Jahechauka jajepyʼapyha ñande rapicháre: Jajeprepara porã rupive
1 Jajeprepara porãramo ñasẽ hag̃ua japredika, ikatuvéta jahechauka jajepyʼapyha ñande rapicháre. Mbaʼérepa jaʼe upéva? Pórke jajeprepara porãramo saʼive jajepyʼapy pe jaʼétavare, ha ikatu ñañatendeve pe óga járare. Ñanepytyvõ avei ñañeʼẽ hag̃ua ñande pyʼaite guive, ha ani hag̃ua ñande pyʼaperere. Upévare, mbaʼéichapa ikatu japrepara peteĩ presentasión osẽ porã hag̃uáicha?
2 Eiporu peteĩ presentasión ou porãtava nde territóriope. Ñane Rembiapo Rréino Rehegua enero 2006-gui, eiporavo umi presentasión iporãva ha ehecha mbaʼéichapa ikatu rejapo umíva ne ñeʼẽtéme. Emohenda reiporu porã hag̃uáicha nde territóriope. Ñamoĩ chupe pe repredikataha rupi oĩha heta tapicha peteĩ rrelihionpegua. Remohendáramo ne presentasión umi óga jára ohenduse hag̃uáicha rehechaukareína rejepyʼapy añeteha hesekuéra (1 Cor. 9:22).
3 Ehecha mbaʼéichapa ikatu rejapo porãve ne presentasión. Upe eréva reñepyrũ hag̃ua iñimportánte. Upévare eñatende mbaʼéichapa opoko umi óga járare pe ere ñepyrũva. Ohendusépa hikuái? Reporandúramo peteĩ mbaʼe, oñeʼẽpa ndéve hikuái? Ndaupéichairamo, eheka mbaʼéichapa ikatúta rejapo porãve.
4 Mbaʼépa nepytyvõta nemanduʼa hag̃ua. Oĩ heta heʼíva hasyha chupekuéra imanduʼapa hag̃ua pe heʼisévare og̃uahẽvo pe ógape. Upéva ojehúramo ndéve, reñensajámapa ótro ndive pe presentasión reñeʼẽrõguáicha peteĩ óga járape? Upéva ikatu nepytyvõ opyta porãve hag̃ua ne akãme pe erétava. Ha upéi hesakã ha oñentende porãvéta ne presentasión. Nepytyvõta avei reikuaa hag̃ua mbaʼépa eréta umi óga járape oñeʼẽve jave hikuái.
5 Nemanduʼa hag̃ua, ikatu avei rehai peteĩ kuatiaʼípe umi mbaʼe iñimportantevéva ha remaʼẽ pyaʼe porã hese reg̃uahẽ mboyve peteĩ ógape. Oĩ puvlikadór otopáva upéva oipytyvõha chupekuéra ani hag̃ua ojepyʼapy ha upévare ikatu oñemongeta porãve pe ogaha rupi. Jajapóramo koʼã mbaʼe ñandekatupyryvéta ñañeʼẽ hag̃ua pe marandu porãgui, ha jahechaukavéta jajepyʼapyha ñande rapicháre.