʼu tü Bibliakat wainmatua nuʼuraajüin Jesús nümüin Jehová. ¿Kasa watüjaka sünainjee tü nikirajakalü anain Jesús na nikirajüinkana?