Umi mbaʼe jaikuaaséva

◼ Ñañemboʼevaʼerãpa jajapóta vove estúdio vívliko ñande rapicha róga renondépe?

Heta mbaʼe porã ningo jahupyty ñañemboʼérõ oñepyrũ mboyve térã opa rire peteĩ estúdio. Ñañemboʼévo, jajerureñaína Jehovápe tañanepytyvõ ijespíritu sánto rupive (Luc. 11:13). Jajapóramo upéicha jahechaukáta ñane estudiántepe iñimportantetereiha pe estúdio, ha oikuaáta avei mbaʼéichapa oñemboʼevaʼerã (Luc. 6:40). Upévare ñañehaʼãvaʼerã ñañemboʼe jastudia ypy guive pe ogajárandi. Péro jaikuaaháicha káda situasión idiferénte, upéicha rupi ñanembaʼerechakuaavaʼerã jadesidi hag̃ua ñañemboʼétapa jajapo vove estúdio ñande rapicha róga renondépe.

Jadesidi hag̃ua ñañemboʼétapa jastudia mboyve, jahecha raẽ vaʼerã mbaʼépa oĩ ñande jerére. Oiméramo heta vésema jaha jastudia hag̃ua ñande rapichándi ha saʼi ojehasa upérupi, ikatu ñañemboʼe mbykymi oñepyrũ térã opávo káda estúdio. Péro ñañemboʼéramo peteĩ lugár ohasahárupi heta hénte ikatu ñamoñeñandu vai pe ostudiávape, upévare iporãvétante ñahaʼarõmiéramo. Tahaʼe haʼeháicha, ñanembaʼerechakuaavaʼerã jaikuaa hag̃ua arakaʼe guivépa ñañepyrũta ñañemboʼe jastudia mboyve ñande rapichándi (ehecha mbaʼépa heʼive Ñane Rembiapo Rréino Rehegua marzo 2005, páhina 4).