Jasegíkena umi anhelkuéra ehémplo

1, 2. a) ¿Mbaʼe mbaʼépepa ñanediferénte umi anhelkuéragui? b) ¿Mbaʼe mbaʼépepa jajojogua umi anhelkuérandi?

ÑANDE ñaime Jehová família tuichaitéva apytépe ha enterovévante japorohayhu ha jaadora chupe. Ko família apytépe oĩ hína entéro umi ñane ermáno ha ermána oĩva ko yvy tuichakuére, ha avei oĩ umi anhelkuéra (Dan. 7:​9, 10). Péro ñanemanduʼávo umi anhelkuérare, ikatu ñapensa haʼekuéra idiferentetereiha ñandehegui. Por ehémplo, aretereíma ningo umi ánhel oexisti hague, ha heta tiémpo rire ae ñande jaexisti (Job 38:​4, 7). Haʼekuéra ipoderosoiterei, oreko tuicha autorida ha ihustove ñandehegui, ñande ndaikatúi jahupyty chupekuéra peichaite peve pórke ñaneimperfékto (Luc. 9:26).

² Ñapensáramo jepe ñanediferentetereiha umi anhelkuéragui, jajogua avei chupekuéra heta mbaʼépe. Por ehémplo, haʼekuéraicha ikatu avei jahechauka umi kualida oúva Jehovágui. Avei jareko pe liverta jadesidi hag̃ua heta mbaʼe. Káda ánhel oreko avei héra, ilája ha heta rresponsavilida, ha ñande upéicha avei. Haʼekuéraicha, ñamombaʼeguasuse ñande Apohare Jehovápe (1 Ped. 1:12).

3. ¿Mbaʼépa ikatu ñaaprende umi ánhel ifiélvagui?

³ Jahecha haguéicha, heta mbaʼépe jajogua umi anhelkuérape, upévare iñehemplokuéra ikatu ñanemokyreʼỹ. Péro ndahaʼéi upévante, ikatu avei ñaaprende chuguikuéra heta mbaʼe. Upévare ko artíkulope jahecháta umi ánhel iñumildeha, oporohayhuha, osegiha oaguanta ha oipytyvõha pe kongregasión ipotĩ hag̃ua. Avei jahecháta mbaʼéichapa ikatu jasegi iñehemplokuéra.

UMI ÁNHEL IÑUMÍLDE

4. a) ¿Mbaʼéichapa umi ánhel ohechauka iñumildeha? b) ¿Mbaʼérepa umi ánhel iñumildete? (Salmo 89:7).

⁴ Umi ánhel ningo iñumildeterei. Haʼekuéra iñarandu, ipoderóso ha oikuaáramo jepe heta mbaʼe, siémpre iñeʼẽrendu entéro mbaʼe Jehová heʼívape chupekuéra (Sal. 103:20). Umi ánhel ojapo jave pe traváho Jehová omeʼẽva chupekuéra, núnka noñemombaʼeguasúi ni ndoipurúi ipodér ojehechauka hag̃ua umi ótrope. Upéva rangue haʼekuéra vyʼápe ojapo la Jehová ojeruréva chupekuéra oikuaaukaʼỹre héra (Gén. 32:​24, 29; 2 Rey. 19:35).a Umi ánhel ndoipotái avei oñemombaʼeguasu chupekuéra Jehovápe rangue. Upéicharõ, ¿mbaʼérepa umi ánhel iñumildete? Pórke ohayhueterei Jehovápe ha orrespeta chupe ipyʼaite guive (elee Salmo 89:7).

5. ¿Mbaʼéichapa peteĩ ánhel ohechauka vaʼekue iñumildeha okorrehírõ guare apóstol Juánpe? (Ehecha pe taʼanga).

⁵ Jahechamína peteĩ ehémplo ohechaukáva umi ánhel iñumildetereiha. Amo áño 96 rupi, peteĩ ánhel ndajaikuaáiva mbaʼéichapa héra, ohechauka apóstol Juánpe peteĩ visión iñimpresionánteva (Apoc. 1:1). ¿Mbaʼépa ojapo Juan ohecha rire pe visión? Haʼe oadorasemoʼã pe ánhelpe, péro upérõ pe ánhel pyaʼeterei voi heʼi Juánpe: “¡No! ¡Aníke ejapo upéva! Eadora Ñandejárape. Che ningo peteĩ esklávonte avei, nde ha ne ermanokuéraicha” (Apoc. 19:10). ¡Ajépa iñumildete ko ánhel! Haʼe ndoipotái kuri oñemombaʼeguasu chupe, upévare ensegída heʼi Juánpe oadora hag̃ua Jehovápe. Avei jahecha pe ánhel nontendekái hague Juánpe iñimportanteveha chugui. Pe ánhel ningo oservíma Jehovápe hetaitereive tiémpore ha ipoderosoitereive Juángui. Upéicharamo jepe haʼe heʼi apóstol Juánpe haʼe haʼeha peteĩ esklávo Juan ha iñermanokuéraicha. Pe ánhel tekotevẽ kuri okorrehi Juánpe péro ndojaʼói ni ndotratavaíri chupe. Upéva rangue haʼe iñamávle hendive, pórke oiméne ohechakuaa Juan oñesorprendetereínte hague umi mbaʼe ohechávare pe visiónpe.

