¿Jamüsü naapaka Maleiwa nikii chi Nüchonkai waaʼu?

1, 2. ¿Jamüsü choʼujaakaʼa wakaalinjünajanain? (Roma 7:22-24; piirakaa sümüin tü ayaakuaakat).

JÜLÜJATA WAAʼIN sujuichijaain wanee miichi naaʼu wanee wayuu, nnojoipejeʼe outuin nia. Choʼujaasü nükaalinjünamaatüin, müshijeseʼe nuʼwaatüin shiiʼiree niyuʼnnajachin yalejee.

² Sutuma moonooin Adán sümaa nünüiki Jehová kaainjalashii waya, niʼipünaaipaka wapüla tü kaainjalakat. Müsü wakuwaʼipa maʼaka naaʼin chi wayuu ojuttakai miichi naaʼu, müsü sujuttakai aaʼin tü kaainjalakat waaʼu müsüjeseʼe choʼujaain wakaalinjünajanain. Suluʼu tü karaloʼuta nüshajalakat Pablo namüin na chajanakana Roma, nüküjain namüin jamüin saaʼin wayuu sutuma kaainjalain naya (paashajeʼera Roma 7:22-24). «¿Jaraleechi akaalinjaka taya suulia tü teʼiruku ajaʼttajatkat sutuma outaa?» müshi nia. Müshi püreesakai naaʼin Pablo sutuma tü kaainjalaa niʼipünaalaka Adán jama nütüjaain saaʼu nnojolin eein wayuu isakat suulia outaa (Roma 6:23). Müsia neʼe wakuwaʼipa maʼaka naaʼin Pablo: müshii püreesakai waaʼin sutuma tü kaainjalaka jee tü outaakat, müsüjeseʼe choʼujaain taashinjanain waya suulia.

3. ¿Kasa weʼraka sutuma naapüin Jehová nikii chi Nüchonkai?

³ Süchikijee nüküjain Pablo «¿Jaraleechi akaalinjaka taya suulia tü teʼiruku ajaʼttajatkat sutuma outaa?», asoutushi nia: «Nia taapaka amüin analuʼut Maleiwa süka nuʼtteʼerüin taya nükajee Jesucristo chi Waseñotsekai» (Roma 7:25). Sutuma tü nümakat Pablo akatchinraasü waaʼin. Anuu tü kasa anasü weʼreetkat sutuma naapüin Jehová nikii chi Nüchonkai süpüla outaa waaʼu: motuitpa naaʼin waainjala, anasü wakuwaʼipa nümaa jee lotuinjatü wakuwaʼipa mapeena. Wekirajaale sünain tia, kooʼomüinjeerü naalin wapüla chi Maleiwa weʼreechikai atuma kasa anasü jee kojuteerü maʼin wamüin tü naaʼinrakat Jesús süka taashin waya nünainjee (Roma 15:13; Col. 1:14).

EEITPA SÜPÜLA MOTUIN NAAʼIN WAAINJALA

4, 5. ¿Jamüsü kojutukaʼa wamüin outuin Jesús saaʼu waainjala? (Eclesiastés 7:20).

⁴ Sutuma waleʼeruʼuin süchiki kaainjalaa eesü tü kasa nnojotkat anawalüin watuma, maʼaka mojuin wanüiki sümüin wayuu. Kojutusü maʼin wamüin outuin Jesús saaʼu waainjala süka eeitpain süpüla motuin naaʼin shia Jehová (paashajeʼera Eclesiastés 7:20). Ashajünüsü suluʼu tü Pütchi Aapünakat nümüin Moisés mojuleein maʼin nümüin Jehová waneirua kasa. Jamüsüjaʼa kawalaʼatale nuʼwayuuse wanee wayuu nutuma jee nuʼutule saaʼin wayuu outajachin nia saaʼujee tü naainjalakat (Lev. 20:10; Núm. 35:30, 31). Eesia waneirua kasa mojusü kaainjaleetka atuma wayuu nnojotka mojuin maʼin, jamüshiijaʼa waya kaainjalawaishii waya sükajee tü wamakat (Sant. 3:2). Müshijeseʼe nümaka David: «Taaʼinmajeerü tanüiki suulia kaainjalajüin taya sutuma» (Sal. 39:1).

