Sapyʼánte jajeporekamantevaʼerã japredika hag̃ua

1. ¿Mbaʼérepa peteĩ lugárpe oñeñeʼẽramo heta idiómape, káda território oñeasigna peteĩ kongregasión oñeʼẽvape upe idióma?

¹ Ojefestehárõ guare pe Pentecostés áño 33-pe, Jesús remimboʼekuéra henyhẽ espíritu sántogui ha “oñepyrũ oñeʼẽ diferénte idiómape”, upévare ikatúkuri opredika umi oúvape opa tetãgui pe areterã. Ha upéicha rupi ojevautisa amo tres mil tapicha rupi (Hech. 2:4, NM). Ñanemanduʼavaʼerã umi ohóva ofesteha pe arete orekoha káda uno iñidióma, péro opavavelénto oñeʼẽkuaavaʼekue avei hebreo ha griégope. Upéicharõ jepe, Jehová oipotavaʼekue umi hénte ohendu iñeʼẽtépe pe notísia porã Irréino rehegua, oikuaágui upéicha ohendu porãvetaha ojepredikárõ chupekuéra iñeʼẽtépe. Upéicha rupi, peteĩ lugárpe oñeñeʼẽramo heta idiómape, káda território oñeasigna peteĩ kongregasión oñeʼẽvape upe idióma (ehecha lívro Organizados páh. 107 párr. 1, 2). Oĩ grúpo oñeʼẽva ambue idiómape odependéva peteĩ kongregasión rehe. Péicha jave pe grúpo opredikakuaa upe kongregasión territóriope umi oñeʼẽvape upe idióma haʼekuéra oñatendévare, ha avei ohokuaa ótro kongregasión território hiʼag̃uivévape.

2. a) ¿Mbaʼépa ojejapovaʼerã ojekuaa hag̃ua moõpa oiko umi oñeʼẽva ótro idiómape, ha mbaʼéicha javépa tekotevẽta upéva? b) ¿Mbaʼépa jajapovaʼerã jatopáramo peteĩ oñeʼẽvape ótro idióma? c) ¿Mbaʼéichapa ikatu oñopytyvõ umi kongregasión oĩva umi território oñeñeʼẽhápe heta idióma?

² Umi maranduhára opredikáva peteĩ território oñeñeʼẽhápe peteĩ idiómante og̃uahẽkuaa káda ógape. Péro idiferénte la situasión umi oikóvape g̃uarã peteĩ siuda oñeñeʼẽhápe heta idióma, peichahárupi peteĩ territóriope ikatu opredika heta kongregasión. Ñaimérõ peichagua territóriope ha jatopa peteĩ oñeʼẽva ótro idiómape, ñaanotavaʼerã héra ha idireksión. Upéi ñameʼẽ umi ermáno opredikáva upe idiómape ovisita hag̃ua chupe. Péro ñanemanduʼavaʼerã umi kongregasión térã grúpo oñeʼẽva upe idiómape oĩha rresponsávle oheka hag̃ua umichagua héntepe (ehecha pe rrekuádro “Ñañopytyvõkena”). Upévare, umi kongregasión térã grúpo ojapovaʼerã peteĩ sénso oheka ha oanota hag̃ua moõpa oiko umi oñeʼẽva pe idióma haʼekuéra oñatendévare.

3. ¿Mboy tiémpopa jaiporúta jaheka hag̃ua umi oñeʼẽvape ótro idióma? ¿Moõpa iporãvéta ñañepyrũ jaheka umi oñeʼẽvape ótro idióma?

³ Mbaʼéichapa jahekavaʼerã. Jaikuaa hag̃ua mboy tiémpopa jaiporúta jahekávo umi oñeʼẽvape ótro idióma peteĩ territóriope, jaikuaa raẽ vaʼerã koʼã mbaʼe: mboy héntepa oñeʼẽ upe idiómape, mboy maranduhárapa oĩ ha mboy direksiónpa ombyatýma pe kongregasión térã grúpo. Jaikuaa ningo jahekavaʼerãha umi oñeʼẽvape ótro idióma pe território tuichakuére, péro pono jaha rei mombyry iporãvéta jahekáramo umi lugár oĩháme hetave hénte. Upévare, ñañeorganisa porã vaʼerã jajapo hag̃ua ko tembiapo, upéicharõ añoite ñaipytyvõta hetavépe omombaʼe hag̃ua Jehovápe (Rom. 10:13, 14).

