¿Arakaʼe pevépa jajeruréta Ñandejárape: “Tou ne Rréino”?

1, 2. a) ¿Mbaʼérepa sapyʼánte ojehasa ñandehegui heta mbaʼe? b) ¿Mbaʼépa jaikuaáma Ñandejára Rréinogui?

HETA hénte omombeʼu jave peteĩ mbaʼe ohecha vaʼekue, pyʼỹinte nomombeʼúi peteĩchapa, síno ojoavyʼimi jepi pe omombeʼu lája. Avei peteĩ persóna ohóramo doktórpe, sapyʼánte ijetuʼu chupe imanduʼapaite hag̃ua pe doktór heʼi vaʼekue omombeʼu rire chupe imbaʼasy. Térã hetágui katu okañy illáve o ilénte ha ndotopái oĩramo jepe henondetépe. ¿Mbaʼérepa oiko koʼã mbaʼe? Umi sientífiko heʼi péicha jave haʼeteha ndajahecháiva, ha upéva ikatu oiko nañañatendéi rupi, ñanderesaráigui térã jajesareko haguére ambue mbaʼére. Ojeʼe voi ñane apytuʼũ ikatuha ojesareko peteĩ mbaʼérente káda ves.

² Heta hénte haʼete avei ndopilláiva umi mbaʼe oikóva ko múndope. Ikatu orrekonose hikuái heta mbaʼe okambia hague 1914 guive, péro ndoikuaái mbaʼérepa añetehápe oiko koʼã mbaʼe. Ñande katu ñahesaʼỹijo Ñandejára Ñeʼẽ ha jahechakuaa áño 1914-pe oñenombra hague Jesúspe Rréi amo yvágape ha upérõ oñepyrũ hague avei ogoverna Ñandejára Rréino. Ha jaikuaa avei neʼĩraha oñekumplipa ko ñemboʼe: “Tou ne Rréino, tojejapo ne rembipota yvy ape ári yvagapeguáicha” (Mat. 6:10). Péro ikatu hag̃uáicha ojejapo Ñandejára rembipota ko yvy ape ári ojejapoháicha amo yvágape, oñehundi raẽ vaʼerã ko múndo aña.

3. ¿Mbaʼépa jahechakuaa jastudia haguére Ñandejára Ñeʼẽ?

³ Jastudia meme rupi Ñandejára Ñeʼẽ jahechakuaa oĩha profesía oñekumplíva koʼág̃a. Péro umi hénte ojepyʼapy ijehénte ha ndohechakuaái Cristo ogovernamaha 1914 guive ha koʼẽrõitéma ohusgataha ko múndo aña. Oiméramo nde heta áñorema reservi Ñandejárape, iporã reñeporandu: “¿Cheinteresápa umi mbaʼe oikóva koʼã tiémpope cheinteresa haguéicha ymave?”. Térã oimérõ ramónte oiko hague ndehegui Testígo, eñeporandumína: “¿Mbaʼérehepa ajepyʼapyve koʼág̃a?”. Jahechamína mbohapy mbaʼe ohechaukáva pe Rréi Jehová oiporavo vaʼekue koʼẽrõitéma ojapopataha Ñandejára rembipota ko yvýpe g̃uarã.

UMI KAVAJU ARIGUA

4, 5. a) ¿Mbaʼépa ojapo Jesús 1914 guive? (Ehecha pe taʼanga oĩva iñepyrũme.) b) ¿Mbaʼépa orrepresenta umi mbohapy kavaju arigua ohóva Jesús rapykuerimi, ha mbaʼéichapa oñekumpli upe profesía?

⁴ Áño 1914-pe, Jesucristo orresivi peteĩ koróna yvágape ha oiko chugui Rréi Ñandejára Rréinope. Pe profesía oĩva Apocalipsis kapítulo 6-pe ohechauka Jesús ohoha peteĩ kavaju morotĩ ári. Oikomíre chugui Rréi osẽma ohundi hag̃uáicha ko múndo aña ha péicha omohuʼãta iñorairõ (elee Apocalipsis 6:1, 2). Pe profesía ohechauka ko múndo ivaivetaha ohóvo Ñandejára Rréino oñepyrũre ogoverna. Oĩta gérra, ñembyahýi, mbaʼasy ha oñemanóta hetave mbaʼégui. Apocalipsis kapítulo 6 ohechauka oĩha mbohapy kavaju arigua, ohóva hína Jesucristo rapykuerimi. Umíva orrepresenta koʼã situasión ivaietéva (Apoc. 6:3-8).

