Jajapo estúdio vívliko oñakãrapuʼãva Párte 8:
Ñaipytyvõ ñane estudiántepe oikese hag̃ua Jehová organisasiónpe
1. Mbaʼérepa peteĩ estudiánte vívlikope iporã ñañeʼẽ káda semána peteĩ mbaʼére Jehová organisasióngui?
1 Jajapóvo peteĩ estúdio vívliko, nañamboʼéi ñane estudiántepe umi doktrína añónte. Ñaipytyvõse avei chupe oike hag̃ua pe kongregasión kristiánape (Zac. 8:23). Jajapo hag̃ua upéva, ikatu ñanepytyvõ pe folléto Los Testigos de Jehová: ¿quiénes son y qué creen? Ikatu remeʼẽ ne estudiántepe peteĩ folléto ha remokyreʼỹ chupe olee hag̃ua. Upe rire, ikatu káda semána reñeʼẽ mbykymi chupe pe estudiohápe peteĩ mbaʼére Jehová organisasióngui.
2. Mbaʼéichapa ikatu remokyreʼỹ pe estudiánte vívlikope oho hag̃ua rreunionhápe?
2 Rreunionkuéra kongregasionpegua. Peteĩ estudiánte vívliko oñepyrũta ohayhu Ñandejára organisasión oho meméramo rreunionhápe (1 Cor. 14:24, 25). Upévare iporãta reipytyvõramo chupe oikuaa hag̃ua mbaʼépa ojejapo umi rreunionhápe. Ikatu reñeʼẽ chupe káda semána peteĩ rreunióngui. Emombeʼu chupe mbaʼe témaguipa oñeñeʼẽta pe rreunión púvlika oúvape. Ehechauka chupe mbaʼe témapa ojestudiáta pe Estúdio de La Atalaya-pe ha Estúdio de Lívro de Kongregasiónpe. Emombeʼu chupe mbaʼépa ojejapo pe Eskuéla dél Ministério Teokrátikope, ha Rreunión de Servísiope. Reguereko jave pe eskuélape peteĩ asignasión, ikatúramo reñensajakuaa hendive. Emombeʼu chupe umi mbaʼe iñimportantevéva reaprendevaʼekue rreunionhápe. Eiporu umi taʼanga osẽva ñane puvlikasionkuérape ohecha porãve hag̃ua umi mbaʼe oaprendéva. Pe primer estúdio guive emokyreʼỹ chupe oho hag̃ua rreunionhápe.
3. Mbaʼe mbaʼépa ikatu ñamombeʼu Jehová organisasióngui?
3 Hiʼag̃ui vove pe Memoriál térã asambléa, ha oúta vove superintendénte de sirkuíto, emombeʼu chupe upe oikótava ha emokyreʼỹ chupe oho hag̃ua. Emombeʼu chupe rehóvo umi mbaʼe oikuaasétava: Mbaʼérepa ñande réra Testigos de Jehová? Mbaʼérepa pe rreunión ojejapohápe oñembohéra Salón del Reino? Mbaʼépa ojapo umi ansiáno ha siérvo ministeriál? Mbaʼéichapa ojejapo pe predikasión ha ojeporu umi território? Mbaʼéichapa ojejapo ñande literatúra? Mbaʼéichapa ojepaga umi gásto oguerekóva Jehová organisasión? Mbaʼépa ojapo pe sukursál ha pe Kuérpo Governánte omotenonde hag̃ua predikasión?
4, 5. Mbaʼéichapa umi vídeo jaguerekóva ikatu oipytyvõ ñane estudiántepe oikese hag̃ua Jehová organisasiónpe?
4 Umi vídeo oĩva ñanemboʼe hag̃ua. Umi vídeo rupive ñane estudiánte vívliko ikatu avei oikuaave pe organisasión porãite Jehová oguerekóva. Pe vídeo Hasta los cabos de la Tierra ohechauka pe predikasión mundiál jajapóva; Toda nuestra asociación de hermanos ohechauka mbaʼéichapa opárupi oĩ ñane ermanokuéra; ha Unidos gracias a la enseñanza divina ohechauka mbaʼéichapa Jehová siervokuéra ombaʼapo peteĩ ñeʼẽme. Peteĩ kuña, ojapómava cinco áño orresivihague oikóvo ñande rrevísta ha ñande literatúra, ipyʼarory ha hesaypa ohechávo pe vídeo Los testigos de Jehová... la organización tras el nombre. Haʼe ojeroviáma umi Testigo ovisitáva chupe rehe, ha koʼág̃a oñandu ikatumaha ojerovia Jehová organisasión rehe avei. Oñepyrũ ostudia ha una semána rire ohóma rreunionhápe Salón del Réinope.
5 Ñañeʼẽ mbykymíramo káda semána ñane estudiánte ndive ha jaiporúramo umi informasión jaguerekóva, ikatu mbegue mbeguépe ñaipytyvõ chupe oikese hag̃ua pe organisasión peteĩetépe oiporúva koʼág̃a Jehová.