¿Reipuru porãpa ne imahinasión?
OREKO un kílo imédio potaite, ha koʼag̃aite peve ndojetopái ko univérsope ótra kósa ikatúva ñambojoja hese. ¿Mbaʼérehepa ñañeʼẽ hína? Ñane apytuʼũre. Amáske jaikuaave jahávo ñane apytuʼũ, jahechakuaa mbaʼeichaitépa Jehová rembiapo “iporãiterei ha ndaijojahái” (Sal. 139:14, NM). Jareko rupi ñane apytuʼũ ikatu ñandekatupyry jajapo hag̃ua hetaiterei mbaʼe, por ehémplo ñanepytyvõ ñañeimahina hag̃ua.
¿Mbaʼéichapa ikatu jaipuru ñane imahinasión? Por ehémplo, ikatu ñañeimahina peteĩ lugár, peteĩ mbaʼe ndajahasáiva gueteri, térã jareko peteĩ idéa ñandegustáva. Ñapensávo koʼã mbaʼére, jahechakuaa pyʼỹinte jaipuruha ñane imahinasión. Oime vaʼerã katuete ñañeimahina jepi peteĩ lugár neʼĩrava javisita, péro haʼetévaicha jahechapáva pórke jalee térã ñahendu chugui. Añetehápe, ñapensa jave peteĩ mbaʼére, péro ndajahechái, nañahendúi, nañatanteái, ndajapokói, térã nañahetũi, oñepyrũma ombaʼapo ñane imahinasión.
La Biblia ohechauka Ñandejára ñandeapo hague ijoguahárõ (Gén. 1:26, 27). Upéva heʼise Jehová oipuruha avei iñimahinasión. Ha haʼe omeʼẽvo ñandéve upe kapasida, katuete ohaʼarõne ñande avei jaipuru porã ñane imahinasión (Ecl. 3:11). ¿Mbaʼéichapa ikatu jaipuru hekópe porã ñane imahinasión, ha mbaʼépa naiporãi jajapo?
MBAʼÉPA NAIPORÃI ÑAÑEIMAHINA
1) Ñañeimahina ndahaʼéi jave pe moménto térã peteĩ mbaʼe naiporãiva.
Ndaivaíri ningo ñañeimahina peteĩ mbaʼe ñandegustáva. Oĩ voi pruéva ohechaukáva upéva ideprovechoha. Upéicharõ jepe, Eclesiastés 3:1 heʼi ‘opa mbaʼerã oĩha peteĩ tiémpo’ (NM). Nañañatendéiramo ikatu hína jaipuru vai ñane tiémpo ñañeimahina hag̃ua peteĩ mbaʼe nañanepytyvõmoʼãiva. Por ehémplo, ñañepyrũramo ñapensa ótra kósare ñaime jave rreunionhápe, térã jajapo jave ñande estúdio personál, ñane imahinasión ndaideprovechomoʼãi ñandéve, síno ñandeperhudikáta. Avei Jesús heʼi vaʼekue ipeligrosoha ñañentretene ñapensávo umi mbaʼe naiporãivare, por ehémplo pe inmoralida sexuálre (Mat. 5:28). Ikatu ningo peichahágui jaju ñañeimahina peteĩ mbaʼe Jehovápe ombojeguarúva. Por ehémplo, ñañemoĩramo ñapensa pe inmoralida sexuál rehe, ikatu hína jaju jaʼa umívape. Upévare, jajedesidi vaʼerã núnka nañapensamoãiha umi mbaʼe ñanemomombyrýtavare Jehovágui.
2) Ñapensa umi mbaʼerepy omeʼẽtaha ñandéve segurida.