⁵ Ojeʼe haguéicha pe profesíape, umi gérra oipeʼa pe “pyʼaguapy ko yvy ape árigui”. Heta tetã opromete kuri ombaʼapotaha oñondive oĩ hag̃ua pyʼaguapy, péro reiete oñehaʼã hikuái. Pe primera gérra mundiál ha umi ótra gérra tuicháva oikóva upe rire, oipeʼa pe pyʼaguapy ko yvy ape árigui. Ha oĩvéramo jepe pláta heta hendárupi ha pe siénsia rupive ojehupyty hetave mbaʼe áño 1914 guive, hiʼupy ofaltapa opárupi ha upéva ikatu hína omoñepyrũ gérra heta hendápe. Avei káda áño hetaiterei hénte omano opaichagua mbaʼasýgui ha oiko rupi desástre naturál heta lugárpe. Koʼã desgrásia ivaive káda día, pyʼỹive oiko ha hetaitereípe ohupyty. Añetehápe peichaite peve ndaivaíriva ñane situasión. ¿Ndépa rentende mbaʼérepa oiko koʼã mbaʼe?

6. a) ¿Mávapa ohecha porã umi profesía oñekumpliha? b) ¿Mbaʼépa ojapo umi ermáno?

⁶ Oñepyrũrõ guare pe primera gérra mundiál ha ojagarrávo ohóvo pe grípe españóla, heta hénte ojepyʼapyeterei ha nopensái voi ótra kósare. Péro umi kristiáno unhído katu oikuaáma áño 1914-pe opataha “pe tiémpo oñemeʼẽva umi tetãme” (Luc. 21:24). Haʼekuéra ndoikuaaporãi kuri mbaʼépa oikóta, péro ontende 1914-pe oĩtaha peteĩ kámbio tuichaitereíva Ñandejára goviérnope. Ohechakuaamíre hikuái oñekumpliha hína umi profesía, pyʼaguasúpe omombeʼu Ñandejára Rréino oñepyrũmaha ogoverna. Péro ojapo haguére upéva, ojepersegi chupekuéra heta tetãme, ha upéva ohechauka porãvéntema oñekumpliha umi profesía. Upe rire umi áño ohasávape, Ñandejára Rréino enemigokuéra oataka Jehová siervokuérape. Oguenohẽ hikuái léi operhudika hag̃ua umi ermánope, ombyepoti vaipa chupekuéra ha omoinge kárselpe. Ótrope katu ojejuvy ha oñemosaingo, ojefusila térã oñeñakãʼo (Sal. 94:20; Apoc. 12:15).

7. ¿Mbaʼérepa heta hénte ndohechakuaái umi mbaʼe oikóva ko múndope?

⁷ Oĩ ningo heta mbaʼe ohechaukáva Ñandejára Rréino oñepyrũmaha ogoverna yvágape. Péro, ¿mbaʼére piko heta oĩ ndopilláiva upéva? ¿Mbaʼérepa umi hénte ndohechakuaái oñekumpliha umi profesía Jehová puévlo are guivéma omombeʼúva? ¿Oimépa ojesareko hikuái umi mbaʼe ohechávarente? (2 Cor. 5:7.) ¿Opensápa hikuái ijehénte ha upévare ndaikatúi ohecha Ñandejára ojapóva? (Mat. 24:37-39.) ¿Ohesareápa chupekuéra ko múndo oĩva Satanás poguýpe? (2 Cor. 4:4.) Ikatu hag̃uáicha jahechakuaa umi mbaʼe ojapóva Ñandejára Rréino, tekotevẽ jajerovia ha ñañatende porã. ¡Ajépa javyʼaite ikatu haguére ñantende heta mbaʼe oikóva ko múndope!

