Abrahán ohechauka ojeroviaha Jehováre

Abrahán omboʼe vaʼekue itaʼýra Isaácpe ohayhu hag̃ua Jehovápe ha ojerovia hag̃ua ipromesakuérare. Péro Isaac orekórõ guare 25 áñorupi, Jehová ojerure Abrahánpe ojapo hag̃ua peteĩ mbaʼe ijetuʼuetereíva. ¿Reikuaápa mbaʼépa ojerure chupe?

Ñandejára heʼi Abrahánpe: “Ejagarra nde raʼy peteĩmi ha eofrese chupe ofréndaicha peteĩ sérro oĩvape Móriape”. Abrahán ndoikuaái kuri mbaʼérepa Jehová ojerure chupe upéva, upéicharamo jepe haʼe ojapo la heʼíva chupe.

Al día sigiénte, pyharevete, Abrahán oho Isaac ha mokõi isirviéntendi Moria gotyo. Upéi 3 día haguépe, ohecháma hikuái mombyry guive pe sérro ohotaha hína. Upémarõ Abrahán heʼi isirvientekuérape: “Pepyta koʼápe oreraʼarõ. Che ha che raʼy katu rohóta amoite roadora hag̃ua Ñandejárape”. Upéi Abrahán omeʼẽ Isaácpe oraha hag̃ua la jepeʼa ha haʼe katu oraha peteĩ kyse, ha tapére Isaac oporandu itúape: “¿Moõiko oime la ovecha jasakrifikátava?”. Abrahán heʼi chupe: “Che raʼy, Jehová omeʼẽta ñandéve la ñaikotevẽva”.

Og̃uahẽvo hikuái pe lugár Ñandejára heʼi haguépe chupe, Abrahán ojapo peteĩ altár. Upéi oipokua ha oipykua itaʼýra Isaácpe ha omoñeno chupe pe altár ári.

Abrahán ojagarrávo pe kyse ojuka hag̃ua itaʼýrape, peteĩ ánhel heʼi chupe: “¡Abrahán! Ani rejapo hese mbaʼeve ivaíva, koʼág̃a aikuaáma nde rejeroviaha Ñandejárare nde pyʼaite guive, pórke nanerakateʼỹi remeʼẽ hag̃ua chupe nde raʼy peteĩmi”. Upéi Abrahán ohecha peteĩ ovecha mácho opaʼãva hatĩgui peteĩ yvyramataʼi rakãre. Upépe opoi pyaʼe porã itaʼýragui ha oho ojagarra pe ovecha ha osakrifika itaʼýra rekovia.

Upe día guive Jehová heʼi Abrahán rehe haʼeha iñamígo. ¿Reikuaápa mbaʼérepa? Pórke Abrahán ojapo enteroite mbaʼe Jehová heʼíva chupe, sapyʼánte nontendéiramo jepe mbaʼérepa ojerure chupe umíva.

Upe rire Jehová opromete jey Abrahánpe: “Rovendesíta ha ambohetaitereíta ne familiare”. Avei opromete chupe ovendesitaha entéro umi hénte ivuénovape ifamiliare rupive.