Añetehápe ningo ñaikotevẽ umi mbaʼerepy ha ideprovécho jepi ñandéve. Upéicharõ jepe, tuichaiterei jajavýta ñapensáramo umi mbaʼerepy omeʼẽtaha ñandéve segurida ha ñanembovyʼataha. Salomón oskrivi vaʼekue: “Pe iplátavape g̃uarã umi imbaʼerepy haʼete peteĩ puévlo imbaretéva, ha oñeimahina upéva oprotehetaha chupe peteĩ murálla yvatéicha” (Prov. 18:11, NM). Ñapensamína pe oiko vaʼekuére siuda de Manílape (Filipinas), septiembre de 2009. Upérõ ou peteĩ ama guasu, ha 80 por ciento pe siuda oñeinundapa. Ha ¿mbaʼépa oiko umi orekóvagui heta mbaʼerepy? Peteĩ karai ipláta hetáva ha operde vaʼekue heta ikosakuéra, omombeʼu: “Pe ama guasu enterovetévape orerupyty, tahaʼe imboriahúvape térã ipláta hetávape”. Jahechaháicha, ndovaléi ñapensa umi mbaʼerepy katuete ñandeprotehetaha ha omeʼẽtaha ñandéve segurida.
3) Jajepyʼapyeterei umi mbaʼe ni ndajaikuaáivare oikotaha.
Jesús heʼi vaʼekue: “Ani pejepyʼapyeterei” (Mat. 6:34). Jajepyʼapyeterei jave, kontinuadoite jaipuru hína ñane imahinasión. Ñañemoĩramo ñapensaiterei umi provléma ikatúvare oñepresenta, térã umi núnka ndoikomoʼãivare, ikatu jaju ñanemokangy. La Biblia heʼi voi jajepyʼapyetereíramo ikatuha ñañedesanima ha ñañedeprimi (Prov. 12:25). Jahechaháicha, iporãve jasegi Jesús konsého, ha ani jajepyʼapyeterei umi mbaʼe oñepresentátavare káda día.
MBAʼÉPA IPORÃ ÑAÑEIMAHINA
1) Ñañeimahina umi pelígro ikatúva oñepresenta ha jajehekýi umívagui.
La Biblia ñanemokyreʼỹ ñapensa hag̃ua ñane renonderãre (Prov. 22:3). Jaipuru porãramo ñane imahinasión jadesidi mboyve, ikatúma jahecha mbaʼépepa ñasẽta. Por ehémplo, ñañeinvitáramo jaha hag̃ua peteĩ fiestítape, ñañeimahina vaʼerã mbaʼépa ikatu oiko upépe, ha upéi jadesidi jahátapa térãpa ndajahamoʼãi. Ñapensa vaʼerã máva mávapa ohóta, mboy héntepa oĩta, ha moõpa ha arakaʼépa oikóta. ¿Repensápa Jehová oguerohorytaha opa mbaʼe ojejapótava upépe? Reipurúramo ne imahinasión repensa hag̃ua koʼã mbaʼére, ikatútama rehecha mbaʼépa la oikótava upe fiestítape. Upéicharõ, jaipuru porãkena ñane imahinasión jajehekýi hag̃ua umi mbaʼe ikatúvagui ñanemomombyry Jehovágui.
2) Jakalkula mbaʼéichapa ñambohováita peteĩ provléma ijetuʼúva.
Ñane imahinasión ikatu avei ñanepytyvõ ñasolusiona hag̃ua peteĩ provléma. Ñamoĩ chupe jajuha ñaneprovléma peteĩ ermánondi. ¿Mbaʼépa ikatu jajapo péicha jave? Iporã ñañeporandu: ¿Ifásilpa ñañemongeta hendive? ¿Mbaʼe moméntopepa okonvenivéta ñañeʼẽ pe provlémare? ¿Mbaʼeichagua palávra ha tóno de vóspa iporãve jaipuru? Jaipuru porãramo ñane imahinasión, ikatútama jaikuaa mbaʼépa okonvenive jajapo ikatu hag̃uáicha jaikekuaa pe ermánope (Prov. 15:28). Péicha jajepokuaáramo ñapensa porã jaha mboyve ñañeʼẽ pe ermánondi, ñaipytyvõta oĩ hag̃ua pyʼaguapy kongregasiónpe.
