Emaña umi nerendúvare

ÑANDE resáre ikatu jahechauka umi mbaʼe ñañandu ha ñapensáva. Ojekuaa oimépa jakyhyje, ñañesorprende, ñañembyasýpa, javyʼápa térã jaiporiahuverekópa ñande rapichápe. Peteĩ karai ijedáva heʼi hetãyguakuéra heta ohasa asy vaʼekuére: “Hesáre ojekuaa osufri hague hikuái”.

Umi hénte ojesarekóvo moõ gotyopa ñande ñamaña ikatúma opilla ñanesinséropa térãpa nahániri. Heta lugárpe umi hénte odeskonfia peteĩ persónare omañáramo yvýre, térã ótro ládo oñemongeta aja hendive. Péro ojejeroviave umi torypápe oporosaludávare ha omañáva hapicha rováre oñeʼẽ jave. Oĩ katu lugárpe ndojehechaporãiva peteĩ persóna omaña hatãramo hapicháre, haʼete voi odesafiáva chupe térã hovaʼatãva, koʼýte omañáramo péicha peteĩ orekóvare autorida térã ipatrón rehe. Heta lugárpe avei peteĩ imitãvéva omañáramo hovaitére peteĩ ijedávare oñepensa imaledukadoha.

Upéicharamo jepe heta lugárpe ndojehechavaíri ñamañáramo umi hénte rováre ñañeʼẽ jave, péicha ojerresalta iñimportanteha pe ojeʼéva. Por ehémplo Jesús ojapo vaʼekue upéicha idisipulokuéra oporandúrõ guare chupe: “¿Máva piko añetehápe ikatúta ojesalva?”. La Biblia omombeʼu: “Jesús omaña porã hesekuéra, ha heʼi: ‘Yvyporakuérape g̃uarã ko mbaʼe ni mbaʼevéicharõ ndaikatumoʼãi oiko, péro Ñandejárape g̃uarã ndaipóri ikatuʼỹva’” (Mat. 19:25, 26). Apóstol Pablo ojesareko meme vaʼekue avei umi héntere oñeʼẽ jave chupekuéra, oikuaa hag̃ua mbaʼépa opensa hikuái pe haʼe heʼívare. Por ehémplo peteĩ vuéltape umi hénte apytépe oĩ vaʼekue peteĩ iparalítikova onase guive, ha Hechos 14:9, 10-pe oñemombeʼu mbaʼépa oiko: “Haʼe oguapy ojapysaka Pablo rehe, upévo Pablo omaña porã pe kuimbaʼére, ha ohechakuaávo ojeroviaha Ñandejárare ha ogueroviaha ikatutaha oñemonguera chupe, heʼi hatã porã: ‘Epuʼã eñemboʼy’”.

Repredika jave. Reñemongetáta jave umi héntendi reñehaʼã vaʼerã nderory ha resaluda porã chupekuéra. Reporandukuaa peteĩ mbaʼe ointeresátava pe ogajárape ha pe heʼívare ikatúta repilla mbaʼépa haʼe opensa. Reñepyrũ guive reñeʼẽ hendive reñehaʼã vaʼerã remaña hováre ha repukavymi. Péicha haʼe ohechakuaáramo nderory ha nderrespetuosoha katuete nerendusevéta.

Remañáramo pe persóna rováre ikatu repilla heta mbaʼe. Por ehémplo hesáre ikatúma reikuaa ipochýpa, ontendépa la eréva térãpa ndoikuaaséi mbaʼeve. Avei oimépa ojapuráma hína térã nerenduseve gueteri, tekotevẽpa reñeʼẽ mbegueve, pyaʼeve, térã oimérõ heʼise ndéve álgo. Ikatu reikuaa avei iporãvétapa reterminántema upépe, térãpa resegikuaa reñemongeta hendive ha rehechauka chupe mbaʼéichapa ojestudia la Biblia.

Tahaʼe repredika jave térã rejapo aja estúdio vívliko reñehaʼã vaʼerã remaña meme pe ogajárare. Péro reñatende vaʼerã ani omolestáma chupe pe remaña lája hese, térã katu opensa nemaledukadoha (2 Rey. 8:11). Iporãta remañáramo hese ha nderory hendive rejapoháicha normálmente reñemongeta jave nde rapichándi, koʼã mbaʼe ningo opárupi ojeguerohory. Relee jave la Biblia térã ótra puvlikasión remaña vaʼerã pe releévare, péro rerresaltase jave peteĩ idéa ikatu remaña sapyʼaite pe ogajárare. Remaña mimíramo hese repilláta oguerohorýpa la releéva térãpa nahániri.

