Jajapo estúdio vívliko oñakãrapuʼãva Párte 10:
Ñamboʼe ñane estudiántepe opredikakuaa hag̃ua opa ogaha rupi
1 Umi ansiáno heʼi rire peteĩ estudiántegui ikatumaha oiko peteĩ puvlikadór, pe estudiánte ikatúma osẽ opredika kongregasión ndive (Ehecha Organizados para hacer la voluntad de Jehová, páhina 79-81). Mbaʼéichapa ikatu ñaipytyvõ pe estudiántepe oñepyrũ hag̃ua opredika ogaha rupi?
2 Japrepara hendive. Ndaipóri iñimportantevéva pe preparasióngui. Ehechauka pe estudiántepe umi presentasión osẽva Ñane Rembiapo Rréino Rehegua-pe ha lívro Razonamiento-pe, ha eipytyvõ chupe oiporavo hag̃ua peteĩ ndahasýiva, ikatútava oiporu porã nde territóriope. Osẽ ñepyrũ guive, emokyreʼỹ chupe oiporu hag̃ua la Biblia opredika jave (2 Tim. 4:2).
3 Umi ensájo pejapóva tuicha oipytyvõta pe puvlikadór pyahúpe. Oñensaja vove, ehechauka chupe avei mbaʼéichapa ikatu okontesta pyʼaguapy porãme umi ñembohovái ojeporuvéva nde territóriope (Col. 4:6). Ehechauka chupe natekotevẽiha peteĩ puvlikadór oikuaapaite katuete mbaʼépa heʼíta umi óga jára oporandúvape. Iporãve jepi jaʼéramo pe óga járape jahekavetaha informasión upe oporandúvagui ha jaju jeytaha ñañemongetave hag̃ua hendive (Pro. 15:28).
4 Japredika hendive. Osẽ ypy vove predikasionhápe ogaha rupi, ejapo nde raẽ pe presentasión pepreparavaʼekue oñondive, ha haʼe ikatu ohendu. Upéi eipytyvõ chupe oñeʼẽ mbykymi hag̃ua nendive pe óga járape. Sapyʼánte iporãve pe puvlikadór pyahu oñeʼẽ mbykymínteramo ñepyrũrã. Ikatu olee ha oñeʼẽʼimi peteĩ téysto vívlikogui. Reikuaavaʼerã mbaʼéichapa haʼe ikatu oñeñandu ha mbaʼe pevépa ikatúta ojapo (Fili. 4:5). Pyʼỹinte emoporã pe ojapóva remboʼe aja chupe opa mbaʼe opredikakuaa hag̃ua.
5 Iñimportánte reipytyvõ peteĩ puvlikadór pyahúpe ojepokuaa hag̃ua osẽ meme predikasionhápe, káda semána ikatúramo (Fili. 3:16). Pehecha oñondive arakaʼépa pesẽta jepi pepredika, ha emokyreʼỹ chupe opredika hag̃ua avei umi puvlikadór ikatupyrýva ndive. Pe ehémplo omoĩva hikuái ha ojeheʼa meméramo hendivekuéra oipytyvõta chupe ikatupyryve hag̃ua, ha ovyʼa hag̃ua osẽ jave opredika ogaha rupi.