Ndaipóri tembiapo iñimportantevéva
1. Mbaʼépa jajapóta ñamombaʼéramo pe predikasión?
1 Ñamombaʼéramo pe predikasión akóinte jaiporúta ñane tiémpo, ñane mbaretekue ha ñane mbaʼerepy ñamyerakuã hag̃ua pe marandu porã. Ndaipóri ningo ambue mbaʼe iñimportantevéva ko tembiapógui. Upévare jajepyʼamongetákena umi mbaʼe ojehupytýtavare, péicha ñanekyreʼỹvéta jajapo hag̃ua ko tembiapo porãite koʼã tiémpopente ojejapóva (Hech. 20:24).
2. Mbaʼéichapa ñane predikasión rupive ñamomarangatu Jehová réra?
2 Omomarangatu Jehová réra. Ñandejára Rréino ningo oĩ Jesucristo pópe. Upévare ñamombeʼúvo oisãmbyhytaha yvypóra rangue ha omyatyrõtaha opa mbaʼe oĩ vaíva ha ñandeguereko asýva, ñamomarangatuñaína Jehová réra (Mat. 6:9, 10). Jaikuaaháicha haʼe añoite ikatu ñandepeʼa mbaʼasy ha ñemanógui (Isa. 25:8; 33:24). Upévare, jaipotáramo umi hénte omombaʼeguasu avei Jehovápe, ñande jaikovaʼerã hekopete ha ñanekyreʼỹvaʼerã ñamyerakuãvo ko marandu (1 Ped. 2:12). Ajépa ñañeñandu porãite jaikuaaukávo Jehová réra ko yvy tuichakuére! (Sal. 83:18.)
3. Mbaʼépa ohupytýta umi ohendu porãva ñane predikasión?
3 Oporosalva. Jehová ningo ‘ndoipotái avave oñehundi, oipota guei opavavénte oñembyasy hembiapo vaikuégui’ (2 Ped. 3:9, BNP). Péro, mbaʼéicha piko oikuaáta mbaʼépa iporã ha mbaʼépa ivai Ñandejára renondépe noñehekomboʼéiramo chupekuéra? (Jon. 4:11; Rom. 10:13-15.) Umi ohendu porãva Ñandejára marandu ha okambiáva hekove, koʼág̃ama voi ovyʼa ha tenondeve gotyo oikóta opa ára g̃uarã (Miq. 4:1-4). Upévare ñanekyreʼỹkena predikasiónpe ikatu hag̃uáicha jajesalva ha avei umi ñanerendúvape (1 Tim. 4:16). Aje piko tuichaite mbaʼe ko tembiapo jajapóva!
4. Mbaʼérepa tekotevẽterei japredika kyreʼỹ?
4 Koʼẽrõitéma oñepyrũta pe jehasa asy guasu ha oñehundíta ko múndo aña, péro opa ojepytasóva Jehová ykére ojesalváta. Upévare tekotevẽterei japredika kyreʼỹ ha ñaipytyvõ umi héntepe oiko hag̃ua chuguikuéra Jehová rembiguái. Ndaipóri ambue mbaʼe iñimportantevéva upévagui. Ñamotenondékena ko tembiapo! (Mat. 6:33.)