Mbaʼéicha ikatu reskrivi peteĩ kárta

UMI kárta ñanepytyvõ ñañekomunika hag̃ua ñande rapichándi, ha oipytyvõma avei hetaiterei héntepe okambia ha oiko porãve hag̃ua. Haimete enterove umi lívro oĩva Escrituras Griégaspe haʼe vaʼekue kárta oñemondo vaʼekue umi kongregasiónpe. Koʼág̃a peve heta ermáno ojevale umi kártare omokyreʼỹ hag̃ua umi estudiántepe, oñekomunika hag̃ua iñamigokuérandi, ofelisita hag̃ua umi orresivívape nombramiénto térã omombarete hag̃ua umi ohasa asývape. Umi kongregasión avei omondo ha orresivi kárta ikatu hag̃uáicha ojejapo hekópe opa mbaʼe (1 Tes. 1:1-7; 5:27; 2 Ped. 3:1, 2).

Umi kárta rupive ikatu avei japredika ñande rapichápe. Heta lugárpe ningo oĩ hénte oikóva edifisioháre térã várrio serrádope ha hasy ojepredika hag̃ua chupekuéra. Térã ñande territóriope ikatu ndajatopaguasúi umi héntere hógape. Oĩ avei oikóva mombyryeterei térã oĩva kárselpe ha upévare ijetuʼu ñag̃uahẽ hag̃ua hendapekuéra.

¿Mbaʼéicha javépa rejevalekuaa avei umi kártare? Por ehémplo, ikatu neresẽvéi nde rógagui nderasykatu rupi, okyeterei, térã pe goviérno oproivi rupi ñasẽ ñande rógagui. Umi kárta rupive nde ikatu resegi repredika. ¿Reskrivikuaánepa peteĩ kárta ne héntepe térã peteĩ persóna repredika vaʼekuépe? ¿Reguerekópa peteĩ estudiánte ova vaʼekue mombyry? Remondóramo chupe peteĩ kárta ikatu ikyreʼỹ jey osegi hag̃ua oikuaa Jehovápe. Térã reguerekóramo peteĩ ne konosído omenda ramóva, ihénte manóva térã ramoiténte ifamíliava, ikatu reaprovecha ha remondo chupekuéra peteĩ informasión vívlika.

Repredikáta jave kárta rupive

Remondótaramo kárta peteĩ deskonosídope, tenonderãite remombeʼu vaʼerã mávapa nde ha mbaʼérepa reskrivi chupe. Ikatu remyesakã nderekovramoʼãiha chupe mbaʼevete, ha repartisipaha peteĩ tembiapo ojejapóvape oparupiete ko múndope. Rekalkuláramo iporãtaha, ikatu remombeʼu nde haʼeha testígo de Jehová ha mbaʼérepa ndaikatúi revisita chupe hogaitépe. Reskrivi vaʼerã nde kárta reñemongetarõguáicha hendive. Péro nemanduʼa vaʼerã pe konsého Jesús omeʼẽ vaʼekuére: “Peikokuaákena mbóicha ha penemánsokena palómaicha” (Mat. 10:16). Upéicha reikuaáta mbaʼe informasiónpa natekotevẽmoʼãi remombeʼu.

Epensa mbaʼépa ere vaʼerãmoʼã pe ogajárape ikatúrire repredika chupe hogaitépe, ha eskrivi umíva nde kártape. Reiporukuaa umi suherénsia oĩva lívro Razonamiéntope térã umi osẽva jepi Ñane Marandu Porãme. Reskrivikuaa peteĩ porandu ha emokyreʼỹ chupe ojepyʼamongeta hag̃ua hese. Oĩ puvlikadór oñekuaveʼẽva oho hag̃ua hogaitépe ombohovái hag̃ua umi mbaʼe oikuaaséva la Bíbliagui. Upéi oiporavo umi téma oĩva ñane puvlikasionkuérape ha omoĩ pe kártape. Páhina 73-pe oĩ peteĩ ehémplo nepytyvõtava reikuaa hag̃ua mbaʼéichapa ikatu rejapo. Péro iporãta rekambia mimíramo umi mbaʼe reskrivíva, ani hag̃ua umi hénte orresivi la mísma kárta heta vése.

