¿Mbaʼéichapa ojejapo vaʼerã pe aty ñasẽ hag̃ua japredika?

1. ¿Mbaʼépa ojehupyty pe aty ñasẽ hag̃ua japredika rupive?

¹ Peteĩ jey, Jesús oñembyaty 70 idisípulondi oho mboyve hikuái opredika (Luc. 10:1-11). Haʼe omokyreʼỹ ha omomanduʼa chupekuéra noĩmoʼãiha haʼeño; heʼi Jehová, pe ‘kóga Jára’, odirihitaha chupekuéra. Upéi, Jesús heʼi chupekuéra mbaʼéichapa opredika vaʼerã. Ha omohuʼã hag̃ua, omondo idisipulokuérape ‘mokõi mokõi’. Koʼág̃arupi ojejapo avei peichagua aty oñesẽ mboyve ojepredika. Koʼã aty rupive ojehupyty mbohapy mbaʼe: oñeorganisa porã pe predikasión, avei oñembokatupyry ha oñemokyreʼỹ umi puvlikadórpe.

2. ¿Mboy minútopa oduráta pe aty ñasẽ hag̃ua japredika abril guive?

² Pe aty ojejapóva oñesẽ mboyve ojepredika odura jepi 10 térã 15 minúto. Ha umi 10 térã 15 minútope oñeformáma avei umi grúpo, oñeasigna moõpa opredikáta káda uno, ha oñeñemboʼe. Péro abril guive, pe aty ñasẽ hag̃ua japredika oduráta 5 térã 7 minútontema. Ha ojejapóramo rreunión rire, ikatu voi mbykyve. ¿Mbaʼérepa? Pe rreuniónpe oñeanalisáma rupi heta mbaʼe Ñandejára Ñeʼẽgui. Ko arréglo rupive ikatúta japredika hetave tiémpo. Avei, umi puvlikadór ha prekursór oñepyrũmava ijaktivida oho mboyve pe atýpe mbykymínte opausáta ha upéi ikatútama okontinua jey opredika.

3. ¿Mbaʼéichapa oñeorganisa vaʼerã pe aty ñasẽ hag̃ua japredika?

³ Pe aty ñasẽ hag̃ua japredika oñeorganisa porã vaʼerã. Umi ansiáno káda kongregasionpegua ohecha vaʼerã moõpa opyta porãvéta enterovépe. Heta kongregasiónpe ikuentave káda grúpo ojapo apárte la iñenkuéntro. Upéva opyta porã jepi heta puvlikadórpe, natekotevẽi rupi oguata pukueterei og̃uahẽ hag̃ua pe rreuniónpe ha pe território ojepredikatahápe. Péicha ipyaʼeve avei oñeasigna hag̃ua mávandipa osẽta káda uno, ha ifasilve umi ermáno omoakãvape káda grúpo oñatende porã hag̃ua umi oĩvare hendive. Ojejapo mboyve pe ñemboʼe oñemohuʼã hag̃ua pe aty, opavave oikuaáma vaʼerã moõpa opredikáta ha mávandipa osẽta.

4. ¿Mbaʼérepa nañapensái vaʼerã umi rreunión de kongregasión iñimportanteveha pe aty ojejapóvagui ñasẽ hag̃ua japredika?

⁴ Ko rreunión iñimportanteterei. Umi rreunión de kongregasiónpe ningo oho entéro puvlikadór, péro pe aty ojejapóvape ñasẽ hag̃ua japredika ohónte umi osẽtava upe díape. ¿Heʼisépa upéva ko aty ndahaʼeiha la iñimportantetereíva? Nahaniriete voi. Ni mbaʼevéicharõ ndovaléi ñapensa upéicha. Jehová omeʼẽ ñandéve entéro rreunión ikatu hag̃uáicha “ñañomokyreʼỹ japorohayhu ha jajapo hag̃ua iporãva” (Heb. 10:24, 25). Upéicha rupi, pe okondusíva ojeprepara porã vaʼerã, ikatu hag̃uáicha oñemombaʼeguasu Jehovápe ko aty rupive ha ideprovécho hag̃ua enterovépe umi mbaʼe oñeanalisáva. Entéro puvlikadór osẽtava opredika, ikatúma guive, oñehaʼãmbaite vaʼerã oĩ ko rreuniónpe.

5. a) ¿Mbaʼe mbaʼépa ojapo vaʼerã pe superintendénte de servísio osẽ porã hag̃ua pe aty ñasẽ hag̃ua japredika? b) Otokáramo peteĩ ermánape, ¿mbaʼéichapa okondusi vaʼerã pe aty?