4. a) ¿Mbaʼéichapa oñeorganisavaʼerã ojehekátaramo umi oñeʼẽvape ótro idióma? b) Emombeʼu mbaʼépa jajapokuaa jaheka hag̃ua umi oñeʼẽvape ótro idióma.

⁴ Ani hag̃ua oñembaʼapo heta rei ojeheka jave umi oñeʼẽva ótro idiómape, ansianokuéra ha koʼýte pe superintendénte de servísio omoakã ha oorganisa porã vaʼerã ko tembiapo (1 Cor. 9:26). Ha oĩrõ kongregasión orekóva peteĩ grúpo oñeʼẽva ótro idiómape, umi ansiáno oĩva upépe oiporavovaʼerã peteĩ ermáno ikatupyrývape omoakã hag̃ua umi tembiapo, ikatúramo haʼevaʼerã ansiáno térã siérvo ministeriál. Oĩ kongregasión ha grúpo orekómava voi peteĩ arréglo oñepyrũ hag̃ua oheka umi oñeʼẽvape ambue idióma. Ha upearã oiporu peteĩ guía telefónika térã Internet, oheka hag̃ua umi hénte réra ikomunvéva pe idióma haʼekuéra oñeʼẽvape. Upéi ohenói térã ovisita chupekuéra, oikuaa hag̃ua máva mávapa oĩ iterritóriope ha omoĩtapa pe lísta oanotahápe umi hénte direksión. Umi ansiáno oĩva pe kongregasión oñatendéva pe grúpore, ohechavaʼerã tekotevẽtapa oñepytyvõ mimi chupekuéra ojeheka hag̃ua umi héntepe (ehecha pe rrekuádro “Mbaʼéichapa ikatu jaheka umi hénte oñeʼẽvape ótro idióma”).

5. a) ¿Mbaʼérepa ñanemanduʼavaʼerã ñasẽta jave ñasensa térã jaheka umi oñeʼẽvape ótro idióma? b) ¿Mbaʼépa ikatu jaʼe umi héntepe jajapo jave pe sénso?

⁵ Jaha mboyve ñasensa térã jaheka umi hénte oñeʼẽvape ótro idióma, jaikuaamavaʼerã mbaʼépa jahupytyse. Ñanemanduʼavaʼerã jajapokuévo ko tembiapo jaserviha Jehovápe, upévare ñañemondevaʼerã jajapoháicha jepi jaha jave predikasiónpe. Ha tuicha ñanemokyreʼỹ ha ñanepytyvõta ñañensaja porãramo upe jaʼétava pe ogajárape. Avei jajapokuévo ko tembiapo ikatu ñañemongeta ñane irũndi pe idióma ñaaprendévape, péicha ñañeʼẽkuaavéta upe ñeʼẽme. Ikatu ñainforma pe tiémpo jaiporúva jaheka hag̃ua umi héntepe, péro ndovaléi ñakonta pe óra jaiporúva jajapo hag̃ua umi lísta térã mápa território rehegua. Jajuhúramo peteĩ oñeʼẽvape upe idióma jahekávape, ñañehaʼãmbaitevaʼerã japredika chupe. Ha oñantende porã térã nahániriramo jaavisavaʼerã pyaʼe porã pe superitendénte de servísiope térã pe ermáno oñenkargáva territóriore, oanota hag̃ua umi direksión pyahu ojetopáva. Péro ñanemanduʼavaʼerã iñimportánteramo jepe jajapo pe sénso, ñamboykevaʼerãha avei tiémpo japredika, jajapo hag̃ua rrevisíta ha estúdio (ehecha pe rrekuádro “Mbaʼépa ikatu jaʼe jajapo jave pe sénso”).

6. ¿Mbaʼérepa heta vése ijetuʼu jepi jatopa hag̃ua umi ohenduʼỹvape?

