Nde ikatu reho repredika oñekotevẽhápe

“Estados Unídospe roiko porã ha roreko heta mbaʼe. Péro upépe umi hénte omombaʼeterei la pláta ha oñehaʼã voi oreko hag̃ua hetave mbaʼe. Ha rokyhyje umi mbaʼe oraha vaírõ g̃uarã ore familiakuérape. Che ningo aservivaʼekue che rembireko ndive misionéroramo. Upérõ rovyʼa ha ndoroguerekoivaʼekue heta mbaʼe. Ha koʼág̃a roikose jey upéicha.”

UPÉVARE 1991-pe Ralph ha Pam omondo kárta heta sukursál oĩva América Central ha América del Súrpe. Haʼekuéra ningo oservise oñekotevẽhápe opredikavaʼerã. Upe rire pe sukursál Mexicopegua heʼi chupekuéra oñekotevẽtereiha opredikavaʼerã umi ingléspe oñeʼẽvape ha osẽ porãtaha chupekuéra hembiapo (Juan 4:35). Upe riremínte Ralph, Pam ha ifamiliakuéra (de 8 ha 12 áño) ojepreparáma ova hag̃ua upépe.

Heta hendárupi ropredikavaʼerã

Ralph omombeʼu: “Rova mboyve Estados Unídosgui heta ermáno oĩ heʼíva oréve: ‘Ijetuʼuhína peiko hag̃ua tetã ambuépe’. ‘Mbaʼe piko pejapóta penderasy mbaʼéramo’. Maʼerã piko pehóta ótro tetãme pepredika hag̃ua ingléspe. Umíva ningo ndoikuaaséi voi mbaʼeve la Bíbliagui’. Péro ore roʼéma rovataha. Ropensa porã ningo upéva rojapo hag̃ua, ha rombyaty mimíma voi roikóvo ore pláta ani hag̃ua rodevepa. Roñemongetáma avei ore familiakuéra ndive mbaʼe mbaʼépa ikatu oiko orerehe upérupi”.

Og̃uahẽmírente Méxicope, Ralph, hembireko ha ifamiliakuéra oho ovisita Betel. Upépe umi ermáno ohechauka chupekuéra peteĩ mápa de México ha heʼi: “Ko tetã tuichakue pepredikáta”. Oiko hikuái pe táva San Miguel de Alléndepe, opytáva 240 kilómetro táva Méxicogui noroeste gotyo. Upépe heta oĩ oñeʼẽva ingléspe. Ha tres áño ova haguépe hikuái oĩma peteĩ kongregasión ingléspe ha diecinueve puvlikadór. Péro upéva ñepyrũrãnte hína.

Méxicope oiko un millón voi Estados Unidosgua. Ha heta oĩ avei profesór térã doktór Mexicoygua oñeʼẽva ingléspe. Ralph heʼi: “Rojerure Jehovápe ombouve hag̃ua opredikavaʼerã orendive. Ógape ningo roreko voi peteĩ koty opyta hag̃ua umi ermáno oúva jepi ohecha mbaʼetekópa oho hese ore rembiapo” (Núm. 13:2).

Omboyke hikuái heta mbaʼe opredikave hag̃ua

Upe rire, ouvéma katu ermanokuéra opredikavaʼerã. Umíva apytépe Bill ha Kathy. Haʼekuéra ningo Estados Unidosgua ha veinticinco áñoma opredikahikóni umi lugár oñekotevẽhápe. Opensákuri hikuái oaprendévo kastelláno, péro ova Ajijícpe ha ohechakuaa natekotevẽiha. Upépe ningo hetaiterei Estados Unidosgua ojehuvilavaʼekue oiko pe lágo Chapala rembeʼýpe. Bill heʼi: “Ajijícpe ore areve predikasiónpe rohekávo umi ingléspe oñeʼẽva ha ostudiaséva la Biblia”. Ha dos áño haguépe rohecháma mbaʼéichapa oñepyrũ Méxicope pe segunda kongregasión ingléspe.

