Peteĩ komparasión ideprovechoitereítava ndéve

KO MÚNDOPE 1 de káda 3 persóna heʼi haʼeha kristiáno, upéva hína mas de 2.000 millón de persóna. ¿Ndépa rejerovia avei Jesúsre? Koʼág̃arupi oĩ hetaiterei rrelihión heʼíva kristianoha, péro umi mbaʼe opensa ha ogueroviáva idiferentepa ojuehegui. Ikatu umi mbaʼe nde regueroviáva tuicha idiferénte ótro héntegui heʼíva avei haʼeha kristiáno. Péro, ¿iñimportánte piko añete mbaʼépa jaguerovia? Si, la Biblia heʼi mbaʼéicha vaʼerãpa umi kristiáno ha ñande jajesegi vaʼerã upévare.

Umi iñepyrũme osegi vaʼekuépe Jesúspe oñehenói vaʼekue kristiáno (Hechos 11:26). Ha noikotevẽi vaʼekue hikuái ótro téra pórke peteĩcha vaʼekue umi mbaʼe ogueroviáva. Haʼekuéra oñondivepa osegi umi mbaʼe omboʼe ha omanda vaʼekue Jesucristo, pe omoñepyrũ vaʼekue pe kristianísmo. Epensamína koʼág̃a ne rrelihiónre, ¿omboʼépa hikuái umi mbaʼe oguerovia vaʼekue umi kristiáno ypykue ha umi mbaʼe Jesús omboʼe vaʼekue? ¿Mbaʼépa ikatu rejapo reime hag̃ua segúro upévagui? Upearã rekomparámante vaʼerã umi mbaʼe la Biblia omboʼéva ha umi mbaʼe omboʼéva ne rrelihión.

Epensamína, Jesucristo omombaʼeterei vaʼekue umi mbaʼe oĩva Ñandejára Ñeʼẽme, oikuaágui Ñandejára voi oskrivika hague upéva. Chupe ndogustaiete vaʼekue umi ombotapykuéva umi mbaʼe oĩva la Bíbliape ha omotenondéva umi mbaʼe kuimbaʼekuérante omboʼéva (Marcos 7:9-13). Upévare jaʼekuaa umi añetehápe osegíva Jesús ehémplo omopyenda vaʼerãha la Bíbliape umi mbaʼe ogueroviáva. Káda kristiáno oñeporandu vaʼerã: “¿Omboʼépa che rrelihión umi mbaʼe oĩva la Bíbliape?”. Reikuaa hag̃ua upéva, iporãitereíta rekomparáramo umi mbaʼe heʼíva la Biblia ha umi mbaʼe omboʼéva ne rrelihión.

Jesús heʼi vaʼekue jaadora hag̃ua Ñandejárape haʼe oipotaháicha, jaadora vaʼerãha chupe añeteguápe, ha pe añetegua jatopa la Bíbliape (Juan 4:24; 17:17). Ha apóstol Pablo heʼi vaʼekue jajesalva hag̃ua tekotevẽha jaikuaa porã “pe añetegua” (1 Timoteo 2:4). Upévare, iñimportanteterei ñamopyenda pe añeteguápe umi mbaʼe jagueroviáva. Péicharõ añoite ikatúta jajesalva.

¿MBAʼÉICHAPA IKATU ÑAKOMPARA UMI MBAʼE JAGUEROVIÁVA LA BIBLIA HEʼÍVARE?

Romokyreʼỹ releemi hag̃ua umi 6 porandu oĩva pe rrekuádrope ha ehechami hag̃ua mbaʼépa heʼi la Bíblia umívare. Elee umi versíkulo oĩva upépe ha ejepyʼamongeta umi rrespuéstare. Upéi eñeporandu: “¿Ohópa la Biblia heʼívare umi mbaʼe omboʼéva che rrelihión?”.

Añetehápe ningo ideprovechoitereíta ndéve rekomparáramo umi mbaʼe regueroviáva la Biblia heʼívare. ¿Reikuaasépa avei mbaʼépa heʼi la Biblia hetave mbaʼe omboʼévagui ne rrelihión? Umi testígo de Jehová ovyʼaitereíta ikatúramo nepytyvõ reinvestiga porã hag̃ua pe añetegua oĩva la Bíbliape. Roipotaite ningo restudia orendive la Biblia, upearã ikatu reñemongeta peteĩ testígo de Jehovándi térã eike ore páhina de Internétpe, www.jw.org/gug.

1 PORANDU: ¿Mávapa Ñandejára tee?

RRESPUÉSTA: Jehová hína Ñandejára Todopoderóso, haʼe ñande Apohare ha siémpre oexistíva. Jehová haʼe Jesús túa.