Oĩ heta hénte ndoleeséiva umi kárta ipukuetereíramo, koʼýte ndoikuaáiramo pe persóna ombou vaʼekuépe. Upévare iporãvéta mbykymínteramo la nde kárta, ani ág̃a ikaiguéma oleepa hag̃ua. Ikatu remoĩ hendive peteĩ invitasión ou hag̃ua rreunionhápe, peteĩ folléto, peteĩ rrevísta ¡Despertad!, térã Ñemañaha. Ha remoĩkuaa avei nde kártape oipotáramo reguerahataha chupe umi rrevísta káda mes. Reñekuaveʼẽkuaa avei revisita hag̃ua chupe peñemongetave hag̃ua la Bíbliare.

Mbaʼéichapa rejapo vaʼerã nde kárta

Emañami pe kárta oĩvare páhina 73-pe. Ejesareko koʼã mbaʼére: 1) Káda párte oĩ hendaitépe ha ndahaʼéi ku ojoʼapáva. 2) Pe eskínape oĩ pe omondóva réra ha idireksión, péicha okañýramo jepe pe sóvre, lomímonte orekóta pe omondóva direksión. 3) Primer párrafope oñemombeʼúma mbaʼérepa oñemondo pe kárta. 4) Ojeskrivi rangue de un pukúnte, káda párrafope oñeñeʼẽ peteĩ púntorente. 5) Ojeskrivi lájare ha umi palávra oiporúvare ojehecha ndahaʼeiha la iserioitereíva ni oñeʼẽramoguáicha peteĩ isósiope.

Umi kárta omondóva sukursálpe pe sekretário de kongregasión iseriove. Umívape omoĩ vaʼerã héra, pe kongregasión réra ha inúmero, pe salón direksión ha fécha. Umichagua kártape oñemoĩ vaʼerã mávapepa oñemondo, héra ha idireksión, tahaʼe oñemondóva peteĩ persónape térã peteĩ organisasiónpe. Oñepyrũnguévo oñemoĩ vaʼerã peteĩ salúdo rrespetuóso, térã remoĩnte: “Ore ermanokuéra”. Ha oñemohuʼãvo ikatu avei oñemoĩ: “Pene ermanokuéra”, ha iguýpe umi omondóva fírma.

Siémpre iñimportánte reskrivi porã. Eñatende moõpa oho vaʼerã umi asénto, púnto ha kóma, ha pe kuatia opyta vaʼerã potĩ asy. Koʼã detálle oipytyvõta pe persónape ohechakuaa hag̃ua iñimportanteha pe mensáhe remog̃uahẽséva chupe.

Ani nderesarái remoĩ hag̃ua nde réra ha ne direksión pe sóvrere. Repensáramo naiporãmoʼãiha remoĩ koʼã informasión, ikatu reporandu umi ansiánope ovalépa remoĩ pe salón direksión. Péro ndovaléi remoĩ pe sukursál direksión, pórke umi hénte ikatu opensa upégui oñemondoha pe kárta. Upéichante avei oñepensáta remondóramo pe kárta ha hendive peteĩ puvlikasión, péro neremoĩriramo nde réra.

Reñatende vaʼerã repagapa hag̃ua umi estampílla tekotevẽvare oreko, koʼýte remondótaramo puvlikasión, ani ofalta ha ojejerure pe ogajárape opaga hag̃ua hese. Cháke péicha ikatu oñeñeʼẽ vai ñane rembiapóre. Heta tetãme hepyve hína oñemondótaramo folléto térã rrevísta.

Mbaʼeichagua palávrapa reiporu vaʼerã

Rejapopa rire nde kárta elee jey rehecha hag̃ua noiméipa tekotevẽ hína rekambiaʼimi. ¿Mbaʼetekópa umi palávra reiporúva? ¿Ojekuaápa nderory ha reñeinteresaha pe persónare? Nemanduʼa vaʼerã ñande kristiáno tekotevẽha ñanembaʼeporã ha jatrata mborayhúpe enterove ñande rapichápe (Gál. 5:22, 23). Rehechakuaáramo nde kártape ofaltaveha koʼã mbaʼe, rekambia vaʼerã.

Umi kárta ikatu og̃uahẽ umi lugár ñande ndaikatuihápe ñag̃uahẽ. Umíva rupive haʼete voi nde reñeʼẽva ha repredikáva hína, upévare iñimportánte reñatende mbaʼe mbaʼépa remoĩta pype, umi palávra reiporútava, ha oĩ porãmbápa opa mbaʼe pe kártape ha pe sóvrepe. Umi kárta rupive ningo ikatu remomýi peteĩ persónape oñepyrũ hag̃ua oikuaa Jehovápe, térã remokyreʼỹ umi ohasa asývape oñemoag̃uive hag̃ua hese.