Rreunión ‘ñanemokyreʼỹva japorohayhu ha jajapo hag̃ua iporãva’

YMAITE guive Jehová puévlo oñeorganisa porã oñembyaty hag̃ua oñondivepa. Por ehémplo, Israélpe umi kuimbaʼe oho vaʼerã Jerusalénpe 3 vése al áño ogueromanduʼa hag̃ua umi fiésta guasu (Deut. 16:16). Primer síglope umi kristiáno pyʼỹi oñembyaty vaʼekue umi ermáno rógape (Filem. 1, 2). Koʼág̃a ñande avei ñañembyaty rreunionhápe ha umi aty guasúpe. ¿Mbaʼérepa Jehová siervokuéra ñañembyaty? Primeroite pórke péicha ñamombaʼeguasu Ñandejárape (Sal. 95:6; Col. 3:16).

² Avei umi rreunión iñimportánte pórke ñanepytyvõ ñandéve. Yma ojegueromanduʼa vaʼekue káda áño pe Fiésta de las Kaváñas ha káda 7 áño oñemanda umi israelítape: “Pembyaty pe puévlo kompletoite, umi kuimbaʼe, kuña, mitã ha umi extranhéro oikóva pende siudápe, ikatu hag̃uáicha ohendu ha oaprende hikuái orrespeta ha omombaʼe vaʼerãha Jehová pende Járape, ha okumpli hag̃ua opa mbaʼe heʼíva ko léi” (Deut. 31:12). Jaikuaaháicha ñañembyaty avei ñane ermanokuérandi ‘Jehová ñanerekomboʼe’ hag̃ua (Is. 54:13). Umi rreunionhápe ikatu jaikuaa porãve ñane ermanokuérape, ñanekyreʼỹ ha ñanembarete ñaimévo hendivekuéra.

RREUNIONKUÉRA KONGREGASIONPEGUA

³ Pe Pentekostés áño 33 rire umi disípulo oñembyaty osegi hag̃ua oaprende umi apóstol omboʼéva “ha káda día oñembyaty hikuái pe témplope oñondivepa” (Hech. 2:42, 46). Umi kristiáno oñembyaty jave oadora hag̃ua Ñandejárape, olee vaʼekue Ñandejára Ñeʼẽ umíva apytépe umi kárta oskrivíva umi apóstol ha umi ótro disípulo (1 Cor. 1:1, 2; Col. 4:16; 1 Tes. 1:1; Sant. 1:1). Upépe oñemboʼe Ñandejárape oñondivepa (Hech. 4:24-29; 20:36). Sapyʼánte oñemombeʼu umi experiénsia ojeguerekóva predikasiónpe (Hech. 11:5-18; 14:27, 28). Ojeexplika avei umi enseñánsa bíblica ha mbaʼéichapa oñekumpli umi profesía. Oñemboʼe mbaʼéichapa kristianokuéra oñekomporta vaʼerã ha mbaʼéichapa ikatu oservi Ñandejárape. Enterovépe oñemokyreʼỹ opredika meme hag̃ua (Rom. 10:9, 10; 1 Cor. 11:23-26; 15:58; Efes. 5:1-33).

⁴ Koʼág̃a avei umi rreunión ojejapo umi apostolkuéra tiémpope ojejapo haguéicha. Ñande jajapo la Biblia heʼíva Hebreos 10:24, 25-pe: “Ñañeinteresákena ojuehe [...]. Oĩramo jepe ojepokuaáva ofalta meme rreunionhápe, ani ñande jaiko jafalta, síno ñañomokyreʼỹ vaʼerã. Jajapo vaʼerã koʼã mbaʼe koʼýte koʼág̃a jahechávo Ñandejára día hiʼag̃uimbaitemaha”. Koʼã ára pahápe ijetuʼuetévape tekotevẽterei ñañomokyreʼỹ rreunionhápe. Péicha ikatúta jajerovia mbareteve ha jasegi ñaneñeʼẽrendu (Rom. 1:11, 12). Ñande kristianokuéra jaiko umi hénte aña apytépe, upévare ñamboykete entéro mbaʼe oñemoĩva Ñandejára rembipotáre ha umi mbaʼe vai oĩva ko múndope (Filip. 2:15, 16; Tito 2:12-14). Iporãiterei ñaime Jehová puévlo ndive, ndaipóri voi ótro lugár iporãvéva (Sal. 84:10). Tuichaiterei ningo ñanepytyvõ jastudia la Biblia ha ñañeʼẽ umi mbaʼe ñaaprendévare. Jahechamína mbaʼéichapa umi rreunión oñeorganisa ñane venefisiorã.

