Paaʼinrajatka kojutule pümüin naapüin Jehová nikii chi Nüchonkai paaʼu

1, 2. (1) ¿Kasa waaʼinreeka amüin jülüjale waaʼin naapajiraain nikii Jesús waaʼu? (2) ¿Jamüsü waaʼinrajatkaʼa tia? (2 Corinto 5:14, 15; piirakaa sümüin tü ayaakuaakat).

JÜLÜJATAA PAAʼIN piyuʼnnuin suluʼujee wanee miichi ojuichijaaka. ¿Aashin talatüin paaʼin nümaa chi wayuu akaalinjakai pia? Püküjamaateerü nümüin kojutuin pümüin tü naaʼinrakat püpüleerua jee nnojoleerüin motuin shia paaʼin.

² Wekirajaaitpa anain choʼujaain wamüin wakaalinjünüin süpüla taashinjanain waya suulia kaainjalaa, nia Jehová akaalinjaka waya. Sutuma naapüin Jehová nikii chi Nüchonkai eeitpa süpüla motuin naaʼin Jehová waainjala, anain wakuwaʼipa nümaa otta lotuin wakuwaʼipa mapeena. Sutuma naaʼinrüin tia Jehová eeitpa süpüla katüin woʼu waneepia suluʼu tü mma nuluwataainjatkalü aaʼu. Watüjaa aaʼu alin waya nüpüla Jesús süka naapajiraain nikii waaʼu otta watüjaa aaʼu aitüjüliinña wayuu nüpüla süpülapünaa nüntüin yaa mmapaʼa (Prov. 8:30, 31). «Sutuma naapajiraain nikii Cristo waaʼu, waaʼinrajatü tü nuluwataakalü anain waya», müshi Pablo (paashajeʼera 2 Corinto 5:14, 15). Sünainjee tia pütchikat wayaawata aaʼu jaʼyainjatüin saaʼu wakuwaʼipa kojutuin wamüin tü naaʼinrakat Jesús wapüleerua jee nnojoluinjatü motuin shia waaʼin.

3. ¿Jamüsü naatayaa makaʼa tü waaʼinrajatkat waneʼewai wakua süpüla kojutuin wamüin naapajiraain nikii Jesús waaʼu?

³ Eesü tü kasa paaʼinrajatkat piakai süpüla jaʼyain saaʼu pukuwaʼipa kojutuin pümüin naapajiraain nikii Jesús paaʼu. Eesü nnojorüle wanaawain tü waaʼinrakat waneʼewai wakua. Jülüjataa waaʼin eein apünüinshii wayuu oʼunajaainjanakana suluʼumüin wanee mma, naatapejeʼe tü mma noʼunuinjatkalü aluʼujee otta naatayaa müsü tü wopu noʼunajatkalü aluʼu süpüla nantüinjanain chamüin. Akaʼaya neʼe piakai eesia süpüla paaʼinrüin waneirua kasa naatakalü suulia tü naaʼinrakat na wane wayuukana jaʼyeetkalü aaʼu kojutuin pümüin naapajiraain nikii Jesús paaʼu. Ekirajaayakat tüü, napülajatü na wayuu ekirajaakana sünain tü Bibliakat, na anoujashii woutiisakana otta na wawalayuu aleʼejeekana nünainmüin Jehová nachikuaʼa.

NA WAYUU EKIRAJAAKANA SÜNAIN TÜ BIBLIAKAT

4. ¿Jamaluʼulu nütüjaain saaʼu Jehová tü suluʼukat naaʼin na wayuu ekirajaakana sünain tü Bibliakat?

⁴ Pikirajaale sünain tü Bibliakat shia süka aleeweein Jehová pümaa jee nükaalinjeein pia süpüla pürütkaain nünainmüin (Juan 6:44; Aluw. 13:48). Saashin tü Bibliakat «nia Jehová atüjaaka saaʼu tü suluʼukat waaʼin». Tia maluʼulu niʼrüin Jehová piiʼiratüin pukuwaʼipa süpüla paaʼinrüin tü nüchekakat püpüleerua jee püchajaain sukuwaʼipa süpüla piʼraajüin tü nukuwaʼipakat sümaa talatüin naaʼin pümaa (Prov. 17:3: 27:11). Naapüin Jehová nikii chi Nüchonkai paaʼu shiiʼiree aleewain maʼin pia nümaa (Roma 5:10, 11). Soteerü shia waaʼin waneepia.