6. ¿Mbaʼéichapa ikatu jasegi umi ánhel iñumíldeva ehémplo?

⁶ ¿Mbaʼéichapa ikatu ñaneumílde umi anhelkuéraicha? Ñande ningo ñambaʼapo jejopy Jehová servísiope, péro ni mbaʼevéicharõ nañañemombaʼeguasuséi umi mbaʼe jajapóvare. Ndajaikomoʼãi avei jajechauka ñandevaletereirog̃uáicha peteĩ mbaʼépe (1 Cor. 4:7). Avei ndajajekreemoʼãi jaservi haguére Jehovápe hetave tiémpore umi ótro ermánogui, térã jaguereko haguére algún priviléhio. Upéva rangue, amedída ke jaguereko hetave rresponsavilida Jehová organisasiónpe koʼýte ñaneumílde vaʼerã (Luc. 9:48). Umi ánhel ojapoháicha, ñande jaservise avei ótrope ha ni mbaʼevéicharõ nañapensamoʼãi ñaneimportanteveha chuguikuéra.

7. ¿Mbaʼéichapa ikatu jahechauka ñaneumildeha japorokorrehi térã ñañemoñeʼẽ jave?

⁷ Jahechauka vaʼerã avei ñaneumildeha jakorrehíta térã ñañemoñeʼẽta jave peteĩ ermánope térã ñane famíliape. Sapyʼánte tekotevẽtamante ñameʼẽ peteĩ konsého imbareteʼíva, péicha jave ikatu jasegi pe ehémplo oheja vaʼekue ñandéve pe ánhel okorrehi vaʼekue mborayhúpe Juánpe. Tekotevẽrõ jepe ñañemoñeʼẽ mbarete, ñaneamávleta ha ni núnka nañamonamoʼãi pe persónape yvýre. Nañapensáiramo ñaneimportanteveha umi ótrogui, ñameʼẽta mborayhúpe umi konsého oĩva la Bíbliape ha siémpre jahechaukáta japororrespetaha (Col. 4:6).

UMI ÁNHEL OPOROHAYHU

8. a) ¿Mbaʼéichapa umi ánhel ohechauka ohayhuha la héntepe? (Lucas 15:10). b) ¿Mbaʼéichapa umi ánhel oipytyvõ predikasiónpe? (Ehecha pe taʼanga).

⁸ Umi ánhel ningo nopensái ñande nañaneimportanteiha, upéva rangue haʼekuéra ñanderayhueterei voi. Por ehémplo, haʼekuéra ovyʼaiterei peteĩ opekáva oñarrepenti jave térã oĩ jave oñemoag̃ui jeýva Jehováre. Ha ipyʼarory hikuái ohechávo oĩha hénte oaprendeséva Jehovágui ha okambiáva oiko lája oservi hag̃ua chupe (elee Lucas 15:10). Umi ánhel tuichaiterei avei ñanepytyvõ japredika jave (Apoc. 14:6). Añetehápe ningo ndahaʼéi haʼekueraite la oúva opredika, péro umi ánhel ikatu ñandegia ñañeʼẽ hag̃ua peteĩ persóna oikuaasévape Jehovápe. Ndaikatúi jaaseguraite umi anhelkuéra siémpre ñandeguerahaha káda persónandi ñañeʼẽ hag̃ua. Amo ipahápe Jehová oipurúnte avei ijespíritu sánto térã ambue mbaʼe oipytyvõ hag̃ua umi héntepe térã ogia hag̃ua isiervokuérape (Hech. 16:​6, 7). Upéicharõ jepe Jehová oipuru meme hiʼanhelkuérape predikasiónpe, upévare ikatu ñaĩ segúro haʼekuéra oĩtaha upépe ñanemoirũ hag̃ua. (Ehecha pe rrekuádro “Jehová ombohovái chupekuéra iñemboʼe”).b

9. ¿Mbaʼéichapa ikatu jasegi umi ánhel ehémplo ha jahechauka japorohayhuha?

