Jajapo estúdio vívliko oñakãrapuʼãva Párte 11:
Ñaipytyvõ ñane estudiántepe ojapo hag̃ua rrevisíta
1 Peteĩ estudiánte osẽ vove opredika ojuhúta umi tapicha oikuaasevéva pe marandu porãgui. Mbaʼéichapa ikatu ñaipytyvõ pe puvlikadór pyahúpe ojapo hag̃ua rrevisíta iporãva ha omongakuaa hag̃ua pe interés otopáva?
2 Peteĩ rrevisíta ojejapo hag̃ua oñembohapevaʼerã pe primera visítape. Emokyreʼỹ ne estudiántepe oipytyvõse hag̃ua pe óga járape (Fili. 2:4). Emboʼe chupe rehóvo oikuaa hag̃ua mbaʼéichapa ikatu omokyreʼỹ pe óga járape heʼi hag̃ua pe opensáva, ohendukuaa hag̃ua pe óga jára oñeʼẽvo, ha ohechakuaa hag̃ua mbaʼépa oipyʼapy chupe oñeʼẽ hag̃ua upévagui. Otopa vove peteĩ tapicha oikuaasevévape, eheja tohai umi mbaʼe oikotevẽtava. Eiporu upéva peprepara hag̃ua peteĩ téma peñemongeta hag̃ua peho jey vove.
3 Japrepara hendive oho jey hag̃ua. Peñemongeta pe primera visítare, ha ehechauka pe estudiántepe mbaʼéichapa ikatu oiporavo peteĩ téma pe óga jára ikatúva ohenduse (1 Cor. 9:19-23). Peprepara oñondive peteĩ presentasión peiporuhápe peteĩ téysto vívliko ha peteĩ párrafo pe puvlikasión oiporútavagui. Peprepara avei peteĩ mbaʼe oporandútava omohuʼãvo pe visíta, ojapo hag̃uáicha tape oho jey hag̃ua. Emboʼe pe puvlikadór pyahúpe oikuaa hag̃ua mbaʼéichapa ikatu oipytyvõ pe óga járape oikuaave hag̃ua Ñandejára Ñeʼẽgui káda visíta ojapóvape.
4 Peprepara pe estudiánte ndive peteĩ introduksión ndahasýiva. Omomaitei rire pe óga járape ikatu heʼi: “Ñañemongeta porãiterei kuri akokuehe, ha aju jey koʼág̃a ahechaukave hag̃ua ndéve mbaʼépa heʼi la Biblia pe [téma reñeʼẽtava rehe]”. Iporãta avei rehechaukáramo chupe mbaʼépa ikatu heʼi osẽramo peteĩ tapicha ndahaʼéiva pe óga jára oñemongeta ypy hague.
5 Ñaipytyvõ kyreʼỹme. Eipytyvõ ne estudiántepe oho jey hag̃ua pyaʼe porã ovisita opavave oikuaasevévape. Sapyʼánte tekotevẽ jaha jey jey jatopa hag̃ua hógape peteĩ tapichápe. Ere chupe iporãtaha oporandúramo pe óga járape arakaʼépa ikatúta oho jey, ha eipytyvõ chupe ohecha hag̃ua mbaʼérepa iñimportánte ojeho jey pe ojeʼehaguéicha (Mat. 5:37). Eipytyvõ pe puvlikadór pyahúpe hory hag̃ua, imbaʼerechakuaa hag̃ua, ha opororrespeta hag̃ua ohekávo umi ‘ovecha’, ha omongakuaávo pe interés oguerekóva hikuái (Tito 3:2).