Japredikákena kyreʼỹme Jesús ojapo haguéicha

1. ¿Mbaʼépepa idiferénte Jehová siervokuéra umi heʼívaguinte ijehe kristianoha?

JEHOVÁ siervokuéra ikyreʼỹeterei opredika hag̃ua umi notísia porã ha ombaʼapo jejopy voi upearã. Péicha jahechauka ñanediferenteha umi heʼívaguinte ijehe kristianoha (Tito 2:14). Péro sapyʼánte ikatu nanekyreʼỹguasúi epredika hag̃ua, ikatu oime eñeñandu peteĩ ansiáno oñeñanduháicha. Haʼe ningo iguápo kongregasiónpe péro avei heʼi: “Legálmente sapyʼánte ndapredikaseiete voi”.

2. ¿Mbaʼérepa sapyʼánte ikatu ijetuʼu jasegi hag̃ua japredika kyreʼỹme?

² Ikatu oime javyʼaiterei jajapóvo heta mbaʼe Jehovápe g̃uarã, péro ndahaʼéi la javyʼaitereíva predikasiónpe. ¿Mbaʼérepa? Pórke asegún la jajapóva Jehová servísiope ikatu jahecha pyaʼe voi oĩha rresultádo iporãva ha upéva igustoiterei ñandéve. Por ehémplo ñañandu upéva ñamopuʼãvo umi Salón del Reino, jajapóvo mantenimiénto, ñaipytyvõvo ermanokuérape oiko jave desástre naturál ha ñamokyreʼỹvo chupekuéra. Ñande ñambaʼapo pyʼaguapy ha mborayhúpe ermanokuérandi ha jaikuaa haʼekuéra omombaʼetereiha la jajapóva. ¿Péro mbaʼépa jaʼekuaa predikasiónre? Ikatu oime otoka ñandéve japredika heta áñorema peteĩ lugár oĩháme saʼieterei hénte ohenduséva, térã oĩ voi katu umi orrechasaitéva umi notísia porã. Hiʼarive jaikuaa hiʼag̃uívo ohóvo pe ára paha oĩtaha hetave oñemoĩva ñane kóntrape (Mat. 10:22). ¿Péro mbaʼépa ikatu ñanepytyvõ jasegi hag̃ua ñanekyreʼỹ térã javyʼave hag̃ua predikasiónpe?

3. ¿Mbaʼe ehémplopa ohechauka Jesús ikyreʼỹeterei hague predikasiónpe? (Lucas 13:​6-9).

³ Ñande ikatu ñaaprende heta mbaʼe Jesúsgui jasegi hag̃ua ñanekyreʼỹ predikasiónpe. Haʼe oĩrõ guare ko yvy ape ári siémpre ikyreʼỹ vaʼekue, ha amedída ke ohasa pe tiémpo ombaʼapo jejopyve predikasiónpe (elee Lucas 13:​6-9). Jesús omoĩ vaʼekue peteĩ ehémplo ha oñekompara peteĩ kuimbaʼe ombaʼapóvare parraltýpe. Upe kuimbaʼe ombaʼapo kuri 3 áñore peteĩ ígo mátare péro upéi ndahiʼái. Upéicha avei Jesús 3 áñorupi opredika umi judíope péro la majoría nomoirũi vaʼekue chupe. Pe kuimbaʼe ombaʼapóva pe parraltýpe noñentregái ha osegi vaʼekue ombaʼapo pe ígo mátare. Jesús avei noñentregái vaʼekue ha osegi opredika umi judíope, haʼe hetaiterei oñehaʼã vaʼekue haʼekuéra oasepta hag̃ua umi notísia porã.

4. ¿Mbaʼe mbaʼépa ñaaprendéta Jesús ehémplogui?

⁴ Ko artíkulope jahecháta Jesús ikyreʼỹeterei hague predikasiónpe, koʼytevéntema umi último 6 mése haʼe oĩ haguépe ko yvy ape ári (ehecha pe nóta de estúdio oĩva Lucas 10:1-pe retopátava pe Traducción del Nuevo Mundo españólpe). La Jesús omboʼe vaʼekue ha iñehémplo ikatu ñanepytyvõ javyʼa hag̃ua avei koʼág̃a predikasiónpe. Ko artíkulope jahecháta 4 mbaʼe ikatúva ñaaprende Jesúsgui: 1) Haʼe omotenonde vaʼekue Jehová volunta, 2) ojesareko meme vaʼekue umi profesía oĩvare Ñandejára Ñeʼẽme, 3) ojerovia vaʼekue Jehová oipytyvõtaha chupe, ha 4) ndoperdéi vaʼekue la esperánsa oĩtaha umi ohendútava chupe.