⁵ Wanaa sümaa jülüjain waaʼin tü wakuwaʼipapuʼukat paala wayaawata aaʼu eein kasa mojuka atuma naaʼin wanee wayuu watuma. Anuujeseʼe sünüiki tü Bibliakat: «‹Wayuu maainjalasalii waya› wamataarüle, emeejiraashii neʼe waya otta nnojotsü wanoujain anain tü pütchi shiimain ekirajünakalü anain waya» (1 Juan 1:8).

6, 7. ¿Kasa naainjaka Jehová süpüla motuinjatüin naaʼin tü waainjalakat? (Piirakaa sümüin tü ayaakuaakat).

⁶ Naapüin Jehová nikii Jesucristo süpüla outuin nia waaʼu, sutuma tia nülatirüin woulia waainjala (Éf. 1:7). ¿Nnojotsüche kasajatüin nümüin Jehová tü waainjalakat süka motowalin shia naaʼin? Nnojottaa. Aisü maʼin nümüin kaainjarale waya (Is. 59:2).

⁷ Ashajünüsü suluʼu tü Pütchi Aapünakat nümüin Moisés süchiki kaainjarale wanee wayuu nuʼutuinjachi aaʼin wanee mürüt süpüla motuinjatüin naaʼin Maleiwa naainjala (Lev. 4:27-31-31; 17:11). Sutuma tü Pütchi Aapünakat nümüin Moisés wayaawata aaʼulu choʼujaain saainjünüin wanee kasa süpüla motuin naaʼin Maleiwa tü waainjalakat, sutumajee tia naapüin Jehová nikii chi Nüchonkai süpüla motuinjatüin naaʼin waainjala. Niyaawata aaʼu Pablo eejeerüin kasa anasü sutuma naapüin Jehová nikii chi Nüchonkai süpüla outuinjachin nia waaʼu. Wanaa sümaa nüshajüin Pablo namüin na chajanakana Corinto nüküjain namüin süchiki tü kasa mojusü naainjapuʼuka namaiwa. Müshijeseʼe nümaka namüin: «Wuleitpapejeʼe jukuwaʼipa atumawaa maaʼulu yaa otta alaʼajaanüitpa jaainjala juulia saaʼu nünülia chi Waseñotsekai Jesucristo otta sükajee tü nüpülainkat Maleiwa» (1 Cor. 6:9-11).

8. ¿Kasa wasakireʼerawalinjatka anain waaʼin süpülapünaa woʼunuin sünain tü Outkajawaakat eere Sotuin Waaʼin Outuin Jesús?

⁸ Süpülapünaa woʼunuin sünain tü Outkajawaa eere Sotuin Waaʼin Outuin Jesús, anasü wasakireʼerawaire waaʼin sünain tü kasa anasü eekat sutuma motuin naaʼin Jehová tü waainjalakat. Wanee kasa anasü eeka sünainjee, shia nnojoluinjatüin mojuin waaʼin sutuma tü kasa mojusü waaʼinrapuʼukat paala müleka wayaawajaale suulia süka watüjaain saaʼu motuin shia naaʼin Jehová. «Mayaainjeʼe tatüjaain saaʼu motuin naaʼin Jehová tü taainjalakat isasü tachiki motuin taaʼin, ayatüsia mojukuʼu müin taaʼin saalinjee tü taainjalakat», eesüjaʼa müle tü jülüjakat naaʼin wanee wayuu. Soto waaʼin niain Jehová chi motokai aaʼin saainjala wayuu jee nüneeküin chi Nüchonkai süpüla süsalainjatüin nutuma saainjala wayuu. Müsüjeseʼe nnojoluin anain jülüjale waaʼin nnojoluin motuin naaʼin Jehová waainjala jee naainjala na waneinnua. «Mülejeʼeya chuwatuuikai saaʼin luusa waaʼu maʼaka chuwatuulin shia naaʼu Maleiwa [...] müsü nülaʼajaakai saaʼin waainjala woulia sükajee nüsha Jesús, chi Nüchonkai» (1 Juan 1:6, 7). Wanoujainjatü sünain motuin naaʼin Jehová tü waainjalakat maʼaka wanoujain sünain süpüshuaʼa tü nikirajaakalü anain waya sükajee tü Bibliakat. Sutumajee naapüitpain Jehová nikii chi Nüchonkai süpüla outaa waaʼu, eeitpa süpüla motuin naaʼin tü waainjalakat maʼaka süküjünüin shia suluʼu tü Nünüikikat (Sal. 86:5).

