¿Mbaʼérepa umi hénte oñekomporta vaieterei koʼág̃arupi? ¿Mbaʼépa heʼi la Biblia?

Amás día hetaitereive umi hénte ndopororrespetáiva. Por ehémplo oĩ persóna otrata vai ha osapukáiva umi doktórpe, oĩ iñeʼẽ arhélva umi oñatendévape hesekuéra umi rrestaurántepe, heta umi oviaháva aviónpe ndosegiséi umi rrégla ha ojaʼo vaipa umi personálpe, eskuélape katu umi mitãnguéra imaledukádo, haʼekuéra oñembohory ha otrata vai iprofesorkuérape, ha algúno polítiko pyʼỹinte ojapo heta mbaʼe vai ha ótro katu heʼi omoĩha ehémplo porã la hentekuérape.

La Bíbliape oĩ heta konsého ñanepytyvõva jarrespeta ha jatrata porã hag̃ua ñande rapichápe. Avei upépe oñemombeʼu ñandéve mbaʼérepa koʼág̃a heta hénte ndopororrespetavéi.

¿Mbaʼérepa umi hénte ndopororrespetavéi?

Oparupiete ko múndope ojekuaa porãiterei umi hénte amás día hekovaiveha, iñañaveha ha ndaiporiveiha orrespetáva hapichápe.

• Peteĩ enkuésta ojejapo ramoitévape ohechauka umi hénte Estados Unidosgua ndopororrespetaveieteha, ha umi 22 áño ohasa vaʼekuépe ojekuaa koʼág̃a saʼiveha oĩ la opororrespetáva.

• Ha ojejapo ótra enkuésta 32.000 persóna 28 paisguápe. Ha 65 por ciento heʼi koʼág̃a ndaiporiveieteha opororrespetáva, ha heʼi avei hikuái ke arakaʼeve umi hénte noñekomportavaíriva la koʼag̃aguáicha.

La Bíbliape ojeprofetisáma vaʼekue voi umi hénte oñekomporta vaietereitaha koʼág̃arupi.

• “Umi ára pahápe pe situasión ijetuʼúta ha ipeligrósota. Pórke umi hénte ojepyʼapýta ijehénte, iplatarayhúta, oñembotuicháta, oñemombaʼeguasúta, oñeʼẽ vaíta Ñandejárare ha hapicháre, naiñeʼẽrendumoʼãi ituakuérape, imalagradesídota, ombotavýta hapichápe, ndohayhumoʼãi ihéntepe, ndoikoporãsemoʼãi avavéndi, oñeʼẽ reíta ótrore, ndojejokokuaamoʼãi, isalváheta, ndaijaʼemoʼãi mbaʼeve iporãvare” (2 Timoteo 3:1-3).

Eikuaaséramo mbaʼéichapa koʼág̃a oñekumpli hína ko profesía, elee ko informasión “¿Predijo la Biblia cómo sería la gente en nuestros dias?”.

Peteĩ lívro ñanemboʼéva mbaʼéichapa ñañekomporta porã vaʼerã

Ko múndope oĩramo jepe heta hénte oñekomporta vaíva hetaiterei persóna osegi umi konsého porã omeʼẽva la Biblia. Ha umi konsého oĩva pype “ideprovécho koʼág̃ama voi ha opa ára g̃uarã” (Salmo 111:8). Jahechamína algúno ehémplo:

• ¿Mbaʼépa heʼi la Biblia?: “Entéro mbaʼe peẽ peipotáva pende rapichakuéra ojapo penderehehápe, peẽ pejapo vaʼerã avei hesehapekuéra” (Mateo 7:12).

  ¿Mbaʼépa heʼise?: Ñande jatrata porã ha jarrespeta vaʼerãha umi héntepe jaipotaháicha avei haʼekuéra ñandetrata.

• ¿Mbaʼépa heʼi la Biblia?: “Koʼág̃a peipeʼáma rupi pendejehegui opaichagua japu, siertoguávante peje vaʼerã pende rapichápe” (Efesios 4:25).

  ¿Mbaʼépa heʼise?: Ñaneonrrádo vaʼerãha umi mbaʼe jajapóvape ha jaʼe vaʼerã siémpre la verda.

Eikuaasevéramo ko témagui ikatu elee koʼã informasión:

• Ñemañaha hérava “¿Mbaʼéichapa ikatu reikuaa oĩ porãva térã oĩ vaíva?”.

• Pe artíkulo hérava “Jarrespeta umi ótro opensa ha oiko lája: ¿Mbaʼépa heʼi la Biblia?”.