Ken, hembireko Joanne ha itajýra Brittany ningo Canadaygua ha omboyke avei hikuái heta mbaʼe itiempove hag̃ua Jehovápe g̃uarã. Ova avei hikuái Méxicope. Ken omombeʼu ñepyrũrã ijetuʼueterei hague chupekuéra ndaipórigui upépe teléfono ni elektrisida. Péro heʼi ovyʼaitereiha hikuái predikasiónpe. Upe riremínte Kéngui oikóma siervo ministerial ha dos áño haguépe katu oikóma chugui ansiáno. Bríttanype avei ijetuʼueterei ñepyrũrã saʼi rupi oĩ mitãkuña ha mitãrusu pe kongregasión ingléspe. Péro upe rire oho oipytyvõ pe construcción de Salones del Reino-pe ha ojuhu heta iñamigorã opa hendárupi.

Patrick ha Roxanne oikovaʼekue Téxaspe. Ha upéi opilla hikuái ag̃uieténte oñekotevẽha opredikavaʼerã umi ingléspe oñeʼẽvape. Patrick heʼi: “Rohórõ guare Monterréype, opytáva nordeste gotyo Méxicope haʼetévaicha oréve Jehová oremondóva upépe”. Patrick ha Roxanne 5 día haguépe ovendéma hóga oĩva Téxaspe ha upéi ova hikuái Méxicope. Upépe ningo ijetuʼu jahupyty hag̃ua ñane remikotevẽ, péro ohupyty hikuái heta mbaʼe porã kongregasiónpe. Ñepyrũrã diecisiete puvlikadór añónte oĩvaʼekue ha dos áño haguépe oĩma cuarenta hikuái.

Jeff ha Deb omboyke avei heta mbaʼe oiporuve hag̃ua itiémpo predikasiónpe. Ovende hikuái hóga guasu orekóva Estados Unídospe ha ova Méxicope peteĩ óga michĩmívape táva Cancúnpe. Jeff ha Deb ningo ojepokuaavaʼekue ag̃uimínte oviaha asamblearã ha upe asambléa oikoha katu orekopa voi áire akondisionádo ha mbaʼe. Péro Méxicope ova rire oviahavaʼerã 8 óra oho hag̃ua pe asambléa ingléspe. Ha upe asambléa ojejapo peteĩ estádiope ha kuarahyetépe. Upéicharõ jepe ovyʼa hikuái oñehaʼã haguére, ha amo ipahápe ningo oĩma peteĩ kongregasión orekóva cincuenta puvlikadór.

Heta ermáno Mexicoygua oñepyrũma avei opredika ingléspe. Rubén ha ifamiliakuéra ohendu oĩha peteĩ kongregasión ingléspe San Miguel de Alléndepe ha México tuichakue opredikaha hikuái. Upémarõ haʼekuéra heʼi oipytyvõseha avei. Péro upearã oaprendevaʼerã hikuái inglés, oikuaavaʼerã mbaʼéichapa opensa umi hénte ha káda semána oviahavaʼerã 800 kilómetro oho hag̃ua rreunionhápe. Rubén heʼi: “Heta oĩ tetã ambuegua aréma oikóva Méxicope ha ndojepredikáiva gueteri chupekuéra iñeʼẽtépe. Umíva ningo omombaʼeterei ohendúvo pe marandu porã iñeʼẽme ha oĩ voi hesay pororopáva ha oagradese oréve”. Rubén ha ifamiliakuéra ñepyrũrã oservi de prekursór táva Guanajuátope. Upépe oipytyvõ hikuái oñepyrũ hag̃ua peteĩ kongregasión de treinta puvlikadór. Ha koʼág̃a katu oservi hikuái peteĩ grúpo ingléspe Irapuátope, ag̃uiete Guanajuátogui.

Ojepredika umi noñatendéivape jepi ñanderehe

Heta Mexicoygua oĩ avei oñeʼẽva ingléspe, péro hasy ojepredika hag̃ua chupekuéra. Oiko hikuái umi iplátava oikohápe ha empleadakuérante voi oñatende ñanderehe. Ha oĩramo ogajára oñatendéva katu noñeʼẽséi voi ñanendive oimoʼãgui testigos de Jehová peteĩ sékta uperupiguánte. Péro ovisitáramo chupekuéra peteĩ ermáno ambue tetãyguáva, oñatende ha ohendu porã hikuái.