OĨ HETA HETAVE IÑAÑÁVA

8-10. a) ¿Mbaʼéichapa oñekumpli oúvo 2 Timoteo 3:1-5? b) ¿Mbaʼérepa jaʼekuaa heta hetaveha umi iñañáva?

⁸ ¿Mbaʼépa ohechauka avei Ñandejára Rréino koʼẽrõitéma osolusionataha opa mbaʼe vai oikóva ko yvy ape ári? Koʼág̃arupi hetave hénte iñañave ohóvo. Ojapóma haimete 100 áño oñekumpli hague oikóvo 2 Timoteo 3:1-5, hiʼarive koʼã mbaʼe ojehecha opárupi ko yvy tuichakuére. ¿Ndépa rehechakuaa avei upéva? Jahechamína umi ehémplo ohechaukáva upeichaha (elee 2 Timoteo 3:1, 13).

⁹ Umi hénte oiko vaʼekue dékada de 1940 térã 1950-pe oponderaiterei umi mbaʼe vai ojejapóva upe tiémpope, péro koʼág̃a ojejapo umi mbaʼe ivaietevéva ha hetápe g̃uarã ndahaʼeiete voi mbaʼeve. Koʼág̃arupi umi hénte iviolénto ha hekovaieterei. Upéva ojekuaa oñembaʼapohárupi, vyʼarãme, depórtepe térã umi hénte oñemonde lájare. Oĩ katu oñehaʼãva iviolentove, itieʼỹve ha iñañave. Umi prográma de televisión dékada de 1950-pe ndojeaseptái vaʼekue ivai rupi, koʼág̃a ojeaseptáma ha oñembohasa ohecha hag̃uáicha tóda la família. Koʼág̃arupi heta omosexuál ojagarrapa pe espektákulo ha móda, ha oaprovechapaite hikuái upéva ikatu hag̃uáicha ojeasepta chupekuéra. Péro ñande javyʼa jaikuaa haguére mbaʼépa opensa Ñandejára koʼã mbaʼére (elee Judas 14, 15).

¹⁰ Ñapensamína mbaʼeichagua mitãrusu ha mitãkuñárepa ymave ojeʼe irreveldeha. Dékada de 1950-pe umi túva ojepyʼapy ifamília opitáramo, hoʼúramo vevída térã ojeroky tieʼỹ léntoramo. Koʼág̃a katu pyʼỹinte ñahendu umi notísia ndevaipa jepéva ohechaukáva mbaʼéichapa oñekomporta umi mitãrusu ñane tiémpope. Por ehémplo, peteĩ estudiánte orekóva 15 áño ojapi ikompañerokuérape, mokõime ojuka ha 13-pe oeri. Peteĩ grúpo mitãrusu katu, kaʼúre ohuga vaipaite peteĩ mitãkuñaʼi de 9 áñore ha ojuka chupe, ha upéi ombyepoti itúva ha iprímope. Ambue notísiape katu oñemombeʼu peteĩ tetãme oĩva Ásiape, umi delíto oiko vaʼekue 10 áñope, la mita ojapo hague mitãrusukuéra. Añetehápe ojekuaa porãiterei ko múndo ivaiveha ohóvo.

11. ¿Mbaʼérepa heta hénte ndohechakuaái ñane situasión ivaiveha ohóvo?

¹¹ Apóstol Pedro oprofetisa vaʼekue “umi ára pahápe outaha umi hénte oñembohorýva umi mbaʼe porãre, ha ojapóta umi mbaʼe vai ogustáva chupekuéra. Ha heʼíta hikuái: ‘Haʼe ningo opromete vaʼekue outaha, ¿moõ piko oĩ upéicharõ? Ñande rukuéra ypykue ningo oikove ha omanomba jeýma, péro upe tiémpo guive koʼág̃a peve mbaʼevete nokambiái’” (2 Ped. 3:3, 4). ¿Mbaʼérepa heta hénte opensa upéicha? Por ehémplo, jahecha meméramo peteĩ mbaʼe, upe rire ndajahecharamovéima. Péro ñamoĩ chupe peteĩ ñane amígo peichaháguinte osẽha ojapo peteĩ mbaʼe ndojapóiva jepi, ajépa ñanesorprendéta upéva. Péicha avei mbeguekatúpe umi hénte okambiáramo ohóvo peteĩ tiémporema, ndajahechakuaái. Upéicharõ jepe, ani ñaimoʼã upéva ndaipeligrosoiha.