5. ¿Jamüsü anakaʼa naaʼinrüle na wayuu ekirajaakana sünain tü Bibliakat tü ashajünakat suluʼu Filipos 3:16?

⁵ Kojutule wamüin naapüin Jehová nikii chi Nüchonkai waaʼu, waainjeerü tü nümakat Pablo namüin na anoujashii chajanakana Filipo. «Eerejeʼeya wanee kasa waaʼinraka shiiʼiree wakooʼomüinreein waʼyataain nümüin Maleiwa, ayataʼaya waaʼinrüin shia», müshi nia (Filip 3:16). Tia maluʼulu nnojoleerüin eein wanee kasa akayaleʼereenaka waya suulia tü wopu kaluʼukat kataa oʼuu (Mat. 7:14; Luc. 9:62).

6. ¿Kasa naaʼinrajatka na wayuu ekirajaakana sünain tü Bibliakat isale nachiki wanee kasa? (Deuteronomio 30:11-14; piirakaa sümüin tü ayaakuaakat).

⁶ Kapüleere pümüin paapaain sümaa wanee pütchi sümaka tü Bibliakat, pikirajaa sooʼomüin süchiki otta puchunta kaalinwaa nümüin Jehová süpüla piyaawatüin maʼin saaʼu (Sal. 86:11). Ayatüleʼejeeya kapüleein pümüin anashi pikirajaale sünain wanee pütchi naata, nnojotpejeʼe puuʼulaainjatüin suulia ekirajawaa sünain tü Bibliakat, jama eein süpüla piyaawatüin saaʼu mapa. Isale püchiki puuʼulaain suulia aaʼinraa wanee kasa mojuka nümüin Maleiwa anasü sotule paaʼin nnojoleerüin nuchuntuin Jehová wanee kasa iseetka püchiki otta nütüjaa aaʼu püleʼeruʼuin süchiki kaainjalaa. Puunteerü poonooin sümaa tü nuchuntakat Jehová pümüin (paashajeʼera Deuteronomio 30:11-14). Nükaalinjeechi pia Jehová (Is. 41:10, 13; 1 Cor. 10:13). Nnojo piyüülajaain isale püchiki wanee kasa. Jalia jülüjakuʼu majayaa paaʼin tü kasa isakat püchiki. Shia anaka aluʼu sotule paaʼin tü kasa anasü naaʼinrakat Jehová püpüleerua maʼaka saaʼin naapüin nikii chi Nüchonkai paaʼu. Shiimainre alin püpüla Maleiwa poonoojeerü amaa tü nuluwataakalü anain pia, nnojotsü kapüleein tia makat (1 Juan 5:3).a

7. ¿Kasa nasakireʼerüinjatka anain naaʼin na ekirajaakana sünain tü Bibliakat namaa na wayuu kachooinkana naya?

⁷ Pikirajünüle sünain tü Bibliakat natuma na wayuu kachooinkana pia shia süka alin maʼin pia napüla. «Jürütkaa nünainmüin Maleiwa, nürütkaajeechika jünainmüin», müsü tü Bibliakat (Sant. 4:8; 1 Crón. 28:9). Paʼaleewajaale nümaa Jehová otta pürütkaale nünainmüin aleeweechi Jehová pümaa. Nnojoishi alin neʼe pia nüpüla Jehová sutuma nanoujain neʼe na püpüshikana, aleeweeshi nia pümaa, naapüinjeseʼe nikii chi Nüchonkai paaʼu, motojoyoo shia paaʼin (Roma 5:1, 2). Soʼunnaa sükalia tü Outkajawaa eere Sotuin Waaʼin Outuin Jesús, anashi püsakirüle paaʼin kojutule pümüin tü naainjakat Jesús püpüleerua jee anain püchajaale sukuwaʼipa süpüla pukooʼomüinrüin piʼyataain nümüin Jehová. Paaʼinrüle tia jaʼyeerü saaʼu pukuwaʼipa kojutuin pümüin naapüin Jehová nikii chi Nüchonkai paaʼu.b

NA ANOUJASHII WOUTIISAKANA

8. ¿Kasa naaʼinrüitka na anoujashii woutiisakana sutuma kanoulain naya nünain Jehová otta nünain Jesús?