RREUNIÓN FIN DE SEMANAGUA

⁵ Pe primera párte pe rreunión fin de semanaguápe oñemeʼẽ peteĩ diskúrso bíblico ojejapóva entéro héntepe g̃uarã, espesiálmente umi ou ramóvape. Pe diskúrso púvliko iñimportanteterei umi ipyahúva ha umi ermánope g̃uarã pórke péva rupive ñañemoag̃uive Ñandejárare (Hech. 18:4; 19:9, 10).

⁶ Cristo Jesús, ijapostolkuéra ha umi ótro disípulo oñembyaty vaʼekue oñondivepa ojejapoháicha koʼág̃a umi kongregasiónpe. Ndajadudái Jesús haʼe hague pe diskursánte ikatupyryvéva oĩ vaʼekue ko yvy ape ári. Umi hénte heʼi vaʼekue: “Núnka norohendúiva peteĩ kuimbaʼe péicha oporomboʼéva” (Juan 7:46). Umi mbaʼe Jesús heʼíva ou Ñandejáragui, umi hénte ijurujaipa vaʼekue opytávo ohendúvo chupe (Mat. 7:28, 29). Umi iñeʼẽrendúva orresivi hetaiterei vendisión (Mat. 13:16, 17). Umi apóstol osegi vaʼekue iñehémplo. Lívro de Hechos 2:14-36-pe jatopa pe diskúrso porãite Pedro ojapo vaʼekue pe Pentekostés áño 33-pe. Upe diskúrso opoko hetaiterei héntere ha omomýi chupekuéra okambia hag̃ua. Tiémpo rire oĩ vaʼekue ojeroviáva Jesúsre ohendu rire pe diskúrso Pablo ojapo vaʼekue Aténaspe (Hech. 17:22-34).

⁷ Koʼág̃a avei hetaitereípema ideprovécho umi diskúrso púvliko ojejapóva kongregasiónpe ha avei umi asambleahápe. Koʼã diskúrso ñanepytyvõ siémpre ñapensa hag̃ua umi enseñánsa bíblica rehe ha jasegi hag̃ua ñambaʼapo pe Rréino rehehápe. Ñainvita vaʼerã umi persóna oikuaasevévape la Biblia heʼíva ha avei umi ótro héntepe ou hag̃ua ko rreuniónpe. Péicha oikuaáta hikuái umi mbaʼe la Biblia omboʼéva.

⁸ Pe diskúrso púvlikope oñeñeʼẽ heta témare, por ehémplo umi enseñánsa bíblicare, umi profesíare, umi konsého ha gía famíliape g̃uarã, matrimóniope g̃uarã, ha avei umi mbaʼe ombohovái vaʼerã mitãrusukuéra ha mbaʼéichapa hekopotĩ vaʼerã kristianokuéra. Oĩ diskúrso oñeʼẽva Jehová kreasión porãitére, mbaʼéichapa Ñandejára siérvo yma guare ijerovia mbarete, ipyʼaguasu, ifiél ha mbaʼéichapa ñande ikatu jasegi iñehemplokuéra.

⁹ Ideprovécho hag̃ua ñandéve umi diskúrso púvliko tekotevẽ ñañatende porã, jaheka umi téxto heʼíva pe diskursánte, jasegi pe lektúra ha ñañatende ojeexplika jave umíva (Luc. 8:18). Jahechávo siertoha umi mbaʼe ojeʼéva ñaimevéta segúro jasegi vaʼerãha umi konsého ñaaprendéva (1 Tes. 5:21).

¹⁰ Oĩramo heta ermáno ikatúva ojapo diskúrso, ojejapo vaʼerã káda semána umi kongregasiónpe. Umi diskursánte ou jepi umi kongregasión hiʼag̃uívagui. Péro saʼíramo jepe umi diskursánte, pe kongregasión lomímonte oñehaʼãmbaitéta oreko hag̃ua diskúrso ikatúma guive.

¹¹ Pe segunda párte pe rreunión fin de semanaguápe ojestudia pe rrevísta Ñemañaha, upearã ojejapo pregúnta ha oñekomenta. Umi artíkulo ojestudiáva osẽ pe rrevísta Ñemañaha ojestudiávape, ko rrevísta rupive Jehová omeʼẽ ñandéve pe aliménto ñaikotevẽva hiʼoraitépe.