EESÜ SÜPÜLA WOUNTUIN LOTUIN WAKUWAʼIPA

9. ¿Jamaluʼulu tü pütchikat kaainjalaa saashin tü Bibliakat? (Salmo 51:5).

⁹ Süküjapa tü Bibliakat süchiki tü kaainjalakat, nnojotsü shiain neʼe süküjain süchiki tü kasa mojusü waainjakat, shia süküjaka achiki joʼuuin waya sümaa tü kaainjalaakat (paashajeʼera Salmo 51:5). Sutuma waleʼeruʼuin süchiki kaainjalaa suchuntaʼawalin waaʼin waaʼinrüin kasa mojusü, ayuuishii waya, laülaashii waya jee outushii waya. Jaʼitakajeʼe wanee joʼuu ayuuishi jee outushi mayaainjeʼe nnojoluin kasain naainjalain jee weʼrüin müliain jee outuin wayuu mayaainjeʼe anamiain naya. Alatüsü tia wamüin wapüshuaʼaleʼeya sutuma nüchooin waya Adán.

10. ¿Kasa neʼraka Adán sümaa Eva sünainjee kaainjalain naya?

¹⁰ ¿Jamüsüche naaʼin Adán sümaa Eva kaainjalapa naya jee sutuma nnojoluitpain lotuin nakuwaʼipa? Mojusü maʼin naaʼin Adán sümaa Eva jama «nayaawatüin suluʼu naaʼin» mojuin maʼin tü naaʼinrakat nümüin Maleiwa (Roma 2:15). Nayaawata aaʼu mojuin maʼin tü kasa naainjakat müsüjeseʼe neʼrapa masheʼin naya, japüisü naaʼin jee ounjulaashii naya nuulia Maleiwa (Gén. 3:7, 8). Neʼrüipaka sünainjee tü kaainjalakat shapawaa aaʼin, wainmajaa aaʼin jee eʼrüshii namüliala. Maʼleeinjatia nakuwaʼipa outaleepaʼaya naya (Gén. 3:16-19).

11. ¿Kasa weʼraka sünainjee waleʼeruʼuin süchiki kaainjalaa?

¹¹ Süka waleʼeruʼuin süchiki kaainjalaa maʼaka naaʼin Adán sümaa Eva, eʼrüshii waya wamüliala, shapaasü waaʼin jee müliasü waaʼin. Jaʼitakajeʼe wanouteʼereein wanee kasa sünain wakuwaʼipa eesü tü kasa isawaikat wachiki. Nnojoishii wayain neʼe müin akuwaʼipa, maʼleesia sukuwaʼipa wayuu süpüshuaʼa. «Nnojotsü sücheküin tü nukumalakat Maleiwa shiyüülajünajatüin, nuuʼulaapejeʼe Maleiwa sülatüin tia» (Roma 8:20). Jamüshiijaʼa noʼutku na süʼlaülashiikana mma nachajaain sukuwaʼipa süpüla wuleinjatüin tü mmakat suulia tü wasuurakat, nachajaain sukuwaʼipa süpüla nnojoluinjatüin eein wayuu mojulaasü jee nnojoluinjatüin sütkaain wayuu jee aneeshii natuma na wayuu maʼletsekana, isapejeʼe shia nachiki. Eekajasaʼa wayakana weʼreerü kasa anasü nutuma Jehová saaʼujee naapüin nikii chi Nüchonkai süpüla outajachin nia waaʼu.

12. ¿Kasa anasü weʼreetka sutuma naapüin Jehová nikii chi Nüchonkai süpüla outaa waaʼu?

¹² Sutuma naapüin Maleiwa nikii chi Nüchonkai süpüla outaa waaʼu, taasheerü «tü kasa nukumalakat suulia kaainjalaa jee suulia outaa» (Roma 8:21). Chapa waya suluʼu tü paʼaraiisükat loteerü wakuwaʼipa, nnojoleena ayuulin waya, mojuin waaʼin jee nnojoleena japülin waaʼin jee shapaain waaʼin. Sutuma naapajiraain nikii Jesús waaʼu nüneeküin nia Jehová süpüla nuluwataainjachin waaʼu, süpüla nunouteʼerüin tü kasa alatakat wamüin jee anain wakuwaʼipa nutuma (Is. 9:6, 7).