⁶ Mbaʼéichapa jahekavaʼerã umi nohendúivape. Jaheka jave umi nohendúivape, ñanemanduʼavaʼerã ndajapillamoʼãiha chupekuéra oñemonde lájare térã hérare, jajapoháicha jepi jaheka jave umi hénte oñeʼẽva ótro idiómape. Hiʼarive, heta vése ifamília ha iñamigokuéra oñangarekoitereígui hesekuéra, nomombeʼuséi ñandéve mbaʼéichapa héra, moõpa oiko térã ambue informasión oñekotevẽva chuguikuéra. Upéicha rupi, sapyʼánte ijetuʼu jepi jajapo hag̃ua ko tembiapo, upévare ñanepasiénsia ha ñañehaʼãmbaitevaʼerã. Jahechami koʼág̃a mbaʼépa ikatu jajapo pono ijetuʼueterei ñandéve jatopa hag̃ua umi ohenduʼỹva térã oñeʼẽvape ótro idióma.

7. a) ¿Mbaʼépa ikatu ñaporandu jaheka jave umi nohendúivape? b) ¿Mbaʼépa ikatu jajapo pono umi hénte opensa vai ñanderehe?

⁷ Umi oservíva kongregasión térã grúpo oĩva lenguáhe de séñaspe, oporandu jepi umi ogajárape ndoikuaáipa moõpa oiko peteĩ nohendúiva. Ikatúhina oreko peteĩ ivesíno, ipariénte, ikompañéro de traváho térã eskuelapegua oiporúva lenguáhe de séñas oñekomunika hag̃ua. Sapyʼánte ikatu avei imanduʼa ohecha hague kállere peteĩ letréro ohechaukáva umi omanehávape oĩha peteĩ eskuéla ohenduʼỹvape g̃uarã upérupi. Péro ani ñanderesarái ñaporandúvo umi héntepe koʼã mbaʼe, ikatuha opensa vai ha okyhyje ñandehegui. Upévare ñanderory ha jatrata porã vaʼerã chupekuéra, ha ani jajereterei jaʼe hag̃ua maʼerãpa jaha. Heta maranduhára ohechauka pe ogajárape umi puvlikasión oĩva lenguáhe de séñaspe, ha heʼi oipytyvõseha umi nohendúivape oikuaa hag̃ua pe esperánsa oĩva la Bíbliape. Ha jatopáramo nomombeʼuséiva ñandéve moõpa oiko peteĩ ohenduʼỹva, jahejakuaa chupe peteĩ invitasión rreunionrã ha peteĩ kuatiáre ñane número de teléfono, omeʼẽ hag̃ua pe tapicha ohenduʼỹva haʼe oikuaávape.

8. ¿Mbaʼéichapa peteĩ kongregasión ikatu oipytyvõ umi ermáno oservívape lenguáhe de séñaspe?

⁸ Peteĩ kongregasión oĩva lenguáhe de séñaspe, ikatu ojerure ambue kongregasiónpe toipytyvõ chupekuéra ojapo hag̃ua peteĩ sénso umi território oĩháme hetave hénte. Ikatu ojerure oñepytyvõ hag̃ua chupekuéra uno térã dos vése káda áño. Ha iporãta peteĩ ermáno oĩva kongregasión lenguáhe de séñaspe omoakã pe aty oñesẽ mboyve ojejapo pe sénso. Upépe haʼe ikatu omombeʼu mbaʼéichapa ojejapovaʼerã ha avei ojapokuaa peteĩ demostrasión. Káda grúpo ohótarõ peteĩ veíkulope, iporãta ohórõ hendivekuéra peteĩ ermáno oservíva kongregasión lenguáhe de séñaspe ha oikuaa porãva moõpa oñembaʼapóta.

9. Jaha jave oñembyatyhápe jepi umi ohenduʼỹva ¿mbaʼépa jajapokuaa ñakonsegi hag̃ua umi informasión ñaikotevẽva jatopa jey hag̃ua umi oñatende porã vaʼekuére?

⁹ Avei jahakuaa umi lugár oñepytyvõhápe umi nohendúivape térã oñembyatyhápe jepi hikuái ojediverti hag̃ua. Umícha jave, jaha rangue ñañeʼẽ peteĩ grúpope, ñanembaʼerechakuaavaʼerã ha ñañeʼẽ peteĩ térã mokõipente. Ha oñatende porãramo ñanderehe ñaporandukuaa chupe héra, moõpa oiko ha ambue informasión ñaikotevẽva jatopa jey hag̃ua hese. Ha ñanemanduʼavaʼerã jaháta jave koʼã lugárpe ñañemondevaʼerãha hekoitépe.