JESÚS OMOTENONDE VAʼEKUE JEHOVÁ VOLUNTA

5. ¿Mbaʼéichapa Jesús ohechauka vaʼekue iñimportantetereiha chupe g̃uarã Ñandejára volunta?

⁵ Jesús opredika vaʼekue vyʼápe “umi notísia porã oñeʼẽva Ñandejára Rréinore”, pórke oikuaa porã Itúa oipotaha ojapo upéva (Luc. 4:43). Jesúspe g̃uarã ndaipóri vaʼekue ótra kósa iñimportantevéva pe predikasióngui. Omohuʼãvo ohóvo hembiapo ko yvy ape ári “ohasa umi siuda ha puévlorupi, ha omboʼe umi héntepe” (Luc. 13:22). Avei ombokatupyry vaʼekue hetave disípulope opredika hag̃ua haʼéicha (Luc. 10:1).

6. ¿Mbaʼépa pe iñimportantevéva Jehová oipotáva jajapo iservísiope? (Ehecha pe taʼanga).

⁶ Koʼág̃a avei pe predikasión haʼe pe traváho iñimportantevéva Jehová ha Jesús oipotáva jajapo (Mat. 24:14; 28:​19, 20). Entéro mbaʼe jajapóva Jehová servísiope amo ipahápe oipytyvõ hína predikasiónpe. Por ehémplo ñande ñamopuʼã umi Salón del Reino ikatu hag̃uáicha umi hénte ojepredika vaʼekuépe oho omombaʼeguasu Jehovápe. Avei pe traváho ojejapóva Betélpe oipytyvõ ojesegi hag̃ua ojepredika. Oiko jave umi desástre naturál ñaipytyvõ umi ermáno ha ermánape oreko jey hag̃ua la oikotevẽva ikatu hag̃uáicha oho jey rreunionhápe ha osẽ jey opredika. Péro ñanemanduʼa vaʼerã pe predikasión haʼeha pe traváho iñimportantevéva Jehová oipotáva jajapo. Jarekóvo enkuénta upéva, vyʼápe ñasẽ meméta japredika. Peteĩ ansiáno hérava János ha oikóva Hungríape heʼi: “Tahaʼe haʼéva la jajapóva Jehová servísiope, ndaipóri ótra kósa iñimportantevéva pe predikasióngui, upéva ndaikatúi hekovia”.

7. ¿Mbaʼérepa Jehová oipota jasegi japredika? (1 Timoteo 2:​3, 4).

⁷ Ikatu hína ñanekyreʼỹve predikasiónpe jahecháramo umi héntepe Jehová ohechaháicha chupekuéra. Jehová oipota ikatumíva guive ohendu ha oasepta umi notísia porã (elee 1 Timoteo 2:​3, 4). Umi notísia porã ningo ikatu osalva umi héntepe, upévare Jehová ñanembokatupyry ñañeʼẽ hag̃ua hendivekuéra. Por ehémplo koʼág̃a jareko pe folléto Pe oporohayhúva omboʼe umi héntepe. Upépe oĩ heta konsého ñanepytyvõva ñañepyrũ hag̃ua ñañemongeta la héntendi ikatu hag̃uáicha kon el tiémpo oiko chuguikuéra Jesús disípulo. Umi hénte noñepyrũiramo jepe oservi Jehovápe koʼag̃aite, ikatu hína oreko oportunida ojapo hag̃ua upéva opa mboyve pe jehasa asy guasu. Amo gotyove haʼekuéra ikatu hína imanduʼa la jaʼe vaʼekuére chupekuéra ha oñepyrũma oservi Jehovápe. Péro upéva oiko hag̃ua, jasegímante vaʼerã japredika umi héntepe.

JESÚS OJESAREKO VAʼEKUE UMI PROFESÍARE

8. ¿Mbaʼéichapa umi profesía oipytyvõ vaʼekue Jesúspe oipuru porã hag̃ua itiémpo?

