Ndépa reikuaa mávapa Jehová?

OJAPO 150 áño rupi Henri Mouhot, peteĩ karai Franciaygua otopa hague Cambóyape peteĩ témplo tuichaitereíva. Machéte ipópe oike peteĩ kaʼaguýpe, ha ojapokuévo haperã otopa sapyʼa peteĩ yvykua guasu ojeréva pe témplore. Haʼe ohechávo pe óga tuichaitéva oikuaase mávapa ojapovaʼekue upéva, ha heʼi: “Kóva ningo oimevaʼerã ojaporakaʼe peteĩ artísta ivaletereíva. Ha iporãiteve umi ojejapovaʼekuégui Grecia ha Rómape”. Ko témplo héra Angkor Vat, ha ndaipóri ótro tuichavéva chugui ko yvy ape ári. Jepe áñorema ojeheja rei, Henri Mouhot ohechakuaa peteĩ tapicha ikatupyrýva ojapo hague upéva.

Peteĩ lívro ojehaivaʼekue yma heʼi avei péicha: ‘Opa óga ningo oreko ijapohare, pe ojapovaʼekue opa mbaʼe katu Ñandejára’ (Hebreos 3:4). Upéicharamo jepe oĩ heʼíva umi mbaʼe porãita oĩva ñande jerére, tahaʼe umi sérro, plánta ha mymbakuéra idiferenteha yvypóra rembiapokuégui. Péro heta sientífiko nopensái upéicha.

Michael Behe, peteĩ profesór omboʼéva Bioquímica Universidad Lehigh-pe (Pensilvania, E.U.A.), heʼi umi sientífiko ombaʼapoha umi sélula oikovévare. Pór ehémplo oiporu umíva okambia térã ojapo hag̃ua heta mbaʼe. Upéva ohechauka umi mbaʼe oikovéva peteĩ sélulaicha térã oikoveʼỹva peteĩ ógaicha “orekoha ijapohare”. Behe ohechakuaa avei mbaʼeichaitépa koʼã sélula ombaʼapo oñondivepa, ha upévare heʼi oĩmantevaʼerãha peteĩ ojapovaʼekue koʼã mbaʼe.

Upéicharõ, máva piko koʼã mbaʼe Apohare?

Máva piko opa mbaʼe Apohare?

Jaikuaa hag̃ua ikatu jajeporeka la Bíbliape. Jepe yma guaréma ko lívro, oñepyrũvo omyesakã porã upéva: ‘Iñepyrũmbýpe Ñandejára ojapo ypy vaʼekue yvága ha yvy’ (Génesis 1:1).

Ñande Apohare omombeʼu mbaʼéichapa héra ha mbaʼérepa ndojoguái umi ñandejára guaʼúpe. ‘Péicha heʼi Ñandejára ojapo ha oipysovaʼekue yvága, ojapovaʼekue yvy ha opa mbaʼe chugui osẽva, omopytuhẽva opa yvypóra pype oikóvape. Che Jehová, péva hína cheréra.’ (Isaías 42:​5, 8, SBP.) Koʼápe jahechakuaa Ñandejára heraha Jehová, haʼe ningo ojapovaʼekue kuña ha kuimbaʼépe ha opa mbaʼe oĩva guive. Péro, máva piko Jehová? Mbaʼeichaguápa haʼe? Ha mbaʼérepa ñaneñeʼẽrenduvaʼerã chupe?

Mbaʼépa heʼise héra?

Evréo ñeʼẽme Jehová ojehai cuatro létrape (יהוה). Ha Génesis guive Malaquías peve jatopa haimete siete mil vése. Héra ningo heʼise haʼe ojapotaha ijehegui oikotevẽva okumpli hag̃ua hembipota. Pór ehémplo, Haʼe ñande Apohare, ñanesãmbyhy, ñanemosãso ha omeʼẽ ñandéve ñane remikotevẽ. Pe ñeʼẽ evréo ohechauka Haʼe ojapoha gueteri opa mbaʼe oikotevẽva oiko hag̃ua hembipota, ha péicha jahechakuaa avei Ñandejára oikoveha.

Mbaʼeichaguápa Jehová?

