¿Reipotápa ojekuaa la rejapóva?
BEZALEL ha Oholiab ikuerái peve ojapo vaʼekue ladríllo oĩrõ guare Egíptope kómo esklávo. Upévare ivale hikuái konstruksiónpe. Péro koʼág̃a oñeasigna chupekuéra peteĩ traváho iñimportantetereíva: ojapo vaʼerã hikuái umi mbaʼe ojepurútava tavernákulope (Éx. 31:1-11). Oiko ningo chuguikuéra artesáno vale, péro lastimósamente avave lénto ndohechái umi mbaʼe porãita ojapo vaʼekue hikuái. ¿Omoñeñandu vaípa raʼe chupekuéra upéva? ¿Tekotevẽ piko ojehecha umi traváho ojapo vaʼekue hikuái? Ha nde, ¿reipotápa ojekuaa la rejapóva?
IPORÃITEREÍRAMO JEPE UMI MBAʼE OJEJAPÓVA, AVAVE NDOHECHÁI
Heta mbaʼe ojepuru vaʼekue pe tavernákulope iporãiterei rasa ha ndaijojahái. Umíva apytépe oĩ vaʼekue umi keruvín de óro oñemoĩva pe árka del pákto ári. Apóstol Pablo heʼi vaʼekue voi umíva ‘omimbipa’ hague porãgui (Heb. 9:5). ¡Eñeimahinamína mbaʼeichaitépa iporãne raʼe umi óvra de árte ojejapo vaʼekue! (Éx. 37:7-9.)
Koʼã tiémpope ojetopárire umi keruvín de óro, katuete oñemoĩ vaʼerãmoʼã umi muséo ifamosovévape, ha hetaiterei hénte oguerohoryjoa vaʼerãmoʼã. Péro, ¿mboy persónapa ohecha ha oguerohory vaʼekue umíva ojejapopa ramóme? Saʼieterei, pórke umíva oĩ vaʼekue pe Santísimo ryepýpe. Ha upépe oike vaʼekue pe saserdóte prinsipál añoite una ves al áño, pe Día Oñeperdonahápe umi Pekádo (Heb. 9:6, 7).
¿JAIPOTÁPA UMI HÉNTE ÑANDEGUEROHORY UMI MBAʼE JAJAPÓVARE?
Ñamoĩ chupe nde la rejapóva Bezalel ha Oholiab rembiapo, ha osẽ porãiterei ndéve, ¿mbaʼéichapa reñeñandu vaʼerãmoʼã unos kuántonte ohechárire la rejapóva? Umi hénte ko mundopegua ningo oipotaiterei oñembotuicha chupe ojapóramo álgo, oñandu hag̃ua otriunfaha ha noñehaʼãreíri hague. Péro ñande jaservíva Jehovápe nañapensái upéicha. Ñandéve g̃uarã iñimportanteve hína Jehová oguerohory umi mbaʼe jajapóva, Bezalel ha Oholiábpe iñimportánte haguéicha.
Jesús tiémpope, umi fariséo oñemboʼe entéro rovake ojechauka hag̃uánte. Péro Jesús heʼi vaʼekue ñañemboʼe vaʼerãha Ñandejára ñanerendu hag̃ua, ndahaʼéi jaipotágui umi hénte ñandeguerohory. Haʼe heʼi: “Nde Ru ohecháva opa mbaʼe, omyengoviáta ndéve” (Mat. 6:5, 6). Jahechaháicha, pe iñimportantevéva ndahaʼéi hína mbaʼépa opensa umi hénte ñane orasiónre, síno mbaʼépa opensa Jehová. Ha jajapóramo oimeraẽ mbaʼe Jehovápe g̃uarã, la iñimportantevéva hína mbaʼépa haʼe opensa umívare, ndahaʼéi mbaʼépa opensa umi hénte. Ñanemanduʼa vaʼerã Ñandejára haʼeha pe “ohecháva opa mbaʼe”.
¿Mbaʼéichapa Ñandejára ohechauka oguerohoryha umi traváho ojapo vaʼekue Bezalel ha Oholiab? La Biblia heʼi oñetermina rire pe tavernákulo, peteĩ arai ojahoʼipa hague pe lugár ha “Jehová podér omimbipa pe tavernákulope” (Éx. 40:34). ¿Mbaʼéichapa nde ere oñeñandúne hague upe moméntope Bezalel ha Oholiab? Ndogueraháiramo jepe herakuéra umi mbaʼe oĩva upépe, haʼekuéra ovyʼaiterei ohechávo Jehová oguerohoryha umíva (Prov. 10:22). Ha amáske ohasa pe tiémpo, haʼekuéra ovyʼavéntema oikuaávo ojesegiha ojepuru umi mbaʼe ojapo vaʼekue hikuái ojeadora hag̃ua Jehovápe. Ág̃a Bezalel ha Oholiab orresusita vove, katuete ovyʼaitereíta oikuaávo pe tavernákulo ojepuru hague 500 áñore oñembotuicha hag̃ua Jehovápe.
Avave ndohecháiramo jepe umi mbaʼe jajapóva, Jehová katuete ohecha
Koʼág̃arupi avei Ñandejára organisasiónpe oĩ heta ermáno ojapóva músika, divúho, pintúra, onohẽva fóto, opreparáva umi informasión ha avei otradusíva. Jaʼe porãsérõ g̃uarã, avave ndohechái la haʼekuéra ojapóva, pórke noñemombeʼúi voi avavépe mávapa umi ermáno ojapóva koʼã traváho. Avei umi 110.000 kongregasiónpe oĩva ko yvy tuichakuére, heta la tembiapo, péro avave ndohechái ojejapo jave. Por ehémplo, ¿mávapa ohecha pe ermáno oñenkargávape ojapo hag̃ua káda mes pe infórme de kuénta kongregasionpegua? ¿Mávapa ohecha pe sekretáriope opreparávo káda mes pe infórme kongregasionpegua oñemondo hag̃ua sukursálpe? ¿Mávapa ohecha pe ermáno térã ermánape omyatyrõ jave álgo pe Salón del Réinope?
Bezalel ha Oholiab ivaleterei vaʼekue itraváhope, ha núnka ndorresivíri medálla ni algún ótro prémio. Péro haʼekuéra nomboguapýi ijehe upéva pórke oikuaa Jehová oguerohoryha chupekuéra, ha upéva ivaliosoiteve oimeraẽ ótro prémiogui. Ñandejára ohecha mbaʼeichaitépa oñehaʼã kuri hikuái ha oguerohory upéva. Ñañehaʼãmbaitékena avei ñande ñaneumílde ha ñandeguápo haʼekuéraicha.