⁸ Jesús oikuaa porã vaʼekue mbaʼéichapa oñekumplíta umi profesía oĩva Ñandejára Ñeʼẽme. Por ehémplo haʼe oikuaa kuri opredikataha 3 áño imédiorente (Dan. 9:​26, 27). Avei Jesús oikuaa oĩha umi profesía omombeʼúva arakaʼépa ha mbaʼéichapa omanóta (Luc. 18:​31-34). Entéro umi profesía Jesús oikuaáva oipytyvõ vaʼekue chupe oipuru porã hag̃ua itiémpo. Upévare haʼe opredika kyreʼỹme omohuʼã meve pe traváho oñemeʼẽ vaʼekue chupe.

9. ¿Mbaʼéichapa umi profesía oĩva la Bíbliape ñanemomýi japredika hag̃ua kyreʼỹme?

⁹ Tekotevẽ ñantende porã umi profesía oĩva la Bíbliape, upéva ñanemomýita japredika hag̃ua kyreʼỹme. Por ehémplo jaikuaa mbykypaitemaha pe tiémpo hembýva ko múndope. Avei la Biblia heʼíma vaʼekue voi mbaʼéichapa la hénte oñekomportáta ha mbaʼépa oikóta umi ára pahápe, ha ñande jahecha mbaʼéichapa umi profesía oñekumpli hína. Avei jahecha mbaʼéichapa pe poténsia mundiál oĩháme Reino Unido ha Estados Unidos oñokontrarioiteha Rusia ha iñirũnguérandi. Péicha oñekumpli pe profesía heʼíva pe rréi del sur ha pe rréi del nórte oñorairõtaha “umi ára pahápe” (Dan. 11:40). Avei ñantende pe profesía oĩva Daniel 2:​43-45-pe ha jaikuaa pe estátua tuichaitéva py orrepresentaha pe poténsia mundiál oĩháme Reino Unido ha Estados Unidos. Jastudia porãvo umi profesía oĩva la Bíbliape ñaĩ segúro koʼẽrõitéma Ñandejára Rréino ohunditaha umi goviérno umánope. Entéro koʼã profesía ohechauka porã ñandéve hiʼag̃uimbaitemaha pe fin, upévare japerdeʼỹre tiémpo jasegi vaʼerã japredika.

10. ¿Mbaʼéichapa umi profesía ikatu ñanemomýi japredika hag̃ua kyreʼỹme?

¹⁰ Umi profesía apytépe oĩ peteĩ mensáhe ñamombeʼusetereíva voi la héntepe. Peteĩ ermána hérava Carrie oservíva República Dominicánape heʼi: “Umi mbaʼe Jehová oprometéva ñane renonderãme g̃uarã ningo iporãiterei ha amombeʼuseterei voi upéva ótrope. Apensávo umi provléma la hénte orekóvare, ahechakuaa haʼekuéra tekotevẽtereiha oikuaa umi mbaʼe porãite Jehová oprometéva chupekuéra avei”. Umi profesía oĩva la Bíbliape ohechauka ñandéve Jehová ñanepytyvõha predikasiónpe ha upéva ñanemomýi jasegi hag̃ua jajapo ko traváho. Leila oikóva Hungríape heʼi: “Isaías 11:​6-9 ohechauka Jehová ikatuha oipytyvõ oimeraẽvape okambia hag̃ua. Upéva chepytyvõ amombeʼu hag̃ua pe notísia porã enterovépe, sapyʼánte apensáramo jepe oĩtaha algúno nohenduséiva”. Peteĩ ermáno oikóva Zámbiape hérava Christopher heʼi: “Marcos 13:10 heʼíma haguéicha, umi notísia porã ojepredika hína oparupiete ko yvy tuichakuére. Upévare che avyʼaiterei voi ikatu haguére aipytyvõ oñekumpli hag̃ua ko profesía”. ¿Mbaʼe profesíapa nepytyvõ esegi hag̃ua epredika vyʼápe?

JESÚS OJEROVIA VAʼEKUE JEHOVÁ OIPYTYVÕTAHA CHUPE

11. ¿Mbaʼérepa tekotevẽ vaʼekue Jesús ojerovia Itúare osegi hag̃ua opredika kyreʼỹme? (Lucas 12:​49, 53).

¹¹ Jesús oĩ vaʼekue segúro Itúa oipytyvõtaha chupe osegi hag̃ua opredika kyreʼỹme. Opredikárõ guare, Jesús siémpre orrespeta vaʼekue la héntepe. Péro lomímonte haʼe oikuaa pe mensáhe ogueraháva ombopochytaha algúnope ha oĩtaha katuete umi oñemoĩ mbaretéva hese opredika haguére (elee Lucas 12:​49, 53). Umi líder rrelihiósope ndogustaiete vaʼekue la Jesús opredika, upévare haʼekuéra heta vése voi oñehaʼã ojuka chupe (Juan 8:59; 10:​31, 39). Péro Jesús osegi opredika pórke oikuaa Itúa oĩha hendive. Jesús heʼi vaʼekue: ‘Naiméi cheaño, chendive oĩ hína pe Túa chembou vaʼekue. Haʼe ndacherejái cheaño, pórke che siémpre ajapo umi mbaʼe haʼe oguerohorýva’ (Juan 8:​16, 29).