⁸ Woutiisashi pia süka punoujain sünain aneerüin pukuwaʼipa sutuma naapüin Jehová nikii chi Nüchonkai paaʼu. Punouteʼerüitpa pukuwaʼipa süpüla aleewain pia nümaa Jehová otta poonooin nümaa. Paaʼinrüin tü nümakat Jesús süchiki aküjaa pütchi otta ekirajaa wayuu. Paapüin paaʼin nümüin Jehová otta woutiisashi pia. Eesüjaʼa süpüleeruaanüle paaʼin saalinjee punoujain nünain Jehová (2 Tim. 3:12). Sutuma püchecherüin paaʼin otta katchin punoula jaʼyasü saaʼu pukuwaʼipa alin püpüla Jehová otta talatüin paaʼin nümaa süka naapüin nikii chi Nüchonkai paaʼu (Heb. 12:2, 3).

9. ¿Kasa eejüinjatka oulia naaʼin na anoujashii woutiisakana?

⁹ Kakaliaichire pia woutiisain eejüinjatü paaʼin suulia nnojoluin kojutuin maʼin pümüin naapüin Jehová nikii chi Nüchonkai paaʼu. Anuu tü alatakat namüin na anoujashii chajanakana Éfeso, mayaainjeʼe talatüin naaʼin Jesús namaa sutuma tü kasa naaʼinrakat «nnojolitchipa alin maʼin püpüla Maleiwa maʼakaapuʼu alin nia püpüla», müshi Jesús namüin (Apoc. 2:3, 4). Anuu tü watüjakat sünainjee tü nümakat Jesús: Eeshijaʼa niʼyataale neʼe wanee anoujashi nümüin Jehová sooʼopünaa naaʼin, eeshijaʼa nuʼuraajawaire, nüküjawaire pütchi jee nuʼunawaire sünain tü outkajawaakat sümaa nnojoluin naaʼin sünain aaʼinraa tia. ¿Kasa waaʼinrajatka weʼrüle nnojoluin miyoʼuin maʼin tü naalinkat Jehová wapüla maʼakaapuʼu paala?

10. ¿Jamüsü anakaʼa waaʼinrüle tü ashajünakat suluʼu 1 Timoteo 4:13, 15?

¹⁰ «Püsakireʼera paaʼin sünain tia, piʼyataa maʼin sünain [tü kasa katchinjeetkalü atuma punoula]», müshi Pablo nümüin Timoteo (paashajeʼera 1 Timoteo 4:13, 15). Puunteerü paaʼinrüin tü nümakat Pablo püchajaale sukuwaʼipa süpüla pukooʼomüinrüin piʼyataain nümüin Jehová «süka süpüshuaʼa paaʼin» (Roma 12:11). Jamüshijaʼa pia jülüjeesü paaʼin tü ekirajünakalü anain sünain tü outkajawaakat jee anasü yapatüjürüle shia putuma pipialuʼujee. Atüjeechi maʼin pia sünainjee tü pikirajaakalü anain pikirajaale pümüiwaʼa eere jimatuulin. Paaʼinrüle süpüshuaʼa tia, talateerü maʼin paaʼin nümaa Jehová sutuma naapüin nikii chi Nüchonkai paaʼu jee miyoʼujeerü maʼin tü naalinkat püpüla maʼaka miyoʼuin suchuwala wanee siki sojoʼttaanüle sukua süpüla chuwatüin maʼin shia. Soʼunnaa sükalia tü Outkajawaakat eere Sotuin Waaʼin Outuin Jesús, anasü jülüjawaire waaʼin tü kasa anasü weʼrakat sünainjee waʼyataain nümüin Jehová. Waaʼinrüle tia kojutuleejeeria maʼin wamüin tü naaʼinrakat Jehová wapüleerua otta aleeweena maʼin waya nümaa.

11, 12. Nnojorüle waaʼin sünain aʼyatawaa nümüin Jehová, ¿shiache sutuma nnojoluitpain naapüin wamüin tü nüpülainkat? (Piirakaa sümüin tü ayaakuaakat).

¹¹ Jalia sümalajaayaai wanoula weʼrüle müin nnojoliikai waʼyataain nümüin Jehová süka süpüshuaʼa waaʼin otta nnojotsü anain jülüjale waaʼin nnojoluitpain naapüin wamüin Jehová tü nüpülainkat. Anuu tü nümakat Pablo süchiki tü alatakat nümüin: «Jaʼitakajeʼe taluwanaajuushire sünain. Taaʼinrajatia neʼe tia, jama shiain tü aʼyatawaa eʼitaanakat tajapuluʼu» (1 Cor. 9:17). ¿Jamaluʼutche tü nümakat?

