Wanee ekirajaaya jeketü süpüla oʼttaa sünain ekirajaa
1. ¿Kasa jeketüinjatka ojuʼitüin sünain La Atalaya süpülajatka wayuu süpüshuaʼa? ¿Kasapülajatü shia?
1 Soʼujee kashikat tüseena ojuʼiteerü wanee pütchi jeketü süpüla woʼttüin sünain ekirajaa sünain tü Wiwüliakat suluʼu La Atalaya süpülajatka wayuu süpüshuaʼa. Müsü sünülia: «Enseñanzas de la Palabra de Dios». Mayaapejeʼe watüjaain saaʼu wainmeerüin wayuu anaka amüin aashajeʼeraa tia pütchikat, ayuʼluushi shia süpüla pikirajüin wayuu.
2. ¿Kasa sünainka tü ekirajaayakat?
2 Tü sünainkat. Tü sünüliakat otta tü sünüliachenkat süpülajatü nasakinnüin na wayuukana nekirajünapa. Eʼitaanüsü tü wersiikulo aashajeʼennajatkat, nnojotsü ashajünüin tü sümakat. Tia süpülajatü saashajeʼennüin suluʼujee tü Wiwüliakat. Süka nnojoluin miyoʼuin maʼin tü pütchikat eesü süpüla shikirajaanüin anain soʼuluʼu tü piichikat. Otta tü ekirajaayakat süjütüin waya sünainmüin tü karalouktakat Kasa shikirajaka süpüla mapüleein wamüin waʼwanajaain tü wekirajakat aka anapa süpüla waainjüin shia.
3. ¿Kasa waainjüinjatka süpüla woʼttüin sünain ekirajaa wayuu sünain tü Wiwüliakat soʼuluʼu nepia?
3 Tü waainjüinjatkat süka. Püküjapa pütchi süka tü rewiisütakat, püsakira na wayuukana süpüla kamalain namüin tü saashajaakat achiki tü ekirajaayakat. Tü rewiisüta ojuʼitakat eneeroʼu 1, aashajaasü süchiki kojutüin maʼin tü Wiwüliakat. Eeshi süpüla pümüin: «¿Nünüikimaajatche Maleiwa tü Wiwüliakat shiataapa neʼe wanee karaloukta anaka ashajia? [Puuʼulaa nüsouktai.] Taküjeein pümüin wanee kasa sünainpünaakat tia». Piiʼiyata tü palajatkat asakiraa, paashajeʼera tü palajatkat pütchi otta püchajaa tü wersiikulo ashajünakat yala. Paashajeʼera süchikuaʼa tü asakiraakat otta püma nümüin nüsouktai. Pikiraja wayuu wanaapünaa sümaa tü anakat süpüla natüjaain aaʼu, paainja shia sükajee tü asakiraa eekat süpüla pachiiruaain shia. Süpülapünaa puʼunüin paashajeʼera nümüin tü wanee asakiraakat otta püküja joujainjachin püleʼejüin süpüla pikirajüin nia sünain. Püleʼeja semaanawai süpüla pikirajüin nia sooʼomüin tü ekirajaayakat süntaleepa wanee rewiisüta jeketü. Tü wanee anakat süpüla paaʼinrüin shia pikirajüin nia watuwoʼushi otta pümüin nümüin pikirajeein nia sünain tü Wiwüliakat. Eesü süpüla piiʼiyatüin jamüin sukuwaʼipa sükajee tü pütchi suluʼukat tü rewiisütakat.
4. ¿Kasa waainjüinjatka süpüla wekirajüin sükajee tü ekirajaayakat wouyantapa wachikuaʼa?
4 Pütchikat tüü, sükaaliinjeena waya weʼikajaʼawaipa tü rewiisütakat namüin na achuntakana shia otta wouyantapa wachikuaʼa. Eeshi süpüla pümüin: «Eesü wanee pütchi suluʼu La Atalaya. Teeʼiyatüin paala shia pümüin». Wachuntüin nümüin Jeowa süpüla wainmainjatüin wayuu ‹atüjaaka saaʼu tü shiimainkat› sutuma tü pütchi jeketkat (1 Tim. 2:4).