MBAʼÉPA HEʼI LA BIBLIA

“Roñemboʼe jave penderehe akóinte roagradese Ñandejárape, haʼéva hína ñande Ruvicha Jesucristo Túa” (Colosenses 1:3).

“Ñandejára Jehová, nde ningo remerese opavave nemombaʼe ha omeʼẽ ndéve tekomimbipa ha podér, nde rejapo rupi opa mbaʼe” (Apocalipsis 4:11).

Ehecha avei Romanos 10:13 ha 1 Timoteo 1:17.

2 PORANDU: ¿Mávapa Jesucristo?

RRESPUÉSTA: Haʼe hína Ñandejára Raʼy ypykue. Jehová siémpre oexistíva, péro Jesucristo nahániri, pórke Ñandejára ojapo chupe. Haʼe orrespeta Ñandejárape ha iñeʼẽrendu chupe.

MBAʼÉPA HEʼI LA BIBLIA

“Pe Túa tuichave [...] chehegui” (Juan 14:28).

“[Jesucristo] hína Ñandejára jahechaʼỹva joguahaite, pe taʼýra ypykue ojejapo vaʼekue opaite mbaʼe mboyve” (Colosenses 1:15).

Ehecha avei Mateo 26:39 ha 1 Corintios 15:28.

3 PORANDU: ¿Mbaʼépa pe espíritu sánto?

RRESPUÉSTA: Pe espíritu sánto ndahaʼéi peteĩ persóna, síno pe podér Ñandejára oipurúva ojapo hag̃ua ivolunta. Umi hénte ikatu henyhẽ espíritu sántogui ha oñemeʼẽ chupekuéra podér upéva rupive.

MBAʼÉPA HEʼI LA BIBLIA

“Elisabet ohendúvo María osaludaha chupe, pe mitã opo hyépe ha Elisabet henyhẽ espíritu sántogui” (Lucas 1:41).

“Oñemeʼẽta peẽme podér pe espíritu sánto ou vove pende ári” (Hechos 1:8).

Ehecha avei Génesis 1:2; Hechos 2:1-4 ha 10:38.

4 PORANDU: ¿Mbaʼépa hína Ñandejára Rréino?

RRESPUÉSTA: Ñandejára Rréino haʼe hína peteĩ goviérno oĩva yvágape. Ko goviérno koʼẽrõite ojapóta Ñandejára volunta ko yvýpe g̃uarã, ha Jesús voi hína pe Rréi.

MBAʼÉPA HEʼI LA BIBLIA

“Pe séptimo ánhel ombopu itrompéta. Upévo oñehendu umi oñeʼẽ hatãva yvágape ha heʼíva: ‘Ñandejára ha Cristo Rréino ogoverna hína yvyporakuérape, ha haʼe ogovernáta opa ára g̃uarã’” (Apocalipsis 11:15).

Ehecha avei Daniel 2:44 ha Mateo 6:9, 10.

5 PORANDU: ¿Oho piko yvágape enterove umi hénte ivuénova?

RRESPUÉSTA: Nahániri. Ñandejára oiporavo peteĩ grúponte umi ifiélva apytégui oho hag̃ua yvágape, ndahaʼéi enterovete. Ko grúpope oñehenói la Bíbliape “ovechakuéra mbovymi”. Haʼekuéra ogovernáta Jesucrístondi ko yvy, yvága guive.

MBAʼÉPA HEʼI LA BIBLIA

“Ani pekyhyje, peẽ che ovechakuéra mbovymi, pende Ru odesidíma omeʼẽtaha peẽme pe Rréino” (Lucas 12:32).

“Oikóta chuguikuéra Ñandejára ha Cristo saserdóte, ha ogovernáta hendive” (Apocalipsis 20:6).

Ehecha avei Apocalipsis 14:1, 3.

6 PORANDU: ¿Mbaʼépa Ñandejára oipota ko yvýpe g̃uarã ha yvyporakuérape g̃uarã?

RRESPUÉSTA: Ñandejára Rréino poguýpe ko yvýgui oikóta peteĩ paraíso, upépe umi ifiélva ndahasymoʼãvéima, nomanomoʼãvéima ha oikóta pyʼaguapýpe pára siémpre.

MBAʼÉPA HEʼI LA BIBLIA

“Umi hénte ivuénova opytáta ko yvy ape ári, haʼekuéra ovyʼaitereíta pórke oikóta pyʼaguapýpe ha noñekevrantamoʼãi mbaʼevete asýre” (Salmo 37:10, 11, TNM).

“[Ñandejára] omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma” (Apocalipsis 21:3, 4).

Ehecha avei Salmo 37:29 ha 2 Pedro 3:13.