Lívro número 51 Colosenses

Ohai: Pablo

Moõpa ojehai: Roma

Arakaʼépa ojehaipa: áño 60-61 rupi Jesús ou rire

MOKÕI kuimbaʼe osẽ Éfesogui ha oviaha kuarahyresẽ gotyo Asia Menor rupi, ha osegi pe rrío Meandro (Menderes). Og̃uahẽvo hikuái rrío Lícope, tetã Frígiape, ojere sudéste gotyo oho hag̃ua pe rrío rupi umi montáña paʼũme. Umi lugár ningo iporãiterei. Ojekuaa heta ovecha okarúva umi ñu henyhẽva kapiʼipe hovyũ asývagui (upérupi oñevende meme umi mbaʼe ojejapóva ovecha raguégui).a Haʼekuéra osegi ohóvo ha ohasa pe táva guasu Laodicea rupi. Ko táva guive umi Romaygua oisãmbyhy umi táva oĩva upérupi. Ijasu gotyo pe rrío mboypýri oĩ Hierápolis, ojekuaáva opárupi orekohaguére heta tupao ha avei yvu osẽháme ytaku. Koʼã mokõi távape oĩ kongregasión, ha avei Colósaspe, tavaʼi opytáva 16 kilómetro upégui.

² Koʼã kuimbaʼe oho Colósaspe ha mokõivéva kristiáno. Peteĩva oikuaa porã upe lugár, haʼégui Colosasgua. Héra Onésimo, haʼe peteĩ tembiguái oho jeýva ipatrón rendápe. Ipatrón ningo kristiáno avei. Hendive oho Tíquico, péro haʼe ndahaʼéi tembiguái. Mokõivépe omondo apóstol Pablo ha oraha hikuái peteĩ kárta ‘iñermanokuéra Colosasguápe, ojeroviáva Crístore’. Ndojekuaái oimépa Pablo ohorakaʼe upe távape. Pe kongregasiónpe hetave umi ndahaʼéiva hudío, ha oiméne omoñepyrũ Epafras, ombaʼapovaʼekue hendivekuéra ha upérõ oĩva Rómape Páblondi (Col. 1:​2, 7, BNP; 4:12).

³ Apóstol Pablo ohai ko kuatiañeʼẽ, heʼiháicha oñepyrũnguévo ha opakuévo (1:1; 4:18). Omohuʼãvo heʼi avei ohaihague oĩ aja kárselpe, oiméne oho ypýrõ guare préso Rómape áño 59-61-pe. Upérõ ohai heta kárta omokyreʼỹ hag̃ua ermanokuérape, umíva apytépe Colosenses kuatiañeʼẽ. Ko kártandi avei oguerahauka ikuatiañeʼẽ Filemónpe (Col. 4:​7-9; File. 10, 23). Oiméne Pablo ohaíraʼe oñondive Colosenses ha Efesios kuatiañeʼẽ. Upévare koʼã mokõi kárta ojojoguaiterei.

⁴ Ikatu jajerovia ko kárta añetehápe haʼeha Ñandejára Ñeʼẽ. Oĩ umi kárta Pablo ohaivaʼekuéndi papiro Chester Beatty núm. 2-pe (P⁴⁶), áño 200-peguare. Péva ohechauka umi kristiáno ypykue ogueroviahague Pablo ohaiha ko kárta. Umi karai arandu ymaguare heʼi kóva haʼeha avei Pablo rembiapokue.

⁵ Mbaʼérepa Pablo ohai umi Colosasguápe? Primero Onésimo ohóta rupi Colósaspe. Avei Epafras ouramoite Pablo rendápe ha oiméne omombeʼúraʼe chupe oikóva Colósaspe (Col. 1:​7, 8; 4:12). Oĩ peteĩ mbaʼe ikatúva ombyai upe kongregasión. Umi rrelihión oĩva opa rei, ha oñemoñepyrũ mante rrelihión pyahu ombojeheʼapáva jerovia ipyahu ha itujáva. Oĩ umi omboʼéva naiporãiha javyʼa, jahasa asy vaʼerãha guei; omboʼe avei espiritísmo ha omombaʼeguasu umi taʼanga. Oĩ heʼíva ndovaleiha ojeʼu opaichagua tembiʼu, ha oñemombaʼevaʼerãha umi hudiokuéra arete. Koʼã mbaʼe ikatu oike mbegue katu ohóvo kongregasiónpe. Tahaʼe haʼéva upe provléma, Epafras oñehaʼã oviaha Roma peve mombyrýramo jepe omombeʼu hag̃ua Páblope mbaʼépa oiko. Péro ndaiporichéne provléma tuichaitereíva, ajeve Epafras oñeʼẽ porãite umi kristiánore, heʼi oporohayhu ha ojepytasoha hikuái ijeroviáre. Oikuaávo upe oikóva Pablo ohai chupekuéra ohechauka hag̃ua iñimportanteha jaikuaa porã Jehová oipotáva ha ñamombaʼe Chupe. Ohechauka Ñandejára rupi Cristo omboʼéva tuichaveha opa mbaʼe yvypóra omboʼévagui. Ha upévare naiporãiha ojerovia hikuái yvypóra ñeʼẽre, oadora umi ánhel, térã osegi umi hudío rrelihión.