10. ¿Mbaʼéichapa ikatu jaheka negosiohárupi umi nohendúivape?

¹⁰ Avei ikatu jajapo mápa ohechaukáva moõ moõpa oĩ umi negósio, peteĩme ñamoĩkuaa moõpa oĩ surtidór, ótrope katu almasén, ambuépe rrestaurantekuéra, otél ha umícha. Péicha jajapóramo ñanepytyvõta javisita hag̃ua chupekuéra pe óra opyta porãvévape. Avei káda mápape ñamoĩramo peteĩ negósio rehegua memete, umi maranduhárape ndahasymoʼãi ojeprepara porã hag̃ua ohóta jave koʼã lugárpe. ¿Mbaʼépa ikatu jaʼe umi negosiohárupi? Pór ehémplo, jaháramo peteĩ otélpe ikatu ñañeʼẽ mbykymi pe oñantendévape umi og̃uahẽvare. Upéi jahejakuaa chupe umi puvlikasión oĩva DVD-pe ha invitasión rreunionrã, omeʼẽ hag̃ua umi hénte nohendúivape opytáva jepi upe otélpe. Ambue negósiope katu ñaporandukuaa nombaʼapóipa upépe peteĩ ohenduʼỹva térã ndorekóipa kliénte oñekomunikáva lenguáhe de séñaspe. Ha oĩramo peteĩ eskuéla umi ohenduʼỹvape g̃uarã ñande territóriope, ñaikuaveʼẽkuaa chupekuéra umi puvlikasión jarekóva lenguáhe de séñaspe omoĩ hag̃ua ivivliotékape.

11. ¿Mbaʼérepa iñimportanteterei jaheka umi oñeʼẽvape ambue idióma?

¹¹ Peteĩ tembiapo iñimportantetereíva. Heta lugárpe pyʼỹi ou térã ova umi hénte oñeʼẽva ótro idiómape, upévare hasy jepi oñeanotapaite hag̃ua umi direksión pe mápape. Upéicha rupi, ikatu ijetuʼu ha ñanemokaneʼõ jaheka hag̃ua koʼãichagua héntepe, upéicharõ jepe heta lugárpe ojehechakuaa tekotevẽha ojejapo upéva. Avei ñanemanduʼavaʼerã Jehová nomboykeiha avavépe upévare iñimportanteterei ko tembiapo (Hech. 10:34). “Haʼe ningo oipota opavave ojesalva ha oikuaa pe añetegua” (1 Tim. 2:3, 4, ÑÑB). Upévare, ñambaʼapókena Jehová ha ñane ermanokuérandi jahekávo umi hénte “ipyʼaporãva” oñeʼẽva opaichagua idiómape (Luc. 8:15, NM).

[Rrekuádro oĩva páhina 5-pe]

Ñañopytyvõkena

Ikatu peteĩ kongregasión térã grúpo oipota oñepytyvõ chupekuéra ojuhu hag̃ua hetave hénte oñeʼẽva ótro idiómape. Upéicha jave, pe superintendénte de servísio oñeʼẽkuaa umi ansiáno oservívape umi kongregasión hiʼag̃uivévape, térã ambue kongregasión orekóva iterritóriope heta oñeʼẽva ótro idiómape. Umi ansiáno odesidíramo oñepytyvõtaha koʼã ermánope, ojeʼevaʼerã opavave maranduhárape otopárõ peteĩ oñeʼẽvape ótro idióma oanotavaʼerãha idireksión, ha upéi tomeʼẽ superintendénte de servísiope. Péicha, ko ermáno ombohasáta umi direksión pe kongregasión térã grúpo oñepytyvõvape. Umi superintendénte de servísio oĩva káda kongregasiónpe, ohechavaʼerã mbaʼéichapa ojeheka porãvéta umi oñeʼẽvape ambue idióma oĩva iterritoriopekuéra, avei mbaʼéichapa oñepytyvõta umi ohendu porã vaʼekuépe, oho hag̃ua pe kongregasión térã grúpo oñeñeʼẽhápe upe idióma haʼekuéra oñeʼẽva.

