Koʼág̃ama voi ikatu revyʼa
OG̃UAHẼTA peteĩ tiémpo ndaiporimoʼãihápe hasýva, itujáva ni omanóva. ¿Ndépa eikuaa ikatuha avei reime upépe? Ñambyasýramo jepe, ñande rekove provléma memete. Péro, ¿ikatúpa revyʼa koʼág̃ama voi? La Bíbliape jatopa heta konsého ñanepytyvõva javyʼa ha isentído hag̃ua ñande rekove. Ñañeʼẽmína unos kuánto provléma oĩvare ha mbaʼéichapa la Biblia ñanepytyvõ.
JAVYʼA LA JAREKOMÍVARE
Konsého omeʼẽva la Biblia: “Aníkena pendeplatarayhu, upéva rangue peñekontenta vaʼerã umi mbaʼe perekóvare” (Hebreos 13:5).
Koʼág̃arupi oĩ heta mbaʼe umi hénte heʼíva jareko vaʼerãha katuete. Péro la Biblia heʼi: “Peñekontenta vaʼerã umi mbaʼe perekóvare”. ¿Mbaʼéichapa ikatu jajapo upéva?
Ani ñandeplatarayhu. Umi iplatarayhúva odeskuida isalu, hogapy, iñamigokuéra ha notĩri ojapo hag̃ua umi mbaʼe noĩporãiva jepe (1 Timoteo 6:10). ¡Ajépa hetaite mbaʼe osakrifika hikuái! Hiʼarive pe iplatarayhúva “núnka noñekontentamoʼãi” (Eclesiastés 5:10).
Umi persóna ningo ovaleve umi kósagui. Umi kósa materiál ningo ideprovécho, péro umíva ndaikatúi ñanderayhu ni ohechauka ñandevaloraha. “Peteĩ amígo verdadéro” katu ñanembovyʼa (Proverbios 17:17).
JAVYʼAVÉTA JASEGÍRAMO UMI KONSÉHO OĨVA LA BÍBLIAPE
ÑANDERASÝRAMO
Konsého omeʼẽva la Biblia: “Peteĩ korasõ ovyʼáva, peteĩ pohã ñanemongueráva hína” (Proverbios 17:22).
Ñañehaʼãramo javyʼa ñanderasy jave ikatu ñanepytyvõ jagueropuʼaka hag̃ua ñane mbaʼasy. ¿Péro mbaʼéichapa ikatu javyʼa ñanderasýramo jepe?
Ñandeagradesído vaʼerã. Ñapensaitereíramo ñane provlemakuérare, ndaiporimoʼãi voi “ni peteĩ día iporãmíva” (Proverbios 15:15). Upéva rangue la Biblia heʼi ñandéve: “Pehechaukákena pendeagradesidoha” (Colosenses 3:15). Ñandeagradesídoramo umi mbaʼe michĩvare jepe, katuete javyʼavéta. Por ehémplo ikatu javyʼa jahecha jave pe kuarahyreike, ñañandu jave ñandepejuha vevyimi pe yvytu térã jahecha jave opuka peteĩ persóna jahayhúva.
Jajapo álgo ótro rehehápe. Nañaneresãiriramo jepe, katuete javyʼavéta “ñameʼẽvo, ñandéve oñemeʼẽ rangue” (Hechos 20:35). Ñande rapichakuéra oagradese jave ñandéve peteĩ mbaʼe jajapo vaʼekuére, javyʼa ha ñanderesarái ñane provlemakuéragui. Jajapóramo ikatúva guive umi ótro oñeñandu porã hag̃ua, ñande avei ñañeñandu porãvéta.
ÑAMOMBARETE ÑANE MATRIMÓNIO
Konsého omeʼẽva la Biblia: “Pehechakuaa umi mbaʼe iñimportantevéva” (Filipenses 1:10).
Umi omendáva ndohasaguasúiramo tiémpo oñondive ikatu hína oñemomombyry ojuehegui. Upévare pe ména ha tembireko omotenonde vaʼerã imatrimónio, chupekuéra g̃uarã upéva haʼe vaʼerã la iñimportantevéva.
Peplanea pejapo hag̃ua algúna kósa oñondive. Iporãta peplaneáramo pejapo algúna aktivida oñondive, pejapónte rangue peneaño umi mbaʼe pejaposéva. La Biblia heʼi: “Mokõi iporãve peteĩgui” (Eclesiastés 4:9). Ikatu peñekosina oñondive, pejepasea, pekayʼu, peterere ha umícha.
Pehechauka pejoayhuha. La Biblia heʼi ména ha tembireko ojorrespeta ha ojoayhu vaʼerãha (Efesios 5:28, 33). Mokõivéva hory, iñamávle, oñomokunuʼũ, ha ojorregaláramo álgo isensíllova jepe, ikatúta omombareteve imatrimónio. Péro ani ñanderesarái, peteĩ persóna omendáva ikatu oreko rrelasión sexuál iparéhandi añónte (Hebreos 13:4).