MBAʼÉICHAPA ÑANEPYTYVÕ

¹² Ñapensamíntena mbaʼeichaitépa pyaʼe omombeʼúne ojupe umi ermáno Colosasgua, og̃uahẽhague mokõi ermáno Rómagui. Oikuaasetereíne mbaʼépa heʼi hikuái ha upévare ijatypa Filemón rógape ohendu hag̃ua ojeleévo pe kárta Pablo oguerukáva (File. 2). Tuicha omokyreʼỹneraʼe chupekuéra ohendúvo mbaʼeichaitépa iñimportánte Jesucristo ha mbaʼérepa tekotevẽ jaikuaa porã Ñandejára oipotáva. Pablo ohechauka porãiterei ndaikatuiha jajerovia yvypóra arandúre ha umi hudío rrelihiónre. Heʼi iporãha jaiko pyʼaguapýpe ha ñahendu Cristo heʼíva. Oñemoñeʼẽ enterovépe oĩva kongregasiónpe: umi omoakãva, menakuéra, tembirekokuéra, túva, sy, taʼyrakuéra, patrón ha tembiguaikuéra. Oñemeʼẽ konsého iporãva Filemón ha Onésimope. Haʼe ningo Filemón rembiguái. Ojeʼe avei ansianokuérape mbaʼéichapa oipytyvõvaʼerã ermanokuérape oheja hag̃ua umi mbaʼe naiporãiva. Pablo heʼíva ningo tuicha omokyreʼỹ umi Colosasguápe, omombaʼeve hag̃ua ojapóva hikuái ipyʼaite guive Jehovápe g̃uarã. Ojeʼe avei chupekuéra ojei hag̃ua umi mbaʼe vai oñepensa ha ojejapóvagui ko múndope. Koʼã konsého iporã avei ñandéve g̃uarã (Col. 1:​9-11, 17, 18; 2:8; 3:​15, 16, 18-25; 4:1).

¹³ Oñemeʼẽ konsého iporãitereíva marandu porã omosarambívape g̃uarã Colosenses 4:​6-pe: “Pene ñeʼẽ iporã ha oporombohoryvaʼerã ha peikuaavaʼerã mbaʼépa pejéta peteĩteĩme mamo ombaʼeporanduhápe”. Ñane ñeʼẽ horýramo japredika jave, umi tapicha ipyʼaporãva ñanerenduséta ha upéva oipytyvõta chupekuéra opa árare. Avei pe kristiáno ikyreʼỹva oñemboʼéramo Jehovápe ipyʼaite guive, Haʼe heta ovendesíta chupe. ‘Peñemboʼe tapia, opa ára peime tesapeʼápe ha pemboaguije Ñandejárape.’ Mbaʼeichaitépa javyʼa ha ñandepiroʼy ñaimévo ñane ermanokuérandi! Pablo heʼi: ‘Peñohekomboʼe ha peñomokyreʼỹ opa arandúpe. Pepurahéi Ñandejárape pende pyʼapýpe’ (4:2; 3:​16, BNP). Katuete jatopáta heta mbaʼe ñanepytyvõva ñahesaʼỹijóramo Colosenses kuatiañeʼẽ.

¹⁴ Moisés Léi rehe ko kárta heʼi: “Opa koʼã mbaʼe niko taʼanga umi ouvaʼerã renondépe, pe añeteguáva Crístonte voi” (2:17). Ko mbaʼe oñemyesakã Colosenses kuatiañeʼẽme. Pyʼỹi ojeʼe iporãitereiha upe ohupytýtava umi kristiáno ohótava yvágape ogoverna Crístondi (1:​5, 27; 3:4). Koʼãva oagradesetereivaʼerã Ñandejára oipeʼahaguére chupekuéra pytũnguýgui ha ogueraha “Taʼýra ohayhuetéva oisãmbyhyhápe”. Péicha oñemoĩ hikuái Cristo poguýpe. ‘Hese jahecha Ñandejára ikatuʼỹva ojehecha. Haʼe hína taʼýra ypykue, opa mbaʼe mboyve guare. Haʼe rupi, Ñandejára ojapo opa mbaʼe oĩva yvágape ha yvýpe, ojehecháva ha ojehechaʼỹva’, tahaʼe jepe mburuvicha guasu, autorida térã puʼaka. Jesús ikatupyry ogoverna hag̃ua tekojojápe Ñandejára rréinope. Upévare Pablo heʼi umi kristiáno ohótava yvágape: “Aipórõ, peẽ niko peñemoingove jevy Cristo rupi, peheka umi mbaʼe yvága reheguáva, pe Cristo oguapyhápe [Ñandejára] akatúape” (1:​12-16; 3:1).

[Nóta]