13. ¿Kasa amaa eeka süpüla wasakireʼerüin anain waaʼin süpülapünaa woʼunuin sünain tü Outkajawaakat eere Sotuin Waaʼin Outuin Jesús?

¹³ Jülüjataa waaʼin loteerüin maʼin wakuwaʼipa chapa waya suluʼu tü paʼaraiisükat. Atamaajeena waya sümaa nnojoluin kasain alin wanain, nnojoleerü shapaain waaʼin saaʼu tü shiküinjatkat aaʼu wapüshi jee nnojoleena ayuulin jee outuin waya. «Tü kasa waʼatapajakat müsü saaʼalijakai saaʼin waaʼin maʼaka saaʼalijünüin wanee anuwa sutuma karapin. Shiimain shikeraajeerüin tia jee nnojoleerü aʼwüinjaain shia» (Heb. 6:18, 19). Maʼaka saaʼalijünüin wanee anuwa süka wanee karapin, akatchinraasü tü wanoulakat jülüjale waaʼin tü kasa eejeetkat mapeena. Wanoujain maʼin sünain naapeerüin «kasa anasü Jehová namüin na wayuu achajaakana maʼin nüchiki» (Heb. 11:6). Sutuma naapüin Jehová nikii chi Nüchonkai süpüla outaa waaʼu, amülialaasü waaʼin jee waʼatapajüin kasa anasü mapeena.

ANASÜ WAKUWAʼIPA NÜMAA MALEIWA

14. (1) Kaainjalapa Adán sümaa Eva, ¿jamüsü nakuwaʼipa na wayuukana nümaa Maleiwa? (2) ¿Jamüsü mojushiikaʼa nümüin Maleiwa tü kaainjalaakat?

¹⁴ Nnojoluitpa anain nakuwaʼipa na wayuukana nümaa Maleiwa sutumajee kaainjalain Adán sümaa Eva (Col. 1:21). Süküjain tü Bibliakat nüʼünüüinapa Maleiwa na wayuukana (Roma 8:7, 8). Sutuma lotuin maʼin nukuwaʼipa Maleiwa, mojushiisü nümüin tü kaainjalaakat. Anuu tü sümakat tü Bibliakat süchiki nukuwaʼipa Maleiwa: «Wulesü maʼin tü poʼukot süpüla piirakaainjachin sümüin kasa mojusü, nnojotsü anashiin pümüin tü mojulawaakat» (Hab. 1:13). Soʼujeʼereeya kaainjalain Adán sümaa Eva amojujaasü nakuwaʼipa na wayuukana nümaa Jehová. Sükajee naapüin Jehová nikii chi Nüchonkai süpüla outaa waaʼu, eeitpa süpüla anajiraain waya nümaa Maleiwa.

15. Sutuma naapajiraain nikii Jesús süpüla outaa waaʼu, ¿jamüsü eeitpakaʼa süpüla anajiraain wayuu nümaa Maleiwa?

¹⁵ Süküjain tü Bibliakat naapajiraain Jesús nikii saaʼu waainjala süpüla «anajiraainjanain waya wachikuaʼa nümaa Maleiwa» (1 Juan 2:2). Sutuma naapajiraain nikii Jesús süpüla outaa waaʼu, ¿jamüsü eeitpakaʼa süpüla anajiraain wayuu nümaa Maleiwa? Shia süka müin nuwalaajakai aaʼin Cristo Jesús naainjala na wayuukana süpüla nuʼtteʼerüinjanain naya suulia naainjala, eeitpaka süpüla lotuin nakuwaʼipa noʼuluʼu Maleiwa (Roma 3:23-26). Na wayuu aʼyataapuʼukana nümüin Jehová süpülapünaa nüntüin Jesús mmapaʼamüin, lotuitpaʼaya nakuwaʼipa noʼuluʼu Maleiwa sükajee outuin Jesús saaʼu naainjala (Gén. 15:1, 6). Lotusü nakuwaʼipa naya wayuukana noʼuluʼu Jehová süka nütüjaain saaʼu naapajiraajeechin Jesús nikii süpüla outaa saaʼu saainjala wayuu (Is. 46:10). Sutumajee naapajiraain nikii Jesús süpüla outaa saaʼu saainjala wayuu, eeitpa süpüla anajiraain na wayuukana nümaa Maleiwa.

