MBAʼÉICHAPA IKATU OPA PE ÓDIO
3 | Eipeʼaite ne akãgui pe ódio
La Biblia omboʼéva:
“Pekambia pepensa lája, péicha peẽ voi pekambiaitéta. Ha ikatúta peikuaa porã Ñandejára volunta iporãva, haʼe oguerohorýva ha ndorekóiva defékto” (ROMANOS 12:2).
Mbaʼépa heʼise ko téxto:
La ñande ñapensáva ningo iñimportanteterei Ñandejárape g̃uarã (Jeremías 17:10). Añetehápeko ñañatende vaʼerã umi mbaʼe jaʼéva ha jajapóvare ani hag̃ua jaju ndajachaʼéi ñande rapicháre, péro tekotevẽ avei jajapove álgo. Ñanemanduʼa vaʼerã pe ódio oñepyrũha ñane ménte ha ñane korasõme, upévare jahapoʼo vaʼerã oimehaichagua pensamiénto ha sentimiénto ñanemomýiva ndajachaʼéi hag̃ua ñande rapicháre. Péicha añoite jahechaukáta ‘ñakambiaiteha’ ha ñandepuʼakaha pe ódiore.
La ikatúva rejapo:
Ejepyʼamongeta vaʼerã eikuaa hag̃ua mbaʼépa eñandu ha mbaʼépa epensa umi persóna idiferéntevare ndehegui. Koʼytevéntema umi ipire kolór diferénteva térã haʼéva ótro paisgua. Ikatu reñeporandu: “¿Mbaʼépa apensa hesekuéra? ¿Ajesegípa umi mbaʼe ojeʼévarente chéve térã che voi ahecha mbaʼeichaguápa pe persóna?”. Emboyke vaʼerã umi rred sosiál, umi pelíkula, térã oimehaichagua diversión nemomýiva neviolénto ha nderechaʼéi hag̃ua nde rapicháre.
Ñandejára Ñeʼẽ ikatu ñanepytyvõ jaipeʼaite hag̃ua ñane akã ha ñane korasõgui pe ódio
Legálmente ndaifásil jahechakuaa hag̃ua ñandejehe oimépa ndajachaʼéi hína ñande rapicháre, péro Ñandejára Ñeʼẽ ikatu ohechauka “mbaʼépa ñapensa ha mbaʼépa jaipota ñane korasõme” (Hebreos 4:12). Upévare, esegíkena estudia porã la Biblia. Ekompara umi mbaʼe eaprendéva upépe umi mbaʼe epensávare. Ha ehechakuaáramo tekotevẽha ekambia la epensa lája oĩ porã hag̃ua la Biblia omboʼévandi, ejapókena upéva. Ñandejára Ñeʼẽ ikatu ñanepytyvõ jaipeʼaite hag̃ua ñane akã ha ñane korasõgui pe ódio “imbaretéva peteĩ tórreicha” (2 Corintios 10:4, 5).