¹² Eesü kaʼi nnojotpuʼuka oʼu naaʼin Pablo sünain aküjaa pütchi. Mayaapejeʼe sülatawalin tia nümüin Pablo ayatüshia nia aküjain pütchi. Anashii waaʼinrüle tü naainjapuʼukat Pablo, anashii waʼyataale nümüin Jehová mayaainjeʼe nnojoluin waaʼin sünain, jama watüjaain saaʼu shiain tü anakat süpüla waaʼinrüin. Wachuntule kaalinwaa nümüin Jehová, niʼitaajeerü suluʼu waaʼin waaʼinreein sümüin wanee kasa jee wounteerü waaʼinrüin shia nutuma (Filip. 2:13). Anasü shiale waaʼinmaain maʼin waʼyataain nümüin Jehová. Waaʼinrüle tia miyoʼujeerü maʼin tü naalinkat Jehová wapüla jee aʼyataweejeerü waaʼin nümüin süka süpüshuaʼa waaʼin.

13. ¿Jamüsü sukuwaʼipa süpüla watüjaain saaʼu pansaale wakuwaʼipa sümaa tü nüchekakat Maleiwa wapüleerua?

¹³ Anuu tü ashajünakat suluʼu 2 Corinto 13:5: «Ayataʼaya jüsakireʼerüin jaaʼin icherejeʼeya jia süchiirua tü junoujakalü anain, jiyaawatüinjatpejeʼe saaʼu analejeʼeya tia jaaʼinrakat». Anasü wasakireʼerüle waaʼin sünain tüü: «¿Shiache taaʼinmaaka maʼin tü aʼyatawaakat nümüin Maleiwa otta tü kasa anakat noʼuluʼu? ¿Jaʼyasüche saaʼu takuwaʼipa talerajüin tü kasa mojusükat sünainjee tü muusika taapakat otta tü peliikula tanajakat? ¿Anasüche saaʼin wayuu sutuma tü tamakat jee tü taaʼinrakat?» (Sal. 97:10, Mat. 6:33; Éf. 4:2, 3). Wasakireein waaʼin sünain tia soʼunnaa sükalia tü Outkajawaakat eere Sotuin Waaʼin Outuin Jesús. Jülüjawaire waaʼin tü kasa anasü naaʼinrakat Jehová otta Jesús wapüleerua aʼyataweejeerü waaʼin nümüin Jehová süka süpüshuaʼa waaʼin jee waainjeerü kasakat süpüshuaʼa shiiʼiree kojutuinjachin watuma Cristo.

NA WAWALAYUU ALEʼEJEEKANA NÜNAINMÜIN JEHOVÁ NACHIKUAʼA

14. ¿Jamüshii nooʼulaaka waneinnua wawalayuu suulia outkajawaa?

¹⁴ Mayaainjeʼe kakaliain waneinnua wawalayuu sünain aʼyatawaa nümüin Jehová, ooʼulaashii naya mapa suulia outkajawaa. Eesüjaʼa sülatüle tia namüin süka shiain naaʼinmaain maʼin tü kasa alatawaikat namüin (Luc. 21:34). Eeshii na amalajaakana anoula sutuma saainjünüin wanee kasa namüin nutuma wanee wawala (Sant. 3:2). Otta eeshii na aainjakana wanee kasa mojusü. Nnojoliipejeʼe naya achuntuin kaalinwaa sutuma japülin naya saaʼujee tü naainjalakat. Müle pukuwaʼipa, ¿kaseerü paaʼinraka sutuma pütüjaain saaʼu naapüin Jehová nikii chi Nüchonkai paaʼu?

15. ¿Niyüülajüinche Jehová na wawalayuu ooʼulaakana suulia outkajawaa? (Ezequiel 34:11, 12, 16).

