Jajapókena ‘opa mbaʼe pe marandu porã rehehápe’
1. Mbaʼérepa ñañehaʼãmbaitevaʼerã ñamombeʼu opavavépe pe marandu porã?
1 Apóstol Pablo ohechakuaavaʼekue tekotevẽtereiha omombeʼu opavavépe pe marandu porã, oikuaágui upéicha ikatuha ohupyty hikuái jeikove opaveʼỹva (1 Cor. 9:16, 19, 23). Ha ñande avei jajepyʼapýgui ñande rapicháre ñañehaʼãmbaitevaʼerã ñamombeʼu opavavépe pe marandu porã.
2. Mbaʼépa ikatu jajapo japredikave hag̃ua ha mbaʼérepa?
2 Mbaʼe óra ha moõpa opyta porãvéta. Umi peskadór ikatupyrýva ndopoíri ipinda térã irréd opyta porãvehápe chupekuéra, omombo guei oĩvehápe pira. Péicha avei ñande ndajapredikaivaʼerã opyta porãveha órante ñandéve, upéva rangue ñamombeʼuvaʼerã opárupi pe marandu porã ha upéicha ñambyatýta “opaichagua pira” (Mat. 4:19; 13:47). Pór ehémplo ikatu ñasẽ kaʼaru pytũ térã pyharevete japredika hag̃ua kállepe. Pablo ojapo haguéicha ñamoherakuãvaʼerã ‘Ñandejára marandu porã hekoitépe’ (Hech. 17:17; 20:20, 24).
3, 4. Mbaʼépa ikatu jaʼe pe marandu porã ogustave hag̃ua ñande rapichápe? Ha mbaʼépa jahupytýta jajapóramo upéicha?
3 Mbaʼépa ikatu jaʼe. Peteĩ peskadór ningo ohecha mbaʼeichagua karnádapa iporãve oikutu hag̃ua pe pira haʼe oipotáva. Ikatu ñambojoja upéva ñane rembiapóre. Pór ehémplo, mbaʼépa ikatu jaʼe pe marandu porã ogustave hag̃ua ñande rapichápe? Ñepyrũrã ikatu ñañemongeta hendive peteĩ mbaʼe oipyʼapývare enterovépe ha upe rire jajapysaka porã hese (Sant. 1:19). Ñaporandukuaa chupe mbaʼépa haʼe opensa upe mbaʼe rehe (Pro. 20:5). Ha upe rire ñandéma jahechakuaáta mbaʼépa jaʼéta chupe. Apóstol Pablo ningo ojapovaʼekue opa mbaʼe omog̃uahẽ hag̃ua pe marandu porã hapichápe (1 Cor. 9:22). Upéva heʼise haʼe oikuaa hague mbaʼéichapa oñeʼẽta chupekuéra, ikatu hag̃uáicha pe marandu porã opoko ikorasõre.
4 Javyʼaiterei ningo ñamombeʼúvo opavavépe koʼẽrõitéma ‘ñasẽtaha jejopy vaígui’ (Isa. 52:7). Upévare jajapókena ‘opa mbaʼe pe marandu porã rehehápe’ (1 Cor. 9:23).