⁹ ¿Mbaʼéichapa ikatu japorohayhu umi ánhel ojapoháicha? Por ehémplo, oñeanunsia jave ou jeyha kongregasiónpe peteĩ ermáno oñenohẽ vaʼekue, javyʼa vaʼerã umi ánhel ovyʼaháicha. Ikatu ñañanduka pe ermánope jahayhuetereiha chupe ha javyʼaitereiha oservi jeýta haguére Jehovápe (Luc. 15:​4-7; 2 Cor. 2:​6-8). Ikatu avei jasegi umi ánhel ehémplo jajapóvo la ikatumíva predikasiónpe (Ecl. 11:6). Umi ánhel ñanepytyvõháicha, ñande ikatu avei jahecha mbaʼéichapa ñaipytyvõkuaa umi ñane ermáno ha ermanakuérape predikasiónpe. Por ehémplo ikatu ñasẽ japredika peteĩ puvlikadór ipyahúvandi. Ñaipytyvõkuaa avei peteĩ ermáno térã ermána hasykatúvape térã ijedávape oho hag̃ua ñanendive predikasionhápe.

10. ¿Mbaʼépa ikatu ñaaprende Sara ehémplogui?

¹⁰ Ikatu ningo ñane situasión nomeʼẽi jajapo hag̃ua entéro mbaʼe jajaposéva Jehová servísiope. Oimérõ upéicha, jahekánte vaʼerã ótra kósa si ikatúva jajapo jasegi hag̃ua ñamoirũ umi ánhelpe japredikávo. Por ehémplo, jahechamína Sara káso.c Haʼe ningo oiko Índiape, ha amo 20 áñorupima ojapo hague iprekursorádo, péro upéi haʼe hasykatu ha opytaite voi tupápe. Upérõ haʼe ndovyʼavéi pórke ombyasyeterei la oikóva hese, péro kon el tiémpo Sara ovyʼa jey olee meme rupi ibíblia, ha avei umi ermáno ikongregasionpegua oipytyvõgui chupe. Upéi Sara ohecha mbaʼéichapa ikatu opredika omeʼẽháicha la iposivilida. Haʼe ningo ndaikatúi vaʼekue ni oguapy oskrivi hag̃ua kárta, upévare por teléfonomante opredika. Haʼe ohenói irrevisitakuérape ha haʼekuéra jey heʼi chupe máva mávapa ikatu ostudia avei hendive. ¿Mbaʼépa upéi ohupyty? Unos kuánto mése haguépente, Sara orekóma 70 kúrso bíblico ha haʼe ndaikatuvéima oñatende enterovetévare. Upémarõ Sara omeʼẽ la iñestudiantekuéra umi ermáno ikongregasionguápe, ha umi estudiánte apytégui heta oĩ umi ohóva rreunionhápe. ¡Ajépa iguapaite Sara ojapóvo ikatumíva guive predikasionhápe! Ikatu ñañeimahina mbaʼeichaitépa umi ánhel ovyʼa ombaʼapóvo peichagua ermáno ha ermánandi.

UMI ÁNHEL OSEGI OAGUANTA

11. ¿Mbaʼéichapa umi ánhel ifiélva ohechauka iñaguantetereiha?

¹¹ Umi ánhel oheja ñandéve peteĩ ehémplo ndaijojaháiva, pórke haʼekuéra hetaiterei áñorema oaguanta umi inhustísia ha mbaʼe vai ojejapóva. Haʼekuéra ohecha mbaʼéichapa Satanás ha heta ánhel oservi vaʼekue hendivekuéra opuʼã Jehová kóntrape (Gén. 3:1; 6:​1, 2; Jud. 6). La Biblia omombeʼu peteĩ vuéltape, peteĩ demónio ipoderósova oñemoĩ mbarete hague peteĩ ánhel ifiélvare (Dan. 10:13). Avei Adán tiémpo guive, umi ánhel ohecha ndahetaiha umi hénte odesidíva oadora Jehovápe. Upéicharamo jepe umi ánhel osegi oservi vyʼápe ha kyreʼỹme. Haʼekuéra oikuaa itiempoitépe Jehová oipeʼataha entéro mbaʼe ivaíva.

12. ¿Mbaʼépa ñanepytyvõta ñaaguanta hag̃ua?

¹² ¿Mbaʼéichapa ikatu jasegi ñaaguanta umi ánhel ojapoháicha? Ñande avei ikatu jahecha ojejapoha heta inhustísia térã oĩ oñemoĩ mbaretéva ñanderehe. Péro umi anhelkuéraicha ñaĩ segúro itiempoitépe Jehová oipeʼataha entéro mbaʼe vai. Upévare jasegi umi ánhel ehémplo ‘siémpre jajapóvo iporãva’ (Gál. 6:9). Ñandejára opromete voi ñandéve ñanepytyvõtaha jasegi hag̃ua ñaaguanta (1 Cor. 10:13). Upévare ikatu ñañemboʼe chupe omeʼẽ hag̃ua ñandéve ijespíritu sánto ikatu hag̃uáicha javyʼa ha ñanepasiénsia (Gál. 5:22; Col. 1:11). Oimérõ oĩ hína oñemoĩ mbaretéva nderehe, ejeroviákena Jehováre ha ani rekyhyje, Jehová siémpre nepytyvõta ha nemombaretéta (Heb. 13:6).