12, 13. a) ¿Mbaʼérepa umi mbaʼe oikóva ko múndope nañanemokangýi vaʼerã? b) ¿Mbaʼe ehémplopa ohechauka ko múndo aña oñehundipotaitemaha?

¹² Apóstol Pablo heʼi porã vaʼekue koʼã “ára pahápe” pe situasión ‘hasytaha jagueropuʼaka hag̃ua’ (2 Tim. 3:1). Péro haʼe ndeʼíri ndaikatumoʼãiha jagueropuʼaka, upévare ani jakyhyje ni ñanekangy. Jehová oĩta ñande ykére, avei ñanepytyvõta ijespíritu ha pe kongregasión rupive. Péicha ikatúta ñambohovái porã oimehaichagua situasión ijetuʼúva ha katuete ñaneñeʼẽrendúta chupe. Haʼe omeʼẽta ñandéve “pe podér ijojahaʼỹva” oúva chugui (2 Cor. 4:7-10).

¹³ Pablo oñepyrũre oñeʼẽ umi ára paháre oiporu pe fráse “eikuaa porãke ko mbaʼe”. Upéicha ohechauka umi mbaʼe oskrivíva upe rire, katuete oñekumplitaha. Jehová ningo ohundíta ko múndo aña, péro ojapo mboyve upéva, pe situasión ivaivéta ohóvo káda día. Por ehémplo, umi istoriadór omombeʼu heta tetã térã puévlo oñehundi mboyvemi, umi hénte oikóva upépe hembiapo vaive hague ohóvo. Ñane tiémpope, 1914 guive ojejapo heta mbaʼe ivaietereíva, ha upéva ohechauka Ñandejára Rréino koʼẽrõitéma ohunditaha avei ko múndo aña. Péro heta hénte ndohechakuaái koʼã mbaʼe.

UMI HÉNTE OIKÓVA KO TIÉMPOPE NDOHASAMOʼÃI

14-16. ¿Mbaʼépa ohechauka porã avei Ñandejára Rréino koʼẽrõitéma ohunditaha ko múndo aña?

¹⁴ Umi mbaʼe Ñandejára puévlo ohasáva ohechauka avei ko múndo oñehundi potaitemaha. Por ehémplo, Ñandejára Rréino oñepyrũ mboyve ogoverna yvágape, oĩ vaʼekue mbovymi unhído kyreʼỹme oservíva Jehovápe. Péro og̃uahẽvo áño 1914 ndoikói umi mbaʼe haʼekuéra ohaʼarõva. ¿Mbaʼépa ojapo upémarõ hikuái? Hetave ijapytepekuéra oĩ osegíva oservi Jehovápe ha oaguanta, jepe ojepersegi ha ohasa heta mbaʼe ijetuʼúva, ha opavave lénto iñeʼẽrendu omohuʼã meve hekove ko yvy ape ári.

¹⁵ Jesús oñeʼẽrõ guare koʼã ára paháre, heʼi vaʼekue: “Umi hénte oikóva ko tiémpope ni mbaʼevéicharõ ndohasamoʼãi oiko mboyve opa koʼã mbaʼe” (elee Mateo 24:33-35). Haʼe heʼírõ guare “umi hénte oikóva ko tiémpope”, oñeʼẽ kuri mokõi grúpo de unhídore. Umi unhído oĩva pe primer grúpope ohecha vaʼekue umi mbaʼe oikóva 1914-pe ha ontende Cristo oñepyrũmaha ogoverna upe áñope. Péro ndahaʼéi oikónteva hikuái 1914-pe, síno Ñandejára oiporavóma kuri chupekuéra itaʼyrarã ijespíritu sánto rupive upe áñope térã upe mboyve (Rom. 8:14-17).