¹² Umi artíkulo ohechauka jepi mbaʼéichapa ikatu jasegi káda día umi konsého bíblico. Umi mbaʼe ojestudiáva ñanepytyvõ ani hag̃ua jaheja “ñandegia umi hénte ko mundopegua opensa ha oiko lája” (1 Cor. 2:12). Pe Ñemañaha omyesakãve umi mbaʼe omboʼéva la Biblia ha umi profesía. Péicha ikatúta jaikuaa porãve umi enseñánsa verdadéra ha jaguata umi ihústova rapére (Sal. 97:11; Prov. 4:18). Ñaimévo pe Ñemañaha Ñehesaʼỹijópe ha ñakomentávo, ñanepytyvõ jasegi hag̃ua ñahaʼãrõ vyʼápe pe múndo pyahu (Rom. 12:12; 2 Ped. 3:13). Ñaĩramo ñane ermanokuérandi ikatúta jahechauka umi mbaʼe porã oúva pe espíritu sántogui ha ñanembaretevéta jaservi hag̃ua Jehovápe kyreʼỹme (Gál. 5:22, 23). Avei omeʼẽ ñandéve fuérsa ñambohovái hag̃ua umi pruéva ha ñanepytyvõ jareko hag̃ua ‘peteĩ simiénto iporãva tenonderãme g̃uarã ikatu hag̃uáicha ñañakarama hatã pe jeikove añetetévare’ (1 Tim. 6:19; 1 Ped. 1:6, 7).

¹³ ¿Mbaʼépa ikatu jajapo jaaprovecha porã hag̃ua koʼã aliménto oúva Jehovágui? Tekotevẽ jastudia porã jaha mboyve rreunionhápe tahaʼe ñaneañohápe térã ñane família ndive. Ikatu jaheka umi téxto ha japrepara ñane komentário jaleénte rangue. Péicha umi mbaʼe ñaaprendéva og̃uahẽta ñane korasõme ha ou porãta avei umi ñanerendúvape. Jajapysaka porã vaʼerã avei umi ótro ermáno okomenta jave, péicha enterovete ñaaprendevéta káda semána.

RREUNIÓN ÉNTRE SEMANAGUA

¹⁴ Káda semána pe kongregasión oñembyaty pe Salón de Réinope ojapo hag̃ua pe rreunión hérava Mbaʼéichapa Jaiko ha Japredika vaʼerã. Pe rreunión oreko 3 seksión ‘ñanepytyvõva ñakumpli hag̃ua ñande servísio’ (2 Cor. 3:5, 6). Umi mbaʼe ojestudiátava osẽ káda mes pe prográma héravape Mbaʼéichapa Jaiko ha Japredika vaʼerã Prográma rreuniónpe g̃uarã. Ko prográma oreko avei umi presentasión isensíllova jaipuru hag̃ua predikasiónpe.

¹⁵ Pe primera seksión héra Tesóro oĩva Ñandejára Ñeʼẽme, upépe ñaaprendeve umi rreláto oĩvagui la Bíbliape, mbaʼe tiémpope ha mbaʼe situasiónpepa ojeskrivi ha mbaʼépa ñaaprende umívagui. Ko seksión oreko peteĩ diskúrso, upéi ojejapo pregúnta oñekomenta hag̃ua pe lektúra semanálgui ha ipahápe ojelee la Biblia. Pe Prográma rreuniónpe g̃uarãme oñemoĩ jepi rrekuádro, taʼanga ha párte oñekompleta hag̃ua. Ko rreuniónpe ojestudia porã la Biblia ha upéva ideprovécho ñandéve káda día ñande rekovépe ha ñaporomboʼe porãve hag̃ua. Péicha ‘ñandekatupyrýta jajapo hag̃ua entéro mbaʼe, ha ñaĩta preparádo jajapo hag̃ua opaichagua mbaʼe porã’ (2 Tim. 3:16, 17).

¹⁶ Pe segunda seksión héra Ñamboʼe porãve hag̃ua. Upe párte omeʼẽ oportunida enterove opraktika hag̃ua umi presentasión ikatu hag̃uáicha ñandekatupyryve japredika ha ñaporomboʼe hag̃ua. Ko seksiónpe oñeasigna umi ermáno ha ermánape opartisipa hag̃ua ha oñeanalisa umi vidéo de presentasión. Ko párte ‘ñanemboʼe mbaʼéichapa jaipuru vaʼerã umi ñeʼẽ iporãva ikatu hag̃uáicha jaikuaa mbaʼépa jaʼe vaʼerã pe ikaneʼõvape’ (Is. 50:4).

