Ñaipytyvõ ñande rapichápe oñevenefisia hag̃ua pe rreskátegui Jajapóta Conmemoración ko 12 de abril oúvape
1. Mbaʼéichapa Ñandejára siervokuéra ohechauka oguerohoryha Jesucristo sakrifísio?
1 ‘Jaagradese Ñandejárape, omeʼẽhaguére ñandéve hetave mbaʼe upe ikatúvagui ñamombeʼu!’ (2 Cor. 9:15, VP.) Ñande avei ñañeñandu upéicha jahechávo mbaʼéichapa, itaʼýra Jesucristo rupive, Ñandejára mborayhúpe imbaʼeporã ha ipyʼaporã isiervokuéra ndive. Jahechaukáta jaguerohoryha umi mbaʼe ñañembyatývo pe 12 de abril oúvape ñanemanduʼa hag̃ua Jesucristo sakrifísiore.
2. Mávapa ou jepi avei Conmemoracionhápe Jehová siervokuéra ndive, ha mbaʼépa ojapovaʼerã hikuái oñevenefisia hag̃ua pe rreskátegui?
2 Jehová siervokuéra ndive 10 millones tapichakuéra rupi, ndahaʼéiva testígo, oĩ jepi avei Conmemoracionhápe káda áño. Ojapóvo upéva, haʼekuéra ohechauka oguerohoryha pe sakrifísio ojapovaʼekue Jesucristo. Upéicharamo jepe, oñevenefisia hag̃ua pe rreskátegui haʼekuéra ojeroviavaʼerã hese (Juan 3:16, 36). Ha mbaʼéichapa ikatu ñaipytyvõ chupekuéra ojerovia hag̃ua pe rreskátere? Koʼág̃a, oñemoag̃uívo pe Conmemoración, ikatu ñamokyreʼỹ chupekuéra ostudia hag̃ua la Biblia ha oho hag̃ua rreunionhápe. Oĩ koʼã mbaʼe ikatúva jajapo.
3. Mbaʼéichapa ikatu ñamoñepyrũ peteĩ estúdio vívliko ñainvitávo peteĩ óga járape oho hag̃ua Conmemoracionhápe?
3 Estúdio vívliko. Reinvitávo peteĩ oikuaasevévape oho hag̃ua Conmemoracionhápe, ikatu remoñepyrũ hendive peteĩ estúdio vívliko reiporuhápe pe lívro Mbaʼépa omboʼe la Biblia? Ere chupe ikatuha pehesaʼỹijo “Cena del Señor: Pe manduʼa omombaʼeguasúva Ñandejárape”, oĩva páhina 206-208-pe, oikuaave hag̃ua pe Conmemoracióngui. Ikatu pehechapa pe informasión peteĩ térã mokõi visítape. Upéicha remoñepyrũkuaa peteĩ estúdio pe óga rokẽme. Pehechapávo upe informasión, ha remokyreʼỹramo chupe, pe óga jára ikatu ostudiase kapítulo 5, “Pe rreskáte: Pe rregálo iporãvéva omeʼẽva Ñandejára”. Rehecháramo pe estúdio osegitaha, ikatu pejevy ha pestudia umi cuatro kapítulo oĩva oñepyrũvo pe lívro.
4. Mávandipa ikatu ñamoñepyrũ peteĩ estúdio vívliko koʼág̃a hiʼag̃uívo pe Conmemoración?
4 Mávandipa ikatu ñamoñepyrũ peteĩ estúdio vívliko? Ne irũ nde travahohápe, térã nde eskuélape, térã ne vesíno ikatu ohechase nendive pe informasión. Peteĩ ermáno ikatu ojapo upéicha peteĩ ermána ména ndahaʼéiva testígo ndive. Ha aníkena nderesarái ne hentekuéra ndahaʼéiva testígogui. Oĩ avei umi oservimavaʼekue Jehovápe ha ndouvéiva rreunionhápe. Umívape espesialménte ñainvitase ou hag̃ua Conmemoraciónpe (Luc. 15:3-7). Ikatu ñañehaʼã ñaipytyvõ enterovépe oñevenefisia hag̃ua pe rreskátegui.
5. Mbaʼéichapa ikatu ñamokyreʼỹ ñane estudiántepe, ha ótro oikuaasevévape, oho hag̃ua ñane rreunionkuérape?
5 Rreunionkuéra. Heta estudiánte, ha ótro tapichakuéra oikuaasevéva, oho Conmemoracionhápe oho mboyve gueteri ótro rreuniónpe. Mbaʼéichapa ikatu ñaipytyvõ chupekuéra oñevenefisia hag̃ua avei umi ótro rreunióngui? Ñane Rembiapo Rréino Rehegua abril 2005-pe guare, páhina 8, heʼi mbaʼéichapa ikatu upéva jajapo: “Emombeʼu chupe mbaʼe témaguipa oñeñeʼẽta pe rreunión púvlika oúvape. Ehechauka chupe mbaʼe témapa ojestudiáta pe Estúdio de La Atalaya-pe ha Estúdio de Lívro de Kongregasiónpe. Emombeʼu chupe mbaʼépa ojejapo pe Eskuéla dél Ministério Teokrátikope, ha Rreunión de Servísiope. Reguereko jave pe eskuélape peteĩ asignasión, ikatúramo reñensajakuaa hendive. Emombeʼu chupe umi mbaʼe iñimportantevéva reaprendevaʼekue rreunionhápe. Eiporu umi taʼanga osẽva ñane puvlikasionkuérape ohecha porãve hag̃ua umi mbaʼe oaprendéva. Pe primer estúdio guive emokyreʼỹ chupe oho hag̃ua rreunionhápe”.
6. Mbaʼe mbaʼépa ikatu jajapo ñaipytyvõ hag̃ua umi tapicha ipyʼaporãvape oñevenefisia hag̃ua pe rreskátegui?
6 Umi tapicha ipyʼaporãva ostudiáva la Biblia ha oho meméva rreunionhápe oñakãrapuʼã pyaʼe jepi oservi hag̃ua Jehovápe. Upévare, ñamokyreʼỹkena ñande rapichakuérape ojapo hag̃ua umi mbaʼe, ikatu hag̃uáicha oñevenefisia pe Ñandejára jopói tuichavévagui: pe rreskáte.