UMI ÁNHEL OIPYTYVÕ PE KONGREGASIÓN IPOTĨ HAG̃UA

13. ¿Mbaʼeichagua traváhopa ojapo avei umi ánhel koʼã ára pahápe? (Mateo 13:​47-49).

¹³ Koʼã ára pahápe Jehová omeʼẽ umi ánhelpe peteĩ traváho espesiál (elee Mateo 13:​47-49). Pe predikasión rupive, opaichagua persóna oñeinteresa pe notísia porãre. Algúno umíva apytégui okambia oiko lája oiko hag̃ua Jehová oipotaháicha, péro oĩ avei ndojapóiva upéva. Upévare umi ánhel oñenkarga ‘omboyke hag̃ua umi iñañáva umi ihústova apytégui’. Péicha haʼekuéra oipytyvõ ani hag̃ua oñemongyʼa pe kongregasión. Upéva ningo ndeʼiséi umi ohejáva Jehová organisasión ndaikatumoʼãveimaha ou jey ñande apytépe, ha ndeʼiséi avei núnka ndaiporimoʼãiha provléma kongregasiónpe. Péro ikatu ñaĩ segúro umi ánhel ombaʼapo jejopyha pe kongregasión ipotĩ hag̃ua.

14, 15. ¿Mbaʼéichapa ikatu jahechauka jaipotaha pe kongregasión ipotĩ ojapoháicha umi ánhel? (Ehecha pe taʼanga).

¹⁴ ¿Mbaʼéichapa ikatu ñaipytyvõ pe kongregasión ipotĩ hag̃ua ojapoháicha umi ánhel? Ñande voi ñañehaʼãmbaite vaʼerã jareko hag̃ua peteĩ amista imbaretéva Jehovándi. Upearã jaelehíta ñane amigorã umi ohayhúva Jehovápe, ha avei ñamboykéta entéro mbaʼe ikatúva ombyai ñane amista hendive. Upéicha jajapóramo, ñaipytyvõta pe kongregasión ipotĩ hag̃ua (Sal. 101:3). Ikatu hína avei ñaipytyvõ ñane ermanokuérape osegi hag̃ua ifiél Jehovápe. Por ehémplo, ¿mbaʼépa jajapóta jaikuaáramo peteĩ ñane ermáno térã ñane ermána opeka vaieterei hague? Jahayhúgui pe ermáno térã pe ermánape jaʼéta chupe oñeʼẽ hag̃ua ansianokuérandi. Péro ndojapóiramo upéva, ñandete voi ñañeʼẽta umi ansiánondi la oiko vaʼekuére. Ñande ningo jaipota pyaʼe voi oñepytyvõ pe ermáno térã ermánape ikatu hag̃uáicha oĩ porã jey Jehovándi (Sant. 5:​14, 15).

¹⁵ Ñambyasyetereíramo jepe, oĩ algúno opeka vaietereíva ha upévare oñenohẽmante vaʼerã kongregasióngui. Péicha jave, ñande ‘ndajajeheʼavéi hesekuéra’ (1 Cor. 5:​9-13).d Upéicha rupi pe kongregasión osegi ipotĩ. Avei ndajajeheʼáivo umi oñenohẽ vaʼekuére jahechauka jahayhuha chupekuéra. ¿Mbaʼérepa? Pórke upéva ikatu oipytyvõ chupekuéra ohechakuaa hag̃ua tekotevẽha ou jey Jehová organisasiónpe. Ha odesidíramo ou jey hikuái, javyʼaitereíta ovyʼaháicha avei Jehová ha hiʼanhelkuéra (Luc. 15:7).

16. ¿Mbaʼépa rejapo vaʼerã esegi hag̃ua umi ánhel ehémplo?

¹⁶ Tuichaite mbaʼe ningo la Jehová opermiti ñandéve ñaaprende umi anhelkuéragui ha ñambaʼapo hendivekuéra. Ñañehaʼãkena jasegi iñehemplokuéra ha ñaneumílde, japorohayhu, jasegi ñaaguanta ha jahechauka jaipotaha pe kongregasión ipotĩ. Jasegíramo umi ánhel ifiélva ehémplo, ikatúta jaadora Jehovápe ifamília apytépe pára siémpre.