¹⁷ Pe tercera seksión héra Jaiko kristiáno teéicha, upépe ojehecha mbaʼéichapa ñanepytyvõ umi enseñánsa bíblica (Sal. 119:105). Peteĩ mbaʼe iñimportánteva ko seksiónpe haʼe pe párte hérava Estúdio bíblico kongregasionpegua. Ko párte ojejapo kon pregúnta ha rrespuésta pe Ñemañaha Ñehesaʼỹijo ojejapoháicha.

¹⁸ Káda mes og̃uahẽvo pe Prográma rreuniónpe g̃uarã, pe koordinadór del kuérpo de ansiáno térã peteĩ ansiáno oipytyvõva chupe ohecha vaʼerã umi informasión ojestudiátava ha oasigna mávapa ojapóta umi párte. Káda semána peteĩ ansiáno oaprováva pe kuérpo de ansiáno ha ikatupyrýva oporomboʼe hag̃ua oservi de presidénte pe rreuniónpe. Haʼe oñenkarga pe rreunión oñepyrũ ha opa hag̃ua órape, avei omeʼẽ konsého omehora hag̃ua umi oreko vaʼekue asignasión ha omokyreʼỹ chupekuéra.

¹⁹ Jajepreparávo, jaha memévo ha japartisipávo ko rreuniónpe ñantendevéta la Biblia omboʼéva ha umi konsého ñandegiáva, avei ñandepyʼaguasuvéta japredika hag̃ua ha ñandekatupyryvéta ñaporomboʼe hag̃ua. Umi neʼĩravape ojevautisa ideprovécho avei ko rreunión, pórke ojeheʼa umi ermánore ha ohendu umi enseñánsa omombaretéva ñande jerovia. Jajeprepara hag̃ua ko rreunionrã ha umi ótro rreuniónpe g̃uarã, ikatu jaipuru pe Watchtower Library, pe aplikasión JW Library^® ha pe VIVLIOTÉKA OĨVA INTERNÉTPE^™ Watchtower (oĩramo ne idiómape), avei pe vivliotéka oĩva Salón del Réinope. Pe vivliotéka oĩvape Salónpe retopáta informasión ojapóva umi testígo de Jehová, Índice de las publicaciones Watch Tower, pe Gía oipurúva testígo de Jehová, avei oĩ heta traduksión de la Biblia, peteĩ lívro concordancia, peteĩ diksionário ha ótro lívro oñeinvestiga hag̃ua. Ko vivliotéka ikatu ojepuru oñepyrũ mboyve umi rreunión térã opa rire.

ATY PREDIKASIONRÃ

²⁰ Éntre semána ha fin de semanakue umi grúpo de predikasión oñembyaty jepi sapyʼaite ojapo hag̃ua pe aty predikasionrã. Koʼã aty ojejapo jepi peteĩ ermáno rógape térã peteĩ lugár opyta porãhápe. Pe Salón del Reino ikatu avei ojepuru ojejapo hag̃ua koʼã aty. Iporãta pyaʼe oñeorganisárõ umi ermánope ha ani ojetardaiterei oñeñepyrũma hag̃ua ojepredika. Pe superintendénte de grúpo oñatende vaʼerã umi ermáno oĩvare igrúpope. Oĩramo heta grúpo oñembyatýva opredika hag̃ua diferénte lugárpe pe territóriope ikatu ifasilve umi ermánope g̃uarã oho hag̃ua upe lugárpe. Péro ideprovéchoramo jepe ojereko heta grúpo osẽtava opredika, sapyʼánte okonvenivénte umi grúpo oñembyaty oñondivepa. Por ehémplo saʼíramo umi ermáno osẽva predikasiónpe éntre semána, okonvenivénte osẽmba oñondive umi grúpo, ha oñembyatypa Salónpe térã ótro lugárpe. Péicha umi ermáno orekóta iñirũrã opredika hag̃ua. Pe kongregasión ohecha vaʼerã avei ou porãtapa chupekuéra oñesẽ ojepredika Salón guive oĩ jave feriádo térã arete. Avei ikatu ou porã chupekuéra opredika opa rire pe Ñemañaha Ñehesaʼỹijo.

