¿Ikatúpa jajerovia umi rrelihión rehe? Oiko lája

Peteĩ enferméra hérava Silvia, heʼi: “Astudiaha tiémpope universidápe, enterovénte umi che kompañéro heʼi irrelihiosoitereiha, péro pyʼỹinte okopia rorrendi jave ha ojedroga hikuái. Ni michĩmi noipytyvõi chupekuéra hekovépe irrelihión”.

Lionel katu heʼi: “Che kompañerokuéra travahohapegua pyʼỹinte ofalta ha heʼi hasyha, péro ijapu. Chupekuéra g̃uarã irrelihión haʼete peteĩ muévle ndojeporúiva, orekónte ojechauka hag̃ua”.

Heta tapichápe noipytyvõi irrelihión oiko hag̃ua hekópe. Oĩ heʼíva ‘oserviha Ñandejárape, péro hekovére ojekuaa ndosegiriha chupe’ (2 Timoteo 3:5, NM). Umi omoakãva irrelihionkuéra nomoĩri ehémplo iporãva ni nomboʼéi chupekuéra mbaʼéichapa Ñandejára oipota jaiko. Upéicha rupi, heta oĩ opensáva Ñandejárape nointeresaiha jaiko lája.

¿MBAʼÉPA OMBOʼE LA BIBLIA?

La Biblia ohechauka porã Ñandejárare opokoitereiha umi mbaʼe jajapóva ha ointeresaha chupe jaiko lája. Por ehémplo, umi isrraelíta naiñeʼẽrendúirõ guare “omoñeñandu vaieterei chupe” (Salmo 78:40, NM). Péro oĩramo oñarrepentíva ipyʼaite guive ha okambia, ‘ojevyʼa yvágape’ (Lucas 15:7). Jahechakuaáramo mbaʼeichagua persónapa ñande Ru yvagapegua, jahayhuvéta chupe. Ha upéva ñanemomýita jahayhu hag̃ua umi mbaʼe Haʼe ohayhúva ha ñamboyke hag̃ua umi mbaʼe ombojeguarúva chupe (Amós 5:15).

¿MBAʼÉPA IKATU JAʼE TESTÍGO DE JEHOVÁRE?

Peteĩ rrevísta heʼi umi testígo de Jehováre: “Haʼekuéra oipytyvõ familiakuérape ojogueraha porã hag̃ua hogapýpe, enterovénte iñonrrádo ha itravahadór hag̃ua”. Upéi heʼive: “Upe rrelihionpegua oiko hekopete. Oikuaa porã hikuái Ñandejára ndoguerohoryiha pe omosexualida ni umi oikóvape okaʼu, opita, ojedroga, ohuga plátare ha hekovai. Upévare ndoikói hikuái upéicha” (The Deseret News, de Salt Lake City [Utah, Estados Unidos]).

¿Mbaʼéichapa oipytyvõ umi Testígope oikuaa porãvo mbaʼeichaguápa Ñandejára? Silvia heʼi: “Che kompañerokuéra ospitalpegua pyʼỹinte ojapo trámpa, ha ajedeskuidáramo, chegueraháta hikuái hapykuéri. Péro aikuaa rupi mbaʼéichapa Jehováa ohecha umi mbaʼe, chepytyvõ ani hag̃ua ajapo upéva. Upévare ikatu haʼe avyʼa ha añeñandu porãitereiha”. Silvia ohechakuaa irrelihión tuicha oipytyvõha chupe oiko hag̃ua hekópe.