Jahechauka jajepyʼapyha ñande rapicháre: Ñamaña rupive hese
1 Japredika jave pe jaikoha rupi térã ogaha rupi, ñamaʼẽ raẽ jepi pe tapicháre ñañeʼẽ mboyve chupe. Ñamañávo hese, hováre, ikatu jahechakuaa mbaʼépa oñandu ñanderechávo, ha mbaʼéichapa oĩ pe tapicha. Ha haʼe avei ikatu ohechakuaa heta mbaʼe ñanderehe. Og̃uahẽ rire hógape peteĩ Testigo, peteĩ kuñakarai heʼi: “Chemanduʼa mbaʼéichapa pe ipukavýre ojekuaa ipyʼaguapyha, ha aikuaase mbaʼéicha rupípa”. Upévagui pe kuñakarai oñemoĩ ohendu pe marandu porã.
2 Ñamañáramo ñande rapicháre ndahasyive japredika hag̃ua pe kállepe ha umi jaikoha rupi. Oñembojávo peteĩ tapicha, peteĩ ermáno oñehaʼã omaña hováre. Ohechávo omañaha hese avei, haʼe opukavy ha oikuaveʼẽ ñande rrevistakuéra. Ojapóvo upéicha heta oñemongeta porã ha omohenda avei heta rrevísta ha lívro.
3 Jahechakuaákena pe ñande rapicha oñandúva. Ñamañáramo ñande rapicháre ikatu jahechakuaa pe oñandúva. Pór ehémplo, peteĩ tapicha nontendéiramo pe jaʼéva, térã ndogueroviáiramo, ojekuaáta upéva hováre. Hembiaporamohína, térã ojapuráramo, ñamañáramo hováre jahechakuaáta hese. Upéicha jave ikatu ñakambia térã ñamombykyve pe jaʼeséva. Jahechakuaáramo pe ñande rapicha oñandúva jahechauka jajepyʼapyha hese.
4 Tojekuaa ñanderehe ñañeʼẽha ñande pyʼaite guive ha jagueroviaha pe jaʼéva. Heta hendápe, ñamañáramo pe ñande rapicha rovaitére ojehechakuaa ñañeʼẽha ñande pyʼaite guive. Ehechamína mbaʼépa ojapo Jesús idisipulokuéra oporandúvo chupe: “Mávapa upéicharamo ikatúne ojesalva?” La Biblia heʼi: “Jesús omaʼẽ hesekuéra ha heʼi ichupekuéra: ‘Yvyporakuéra ndikatúi ojapo upéva [...] Ñandejára katu ipuʼaka ojapo hag̃ua opa mbaʼe’” (Mat. 19:25, 26, VP). Katuetei pe hováre ojekuaa ogueroviahague pe heʼíva. Upéicha avei, ñamañáramo ñande rapicháre jahechaukáta ñañeʼẽha ñande pyʼaite guive ha jagueroviaha pe marandu porã ñamombeʼúva (2 Cor. 2:17; 1 Tes. 1:5).