¹⁶ Pe segundo grúpope katu oĩ umi unhído oikóva pe primer grúpo oikove aja gueteri. Péro ndahaʼéi oĩnteva hikuái pe primer grúpo oikove aja, síno ojeporavo chupekuéra espíritu sánto rupive umi ermáno oĩva pe primer grúpope oikovéitirõ guare ko yvy ape ári. Upéicharõ, “umi hénte oikóva ko tiémpope” ndahaʼéi hína entéro umi unhído oikóva ko yvy ape ári koʼág̃a. Umi unhído oĩva pe segundo grúpope, koʼág̃a ijedáma ohóvo. Ha pe profesía oĩva Mateo 24:34-pe heʼi porã ñandéve ‘umi hénte oikóva ko tiémpope ni mbaʼevéicharõ ndohasamoʼãiha’, térã nomanombamoʼãi gueteri oñepyrũ mboyve pe jehasa asy guasu. Upévare katuete oĩta mbovymi jepe pe segundo grúpogui ko yvy ape ári oñepyrũ vove pe jehasa asy guasu. Añetehápe upéva ohechauka porã ñandéve saʼietereíma ofaltaha pe Rréi ogovernáva Ñandejára Rréino ohundi hag̃ua ko múndo aña ha omoñepyrũ hag̃ua peteĩ múndo pyahu oĩtahápe hustísia (2 Ped. 3:13).

CRISTO KOʼẼRÕITÉMA OMOHUʼÃTA IÑORAIRÕ

17. ¿Mbaʼépa ohechauka porã ñandéve umi mbohapy profesía ñahesaʼỹijo vaʼekue?

¹⁷ ¿Jahechakuaápa hína mbaʼéichapa oñekumpli koʼã mbohapy profesía ñahesaʼỹijóva? Jesús heʼi vaʼekue ndajaikuaaiha mbaʼe día ni mbaʼe órapa oúta pe fin (Mat. 24:36; 25:13). Péro Pablo heʼi haguéicha, jaikuaa “mbaʼe tiémpopepa” oikóta (elee Romanos 13:11). Añetehápe jaiko hína upe tiémpope, térã umi ára pahápe. Ñañatende porãramo umi profesíare ha umi mbaʼe Jehová ha Jesús ojapóvare koʼág̃a, katuete jahechakuaáta pe fin hiʼag̃uimbaitemaha.

18. ¿Mbaʼépa oikóta umi noñemoĩséivagui Ñandejára Rréino poguýpe?

¹⁸ Jesús osẽma ikavaju morotĩ ári omohuʼã hag̃ua iñorairõ ha oreko tuicha autorida, péro umi norrekonoséiva ijautorida ojecháta hendive. Og̃uahẽvo pe día heta oĩta kyhyjégui heʼítava: “¿Máva piko ikatúta oñemboʼy Ñandejára renondépe?” (Apoc. 6:15-17). Pe ótro kapítulo oĩva Apocalípsispe ombohovái ko porandu. Umi unhído ha umi ótro kristiáno orekóva esperánsa oiko hag̃ua ko yvy ape ári ‘oñemboʼýta’ upe díape, Ñandejára oguerohory rupi chupekuéra. Upe rire, “peteĩ aty guasu” ohasáta pe jehasa asy guasu (Apoc. 7:9, 13-15).

19. ¿Mbaʼépa ohaʼarõ opavave orrekonose ha ohechakuaávape pe fin hiʼag̃uimbaitemaha?

¹⁹ Ñañatende porãramo umi profesía oñekumplívare koʼã tiémpo iñimportantetévape, Satanás múndo nañanderesareamoʼãi ha ñantendéta mbaʼérepa oiko heta mbaʼe koʼág̃arupi. Cristo koʼẽrõitéma omohuʼãta iñorairõ Armagedónpe ohundívo ko múndo aña (Apoc. 19:11, 19-21). ¡Iporãite ningo la ñaneraʼarõva! (Apoc. 20:1-3, 6; 21:3, 4.)