Jahechamína koʼág̃a mbaʼépa omombeʼu ñandéve Gloria, oikóva Querétarope. Haʼe heʼi: “Umi testigos de Jehová pyʼỹinte og̃uahẽva che rógape péro nañatendéiva hesekuéra. Upe rirénte che família ha che amigokuéra ou iprovléma heta ha ambyasyeterei upéva. Upémarõ añemboʼe Ñandejárape chepytyvõmi hag̃ua. Ha upe riremínte og̃uahẽ che rógape peteĩ kuñakarai oñeʼẽva ingléspe ha oporandu chéve oĩpa ógape oñeʼẽva inglés. Ahechakuaa pe kuñakarai ndahaʼeiha Mexicoygua ha aikuaase mbaʼépa ojapohikóni, upévare haʼe chupe che añeʼẽha ingléspe. Ha oñeʼẽ aja chéve la Bíbliare, chepyʼapýpe haʼe: ‘Mbaʼépa ko kuñakarai ojapohína koʼárupi’. Péro chemanduʼa ajerure hague Ñandejárape peteĩ señál ha apensa ko kuñakarai rupi Ñandejára ombohovaiha chéve cheñemboʼe”. Gloria oñepyrũ ostudia la Biblia ha pyaʼe voi oikuaáma heta mbaʼe. Upe riremínte ojevautisáma oñemoĩramo jepe hese ihentekuéra. Koʼág̃a Gloria precursora regular ha iména ha imemby kariaʼy oservíma avei Jehovápe.

Mbaʼépa ohupyty umi oiporuvéva itiémpo opredika hag̃ua

Ijetuʼu ningo añete jaha hag̃ua jaservi oñekotevẽhápe opredikavaʼerã, péro hetaiterei mbaʼe porã jahupytýta Jehovágui jajapóramo upéva. Ralph ningo heʼi voi: “Romboʼe la Biblia hetaiterei tapichápe, tahaʼe China, Gran Bretaña, Jamaica, Suecia ha Ghanayguápe. Umíva apytégui oĩma ojevautisáva ha oservímava avei de tiémpo kompléto. Che família ha che rohecha mbaʼéichapa oñepyrũ umi siete kongregasión ingléspe. Umi mokõi ore família ojapókuri avei orendive prekursorádo ha koʼág̃a katu oservi hikuái Betélpe Estados Unídospe”.

Méxicope oĩma koʼág̃a 88 kongregasión ingléspe ha heta grúpo avei. Mbaʼérepa hetaite oĩ koʼág̃a rupi? Heta mbaʼére: Umi tetã ambuegua oĩva Méxicope koʼág̃a ramo oñeʼẽ testigos de Jehová ndive. Ótro katu ohendu porã ojepredika jave chupekuéra ndaipórigui ag̃ui ihentekuéra térã iñamígo ojokovaʼerã chupe. Oĩ avei heta ojehuvilámava ha itiempove ostudia hag̃ua la Biblia. Pe Kongregasión ingléspe oĩ avei heta prekursór ha upéicha rupi ikyreʼỹ ha hetaverei hikuái.

Peneraʼarõ heta mbaʼe porã

Katuete heta ñande rapicha ostudiavéta la Biblia ojepredikáramo chupe iñeʼẽtépe. Ñanemokyreʼỹeterei jahechávo mbaʼéichapa heta ermáno tahaʼe soltéro térã omendáva, ipyahúva térã ijedámava, ovahína umi lugár oñekotevẽhápe opredikavaʼerã. Ha ijetuʼúramo jepe upéva, ovyʼaiterei hikuái ojuhúvo umi tapicha ipyʼaporãva ha oñepyrũva avei oservi Ñandejárape. Eñehaʼãmína nde avei reho reservi umi lugár térã tetã oñekotevẽhápe opredikavaʼerã (Luc. 14:​28-30; 1 Cor. 16:9).a Rejapóramo upéicha, rehupytýta heta mbaʼe porã.