²¹ Umi grúpo osẽrõ opredika hag̃ua káda uno iterritóriope, pe superintendénte de grúpo odirihíta pe aty predikasionrã. Haʼe oasignáta jepi avei ijauxiliárpe térã ótro ermáno ikatupyrývape omoakã hag̃ua koʼã aty. Pe odirihíva oprepara vaʼerã peteĩ informasión oipytyvõtava umi ermánope predikasiónpe. Upéi ojejapo umi asignasión oñesẽ hag̃ua ha peteĩ ermáno ojapo pe ñemboʼe. Péicha pe grúpo pyaʼe ohótama pe territóriope. Koʼã aty odura vaʼerã éntre 5 ha 7 minútonte, péro mbykyve vaʼerã ojejapóramo rreunión rire. Koʼã atýpe oñemokyreʼỹ, oñemeʼẽ konsého ha instruksión predikasionrã. Umi puvlikadór pyahu térã ótro oikotevẽva oñepytyvõ chupe, ikatu osẽ umi iñexperiensiavéva ndive.

RREUNIÓN UMI KONGREGASIÓN IPYAHÚVA TÉRÃ MICHĨVAPE G̃UARÃ

²² Hetavévo ohóvo umi ojevautisáva hetave avei umi kongregasión. Normálmente pe superintendénte de sirkuíto ojapo pe solisitu oĩ hag̃ua peteĩ kongregasión pyahu. Péro sapyʼánte ikatu okonvenive umi grúpo michĩvape oñembyaty pe kongregasión hiʼag̃uivévandi.

²³ Umi kongregasión michĩvape sapyʼánte oĩ ermána añónte, péicha jave pe ermána ojapóva la orasión ha odirihíva pe rreunión okuvri vaʼerã iñakã la Biblia heʼiháicha (1 Cor. 11:3-16). Pe ermána normálmente oguapýta pe grúpo renondépe ha ndojapomoʼãi diskúrso. Upéva rangue haʼe oleéta peteĩ puvlikasión omeʼẽva Jehová organisasión ha oñeʼẽʼimi upe témare, térã ojapokuaa porandu oñekomenta hag̃ua térã ojejapo peteĩ demostrasión. Pe sukursál ojeruréta peteĩva umi ermánape orresivi hag̃ua umi kárta ha ohecha hag̃ua mbaʼéichapa ojejapóta umi rreunión. Upéi oĩ vove ermáno okumplíva umi rrekisíto, haʼe oñenkargáta ojapo hag̃ua koʼã traváho.

ATY GUASU UN DIAGUA

²⁴ Káda áño oñeorganisa mokõi aty guasu un diagua, upépe oñembyaty umi kongregasión oĩva peteĩ sirkuítope. Entéro umi ermáno ovyʼaiterei koʼã aty guasúpe ha ohechauka hikuái ohayhuha iñermanokuérape (2 Cor. 6:11-13). Jehová organisasión oiporavo mbaʼe témarepa oñeñeʼẽta pe asambléape, upearã oipuru la Biblia ha oreko enkuénta mbaʼépa oikotevẽ umi ermáno oservi porãve hag̃ua Jehovápe. Ojejapo jepi diskúrso, demostrasión, esenifikasión, monólogo (ojepyʼamongetáva) ha entrevísta. Koʼã mbaʼe ningo aliménto omeʼẽva Ñandejára ha omombarete enterove jerovia. Koʼã aty guasúpe ikatu ojevautisa umi oñemeʼẽmava Jehovápe ñemboʼe rupive.

ATY GUASU TRES DIAGUA

²⁵ Una ves al áño ojeguereko peteĩ aty guasu tres diagua, koʼãvape oñembyaty jepi algúno sirkuíto oreko hag̃ua oñondive pe asambléa. Umi sukursál michĩva ikatu odesidi okonvenivétapa pe asamblearã oñembyatýramo peteĩ lugárpente entéro umi kongregasión oĩva iterritóriope. Heta lugárpe umi asambléa tres diagua oñeorganisa lája idiferénte, péva odepende káda lugár situasiónre ha umi instruksión ojerresivívare ñane organisasióngui. Algúno paíspe oñeorganisa jepi avei umi asambléa internasionál ha espesiál ha oho jepi hetaiterei Testígo diferénte paisgua. Oĩta jave koʼãichagua asambléa oñeinvita ha oñemombeʼu opárupi, upévare oĩ heta hénte ohendúva péicha umi notísia porã oñeʼẽva Ñandejára Rréinore.