16. ¿Kasa amaa eeka süpüla wasakireʼerüin anain waaʼin süpülapünaa woʼunuin sünain tü Outkajawaakat eere Sotuin Waaʼin Outuin Jesús? (Piirakaa sümüin tü ayaakuaakat).

¹⁶ Wane kasa anasü eeka sünainjee anajiraainnapa waya nümaa Maleiwa shia eeitpain süpüla «Washikai» wamüin nümüin Jehová (Mat. 6:9). Waküjapa niain Maleiwa chi Waʼaleewainkai jee chi Washikai, waküja shia sümaa nnojoluin yaletüin waaʼin otta sümaa kojutuin nia wamüin, jama waleʼeruʼuin tü kaainjalaakat. Eeinnapa süpüla aleewain waya nümaa Jehová sutuma naapüin Jehová nikii chi Nüchonkai süpüla outaa waaʼu, nnojotsü shiain sutumajee wakuwaʼipa wamüiwaʼa. «Nükajee Cristo, anajiraaitpa nutuma Maleiwa kasa süpüshuaʼa nümaa, [...] müitpa sukuwaʼipa tia sükajee tü nüsha amülakat soʼu nükachennüin sünain wanee wunuʼu süpüla outaa» (Col. 1:19, 20). Müsüjeseʼe eeitpa süpüla anajiraain waya nümaa Maleiwa mayaainjeʼe waleʼeruʼuin süchiki kaainjalaa.

AMÜLIALAASÜ NAAʼIN JEHOVÁ WAALIN

17. ¿Jamüsü wayaawatakaʼa saaʼu sümülialaain naaʼin Jehová waalin sükajee naapüin nikii chi Nüchonkai süpüla outaa saaʼu waainjala? (Éfeso 2:4, 5).

¹⁷ Süka naapüin Jehová nikii chi Nüchonkai, wayaawata aaʼu amüliajülin maʼin chi Maleiwakai «katüsü woʼu nutuma wanaa nümaa Cristo, jaʼitakajeʼe neʼe wanaa sümaa müin outakai waaʼin saalinjee tü waainjalakat» (paashajeʼera Éfeso 2:4, 5). Maʼaka choʼujaain nükaalinjünüin chi wayuu ojuttakai miichi naaʼu, müshiʼiya na wayuu ayaawatakana saaʼu choʼujaain namüin Maleiwa choʼujaasü nakaalinjünajanain süpüla taashin naya suulia naainjala (Aluw. 13:48). Müshijeseʼe nükaalinjain Jehová naya wayuukana süpüla nayaawatüin saaʼu tü pütchi anakat maʼin süchiki nuluwataainjachin, süpüla neʼraajüinjachin nia jee neʼraajüinjachin chi Nüchonkai (Juan 17:3). Mayaainjeʼe nüchajaain sukuwaʼipa Satanás süpüla nnojoluin nikeraajüin Maleiwa tü nüchekakat napüleerua na wayuukana, nnojotsü nuuntuin Satanás tia.

18. ¿Kasa eeka sünainjee naapüin Jehová nikii chi Nüchonkai?

¹⁸ Nnojotsü shiain neʼe naapüin Jehová nikii chi Nüchonkai süpüla outaa waaʼu naaʼinrüinña tia süpüla sütüjaanüin aaʼu alawaain tü nüküjakat Satanás nüchiki Jehová chaa Edén (Gén. 3:1-5, 15). Sutuma naapajiraain nikii Jesús saaʼu waainjala, sütüjaaitpa aaʼu wayuu niain Jehová anaka süpüla aluwatawaa otta kojutuinjachin nia sümüin wayuu. Sutuma alin waya nüpüla Maleiwa, taashinnapa waya suulia kaainjalaa jee outaa, eeitpa süpüla waʼyataain nümüin Jehová süka süpüshuaʼa waaʼin, mayaa wasoutuin niʼipajee Satanás chi ojuyaajakai Jehová (Prov. 27:11). Talatashaatasü maʼin waaʼin süka naapüin Jehová nikii chi Nüchonkai süpüla outajachin nia waaʼu. Sünain tü wane ekirajaayakat wekirajaajeerü anain tü waaʼinrajatkat süpüla jaʼyain waaʼu kojutuin wamüin tü naaʼinrakat Jehová wapüleerua.