La Biblia ningo heʼi heta mbaʼe porã Ñandejára rehe: ‘Jehová, Jehová, imbaretéva, oporoporiahuverekóva, ha ipyʼaporãva, hasy ipochy hag̃ua, tuicha iporiahuverekóva ha nopyrũiva iñeʼẽ omeʼẽvaʼekue rehe, Haʼe oiporiahuvereko mil kuimbaʼe ñemoñare peve ha operdona tapichakuéra rembiapo vai’ (Éxodo 34:​6, 7). Koʼápe ohechauka Jehová ipyʼaporãha. Evréo ñeʼẽme upéva heʼise avei “ñanderayhu añeteha”. Haʼe ojapóvo hembipota ohechaukahína ñanderayhuetereiha. Aje piko ñanembovyʼaite upéva!

Jehová ningo ndaipochyreíri, ñaneperdonase guei ñane rembiapo vaikue. Ajépa tuicha ñanembopyʼaguapy jaikuaávo ndohekaiha mbaʼépepa jajavy! Péro upéva ndeʼiséi Jehová oguerohoryha umi mbaʼe vai jajapóva. Haʼe heʼi: ‘Che ahayhu tekojoja, ndahayhúi katu umi omonda ni oporombotavývape’ (Isaías 61:8). Ñandejára ningo hekojoja ha ndohejareimoʼãi umi mbaʼe vai apohápe. Upévare ñahaʼarõ koʼẽrõitéma osolusiona umi mbaʼe vai oikóva ko múndope.

Jehová ningo ñanderayhu ha hekojoja, upéva ohechauka iñaranduha (Romanos 11:​33-36). Avei hembiapo porãitáre jahechakuaa mbaʼeichaitépa iñarandu (Salmo 104:24; Proverbios 3:19).

Avei tekotevẽ ipuʼakapa ojapo hag̃ua hembipota. La Biblia heʼi: “Pejesaupi ha pemaʼẽ porãke mbyja atykuéra rehe. Máva piko ojapopa umíva? [...] Haʼe ohenói umívape héra rupi, ha ndaipóri peteĩnte jepe ouʼỹva Haʼe ohenói guive, peichaite tuicha ipuʼaka” (Isaías 40:26). Upéicharõ jahechakuaa Jehová ipuʼaka mbareteha ojapo hag̃ua hembipota. Aje piko tuichaite mbaʼe upéva!

Mbaʼérepa iporã jaikuaa Jehovápe?

Jehová ningo heʼi: “Che ajapomavaʼekue ko yvy ha amoĩ porãmba vaʼekue hendápe ojeiko porã hag̃ua ipype” (Isaías 45:18; Génesis 1:28). Ñandejára ojepyʼapy ñanderehe ha oipota ñaime porã hendive. Upévare ojapovaʼekue peteĩ hardín iporãitereíva ojeiko hag̃ua. Péro upe rire yvypóra opuʼã Ñandejárare ha ombyai ko yvy. Upéicharamo jepe Jehová ojapóta katuete hembipota (Salmo 115:16; Apocalipsis [Revelación] 11:18). Ojapo jeýta ko yvýgui peteĩ hardín neporãmba jepéva oiko hag̃ua ipype umi iñeʼẽrendúva chupe (Proverbios 8:17; Mateo 5:5).

La Biblia omombeʼu mbaʼépa ojapóta Ñandejára jaiko porã hag̃ua pe hardínpe: ‘Omokãta hesaykuéra, ndaiporimoʼãvéima ñemano, tasẽ, jaheʼo ha temimbyasy; opa oĩvaʼekue yma niko ndaiporimoʼãvéima’ (Apocalipsis 21:​3, 4, SBP). Péicha jahecha Ñandejára oipotaha jaiko porã. Aje piko imbaʼeporãite! Ndépa reikuaaseve Jehovápe ha umi mbaʼe Haʼe oipotáva rejapo reiko hag̃ua pe hardín neporãmba jepévape?

Ñandejára Ñeʼẽ ojeporúva: Ñande Ruete Ñeʼẽ Biblia. Upeichaʼỹrõ Sociedad Bíblica Paraguaya, SBP (grafía y gramática actualizadas).