Jahechauka jajepyʼapyha ñande rapicháre: Ñañeʼẽ rupive oñekotevẽháicha
1 Pe apóstol Pablo omoĩ ñandéve peteĩ ehémplo iporãva oiporúvo umi mbaʼe hapichakuéra ohasavaʼekue ha umi mbaʼe opensáva oñeʼẽ hag̃ua oñekotevẽháicha pe marandu porãgui (1 Cor. 9:19-23). Ñande ñañehaʼãvaʼerã jajapo upéicha avei. Jajepreparáramo, jaiporúta umi presentasión osẽva Ñane Rembiapo Rréino Reheguápe ou porã hag̃uáicha ñande territóriope. Ñag̃uahẽvo peteĩ ógape ikatu jahecha umi mbaʼe ohechaukáva mbaʼépa ointeresave pe óga járape, ha jaiporúta umíva ñañeʼẽ hag̃ua. Péro ñañeʼẽ hag̃ua oñekotevẽháicha ñande territóriope, oĩve umi mbaʼe ikatúva jajapo.
2 Jaiporu pe óga jára heʼíva. Ñañeʼẽ jave pe marandu porãgui, pyʼỹinte ñaporandu jepi pe óga járape ha ñamokyreʼỹ chupe ombohovái hag̃ua. Ha mbaʼépa jajapo pe oñeʼẽ rire? Nañapenaguasúipa pe heʼívare ha jasegíntepa ñañeʼẽ pe japreparahaguéicha? Térãpa ohechauka umi jaʼéva jaiporuhañaína pe óga jára heʼivaʼekue? Ñañeinteresáramo pe heʼívare, ikatu ñaporanduve chupe umi mbaʼe ohechaukátava mbaʼépa opensa (Prov. 20:5). Upéicha ikatúta jahechauka pe óga járape umi mbaʼe oikuaasevéva pe marandu porãgui.
3 Upearã, jaguerekóramo jepe pe japreparavaʼekue, ikatuvaʼerã ñañeʼẽ pe óga jára ndive pe haʼe oikuaasévagui. Ñañepyrũramo jaiporu peteĩ mbaʼe osẽvaʼekue peteĩ diáriope, ha pe óga jára oñeʼẽramo ñandéve peteĩ mbaʼe pe hóga jerére oikovaʼekuégui, térã peteĩ mbaʼe ichupe oipyʼapývagui, ñañeinteresáramo hese añetehápe, jaiporúta Ñandejára Ñeʼẽ ñañemongeta hag̃ua pe ichupe oipyʼapyvévagui (Fili. 2:4).
4 Jaiporavo pe jaʼétava. Peteĩ óga jára oporandúramo peteĩ mbaʼe ndaikatumoʼãiva ñambohovái porã, ikatu jaʼe chupe jahekavetaha informasión upe oikuaasévagui ha jaju jeytaha ñañemongeta hendive. Ikatu avei ñaikuaveʼẽ chupe peteĩ puvlikasión oñeʼẽvéva pe oikuaasévagui. Jajapóramo koʼã mbaʼe jahechauka ñaipytyvõ porãseha ñande rapichápe oikuaa hag̃ua Jehovápe (2 Cor. 2:17).