²⁶ Jehová puévlope ombovyʼaiterei umi aty guasu pórke upépe ikatu oadora oñondivepa Jehovápe. Koʼã asambléape heta vésema ojeexplika porãve umi enseñánsa verdadéra. Algúno aty guasúpe oñepresenta puvlikasión pyahu ikatúva jaipuru predikasiónpe térã jastudia hag̃ua ñaneañoháme. Koʼã asambleahápe oĩ avei ojevautisáva. Umi aty guasu iñimportanteterei pórke ñanepytyvõ ñande jerovia imbareteve hag̃ua. Koʼã asambléa ohechauka umi Testígo orekoha peteĩ organisasión mundiál ojoayhúva peteĩ famíliaicha, péicha ojekuaa ñande haʼeha Jesús disípulo (Juan 13:35).

²⁷ Jahávo umi rreunionhápe ha umi aty guasúpe ñanekyreʼỹve jajapo hag̃ua Jehová volunta. Péicha jajeprotehe ko múndo oiko ha opensa lájagui ha ñamombarete ñande jerovia. Koʼã aty omombaʼeguasu ha ombotuicha Jehovápe (Sal. 35:18; Prov. 14:28). Jaagradesete ningo Jehovápe omeʼẽ haguére ñandéve koʼã aty ñanemokyreʼỹva jasegi hag̃ua ñandefiél koʼã ára pahápe.

KONMEMORASIÓN

²⁸ Umi testígo de Jehová oĩva ko múndo tuichakuére ogueromanduʼa una ves al áño Jesús omano hague ára. Ko rreuniónpe oñehenói Konmemorasión térã Séna del Señór (1 Cor. 11:20, 23, 24). Ko rreunión hína pe iñimportantevéva umi Testígope g̃uarã pórke Jesús voi omanda ojegueromanduʼa hag̃ua upéva (Luc. 22:19).

²⁹ Pe Konmemorasión ojejapo pe fécha yma ojejapo haguépe pe Páskua oñemombeʼúva la Bíbliape (Éx. 12:2, 6; Mat. 26:17, 20, 26). Pe Páskuape umi israelita káda áño ogueromanduʼa vaʼekue osẽrõ guare Egíptogui áño 1513-pe Jesús ou mboyve. Upérõ Jehová omanda vaʼekue chupekuéra pe primer mes lunár pe día 14-pe hoʼu hag̃ua peteĩ ovecha raʼy ha osẽ hag̃ua Egíptogui (Éx. 12:1-51). Ojekuaa hag̃ua arakaʼépa hoʼáta ko fécha oñekonta 13 día ojekuaa ypy guive Jerusalénpe pe lúna nuéva hiʼag̃uivéva pe ekinóksioa de primavéragui. Pe Konmemorasión hoʼa jepi ojekuaa vove pe primera lúna nuéva pe ekinóksio rire.

³⁰ Jesús heʼi vaʼekue mbaʼéichapa ojejapo vaʼerã pe Konmemorasión, ha upéva jatopa Mateo 26:26-28-pe. Ko atýpe ndojejapói mbaʼeve iñextráñova síno ojepuru pan ha víno orrepresentáva Jesús rete ha huguy, péva hoʼu umi unhído ohótava yvágape ogoverna Cristo ndive (Luc. 22:28-30). Entéro umi ótro kristiáno ha umi persóna oñeinvita vaʼekue ikatu oho pe Konmemorasiónpe. Umi ohóva ko rreuniónpe ohechauka omombaʼetereiha Ñandejára Jehová ojapo vaʼekue omeʼẽvo Itaʼýra Jesucristo enterove rehehápe. Pe Konmemorasión mboyve ojejapo peteĩ diskúrso espesiál omokyreʼỹva umi héntepe oho hag̃ua pe konmemorasiónpe ha ostudia hag̃ua la Biblia.

³¹ Umi testígo de Jehová vyʼápe ohaʼarõ oñembyaty hag̃ua oñondive. Upépe ‘ñañeinteresa ojuehe ñande pyʼaite guive, ha ñañomokyreʼỹ japorohayhu hag̃ua ha jajapo hag̃ua iporãva’ (Heb. 10:24). Pe esklávo de konfiánsa ha iñarandúva ohecha mbaʼépa ñaikotevẽve jastudia hag̃ua ñañembyaty jave. Oñemokyreʼỹ enterove Testígope ha umi persóna ostudiasévape oaprovechapaite hag̃ua koʼã aty oñeorganisáva ñaĩmba hag̃ua oñondive. Jahechaukáramo ñamombaʼeha ñande pyʼaite guive umi mbaʼe Jehová omeʼẽva iñorganisasión rupive, ñaĩta unído ha iñimportanteveha katu ñambotuicha ha ñamombaʼeguasúta Jehovápe (Sal. 111:1).