Oiméramo neotĩ ha hasy jepi ndéve remaña umi hénte rováre, ani repensa ndaikatumoʼãiha remehora. Repraktika meméramo, mbeguekatúpe rejepokuaátama ha péicha reñemongeta porãvéta umi héntendi.

Rejapo jave diskúrso. La Biblia heʼi Jesús oñepyrũ mboyve pe Sermón del Mónte ‘omaʼẽ hague idisipulokuérare’ (Luc. 6:20). Nde ikatu avei resegi iñehémplo ha reñepyrũ mboyve nde diskúrso emaña raẽ sapyʼami umi héntere. Péva nepytyvõta ani hag̃ua nenerviosoiterei ha avei umi nerendúva omañávo nde rováre ipyʼaguapyvéta ohechávo netrankiloha. Péicha avei remeʼẽvéta tiémpo umi nerendúvape ojeprepara porãve hag̃ua, ikatu hag̃uáicha oñatende porã nderehe.

Rejapo aja nde diskúrso remaña mimi vaʼerã avei umi nerendúvare. Ani remañánte pe grúpo kompletoitére síno eñehaʼã emaña káda únore. Entéro hendápe oñehaʼarõ voi pe diskursánte omaña umi héntere oñeʼẽ jave chupekuéra.

Remaña umi nerendúvare ndeʼiséi remaña pyaʼe pyaʼénte hesekuéra térã rejesaupiʼimínte pokã pokã. Tekotevẽ remaña porã peteĩ persónare ha ere peteĩ fráse kompletoite. Upéi emaña ótrore ha eñeʼẽ mbykymi jey chupe, péro ani reikutu voi hese nde resa, cháke péicha ikatu oñeñandu vai. Ani avei remaña peteĩ grúpore meménte, eñehaʼã guei mbeguekatúpe emaña enterovére pe diskúrso aja, ha eñatende mbaʼéichapa orreaksiona hikuái reñeʼẽ aja.

Reguerekóramo ne nóta remoĩ vaʼerã pe atrílpe, nde pópe térã nde Bíbliape, péicha ifasilvéta ndéve remaña umi nerendúvare. Pórke reñakãitýramo manterei remaña hag̃ua ne nótare, ndaikatumoʼãi remaña porã umi nerendúvare. Reñatende vaʼerã avei ani remaña ne notakuérare ere jave umi mbaʼe iñimportantevéva, cháke péicha ndaikatumoʼãi repilla ontendépa hikuái la eréva ha pe informasión ndopokomoʼãi umi nerendúva korasõre.

Por ehémplo, rehuga jave vólei rekonvina jave ne irũme, reñatende vaʼerã jahecha ojagarra porãpa pe pelóta. Péicha avei rejapo jave diskúrso: repoi hína umi nerendúvape heta idéa ha reñatende vaʼerã mbaʼéichapa orreaksiona hikuái, upéicha repilláta ojagarra porãpa hína hikuái la eréva. Oñatende porãramo nderehe ha opukavymíramo, heʼise ontendeha hína la eréva. Remaña meméramo umi nerendúvare, ikatúta repilla ontende porãpa pe informasión.

Otokáramo ndéve relee kongregasiónpe, ¿tekotevẽtapa remaña umi nerendúvare? Jepe oleéta avei hikuái pe párte ha ndopillamoʼãi oimépa nde remaña hína hesekuéra, lomímonte ikatu remaña umi nerendúvare, ¿mbaʼérepa? Upéva nepytyvõta relee porãve hag̃ua, pórke ikatúta repilla mbaʼéichapa orreaksiona umi hénte. Ha oĩramo ndoleéiva ivívlia, ohechávo nde reñatendeha hesekuéra ikatu oñepyrũ olee. Péro sapyʼaiténte remaña vaʼerã, pono rekañy relee jave. Iporãvéta rerekóramo la Biblia nde pópe ha ani reñakãity relee hag̃ua, síno eñemboʼy derécho porã.

Umi ansiánope sapyʼánte otoka ojapo diskúrso leído asambleahápe. Péicha jave osẽ porã hag̃ua ndéve tekotevẽ rejeprepara porã ha epraktika heta vése. Releéta rupi nde diskúrso hasyve remaña hag̃ua umi nerendúvare, péro rejeprepara porãramo ikatúta remaña mimi hesekuéra rekañyʼỹre nde lektúrape. Upéicha umi nerendúva oñatende porãvéta nderehe ha ideprovéchota la nde diskúrso.