12. Jesús oikuaa vaʼekue ojepersegitaha idisipulokuérape, ¿mbaʼéichapa haʼe oprepara chupekuéra upearã?

¹² Jesús omomanduʼa vaʼekue idisipulokuérape Jehová siémpre oipytyvõtaha chupekuéra. Haʼe heta vése voi heʼi idisipulokuérape Jehová oĩtaha hendivekuéra, koʼýte oĩ jave umi opersegíva chupekuéra (Mat. 10:​18-20; Luc. 12:​11, 12). Péro Jesús oavisa avei chupekuéra tekotevẽtaha oñatende porã (Mat. 10:16; Luc. 10:3). Avei heʼi vaʼekue idisipulokuérape ani hag̃ua ojopy la héntepe ohendu hag̃ua pe mensáhe oimérõ haʼekuéra nohenduséi (Luc. 10:​10, 11). Ha heʼi avei chupekuéra ohónte hag̃ua ótro ládo oĩramo opersegíva chupekuéra (Mat. 10:23). Jahechaháicha Jesús ikyreʼỹ ha ojeroviáramo jepe Jehováre, ndoikói vaʼekue ojapeligra rei (Juan 11:​53, 54).

13. ¿Mbaʼérepa ikatu reĩ segúro Jehová katuete nepytyvõtaha?

¹³ Koʼág̃a oĩ avei heta oñemoĩva ñanderehe, upévare ñaikotevẽ Jehová ñanepytyvõ jajapo hag̃ua opa ikatúva jasegi hag̃ua japredika (Apoc. 12:17). ¿Péro mbaʼére ikatu reĩ segúro Jehová oĩtaha nde ykére? Pórke Jesús ojerure vaʼekue voi upéva Itúape peteĩ ñemboʼépe, ha upe ñemboʼe jatopa Juan kapítulo 17-pe. Upépe Jesús ojerure vaʼekue Itúape oñangareko hag̃ua umi apóstol rehe, ha Jehová ombohovái vaʼekue upe iñemboʼe. Pe lívro de Hechos omombeʼu mbaʼéichapa Jehová oipytyvõ umi apóstolpe osegi hag̃ua opredika kyreʼỹme ojepersegíramo jepe chupekuéra. Avei Jesús ojerure vaʼekue Jehovápe oñangareko hag̃ua umi ojeroviátavare hese ohendu rire la omboʼéva umi apóstol. Ha upépe reikéma nde avei. Jehová koʼág̃a peve osegi ombohovái Jesús ñemboʼe, upévare aníkena reduda Jehová oĩtaha nde ykére oipytyvõ haguéicha avei yma umi apóstolpe (Juan 17:​11, 15, 20).

14. ¿Mbaʼérepa jaʼekuaa jasegitaha japredika kyreʼỹme ijetuʼúramo jepe? (Ehecha pe taʼanga).

¹⁴ Amáske hiʼag̃ui pe fin ikatu hína ijetuʼuve ñandéve jasegi hag̃ua japredika kyreʼỹme. Péro Jesús oasegura ñandéve jarekotaha pe ajúda ñaikotevẽva jasegi hag̃ua japredika (Luc. 21:​12-15). Jesús ha idisipulokuéra ojapo haguéicha, ñande jaheja la hénte odesidi ohendútapa térãpa nohendumoʼãi pe mensáhe, ha ni michĩmi voi ndajaikovaiséi hendivekuéra. Umi país ojeproivihápe ñane rembiapo, umi ermanokuéra lomímonte osegi opredika umi notísia porã ojeroviágui Jehováre ha ndahaʼéi ijehénte. Yma síglo primérope Jehová omeʼẽ vaʼekue isiervokuérape pe fuérsa oikotevẽva, upéicha avei haʼe koʼág̃a ñanemombaretéta japredika hag̃ua oparupiete pe mensáhe haʼe oipotaháicha (2 Tim. 4:17). Nde rejeroviáramo Jehováre katuete haʼe nepytyvõta resegi hag̃ua repredika kyreʼỹme.