⁵ Mbaʼéichapa ojeprepara vaʼerã pe okondusítava. Peteĩ ermáno oprepara porã hag̃ua peteĩ párte orekóva rreunionhápe, voi oñeasigna vaʼerã chupe. Péicha vaʼerã avei pe aty ojejapóvape ñasẽ hag̃ua japredika. Ojepredika jave por grúpo, pe omoakãva pe grúpo térã ijauxiliár okondusi pe predikasión. Péro ojepredikáta jave oñondivepa, pe superintendénte de servísio oasigna vaʼerã mávapa okondusíta. Oĩ superintendénte de servísio voimíre omeʼẽmava umi ermáno okondusívape peteĩ prográma ikatu hag̃uáicha oikuaa arakaʼépa otokáta chupekuéra, ha ojapo avei peteĩ kópia pe prográmagui oñemoĩ hag̃ua pe tavléro de anúnsiore. Ko rreunión osẽ porã hag̃ua, pe okondusíva oporomboʼekuaa ha ivale vaʼerã oorganisa hag̃ua. Upévare, pe superintendénte de servísio okalkula porã vaʼerã mávapepa oasignáta. Ndaipóriramo peteĩ ansiáno, siérvo ministeriál, térã ótro ermáno ikatupyrýva ikatu vaʼerã okondusi peteĩ díape, pe superintendénte de servísio oasignáta peteĩ ermána ikatupyrývape odirihi hag̃ua ko rreunión. (Ehecha pe artíkulo oĩva páhina 6-pe, hérava “Okondusítaramo peteĩ ermána”.)

6. ¿Mbaʼérepa iñimportánte ojeprepara porã pe okondusítava ko aty?

⁶ Oñemeʼẽ jave ñandéve peteĩ párte Eskuéla Jaiporukuaa Hag̃ua la Bíbliape térã Aty Ñanemboʼévape Japredika Hag̃ua, katuete jajagarra ensério ha jajeprepara porã. Ndahaʼeiete tapérentema mbaʼe jajepreparáva. Ha upeichaite vaʼerã avei oñeasignáramo ñandéve ñakondusi hag̃ua pe aty ñasẽ hag̃ua japredika. Koʼág̃a pe rreunión mbykyvéta; upévare, koʼýte jajeprepara porã vaʼerã, péichamante ndajahasamoʼãi ñande óra ha jajapóta ko aty oipytyvõ hag̃uáicha ermanokuérape. Jajeprepara hag̃ua tekotevẽ avei voi porã jajeruréma umi tarhéta de território ñambaʼapotahápe.

7. ¿Mbaʼe mbaʼépa ikatu oñeanalisa pe rreuniónpe?

⁷ Mbaʼépa ikatu oñeanalisa. Káda território idiferénte, upévare tembiguái jeroviaha nomoĩri peteĩ prográmape mbaʼe mbaʼépa oñeanalisáta pe aty ojejapóvape ñasẽ hag̃ua japredika. Pe rrekuádro oĩvape páhina 6-pe oĩ unos kuánto suherénsia. Ko rreuniónpe ojejeruréta jepi ermanokuérape okomenta hag̃ua. Ikatu avei ojejapo jepi peteĩ demostrasión térã ojehechauka peteĩ vidéo ñanepytyvõtava predikasiónpe, oĩva jw.org-pe. Pe okondusítava oprepara jave mbaʼépa oanalisáta, opensa vaʼerã mbaʼépa ikatu oipytyvõ ha omokyreʼỹ umi ermáno osẽtavape upe díape.

8. ¿Mbaʼépa ikatu oñeanalisa oñesẽ mboyve ojepredika sábado ha domingokue?

⁸ Sabadokue, umi puvlikadór opresenta jepi ñande rrevistakuéra. Ha heta osẽva upe díape nosẽi éntre semána, upévare hasyve imanduʼa hag̃ua umi presentasión oñensaja vaʼekuére ijestúdio de famíliape. Upévare, pe okondusíva ikatu orrepasa peteĩ presentasión osẽva última páhinape Ñane Marandu Porãme. Ikatu avei oñeanalisa mbaʼéichapa ikatu jaipuru peteĩ notísia, akontesimiénto, térã arete oikóva pe jaikohárupi ñapresenta hag̃ua peteĩ rrevísta. Térã ikatu oñeanalisa mbaʼe porandúpa ikatu jaheja pe ogajárape ñambohovái hag̃ua chupe ótra visítape. Oĩramo pe rreuniónpe algúno oipurúmava predikasiónpe umi rrevísta upe mespegua, pe okondusíva ikatu oporandu chupekuéra mbaʼe suherénsiapa ikatu omeʼẽ ñapresenta hag̃ua térã ojerure chupekuéra omombeʼu hag̃ua experiénsia. Domingokue ikatu avei ojejapo upéicha, upearã ikatu ojepuru pe puvlikasión ñapresentáva hína upe méspe. Umi puvlikasión jaipurúva jajapo hag̃ua estúdio vívliko ikatu ñapresenta oimeraẽ día; umíva apytépe oĩ folléto Notísia porã, Ehendúkena Ñandejárape, ha lívro ¿Mbaʼépa omboʼe la Biblia? Upévare, peteĩ vuéltape ikatu oñeanalisa mbykymi mbaʼéichapa ikatu ñapresenta koʼã puvlikasión.