3) Jaipuru ñane imahinasión jalee ha jastudia jave la Biblia.
Iñimportánte ningo jalee la Biblia káda día. Péro ndahaʼéi jaleénte vaʼerã heta páhina, síno tekotevẽ jahecha mbaʼéichapa ñanepytyvõ umi konsého oĩva pype, ha jajapo umi mbaʼe ñaaprendéva. Ikatu hag̃uáicha ñamombaʼe Jehová rape, tekotevẽ jalee meme la Biblia ha jaipuru ñane imahinasión. Ikatu jastudia pe lívro hérava Jajerovia hag̃ua. Umi rreláto oĩva upe lívrope, ñanepytyvõta ñañeimahina hag̃ua umi mbaʼe oiko vaʼekue yma. Ikatu ñañeimahina umi lugár, ñahendu umi sonído, ñahetũ umi aróma ha ñañemoĩ umi persóna lugárpe. Upéva ñanepytyvõta ñaaprende porãve hag̃ua mbaʼépa ñanemboʼe káda rreláto, ha ikatúta ñantende porãve umi mbaʼe jaikuaámava voi. Péicha katuete jaaprovecha porãvéta pe informasión jaleéva.
4) Ñañemoĩ ñande rapicha lugárpe.
Ñañemoĩramo ñande rapicha lugárpe, ikatúta ñantende chupekuéra ohasa asy jave. Jehová ha Jesús ontende mbaʼéichapa yvyporakuéra oñeñandu, ha ñande ñañehaʼã vaʼerã jasegi iñehemplokuéra (Éx. 3:7; Sal. 72:13). ¿Mbaʼépa ikatu ñanepytyvõ ñakomprende hag̃ua ñande rapichápe? Ideprovechoitereíta ñandéve ñañeimahináramo mbaʼéichapa oñeñandu. Ikatu oime ñande núnka ndajahasáiva gueteri peteĩ mbaʼe ohasáva hína peteĩ ermáno térã ermána. Péro iporã ñañeporandu: “Aimérire isituasiónpe, ¿mbaʼéichapa añeñandu vaʼerãmoʼã? ¿Mbaʼépa aikotevẽta?”. Jaipurúramo ñane imahinasión ñarresponde hag̃ua koʼã pregúnta, ñantende porãvéta ñande rapichakuérape. Entéro kristiáno ningo tekotevẽ ñañemoĩ umi ótro lugárpe. Péicha ñaipytyvõ porãvéta umi hénte japredikávape ha jajogueraha porãvéta ñane ermanokuérandi.
5) Ñañeimahina mbaʼéichapa jaikóta pe múndo pyahúpe.
La Bíbliape oñemombeʼu heta mbaʼe ohechaukáva mbaʼéichapa jaikóta pe múndo pyahúpe (Is. 35:5-7; 65:21-25; Apoc. 21:3, 4). Avei ñane puvlikasionkuérape osẽ jepi heta taʼanga ohechaukáva umi mbaʼe iporãitereíva oĩtava pe paraísope. Koʼã mbaʼe ñanepytyvõ ñañeimahina hag̃ua mbaʼeichaitépa javyʼáta oñekumpli vove Jehová oprometéva. Jehová, pe ñandeapo vaʼekue ikatu hag̃uáicha ñañeimahina, oikuaa porã mbaʼeichaite pevépa ideprovécho ñane imahinasión. Jaipuru porãramo ko kapasida ñapensa hag̃ua Ñandejára promesakuérare, ñaiméta segúro katuete oñekumplitaha umíva ha jasegíta ñaneñeʼẽrendu, ñambohováiramo jepe heta mbaʼe ijetuʼúva.
Jehová ñanderayhúgui omeʼẽ ñandéve pe kapasida ñañeimahina hag̃ua. Ha upéva ikatu ñanepytyvõ jaservi porãve hag̃ua chupe. Upéicharõ, jaagradesékena Jehovápe omeʼẽ haguére ñandéve ko kapasida ha káda día ñañehaʼã jaipuru porã ko rregálo porãite.