JESÚS NDOPERDÉI VAʼEKUE LA ESPERÁNSA

15. ¿Mbaʼérepa jaʼekuaa Jesús ndoperdéi hague la esperánsa oĩta hague umi ohendúva pe notísia porã?

¹⁵ Jesús siémpre opensa vaʼekue ojehupytytaha heta mbaʼe porã predikasiónpe, opensa rupi upéicha osegi vaʼekue opredika kyreʼỹme. Por ehémplo un áñorupi oñepyrũ riréma opredika, haʼe ohechakuaa oĩha hetaiterei persóna omombaʼéva pe mensáhe, ha okompara la héntepe umi kokue morotĩmbávare oĩmava oñemonoʼõ hag̃uáicha (Juan 4:35). Un áñorupi upe rire Jesús heʼi vaʼekue idisipulokuérape: “Hetaiterei oĩ la oñemonoʼõ vaʼerã” (Mat. 9:​37, 38). Upe rire haʼe heʼi jey idisipulokuérape: ‘Hetaiterei oĩ la oñemonoʼõ vaʼerã, pejerurékena pe kokue Járape tombou hetave travahadór omonoʼõ vaʼerã’ (Luc. 10:2). Jesús núnka ndoperdéi vaʼekue la esperánsa ha oĩ segúro oĩtaha persóna ojeroviáva pe notísia porãre. Jesús ohechárõ guare upéva oikoha, ovyʼaiterei vaʼekue (Luc. 10:21).

16. ¿Mbaʼéichapa umi ehémplo Jesús oipuru vaʼekue ohechauka ojehupytytaha heta mbaʼe porã? (Lucas 13:​18-21). (Ehecha pe taʼanga).

¹⁶ Jesús omboʼe vaʼekue idisipulokuérape pe mensáhe haʼekuéra opredikáva rupive ojehupytytaha hetaiterei mbaʼe. Upéicha Jesús oipytyvõ vaʼekue idisipulokuérape opredika hag̃ua kyreʼỹme. Jahechamína mokõi ehémplo Jesús omombeʼu vaʼekue idisipulokuérape (elee Lucas 13:​18-21). Jesús okompara vaʼekue pe mensáhe oñeʼẽva Ñandejára Rréinore peteĩ mostása semíllare. Upéicha Jesús ohechauka oĩtaha hetaiterei persóna oaseptáva umi notísia porã ha ndaiporimoʼãiha avave ikatúva ojoko upéva. Jesús avei okompara vaʼekue pe mensáhe pe levadúrare. Upéicha ohechauka ojepredikataha oparupiete ha la hénte ojapotaha heta kámbio, péro ikatu hína ndojehechái umi kámbio ensegidaite. Upéicha Jesús ohechauka vaʼekue idisipulokuérape oĩtaha heta rresultádo iporãitereíva haʼekuéra osegi rupi opredika upe mensáhe.

17. ¿Mbaʼérepa jasegi vaʼerã japredika vyʼápe?

¹⁷ Jahechakuaávo mbaʼéichapa pe predikasión oipytyvõma hetaiterei persónape oparupiete, ñanekyreʼỹ jasegi hag̃ua japredika. Káda áño hetaiterei persóna oho konmemorasionhápe ha oñepyrũ ostudia la Biblia. Oĩ avei hetaiterei ojevautisáva ha oñepyrũva ñanemoirũ predikasiónpe. Ndajaikuaái ningo añete mboy persónapa gueteri oaseptáta pe mensáhe, péro si jaikuaa Jehová ombyatyha peteĩ aty guasu tuichaitereívape. Ko aty guasu ojesalváta pe jehasa asy guasu ou potaitévape (Apoc. 7:​9, 14). Jehová ningo pe kokue Jára ha haʼe oĩ segúro oĩtaha gueteri heta persóna oaseptáva pe mensáhe. ¡Upévare jasegíkena japredika!

18. ¿Mbaʼépa jaipota la hénte ohechakuaa ñanderehe?

¹⁸ Jesús disipulokuéra siémpre ikonosído vaʼekue opredika haguére kyreʼỹme. Yma umi hénte ohechárõ guare umi apóstol opredikaha pyʼaguasúpe, “ohechakuaa avei haʼekuéra omoirũmi hague Jesúspe” (Hech. 4:13). Upévare ñande avei japredikase kyreʼỹme ha pyʼaguasúpe, umi hénte ohechakuaa hag̃ua jasegiha Jesús ehémplo.