Prográma ñane famíliape g̃uarã: Téysto káda diagua
1 Tuvakuéra ohayhúva ifamíliape oñehaʼãmbaite omoĩ hag̃ua chupekuéra káda día tembiʼu iporãva. Upevére, iñimportanteve oñemeʼẽ chupekuéra pe tembiʼu espirituál iporãva, oúva Ñandejára Ñeʼẽgui (Mat. 4:4). Peipytyvõ hag̃ua pene famíliape okaruse ha hesãi hag̃ua espiritualménte, ‘okakuaa ha ojesalva hag̃uáicha’, iporãta pemboykéramo tiémpo káda día pehecha hag̃ua oñondivepa pe téysto káda diagua ha ikomentário (1 Ped. 2:2). Moõpa ikatu remohenda upéva ne família prográmape?
2 Ojekaru jave. Pehecháramo pe téysto káda pyharevete, peipytyvõta pene famíliape imanduʼa hag̃ua Jehováre pe ára pukukue (Sal. 16:8). Peteĩ sy, oñehaʼã olee ha oñemongeta imemby ndive pe téysto ha ikomentáriogui, imemby orambosa aja oho mboyve eskuélape, ha upéi oñemboʼe hikuái. Upéva oipytyvõ imembýpe ombohovái porã hag̃ua eskuélape pe nasionalísmo ha inmoralida, ha omombarete chupe oñeʼẽ hag̃ua Ñandejára Ñeʼẽgui iñirũnguéra ha imboʼeharakuéra ndive. Ndaipóriramo jepe ótro testígo pe eskuélape, haʼe noñeñandúiva haʼeño.
3 Ndaikatúiramo pehecha pe téysto pyhareve oñondivepa, ikatu pejapo upéva upe rireve. Ikatu opyta porãve peẽme asajekue pekaru aja. Oĩ família omombeʼúva avei umi eysperiénsia oguerekovaʼekue predikasionhápe, ha umi mbaʼe ombopyʼaroryvaʼekue chupekuéra oleévo hikuái la Biblia haʼeño. Heta oĩ torýpe imanduʼáva pe oĩramo guare hikuái mesa jerére karu órape, ha pe ovyʼáramo guare ifamília ndive oñondivepa.
4 Pyhare. Heta famíliape opyta porãve pyhare ohecha hag̃ua oñondivepa pe téysto káda diagua, oke mboyve hikuái. Upépe ikatu opyta porã avei oñemboʼe hag̃ua hikuái oñondivepa. Pene mitãnguéra ohendúramo peñeʼẽha Jehovágui káda día ha peñemboʼeha ichupe, Jehová haʼéta chupekuéra g̃uarã peteĩ persóna añetetéva.
5 Jehová tapenevendesi peñehaʼãvo pemoĩ Ñandejára Ñeʼẽ pene família korasõme, peiporu porã aja ñande folléto Examinando las Escrituras diariamente.