Jajapo estúdio vívliko oñakãrapuʼãva Párte 7:
Ñañemboʼe pe estudiohápe
1. (a) Mbaʼérepa iporã ñañemboʼe pe estúdiope oñepyrũ ha opa hag̃ua? (b) Mbaʼépa ikatu jajapo ñañepyrũ hag̃ua ñañemboʼe pe estúdiope?
1 Pe ostudiáva la Biblia oñakãrapuʼã hag̃ua espiritualménte, Jehová vendisión iñimportanteterei (1Cor. 3:6). Upévare iporã ñañemboʼe pe estúdio oñepyrũ ha opa hag̃ua. Peteĩ tapicha iñandejararayhúva ndive, ikatu jajapo upéva pe primer estúdio guive. Umi ótro estudiánte ndive jahechavaʼerã arakaʼépa iporãta ñañepyrũ ñañemboʼe. Pe estudiánte ohecha hag̃ua mbaʼérepa iporã ñañemboʼe, ikatu jaiporu Salmo 25:4, 5 ha 1Juan 5:14. Ikatu jaiporu avei Juan 15:16 jahechauka hag̃ua tekotevẽha ñañemboʼe Jehovápe, Jesucristo rupive.
2. Peteĩ ermáno vautisádo térã peteĩ puvlikadór ndojevautisáiva gueteri ohóramo peteĩ ermána ndive ijestudiohápe, mávapa oñemboʼevaʼerã?
2 Mávapa oñemboʼevaʼerã peteĩ estúdio vívlikope? Peteĩ ermáno vautisádo ohóramo peteĩ ermána ndive, pe ermáno oñemboʼevaʼerã. Pe ermána ikatu ojapo pe estúdio oñakãhoʼíramo upe aja (1Cor. 11:5, 10). Péro ohóramo hendive peteĩ puvlikadór ndojevautisáiva gueteri, pe ermána oñemboʼevaʼerã. Upéicha vove, pe ermána oñakãhoʼivaʼerã oñemboʼe jave ha ojapo aja pe estúdio avei.
3. Mbaʼe mbaʼe rehépa ikatu ñañemboʼe peteĩ estúdio vívlikope?
3 Mbaʼépa ikatu jaʼe ñañemboʼe jave: Peteĩ estúdiope natekotevẽi ipuku pe ñemboʼe, péro hesakã porã vaʼerã. Ikatu jajerure Ñandejára vendisión pe estúdiore, ha jaagradese umi mbaʼe añetegua oñeaprendéva rehe. Iporã avei jaalava Jehovápe, ouhaguére ichugui pe enseñánsa (Isa. 54:13). Ikatu jaʼe umi mbaʼe ohechaukáva ñañeinteresaha pe estudiánte rehe, ha jaguerohoryha pe organisasión Jehová oiporúva (1Tes 1:2, 3; 2:7, 8). Ikatu jajerure Jehovápe ovendesi hag̃ua pe estudiántepe oñehaʼãhaguére oiporu umi mbaʼe oaprendéva. Upéva ikatu ohechauka pe estudiántepe iñimportanteha oiko ñandehegui peteĩ “ojapóva Ñandejára Ñeʼẽ heʼíva” (Sant. 1:22).
4. Mbaʼe venefísiopa ogueru avei ñañemboʼéramo peteĩ estúdio vívlikope oñepyrũ ha opa hag̃ua?
4 Heta mbaʼe porã jahupyty ñañemboʼéramo. Ñandejára ñanevendesi (Luc. 11:13). Ohechauka tuicha mbaʼeha pe estúdio jajapóva Ñandejára Ñeʼẽgui. Pe estudiánte ohendúvo mbaʼéichapa ñañemboʼe, oaprende mbaʼéichapa haʼe avei ikatu oñemboʼe (Luc. 6:40). Ha avei, umi ñemboʼe osẽva peteĩ korasõ iñandejararayhúvagui ha oguerohorýva umi kualida porãita Ñandejára oguerekóva, ikatu oipytyvõ pe estudiántepe oñepyrũ hag̃ua haʼe avei ohayhu Jehovápe.