Ñañehaʼã japredika opavavépe ñande territóriope
1. Mbaʼépa ojapo umi kristiáno ypykue oñehaʼãvo omog̃uahẽ opavavépe ko marandu porã?
1 Jesús disipulokuéra ypykue oñehaʼãmbaitevaʼekue omosarambi hag̃ua ko marandu Rréino rehegua. Ojapo ikatúva guive omog̃uahẽ hag̃ua hikuái opavavépe ko marandu. Umi kristiáno ohaivaʼekue la Biblia Ñandejára espíritu rupive, oiporu pe griégo komún, pe idióma oñeñeʼẽvaʼekue opárupi pe Imperio Románope. Avei, pe segundo ha tercer síglope, umi predikadór kyreʼỹ omotenonde pe códice (lívro joguaha) jeporu. Peteĩ códice-pe ndahasyive ojeheka hag̃ua peteĩ téysto, ojeporu rangue umi rróllo.
2, 3. (a) Mbaʼéichapa oñekumplihína koʼág̃a Isaías 60:16? (b) Mbaʼéichapa ojeporu pe teknolohía oñemosarambive hag̃ua pe adorasión añetegua?
2 Ojeporu pe teknolohía. Pe proféta Isaías rupive, Jehová heʼi: “Nde rekambúta tetãnguéra kambýgui” (Isa. 60:16). Pe profesía oñekumplihína koʼág̃a. Jehová siervokuéra oiporu umi mbaʼe oguerekóva tetãnguéra ikatu hag̃uáicha ojepredika oparupiete. Pór ehémplo, 1914-pe, ojeporu heta mboyve gueteri pe cine, Jehová siervokuéra ojapo ha ohechauka pe “Foto-Drama de la Creación”. Upéva ipuku ocho óra, oguereko taʼanga ryrýi, fóto ikolórva ha ipu avei, ha ojeporu ojepredika hag̃ua heta millón tapichakuérape.
3 Koʼág̃a Ñandejára puévlo oiporu umi imprénta pyahu ipyaʼetereíva, ha komputadóra, ojejapo hag̃ua heta idiómape la Biblia ha umi lívro omboʼéva ichugui. Umi mbaʼyru guasu ogueraha umi lívro mombyryvehápe, ha ojehupytýma 235 tetã. Jehová, ijespíritu rupive, omomýi isiervokuérape oiporu porã hag̃ua pe teknolohía oñemog̃uahẽ hag̃ua hetaitereive tapichápe pe añetegua omboʼéva Ñandejára Ñeʼẽ, ojejapoʼỹhaguéicha gueteri koʼág̃a peve.
4. Mbaʼe kámbiopa heta ojapo ikatu hag̃uáicha hetavépe ogueraha ko marandu porã?
4 Mbaʼépa ikatu ñande jajapo. Heta Jehová siervokuéra ojapose ikatúva guive ogueraha hag̃ua hetave tapichápe ko marandu porã. Oĩ heta ojapóva kámbio saʼive hag̃ua umi mbaʼe oguerekóva, ikatu hag̃uáicha opredika hetave. Oĩ katu umi ováva ojepredika saʼivehápe oipytyvõ hag̃ua upépe. Oĩ avei umi ostudiáva ótro idióma ikatu hag̃uáicha opredika umi oñeʼẽva pe idiómape.
5, 6. Mbaʼépa ikatu jajapo ñañehaʼã hag̃ua jahupyty opavave tapichakuérape ñande territóriope?
5 Ikatu avei hetavépe ñamog̃uahẽ ko marandu porã japredikáramo ogaha rupi oĩ jave óga jarakuéra, ha jaháramo oĩháme tapichakuéra. Nde territóriope ndaikatúiramo ojejuhu heta óga járape arakuépe, ikatúnepa resẽ kaʼaruete térã pytũmby jave? Oĩpa avei nde territóriope umi lugár oĩháme heta hénte, ikatuhápe ojepredika? Reiporúmapa teléfono repredika hag̃ua ha resẽmapa negosioha rupi? Reñehaʼãpa reñeʼẽ oimehápe?
6 Ajépa javyʼaite ikatuhaguére ñande avei jajapo ko predikasión tuichaite koʼag̃agua, ojekuaave hag̃ua Ñandejára réra ha Irréino! Ñañehaʼã katu ñamombeʼu jahávo opavave tapichakuérape umi mbaʼe añetegua Ñandejára Ñeʼẽgui, omeʼẽtava tekove (Mat. 28:19, 20).