¹⁵ Anasü jülüjale paaʼin nnojoluin niyüülajüin Jehová na akayalaakana nuulia. Müshii naya nümüin maʼaka saaʼin wanee naʼanneetsechon amülouika jee nüchajaain maʼin nachiki. Nükaalinjain naya otta nükatchinrüin nanoula naleʼejeere nachikuaʼa nünainmüin (paashajeʼera Ezequiel 34:11, 12, 16). ¿Ayatüshiche alin pia nüpüla Jehová? Jamüsaʼa shia. Sutuma paashajeʼerüin rewiisütakat tüü, jaʼyasü paaʼu alinña püpüla Jehová. Jülüjeesü paaʼin nürütkeʼerüin pia Jehová nünainmüin süka niʼrüin anain tü suluʼukat paaʼin jee keeʼireeshaatasü naaʼin püleʼejüinjachin püchikuaʼa nünainmüin jee puutkajaain wamaa.

16. ¿Kasa naaʼinrajatka na wawalayuu aleʼejeekana nachikuaʼa nünainmüin Jehová? (Piirakaa sümüin tü ayaakuaakat).

¹⁶ Anasü maʼin tü pütchi ashajünakat suluʼu tü poyeetokot Jehová desea que vuelva, müsü mayaa: «Nükaalinjeechi pia Jehová süpüla püleʼejüinjachin nünainmüin otta aleewain pia püchikuaʼa nümaa. Nükaalinjeechi pia Jehová suulia shapaain maʼin paaʼin sutuma tü kasa alatawaikat pümüin. Nümülialeerü paaʼin Jehová süpüla anain paaʼin püchikuaʼa mojuirüle paaʼin atumawaa. Moteerü naaʼin Jehová paainjala otta nükaalinjeechi pia suulia sotokuʼu müin paaʼin tü kasa mojusü paaʼinrapuʼukat. Pükaalinjünapa nutuma Jehová keeʼireejeerü paaʼin piʼyataain püchikuaʼa nümüin namaa na wawalayuukana». Anasü jülüjale paaʼin nakaalinjeein pia na laülaashiikana, müshii naya «maʼaka saaʼin wanee ounjulaaya suulia joutai otta suulia juya wawaimaajatü» (Is. 32:2). Jülüjeesü paaʼin tü punouteʼerüinjatkat sünain pukuwaʼipa süpüla aleewainjachin pia püchikuaʼa nümaa Jehová (Is. 1:18; 1 Ped. 2:25). Anashi puutkajaʼawaire namaa na wawalayuukana jee püküjale namüin na laülaashiikana püleʼejeein püchikuaʼa nünainmüin Jehová otta puutkajaweein wamaa. Naküjeerü pümüin pikirajüneechin sünain tü Bibliakat nutuma wanee wawala maʼaka jeʼra kashi. Nükaalinjeechi pia Jehová, jama niʼrüin süpüshuaʼa tü paaʼinrakat sutuma kojutuin pümüin naapüin nikii chi Nüchonkai paaʼu.

¿KASEERÜ PAAʼINRAKA SUTUMA KOJUTUIN PÜMÜIN TÜ NAAʼINRAKAT JEHOVÁ PÜPÜLEERUA?

17, 18. ¿Kasa anaka süpüla waaʼinrüin soʼunnaa sükalia tü Outkajawaa eere Sotuin Outuin Jesús?

¹⁷ Naashin Jesús naapüin Maleiwa «nikii chi waneeshikai Nüchon süpüla nnojoliinjanain amüloulin na wayuu anoujakana nünain. Neʼreenaka suluʼujee tia kataa oʼuu süpüla kaʼikat süpüshuaʼa» (Juan 3:16). Nnojoluinjatü motuin waaʼin naapüin Jehová nikii chi Nüchonkai shiiʼiree taashinjanain waya suulia kaainjalaa jee outaa (Roma 3:23, 24; 2 Cor. 6:1). Soʼunnaa sükalia tü Outkajawaa eere Sotuin Waaʼin Outuin Jesús anasü jülüjale waaʼin miyoʼuin maʼin tü waalinkat nüpüla Jehová otta Jesús otta jaʼyainjatü saaʼu wakuwaʼipa alinña naya wapüla.

¹⁸ Eesüjaʼa naatayaa müle tü waaʼinrakat waneʼewai wakua süpüla jaʼyain saaʼu wakuwaʼipa kojutuin wamüin tü naaʼinrakat Jehová wapüleerua. Eʼreenapejeʼe anaa nutuma Maleiwa wapüshuaʼa waya anoujashiikana, jama nnojoluin waaʼinrüin tü suchuntaakat neʼe waaʼin, shia waaʼinraka tü nuluwataakalü anain chi outakai wapüleerua (2 Cor. 5:15).