¿Ikatúnepa umi organisasión omoĩséva pyʼaguapy ohupyty upéva?

Ko múndo tuichakuére pyʼỹinte oiko umi gérra ha ñorairõ. Umi Naciones Unidas ha hetave organisasión oñehaʼã omoĩ hag̃ua pyʼaguapy, upearã omoĩ jepi irrepresentantekuéra oikohápe umi gérra. Haʼekuéra oipota oĩ pyʼaguapy umi lugár oĩvehápe violénsia. Pe sekretário henerál Naciones Unidaspegua, António Guterres, heʼi: “Koʼã organisasión rupive ikatu ojehupyty pyʼaguapy ko múndo tuichakuére. Haʼekuéra haʼe pe párte iñimportantevéva upearã”.

Umi áño ohasa vaʼekuépe ojekuaa umi organisasión oñehaʼãva omoĩ hag̃ua pyʼaguapy, ohupyty mimi hague upéva. Por ehémplo, oprotehe umi hénte inoséntepe, ogueraha jey umi rrefuhiádope ipaíspe, omeʼẽ chupekuéra tembiʼu ha hetave mbaʼe oikotevẽva, ha omyatyrõ jey umi óga ha edifísio oñembyaipa vaʼekue. Péro oñehaʼãmbaitéramo jepe hikuái ojapo la ikatumíva, ndaikatúi omeʼẽmbaite la héntepe umi mbaʼe oikotevẽva. ¿Ikatúne piko oñesolusionaite koʼã mbaʼe ha jaiko pyʼaguapýpe ko múndo tuichakuére? ¿Mbaʼépa heʼi la Biblia?

Mbaʼérepa noĩri pyʼaguapy ha mbaʼe solusiónpa omeʼẽ la Biblia

Provléma: noñembaʼaposéi oñondive. Umi organisasión diferénte paisgua, haʼéva militár ha umi ndahaʼéivape, ijetuʼu jepi ombaʼapo hag̃ua oñondive. Sapyʼánte koʼã organisasión ndaikatúi ombaʼapo oñondive noñontendéi rupi térã idiferénte rupi umi mbaʼe ohupytyséva káda uno.

Solusión omeʼẽva la Biblia: “Ñandejára omoĩta peteĩ rréino [...]. Omonguʼíta ha ohundíta enterove koʼã rréino [térã goviérno umáno], ha ko rréino añoite opytáta opa ára g̃uarã” (Daniel 2:44).

Provléma: ndorekopái la oikotevẽva. Umi organisasión oñehaʼãva omoĩ hag̃ua pyʼaguapy oreko jepi koʼãichagua provléma: saʼi ipersonál, saʼi la pláta ha ndorekopái jepi umi mbaʼe oikotevẽva, upéicha rupi ndaikatúi oprogresa hikuái. Avei, umi oñehaʼãva omoĩ hag̃ua pyʼaguapy ombaʼapo jepi umi lugár ipeligrosoitereívape ha ivaietereihápe la situasión.

Solusión omeʼẽva la Biblia: “Ñandejára, pe Túa ijojahaʼỹva, haʼéva hína ñande Ruvicha Jesucristo Jára [...], omboguapy [Jesúspe] ideréchape yvágape. Omoĩ chupe peteĩ puésto ijyvatevévape entéro goviérnogui, umi orekóvagui autorida ha podér” (Efesios 1:17, 20, 21).

Jesús haʼe pe Rréi Ñandejára Jehováa oiporavo vaʼekue ogoverna hag̃ua Irréino. Ñandejára Todopoderóso omeʼẽ chupe entéro mbaʼe oikotevẽva ogoverna porã hag̃ua (Daniel 7:13, 14).b Jesús orekove podér, iñaranduve, oikuaa hetave mbaʼe ha iñentendidove oimeraẽ governánte umáno térã organisasióngui, ¿mbaʼéicha rupípa? Ñandejára voi oipytyvõgui chupe (Isaías 11:2). Avei Jesús oreko peteĩ ehérsito oĩháme umi ánhel ipoderosoitereíva (Apocalipsis 19:14). Ndaipóri mbaʼeve haʼe ikatuʼỹ vaʼerã osolusiona.

Provléma: pe léi nopermitíri. Sapyʼánte umi organisasión oñehaʼãva omoĩ hag̃ua pyʼaguapy ndaikatúi ojapo la tekotevẽva, pórke nontendeporãi la oñehaʼarõva chuguikuéra térã oĩ rupi heta mbaʼe pe léi voi nopermitíriva chupekuéra ojapo. Upéicha rupi haʼekuéra ndaikatúi oprotehe porã umi héntepe ha ndaikatúi okumpli porã la ohupytyséva hikuái.

Solusión omeʼẽva la Biblia: “Ñandejára omoĩ [Jesús] poguýpe entéro mbaʼe oĩva yvágape ha ko yvy ape ári” (Mateo 28:18).

Pe instruksión Ñandejára omeʼẽva Jesúspe iklaroiterei: haʼe ogueru vaʼerã pyʼaguapy ko yvy ape ári. Upearã haʼe omeʼẽ chupe la autorida oikotevẽva (Juan 5:22). Jesús arakaʼeve ndojapomoʼãi mbaʼeve iñinhústova ni ndaikorruptomoʼãi (Isaías 11:3-5). Ajeve voi la Biblia ohenói Jesúspe “Prínsipe de Paz”, ha Irréino poguýpe oĩta “hustísia ha pe tekojoja” (Isaías 9:6, 7).

Ñandejára Rréino omoĩta pyʼaguapy teete

Umi organisasión oñehaʼãva omoĩ hag̃ua pyʼaguapy okonsegi mimi jepi upéva, ha ikatu voi oipytyvõ opa hag̃ua la gérra peteĩ térã hetave lugárpe. Péro haʼekuéra ndaikatúi oipeʼaite umi hénte korasõgui pe ódio, ha upéva la omoñepyrũva jepi umi gérra.

“Umi organisasión oñehaʼãmbaitéramo jepe omoĩ hag̃ua pyʼaguapy, ndaikatumoʼãi voínte ohupyty upéva” (Dennis Jett, embahadorkue Estados Unidospegua).

Ñandejára Rréino katu idiferentete, pórke oipytyvõ oĩ hag̃ua pyʼaguapy ha oipeʼaite hag̃ua la hénte korasõgui pe ódio. Por ehémplo, Jesús omboʼe vaʼekue idisipulokuérape, umi mbaʼe heʼíva ha ojapóva rupive, mbaʼéichapa oiko vaʼerã pyʼaguapýpe ha ohayhu hag̃ua hapichakuérape:

Jesús heʼi vaʼekue avei umi oĩva Ñandejára Rréino poguýpe ohayhutaha hapichápe, ha enterovéva ohechakuaataha upéva. La Biblia ohechauka porã Ñandejára Rréino poguýpe noĩmoʼãiha umi ndochaʼéiva hapicháre:

Ñandejára Jehová ningo ñandekrea, ha haʼe añoite oikuaa mbaʼéichapa ikatu oĩ pyʼaguapy ko múndo tuichakuére. Irréino rupive haʼe ojapóta entéro umi mbaʼe umi hénte ymaitereíma oñehaʼãva ojapo, umíva apytépe oguerúta pyʼaguapy teete ko múndo tuichakuére.