Akóinte ñanekyreʼỹvaʼerã predikasiónpe
1 Ñande testigos de Jehová ko Yvy tuichakue japredika ha ñamboʼe la Biblia ñande rapichakuérape. Upearã jaiporu mil millones de óra rupi káda áño 1992 guive. Aje piko javyʼaite ñande avei ñaipytyvõhaguére ojejapo hag̃ua peichagua mbaʼe porãite! (Mat. 28:19, 20.)
2 Jaikuaáningo Jehová ojapopaha koʼã mbaʼe. Upévare jaagradese chupe ñanepytyvõhaguére japredika meme hag̃ua koʼã tiémpo ijetuʼuetévape (2 Tim. 3:1). Upéicharõ, mbaʼépa jajapovaʼerã akóinte ñanekyreʼỹ hag̃ua predikasiónpe?
3 Mbaʼérepa japredika: Jahayhúgui ñande pyʼaite guive Ñandejárape ha ñande rapichakuérape, avei jajaposégui opa mbaʼe oñehaʼarõva ñandehegui (Mat. 22:37-39; 1 Juan 5:3). Japorohayhúgui ñamboyke heta mbaʼe ñasẽ meme hag̃ua predikasiónpe (Luc. 9:23).
4 Mbaʼéichapa ikatu akóinte ñanekyreʼỹ predikasiónpe. Satanás ningo ndaijaʼeieterei ñanderehe. Upévare ojapo opa ikatúva ñanemokangységui anive hag̃ua japredika. Oiporu heta mbaʼe ñanemokangy hag̃ua, umíva apytépe oĩ umi nañanerenduséiva ñande territóriope, umi vyʼarã ko múndope ojejapóva, umi mbaʼe ñaikotevẽva káda día g̃uarã ha avei umi mbaʼasy.
5 Upéicharõ, ñañehaʼãmbaitevaʼerã ñanekyreʼỹ meme predikasiónpe. Tekotevẽningo ñamombarete ‘pe mborayhu jarekovaʼekue iñepyrũrã’. Upéva heʼisehína jaleevaʼerãha Ñandejára Ñeʼẽ ha jajepyʼamongeta meme hese. Upéicha avei jaiporuvaʼerã opa mbaʼe omoĩva “pe tembiguái jeroviaha ha iñarandúva” (Rev. 2:4; Mat. 24:45; Sal. 119:97).
6 Umi profesía oĩva la Bíbliape ohechauka porã hiʼag̃uimbaitemaha pe ára Jehová ohundipataha umi iñañávape (2 Ped. 2:3; 3:10). Jaikuaáma rupi upéva, jajapovaʼerã opa ikatúva akóinte ñanekyreʼỹ hag̃ua predikasiónpe. Upearã ningo ñasẽ meme vaʼerã japredika ha ñaipytyvõ ñande rapichápe oguata hag̃ua Ñandejára rapére.