Péro, ¿mbaʼépa jajapóta ñane kongregasión noipytyvõiramo peteĩ kongregasión térã grúpo oñeʼẽvape ótro idióma? Upéicha jave, peteĩ maranduhára otopárõ peteĩ oñeʼẽvape ambue idióma térã peteĩ ohenduʼỹvape ha ohechakuaa oikuaaseveha la Biblia omboʼéva, omyenyhẽvaʼerã pyaʼe pe formulário Sírvase visitar (S-43) ha omeʼẽ pe sekretário oĩva ikongregasiónpe. Jajapórõ péicha, pyaʼe porã oñepytyvõta upe tapichápe (ehecha km 5/11 páh. 3).

[Rrekuádro oĩva páhina 6-pe]

Mbaʼéichapa ikatu jaheka umi hénte oñeʼẽvape ótro idióma

• Ñaporandukuaa ñane estudiántepe, ñane hentekuérape, ñande travahohápe térã ambue tapichápe.

• Jahekakuaa umi téra ikomunvéva peteĩ idiómape ha idireksionkuéra, upearã ikatu jaiporu peteĩ guía telefónika oĩva Internétpe térã umi lívro omeʼẽvape umi kompañía telefónika.

• Ñaporandukuaa umi lugár ohohápe heta hénte, pór ehémplo; vivliotékape, eskuélape, térã umi institusionhárupi omoĩva pe goviérno.

• Ñamañakuaa diáriope. Sapyʼánte upépe oñemombeʼu moõpa ojejapóta peteĩ aktivida ohotahápe heta oñeʼẽva ótro idiómape.

• Jahakuaa umi rrestauránte térã ambue negósio ohohápe jepi umi hénte oñeʼẽva ótro idiómape.

• Jajerurekuaa permíso ñamoĩ hag̃ua peteĩ mesa ári puvlikasión umi lugár pyʼỹi ohohápe hénte oñeʼẽva ótro idiómape. Pór ehémplo, umi negósio renondépe, universidápe, opytahápe trén térã kolektívo parádape.

• Jajoguakuaa peteĩ guía telefónika térã peteĩ prográma ohekáva umi hénte direksión Internétpe, pe léi ñane retãmegua ndoproivíriramo.

[Rrekuádro oĩva páhina 7-pe]

Mbaʼépa ikatu jaʼe jajapo jave pe sénso

Ñañeʼẽ jave umi héntepe ñanderoryvaʼerã ha jaʼe chupekuéra maʼerãpa jaha, péicha ndokyhyjemoʼãi ñandehegui. Avei ñanepytyvõta jahechaukaraẽramo chupekuéra umi puvlikasión jagueraháva ñameʼẽ hag̃ua umi oñeʼẽvape ótro idióma.

Jasaluda rire pe ogajárape ikatu jaʼe: “Roheka ningo hína umi hénte oñeʼẽva ______ romombeʼu hag̃ua chupekuéra peteĩ esperánsa iporãitereíva oĩva la Bíbliape. ¿Ndépa sapyʼarei ndereikuaái peteĩ oñeʼẽvape upe idióma?”.

Jaheka jave peteĩ nohendúivape ikatu jaʼe: “¡Mbaʼéichapa! ¿ikatúpa ahechaukami ndéve peteĩ vidéo? [Eiporu peteĩ DVD portátil rehechauka hag̃ua chupe peteĩ téysto vívliko lenguáhe de séñaspe.] Kóva ningo peteĩ téysto vívliko lenguáhe de séñaspe. Ha roguereko heta vidéo umi nohendúivape g̃uarã, koʼãva ojejapo ikatu hag̃uáicha oñepytyvõ chupekuéra oikuaa hag̃ua hetave mbaʼe Ñandejáragui. ¿Reikuaápa peteĩ ohenduʼỹvape térã peteĩ nohenduporãivape ontendéva lenguáhe de séñas?”. Pe ogajára naimanduʼáiramo, reporandukuaa chupe nodohecháipa raʼe umichagua héntepe itravahohápe, eskuélape, hóga jerére térã ótro hendápe.