[Nóta]

[Rrekuádro oĩva páhina 21-pe]

Ovyʼa hikuái

Beryl ningo oikovaʼekue Gran Bretáñape ha upégui ova Canadápe ha ombaʼapo peteĩ emprésape. Haʼe ivaleterei avei kavaju ári ha upévare Canadápe ojeporavo chupe oho hag̃ua pe Juegos Olímpicos-pe áño 1980-pe. Ha ojehuvila rire katu Beryl ha iména ova Chapálape. Haʼekuéra oho jepi okaru peteĩ várpe ha upépe otopa heta hapicha ojehuvilamavaʼekue. Ohendu jepi chupekuéra oñeʼẽ ingléspe ha ovyʼajoa hikuái. Upémarõ Beryl oñemboja ha oporandu chupekuéra mbaʼépa ojapo Méxicope, ha enteroveléntonte heʼi chupe Testigoha. Beryl ha iména ohechakuaa mbaʼéichapa ovyʼa hikuái ha upévare oikuaase avei Ñandejárape. Heta tiémpo oho rire rreunionhápe Beryl oñepyrũ ostudia la Biblia, upéi ojevautisa ha heta áñore ojapo precursorado regular.

[Rrekuádro oĩva páhina 22-pe]

“Tuichaiterei ningo orepytyvõ hikuái”

Jaguerohoryeterei ningo umi ermáno ohejávape hetã oho hag̃ua oipytyvõ ambue kongregasiónpe. Peteĩ sukursál oĩva Caríbepe ohai: “Ijetuʼuetereíta ningo oréve kongregasiónpe ohopáramo umi ermáno oúva ambue tetãgui opredika hag̃ua orendive. Tuichaiterei ningo orepytyvõ hikuái”.

La Biblia heʼi hetaiterei kuña oĩha omombeʼúva pe marandu porã (Sal. 68:11). Hetaiterei ermána ningo oĩ ohóva opredika hag̃ua ambue tetãme. Peteĩ sukursál oĩva Europa del Éstepe heʼi: “Orembovyʼaiterei ningo umi ermána prekursóra oúva ambue tetãgui orepytyvõ hag̃ua. Heta puvlikadór pyahu oĩ ore kongregasiónpe ha kuña memelénto hikuái. Umi prekursóra tuicha oipytyvõ chupekuéra. Rovyʼaite ningo Jehová ombou haguére chupekuéra orepytyvõ hag̃ua!”.

Mbaʼéichapa oñeñandu koʼã ermána ohóva opredika hag̃ua tetã ambuépe? Peteĩ ermána hérava Angelica oreko 35 áño rupi ha heta áño oservivaʼekue tetã ambuépe heʼi: “Ijetuʼúngo añete. Peteĩ lugár aha haguépe aservi ivaieterei la tape, tuju memete ha káda día ahecha mbaʼéichapa umi hénte ohasa asy. Ambyasyeterei ningo, péro avyʼa ikatu haguére aipytyvõ chupekuéra oikuaa hag̃ua Ñandejárape. Chemopirĩmba avei umi ermána oñembojávo oagradese chéve umi mbaʼe ajapóvare. Peteĩva heʼi chéve oñepyrũ hague ojapo iprekursorádo ohechágui mbaʼéichapa che añehaʼã ha aju mombyryetégui apredika hag̃ua hendivekuéra”.

Sue ningo peteĩ prekursóra orekóva 50 áño rupi, haʼe heʼi: “Ijetuʼúko añete jaháramo japredika ambue tetãme, péro hetaitereive mbaʼe porã jahupyty upe haguére. Igustoiterei voi ningo! Heta tiémpo che ahasa predikasiónpe umi ermána imitãva ndive ha upéicha jave añemongeta hendivekuéra. Amombeʼu chupekuéra mbaʼéichapa la Biblia, rrevísta ha lívro umíva omeʼẽ ñandéve konsého neporãva ha ñanepytyvõha ñambohovái hag̃ua opa mbaʼe. Ha heta ermána heʼi chéve omokyreʼỹetereiha chupekuéra mbaʼéichapa ambohovái oimeraẽ provléma ahasáva che prekursorádope. Ha ohechakuaa haʼekuéra avei ikatuha ojapo upéicha. Añeñandu porãiterei ningo aipytyvõ haguére péicha che ermanakuérape”.

[Mápa oĩva páhina 20-pe]

(Emaña pe kuatiañeʼẽre rehecha hag̃ua osẽ hagueichaite ko párte)

MÉXICO

Monterrey

Guanajuato

Irapuato

Ajijic

Chapala

Lago de Chapala

San Miguel de Allende

Querétaro

CIUDAD DE MÉXICO

Cancún

[Nóta oĩva taʼanga ndive páhina 23]

Heta tapicha tetã ambuegua koʼág̃a ramo ohenduhína pe marandu porã