Ifamília sapyʼa hikuái

Abrahán ha Sara aréma omenda hague. Haʼekuéra oiko vaʼekue Úrpe, péro oheja hikuái pe hóga porãite orekóva upépe ha oho oiko óga kárpape. Péro Sara arakaʼeve ndojekehái upévare pórke haʼe ojerovia Jehováre ipyʼaite guive.

Sara ningo oipotaiterei vaʼekue la mitã, upévare heʼi Abrahánpe: “Che sirviénta Agar orekóramo peteĩ mitã, arekóta peteĩ che membyrã”. Upéi Agar hyeguasu ha oreko peteĩ mitãkuimbaʼe ha oñembohéra chupe Ismael.

Heta tiémpo rire, Abrahán orekópe 99 áño ha Sara 89, mbohapy persóna ou ovisita chupekuéra. Abrahán ombohasa chupekuéra opytuʼu hag̃ua peteĩ yvyra guýpe ha upéi oinvita chupekuéra opyta hag̃ua okaru hendivekuéra. ¿Reikuaápa mávapa rakaʼe umi mbohapy persóna? Haʼekuéra ningo ánhel ha Jehová omondo chupekuéra heʼi hag̃ua Abrahánpe: “Koʼã fécharupi pe áño oúvape ne rembireko Sara imembýta peteĩ mitãkuimbaʼe”. Sara ojapysaka hína kuri hesekuéra koty guive ha ohendúvo upéva opuka ha heʼi ipyʼapýpe: “Mbaʼéiko che chemembyvéta cheg̃uaig̃ui rire”.

Upéi al áño sigiénte, Sara orekóma peteĩ mitã Jehová ánhel heʼi hagueichaite chupe. Abrahán ombohéra itaʼyraʼípe Isaac. Upe téra heʼise “opukáva”.

Isaac orekórõ guare 5 áñorupi, Sara ohecha mbaʼéichapa Ismael oñembohory jepi hese. Sara ningo hakateʼỹeterei Isaac rehe ha upévare heʼi Abrahánpe omosẽ hag̃ua Agárpe ha Ismaélpe. Ñepyrũrã Abrahán ndojaposéi upéva, péro Jehová heʼi chupe: “Ejapo la Sara heʼíva pórke Isaac rupive akumplíta hína pe apromete vaʼekue ndéve. Ha ani ejepyʼapy Ismael rehe, che akuidáta hese”.