Umi 10 plága

EMAʼẼMÍNA koʼã taʼangáre. Ohechauka umi plága Jehová ogueruvaʼekue Egíptope. Ñepyrũrã rehecha Aarónpe oinupãrõhína pe rrío Nilo peteĩ yvyrápe ha pe rríogui oiko tuguy. Umi pirakuéra omanomba, ha pe rrío oñepyrũ hyakuã vai.

Upe rire, Jehová oheja osẽ heta juʼi pe rrío Nílogui. Umi juʼi oĩ tatakuápe, umi mbaʼyru pán ojejapohápe, hupakuérape ha oparupiete. Omanomba rire juʼikuéra, umi ehípsio oñemoĩ ombyatypa, ha inemba opárupi.

Upéi Aarón oinupã pe yvyra oguerekóvape pe yvy ha pe yvytimbógui oikopa vichoʼi ñatiʼũ joguaha, ovevéva ha oporosuʼúva. Kóva haʼe pe plága mbohapyha.

Umi plága oúva upe rire ojapo vai umi ehípsiore añónte, péro isrraelitakuérare ndojapói mbaʼeve. Pe cuarta plágape ou mberu guasu oikepáva umi ehípsio rógape. Ha pe quinta plága ou animalkuérape. Hetaiterei umi ehípsio rymba vaka, ovecha ha kavara omanomba.

Upe rire Moisés ha Aarón ojagarra tanimbu ha opoi yvytúre, ha upévagui ojagarrapa llága umi hénte ha animalkuérape. Kóva haʼe pe sexta plága.

Upe rire Moisés ohupi ipo yvága gotyo, ha Jehová ombou arasunu ha amandáu. Upeichagua amandáu ndoikóiva gueteri Egíptope.

Pe octava plágape ou hetaiterei tuku. Neʼĩrava gueteri oĩ upeichaite peve. Pe amandáu nohundirivaʼekue, umi tuku hoʼupaite.

Pe novena plágape ou pytũ. Tres día Egipto opyta pytũmbýpe, péro umi isrraelíta oikohápe oĩ lús.

Ha ipahaitépe, Ñandejára heʼi ipuévlope ohypýi hag̃ua peteĩ kavara raʼy térã peteĩ ovecha raʼy ruguykuépe hóga rokẽ márko. Upéi Ñandejára ánhel ohasa Egipto rupi. Pe ánhel ohechávo pe tuguy, ndojukái avavépe upe ógape. Péro ndohecháivo pe tuguy ojuka umi taʼýra ypykue oguerekóva umi hénte térã animalkuéra. Kóva haʼe pe décima plága.

Ko plága ou rire, Faraón oheja oho umi isrraelítape. Haʼekuéra ojepreparapamavaʼekue, ha upe pyharépe voi osẽ hikuái Egíptogui.