Prográma ñane famíliape g̃uarã: Jastudia hag̃ua oñondivepa
1 Pe mborayhu peguerekóva Jehováre haʼe pe jopói tuichavéva ikatúva pemeʼẽ pene famíliape. Upéva ikatu pejapo ‘peguapy jave pende rógape’ pestudia hag̃ua oñondive Ñandejára Ñeʼẽ káda semána (Deu. 6:5-7). Reime reimeháicha: ne ména térã ne rembireko oservíramo Jehovápe, térã nahániriramo, reiméramo neaño nde raʼy térã ne membykuéra ndive, opáichante ndete ikatu reipytyvõ ne famíliape oñemoag̃ui hag̃ua nderehe ha Jehová rehe peguereko meme rupi peteĩ estúdio oñondive.
2 Emoñepyrũ hag̃ua pe estúdio. Reñehaʼã raẽ vaʼerã ne família ojepokuaa pe estúdio peguerekóva oñondivepa rehe. Ndereikuaáiramo arakaʼetépa ikatúta pejapo pe estúdio, iporãta peñemongetáramo upévare oñondivepa (Pro. 15:22). Reguerekóramo mitã michĩva gueteri, ikatu osẽ porãve pestudiáramo mbyky mimínte ha pyʼỹive. Rehechavaʼerã mbaʼépa oiko porãvéta nde rogapýpe g̃uarã. Pehai pene prográmape arakaʼépa pestudiáta oñondive, ha peñehaʼã pejapo katuete pene prográmape oĩháicha.
3 Mbaʼépa ikatu pestudia? Oĩ família ojepreparáva pe Estúdio de Lívro de Kongregasiónpe g̃uarã, térã Estúdio de La Atalaya-pe g̃uarã. Oĩ katu ostudiáva umi informasión osẽva mitãrusukuérape g̃uarã. Peteĩ túva, oguerekóva peteĩ mitãkuimbaʼe ha peteĩ mitãkuña, heʼi: “Ore estúdio aja roiporu jepi Mi libro de historias bíblicas rojapo hag̃ua presentasión peteĩ dramapeguáicha. Upéva ohaʼarõgui, che raʼykuéra omombaʼeterei pe estúdio rojapóva káda semána. Ontende porãve ha omombaʼeve hikuái pe rostudiáva, ha upéva iñimportanteve rojepyʼapy rangue mboy párrafopa rostudiáta”.
4 Ojestudiavaʼerã káda semána. Pe estúdio oguerekóva ne família ojejapovaʼerã káda semána, ha opavave vyʼápe ohaʼarõsevaʼerã. Pe estúdio día térã óra ikatuvaʼerã sapyʼánte oñemomyiʼimi, ikatu hag̃uáicha oñeñatende umi mbaʼe oikóva oñehaʼarõʼỹre. Sapyʼánte tekotevẽ avei oñekambia pe ojestudiátava. Umi kámbio ojejapóva katu sapyʼami g̃uarãnte vaʼerã, ani hag̃ua oñesẽ are pe prográmagui. Peteĩ ógape, peteĩ mitãkuña heʼi: “Oñekambia vove ore estudio óra, che ru omoĩ ore eladéra rokẽre peteĩ kuatiápe mbaʼe órapa rostudiáta, enterove oikuaa hag̃uáicha”. Ajépa ñamombaʼe chupekuéra oñehaʼãhaguére upéicha oguereko hag̃ua pe estúdio káda semána! Remongakuaa aja upéicha ne famíliape “Jehová ñanemboʼeháicha, ha oipotaháicha ñahekomboʼe pe ñane akãme jaguerekóva”, rehechaukareína rehayhuha chupekuéra ha ñande Ru Jehovápe avei (Efe. 6:4).