KO RREVÍSTAPE OÑEANALISA | NDE IKATU RENTENDE LA BIBLIA
¿Iñimportántepa ñantende la Biblia?
“La Biblia ningo peteĩ lívro rrelihióso ikonosidoitereíva. Péro noñeʼẽi pe kultúra chínare, upévare naiñimportanteguasúi umi chínope g̃uarã.” (LIN, CHINA)
“Che ningo aime rrelihión indúpe, ha ni umi lívro sagrádo ore roguerekóva nantendéi. ¿Mbaʼéicha piko antendéta upéicharõ la Santa Biblia?” (AMIT, INDIA)
“Che aikuaa ymaitereíma ojeskrivi hague la Biblia, upévare arrespeta upe lívro. Ha aikuaa avei hetaiterei persóna orekoha. Péro che núnka ndahecháiva peteĩ Biblia.” (YUMIKO, JAPÓN)
Hetaiterei persóna ko múndo tuichakuére omombaʼe la Biblia, péro ndoikuaaguasúi térã ndoikuaaiete voi mbaʼéguipa oñeʼẽ. Upéva oiko heta persóna oĩvare Ásiape. Ha umi lugár la majoría orekohápe la Biblia jepe, heta oĩ ndoikuaáiva mbaʼépa oĩ pype.
Péro ikatu oime nde repensa: “¿Ha mbaʼére piko tekotevẽ che antende la Biblia?”. Añetehápe heta mbaʼépe ikatu nepytyvõ rentendéramo la Biblia heʼíva. Por ehémplo:
Ikatúta revyʼave
Reiko porãvéta nde rogapýpe
Ndereikomoʼãi rejepyʼapyeterei
Rejogueraha porãvéta nde rapichakuérandi
Reipuru porãvéta nde pláta
Oĩ heta persóna okomprovámava la Biblia añetehápe ñanepytyvõha. Por ehémplo, Yoshiko, peteĩ kuñakarai oikóva Japónpe, siémpre oikuaase vaʼekue mbaʼéguipa oñeʼẽ la Biblia, upémarõ odesidi olee. ¿Mbaʼépa ohupyty upéva rupive? Haʼe heʼi: “La Biblia chepytyvõ antende hag̃ua maʼerãpa jaikove. Yma naisentídoi vaʼekue chéve mbaʼeve, péro koʼág̃a aguereko peteĩ esperánsa iporãitereíva”. Amit, pe kuimbaʼe oñemensionáva oñepyrũvo ko artíkulo, odesidi avei oinvestiga ijehegui mbaʼépa heʼi la Biblia. Haʼe heʼi: “Ahechakuaa la Biblia ikatuha oipytyvõ enterovépe. Che ningo ni naimoʼãi kuri upeichataha”.
La Biblia ningo oipytyvõma hetaiterei persónape. ¿Mbaʼépa ere ndete voi reinvestigáramo mbaʼépa heʼi pype ha rehecha mbaʼéichapa ikatu nepytyvõ?