9. Ojejapóramo hína peteĩ kampáña espesiál, ¿mbaʼépa ikatu oñehesaʼỹijo fin de semanakue oñesẽ mboyve ojepredika?

⁹ ¿Mbaʼépa ikatu oñeanalisa oiméramo ojejapo hína peteĩ kampáña espesiál? Fin de semanakue ikatu oñeanalisa mbaʼéichapa ñapresentakuaa ñande rrevistakuéra pe invitasión térã tratádondi. Ikatu avei oñehesaʼỹijo mbaʼépa jajapokuaa jatopáramo peteĩ oñeinteresáva pe mensáhere térã oñemombeʼukuaa umi experiénsia porã ohechaukáva mbaʼérepa iñimportánte ojejapo peichagua kampáña.

10, 11. ¿Mbaʼérepa iñimportánte umi puvlikadór ojeprepara porã?

¹⁰ Mbaʼéichapa ojeprepara vaʼerã umi puvlikadór. Umi puvlikadór ojeprepara porãramo oipytyvõ avei osẽ porã hag̃ua pe aty ojejapóva ñasẽ hag̃ua japredika. Ikatu voi oaprovecha ijestúdio de família ojeprepara hag̃ua. Péicha ojapóramo, ikatúta okomparti umi ótro puvlikadórndi umi mbaʼe oaprende vaʼekue. Tekotevẽ avei orretiráma umi puvlikasión oikotevẽtava oho mboyve pe atýpe, péicha ndojeperdemoʼãi tiémpo opa rire pe rreunión.

¹¹ Iñimportánte avei ñag̃uahẽ oñepyrũ mboyve pe aty ñasẽ hag̃ua japredika, jajapoháicha jepi voi jaha jave rreunionhápe. Pe ermáno okondusíva oreko jepi enkuénta heta mbaʼe oasignáta jave káda únope mávandipa osẽta opredika ha moõ gotyopa ohóta. Por ehémplo, ndahetáiramo la osẽtava, ikatu oñeterminánte peteĩ território oñeñepyrũma vaʼekue. Térã pe lugár ojepredikataha opytáramo mombyry, ikatu oasigna umi oĩva yvýrupi oho hag̃ua peteĩ orekóvandi veíkulo. Ojepredikátaramo peteĩ lugár ipeligrosohápe katu, oasignáta umi ermánope osẽ hag̃ua ermánandi térã opredika hag̃ua ijypýrupi. Oĩramo ermáno hasykatúva, oasignáta chupe peteĩ kálle iporãvehápe ha ndaiporihápe hetaiterei arriváda térã veréda yvate. Ha umi puvlikadór ipyahuvévape oasignáta umi ikatupyryvévandi. Péro oĩramo og̃uahẽva tárde, heta vése oñekambia jey vaʼerã umi arréglo ojejapóma vaʼekue, ha upéva omombaʼapo asy pe konduktórpe. Jaikuaa ningo sapyʼánte oikoha peteĩ mbaʼe ñahaʼarõʼỹva ha nañarremediái rupínte ñag̃uahẽ tárde. Péro, oiméramo jajepokuaánte hína ñag̃uahẽ tárde, ñañeporandumi vaʼerã: “¿Tekotevẽpa amombaʼeve pe aty ñasẽ hag̃ua japredika? ¿Ofaltápa hína amohenda porãve che tiémpo ikatu hag̃uáicha ag̃uahẽ órape?”.

12. Oiméramo jajepokuaa jajapo arréglo ñasẽ mboyve japredika, ¿mbaʼépa iporãta jajapo?

¹² Umi puvlikadór osẽséramo peteĩ ermánondi, ikatu ojapo arréglo hendive oñepyrũ mboyve pe aty, péro ikatu avei ohejánte pe konduktór oasigna chupe mávandipa osẽta. Oiméramo jajepokuaa jajapo arréglo ñasẽ mboyve japredika, aníkena ñasẽ peteĩ ermáno térã ermánandi meménte, iporãvéta ñasẽramo diferénte ermánondi, péicha jahechaukáta jahayhuha enterovépe (2 Cor. 6:11-13). ¿Ikatúnepa sapyʼapyʼa ñasẽ avei peteĩ puvlikadór pyahúndi ñaipytyvõ hag̃ua chupe? (1 Cor. 10:24; 1 Tim. 4:13, 15.) Pe rreunión aja, jajapysaka porãkena pe konduktór heʼívare, por ehémplo, omombeʼu jave moõpa ñañepyrũta japredika. Upéi, opa rire pe rreunión, anivéma ñakambia umi arréglo haʼe ojapo vaʼekue, ha ensegída jaha pe território ojepredikatahápe.

13. Opavave ñamoĩramo ñande párte, ¿mbaʼéichapa ñanepytyvõta pe aty ñasẽ hag̃ua japredika?

¹³ Umi 70 disípulo “vyʼapópe ou” vaʼekue opredikapa rire (Luc. 10:17). Pe aty Jesús ojapo vaʼekue osẽ mboyve hikuái opredika katuete oipytyvõne raʼe chupekuéra. Koʼág̃arupi, pe aty ñasẽ hag̃ua japredika ikatu avei tuicha ñanepytyvõ. Opavave ñamoĩramo ñande párte, koʼã aty ñanemokyreʼỹta jaikuaauka hag̃ua pe marandu porã “opa tetãrupi” ha avei oñeorganisa porãta pe predikasión (Mat. 24:14).